طلة ثورة
طلة ثورة
شعر: بهاء الدين السنهوري
(النص)
——–
مالك لو هسع جيتي زمان
حتحت شجرك وجع الحاضر
شهقت بينا الذكرى
واخضوضر فينا نشيدك
مالك لو هسع جيتي زمان
كميات من شوق وحنين
مني عليك انكشحت
غرقت دنيا بحالها
وشهد الكون أني بريدك
زخة مطرة
وحنا ليك بالكوم يا أنبل ثورة
وارف طلاتك صحا غناي
بالحلم الحاضن نسمة عيدك
بحلم بكرة يعدي علينا فرح ضحاك
وهتاف مشحون بي ريدك
مالك لو هسع جيتي زمان
شان تضحك تاني عيون الفجر الانضر
مرة هديلك مطر في اكتوبر
غنى هزارك فوق ابريل ومعاك بتذكر
همت شمسك تشرق ذات سبتمبر
الا غيابك طال بالشوق والهم
ودروب الرجعة أبت ما تجيبك
مالك لو هسع جيتي زمان
طلة ثورة وأجمل فكرة
تضوي مدن احزانا شموسك
يصدح بينا صباحك لينا يعيدك
أطفال الشارع واللمات
والجايين وكم غنوات كم زهرات
راجين طلاتك بكرة
مابين ضحكة وضحكة وهمس قصيدك
مالك لو هسع جيتي زمان
مالك لو هسع جيتي زمان
حتحت شجرك وجع الحاضر
شهقت بينا الذكرى
واخضوضر فينا نشيدك
/::::::::::////::::::::::::::/
شعر: بهاء الدين السنهوري
11/ديسمبر/2014م
قصيدة رائعة .. ومنتظرين طلة ثورة قريبا لتحرق هؤلاء الكيزان الذين طغوا وتجبروا على هذا الشعب الكريم ..
هذه الأرض الطيبة لن تخرج إلا زرعاً طيباً ، إن شاء الله ولتحرق الأشواك والأعشاب الطفيلية إلى الأبد.