المقالات
السياسة
ارشيف مقالات سياسية
نضرب خدرة بي كاتولة نتمها موية بي دغلوبة
نضرب خدرة بي كاتولة نتمها موية بي دغلوبة
07-23-2011 03:40 PM

بشفافية

نضرب خدرة بي كاتولة نتمها موية بي دغلوبة

لسان الحال يغني عن أي مقال كما تقول الحكمة فكل شيء واضح وظاهر بل ومعاش لا يحتاج إلى تعريف اللهم الا اذا كان من العصبة اولي البأس او الزمرة المحظية فالماء مطين ومتنيل بستين نيلة هذا ان وجد والاسعار نار وفي كل يوم هي في شان تمارس القفز بالزانة في تناسب عكسي مع المداخيل المتناقصة والحالة المتباقصة وليس من عايش وكابد وعانى كمن حكى وكتب فالمكتوي بهذا السعير في غنى عن من يصفه له والعارف لا يعرف ولهذا نتيح الفرصة لشاعر حلمنتيشي عثرت على قصيدته المعبرة هذه بين بعض اوراقي القديمة لعله المتجهجه الاممي او المستعرب الخلوي او المتجبجب الودكي او جاغوم بن بلاع او الجحيح بن احيحة ولكنه ليس حساس محمد حساس فقد تأكدت انه ليس هو وليعذرني شاعرها لسقوط اسمه عن النص الذي احتفظ به وقد تذكرت هذه القصيدة بعد ان «قرطعت» مضطرا كوزا من موية بي دغلوبة نسأل الله أن يكفنا شرها .....
زي ما انتو يا الحلوين خالين بال ومرتاحين
تاكلو رغيف
كلو خفيف
وكلو ظريف
انحنا هناك كمان عايشين ..!!
نضرب خدرة بى كاتوله
نتمها موية بى دغلوبه
ناكل لوبا
بليلة فريك.. تخلى الزول يقيف انبوبة
تستفو تب.. تبرشمو تب
توقعو رب
وتبقى انفاسو فيها صعوبة
وبرضو «استل- still »نكون عايشين
*****
وزى ما انتو يا الحلوين
فى الدور والقصور ساكنين
هناك الناس كمان ساكنين
ما فى فيلا... فى راكوبة
بى شوك الكتر مزروبة
وفى حر الهجير منصوبة
بابها حصير وعادمه سرير
والسوسيو وقع فى الزير
والخمارة ليها هدير
ابوك بى غادى ليهو شخير
وكان زرتوها يا الحلوين
بدل ريفدور تشمو لعوت
وتلقوا هناك طقم بنوت
دى شافعة صغيرة ميرودة
وناشفة تقول كراع شرموط
تشوفها تقول دى هسه تموت
واريتها تموت
اصلو الناس كتير بتموت
وديك بي غادى تتدخن
وواحدة كمان بتتحنن
وشوف السمحة ديك مخطوبة
قاعدة تفلى فى حبوبة
وتلقى الحاجة بى قرقوبها
قاعدة هناك تهز فى روبها
وشافع لونو زى الطوبة
فى نص راسو قامت قوبة
شايفو هناك بيقلب الهوبة
فى دكة بعر مكبوبة
وبرضو «استل- still» نكون عايشين
*****
وزى ما انتو يا الحلوين
اساميكم تدقر العين
ديك ياسمين وداك نزار
وديك سوزان وداك عمار
وداك امجد وديك ازهار
انحنا هناك اسامينا كتار
اخوك حيمروك وود جانكوك
وابوك قجة.. واخوك عوجة
واب قرجة.. واب عنجة
والهبرب وود عقرب وود العب
والبلى وابوى قنطور
وود كابور.. وجبر السيد
وعوض الجيد وود حقار
وجبر الدار.. والشعار وسعدية
اسامى كتيرة منسية
اصلكم انتو يا الحلوين
اكلتو حقوقنا زندية
وطرتو هناك سهيتو
مع النفحة الاوروبية
نسيتو الكعة وام دلدوم
بقيتو تضربو كارتية
وقلتو دى هى المثالية
الا وحاتكو يا الحلوين
حياتكم مرة ما بتندار
حياة النفخة والبوبار
وابدا ما بتكرمو الضيف
وما بتراعو حق الجار
وعاد يوم يقطع التيار
تلقاكم صغار وكبار
تقول صبرا ضرب حجّار
*****
حياتكم باقية زيف فى زيف
حياة البهجة والتخفيف
والثلاجة والتكييف
وابدا ما بتعرفو الصيف
وما ضقتوها زنقة جوعة
فى الحواشة ضهرية
وما جربتو جر واسوق
ولا شلتوها طورية
ولا سيّل عرقكم يوم
لمن بل السديرية
*****
جلودكم باردة يا الحلوين
تقومو من الصباح هاشين
دوام قاجين ومبتهجين
انا التعبان انا المغلوب
قفل عينى ابو الضبضوب
يطقطق جسمى للعرقوب
تقول سعنا وقف كرتوب
يكون فى بطنى باقى هبوب
اتمها رووووب ..

الصحافة


تعليقات 2 | إهداء 3 | زيارات 3849

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#183441 [ابو مصطفى]
0.00/5 (0 صوت)

07-24-2011 02:02 AM
إنه صديقى الشاعر الرائع المستعرب الخلوى. سقى الله تلك الأيام النضرات أوائل الثمانينيات من القرن المنصرم


#183360 [كاكوم]
0.00/5 (0 صوت)

07-23-2011 10:21 PM
فتش على القال الكلام دا تلقاه اليوم من الجماعة الطيبين طبعا القصيدة معروفة وصاحبها معروف احرجت الراجل يا مكاشفى


حيدر المكاشفي
حيدر المكاشفي

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة