المقالات
السياسة
ارشيف مقالات سياسية

07-11-2011 03:53 PM

كيف نبكيك يا جنوب دون أن نبكي الشمال

عبد الله الأمين أبو إيقان
abueegan@yahoo.com

كيف نبكيك يا جنوب
دون أن نبكي الشمال؟؟
نبكي سودانا العزيز
الصار محطم وحالو حال
سودانا محبوس من زمان
في الكوارث والهوان
خطفوهو من عشرين سنة
ساموهو أصناف العـنا
والمصائب والكروب
كيف بنبكيك يا جنوب
من دون أن نبكي الشمال؟؟
سودانا كان أطيب وطن
سودانا كان أوسع وطن
واحد موحد ومؤتمن
مقرن النيلين عناقـو
وانسجام النيل وفاقـو
والأصالة الطيبة والإلفة
من حلفا لي نمولي
ومن نمولي لي حلفا
مليون فرح ممدود
مع خضرة الضفة
مليون أمل ممدود
في حضنو ندفى
إلا جوهو المجرمين
الأبالسة الخائنين
المتاجرين بالقيم
لا ضمائر لا فهم
بس نفوس مليانة شر
قالوا نحكم بالشطارة
استخدموا الإسلام تجارة
لا فيهم أخلاق لا كياسة
اخضعـوا الدين للسياسة
جونا من تنظيم دخيل
ما من البلد الأصيل
ما من الوطن النبيل
ما شموا ريحة طين جروفو
أو سمعوا مرة غنا السواقي
ما كتبوا للأطفال حروفو
أو مسحوا يوم دمع المآقي
قفزو في يوما كئيب
نشروا الحرائق واللهيب
بالكذب والاحتيال
والجهالة مع الضلال
بالحقد والسوء والخبل
قتلوا البشائر والأمل
قفزو في ليلا حزين
دمروا البلد الأمين
ساموهو أصناف الفتن
والمصائب والأحن
أشعلوا حرب الجنوب
أحرقوا القرى والدروب
كم بدلوا الآمال كروب
وقالوا دا الإسلام جهاد
نشروا الأذية على العباد
في كل بيت حصل الحداد
سموهو قالوا عرس شهيد
أصلو ما فيهم رشيد
وكلما تقيف الحرب
يقعوا في الثروات نهب
ومستمرين في الكذب
وبعدما حرقوا الجنوب
لا خلوا قش لا خلوا طوب
شافـوا دارفـور في أمان
نساء وأطفال في أمان
عايشة بالحب والحنان
والتمرد ما هناك
لا في البيوت لا في الطريق
التمرد في الجبال
وجهوا ليها الحريق
وجهوا ليها النبال
قـتـل وجرائم واغتصاب
نشروا الحرائق والخراب
ولسا ما فضُّوا الجراب
مستمرين في الخراب
مستمرين في الحرب
ومستمرين في الكذب
وبرضو في الثروات نهب
ودوا لي كجبار شوية
من المصائب والأذية
في شمالنا وفي الشرق
برضو ما كفوا الحرق
رجعوا أبيي بي احتيال
هجوم وتشريد واحتلال
وبعد كل الصار وكان
هاجموا جنوب كردفان
نشروا المحارق والهوان
ما خلوا في السودان مكان
وبالجبايات والنهب
والأباطيل والكذب
ما خلوا زول ما مكتئب
دمروا الفرح الجميل
أفقروا الشعـب الأصيل
لا خلوا حب لا خلوا نيل
ثم فصلوك يا جنوب
قالوا درت الانفصال
كذب وتضليل واحتيال
لولا أذاهم فاق احتمال
ما كنت درت الانفصال
كيف حا نبكيك يا جنوب
دون أن نبكي الشمال

عبد الله الأمين أبو إيقان


تعليقات 2 | إهداء 0 | زيارات 700

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#177583 [طارق باشا ]
0.00/5 (0 صوت)

07-13-2011 11:42 AM
وطني حزنا عليك اقمته ;( ;( ;( ;( ;( ;( ;( ;( ;( ;(


#176711 [سودانى طافش]
0.00/5 (0 صوت)

07-12-2011 04:03 AM
العنوان فقط يكفى .. فلقد إحتوي كل المعانى وإخنصر كل المآسي !
( كيف نبكبك ياجنوب دون أن نبكي الشمال ) !
( من أين أتي هؤلاء ) !


عبد الله الأمين أبو إيقان
مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة