المقالات
السياسة
ارشيف مقالات سياسية
بأثر رجعي..!ا
بأثر رجعي..!ا
07-23-2011 03:44 PM

حديث المدينة

بأثر رجعي..!!

عثمان ميرغني

أمس خلال جلسة في مكتب والي الخرطوم.. وفي حديث جانبي مع وزير التخطيط والتنمية العمرانية المهندس عبد الله أحمد حمد ومعتمد محلية كرري السيد كمال محمد عبدالله.. حكى المعتمد أنه التقى ببعض الأهالي في حارات محليته.. وأنهم حينما اشتكوا من بعض ما يقلق حياتهم الآن.. طلب منهم أن يقارنوا بين حالهم الآن وما كانت عليه، ويلقوا نظرة عادلة للتطور في مستوى الحياة والبيئة حولهم.. قلت للأخ المعتمد.. إن ذلك واحداً من الأخطاء المفاهيمية الكبيرة التي تقع فيها الحكومة، أن تطلب من الناس دائماً أن يلتفتوا وينظروا إلى الوراء.. أن يقارنوا حياتهم الآن مع ماضيهم.. مثل هذه النظرة علاوة على أنها تزرع إحساس المن والأذى في نفس المواطن.. فهي أيضاً نظرة (رجعية) تجعل المقارنة دائماً بين الحال والماضي.. الأوجب – وسبق لي أن كتبت ذلك - أن نقر ونعترف أننا - دولة السودان - متأخرين أكثر من نصف قرن من عالمنا الذي يحيط بنا.. وقلت لكم لا تذهبوا بعيداً وتقارنونا بأوروبا أو حتى بإمارة دبي الصغيرة، انظروا حولنا هنا في إقليمنا في جارتنا إثيوبيا.. التي قفزت بصورة هائلة خلال العشر سنوات الماضية.. بشكل أدهش الناس رغم شحّ الموارد وعوز الحال مثلنا. ونحن في السودان لدينا موارد هائلة.. غالبها معطل.. ولدينا فرصة للقفز عالياً في الهواء لنصبح دولة غاية في التحضر. لكن المشكلة هي في (المفاهيم) التي تصرخ في المواطن (انظر خلفك.. أين كنت) والأجدر أن يقال (انظروا للعالم حولنا.. أين نحن).. وقلت لكم في مناسبة سابقة. إننا مثل فريق كرة القدم الذي اهتزت شباكه بعشرة أهداف كاملة الدسم.. إذا أحرز بعد ذلك هدافه الهدف الأول.. فلن يخلع الفانلة ويجري للجمهور في المدرجات أو يرقص اللاعبون تلك الرقصة الأفريقية، لأن الفارق لا يزال تسعة صفر.. على العكس سيجري الهداف الذي أحرز الهدف إلى المرمى ويحمل الكرة ويسرع بها لخط النصف؛ حتى يضمن سرعة استمرار اللعب عسى ولعل أن تتعدل النتيجة. لا نريد من الحكومة أن تنظر بأي فرح لما تقوم به حتى عندما تنجز.. لأننا في حالة (عشرة صفر). بل الأجدر أن تحمل الحكومة الكرة وتسرع بها إلى خط النصف لتكسب الزمن. لو نظرنا جيداً لما أنجزه الفريق إبراهيم عبود خلال ست سنوات فقط من حكمه.. ولو تخيّلنا حكم عبود استمر عشرين عاماً أخرى واستمر بنفس المعدل.. لكان السودان دولة في عالم آخر.. قطعة من أوروبا في أعماق أفريقيا. نحن في حاجة لتمزيق الخطط التي نعمل بها الآن.. وتصميم خطة جديدة وفق هذا المفهوم.. مفهوم (عشرة صفر) وننظر للمستقبل لا للماضي.. ونبدأ خطوات قفز بالزانة لنلحق القطار.. وننسى حكاية مياه تنقطع بسبب العكورة.. وموسم خريف تغرق فيه العاصمة.. وما إلى تلك المشكلات التي لا يمكن تصنيفها بأكثر من أنها (تخلّف في تخلّف).

التيار


تعليقات 26 | إهداء 0 | زيارات 4324

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#183696 [nasreldeen ]
0.00/5 (0 صوت)

07-24-2011 01:08 PM
عثمان ذى سؤال الولد العملوهو معتمد ده هو سؤال لمحليتو بس لكن لو صعدنا المسألة والمساءلة لحدى ماوصلت للسيد الرقيص ... عفوا الرئيس حيبقى السؤال للشعب كلو ولمن الشعب يلتفت وراهو حيلقى ثلث البلد بى ناسا ( انقلمت ) ( ولا انشرمت ) ( ولا انقطعت ) ( ولا انفصلت ) و لا ....... المهم البلد نقصت بمقدار الثلث ( ناس وأرض وموارد )
أها قول للجنى البقى معتمد ( فى غفلة الزمان ده هز ضرعاتك وسوى الصقرية )
يا عثمان انتو الزول القاعدين حارسنو ده سوى للزول بتاع الكشك الما انتحر لكن أولادو طشوا شنو . يا عثمان انت لقاءاتك كثيرة مع ود الخدر ده يا عثمان احسم موضوع صاحب الكشك ده عشان ماتعتبرنا عاملنها ضحكة ساكت لأن مصاير الناس ماضحكة وسبل ارزاقهم ماها مسخرة وبدل ماكل يوم عاوز تكتب موضوع مامنو فايدة شد حيلك وقول موت موت حياة حياة واتعابط فى ودالخدر وخليهو يحل مشكلة صاحب الكشك
ولا شنو ياناس الرابطة؟؟!!


#183656 [maw]
0.00/5 (0 صوت)

07-24-2011 12:21 PM
شايفك يوم الجمعة مع صاحبك الذى لا يظلم عنده احد


#183599 [seraj]
0.00/5 (0 صوت)

07-24-2011 11:13 AM
أعجبني تعليق معليش حكومة البشير فوالله اصاب كبد الحقيقة التي تتوارى انت عنها ياميرغني ويتوارى عنها كل من له مطامع !!! احدهم وهو رمز من رموز ولاية الخرطوم وهو قريب لي والله كان لا يملك والده وجبات ثلاث لابنائه اصبح ابنه تحت بائنتة ثلاث حريم ،، كان جدارهم ينهد كل خريف كمثل الاف البيوت اصبح منزلهم قصور بلقيس وهو لديه من الدور مالديه ،، الفقر لم يكن عيبا يوما فكل اهلنا بمقياس الغني كانوا فقراء ولكن الفقر فقر النفس وظمئها لأكل مال السحت والنهب الأجل انه جبهة اسلامية غدى مثل هذا ،،،، والله يابشير لن تشفع لك دعوات خالك ،، ولا حب أمك أن تسئل في عقر دارك وما ملكت يمينك التي حينما كانت بيد شمس تجر الخفر والحياء ملبسها للسلام على رفاق بعلها ،، لسوف تجر يوما كان افضل لك ان تجر في لهاي منه ،،، يامن تدعون الدين والاسلام اين دين عمر بن الخطاب وعدل عمر بن عبدالعزيز ،،، تطالبونا بالنظر الي الوراء لعمري كل الشعوب تتطلع الى الامام وحكمنا وسادتنا يطلوبننا الي الخلف ،،،،


#183515 [محمد احمد]
0.00/5 (0 صوت)

07-24-2011 08:59 AM
كلما نقول ولدنا بقى ديمقراطي يرجع تاني لحب العساكر عبود المهنا يا ولدي


سير سير سير يا بشير


#183395 [برق العطاشى]
0.00/5 (0 صوت)

07-23-2011 11:42 PM
يااستاز عثمان الحكومة دي ( تورا كمل كراهو ) يعني عمرها الافتراضي انتهى وماشا بي روح الجيران وبقت زي ( تيس ام الحسن جابوهوا يعشر الغنم رضعن ) يعني ( جا يكحلا عماها) 00قالوا انقاز قالوا !!!! رجعونا محل انقذتونا دا يا ناقوس الاسى وكمان بيقارنوا ويمتنوا علينا بكم كبري وطريق وكلها ديون في ديون ونسوا انهم قفلوا المصانع ولجنوا المزارع وضيقوا على اهل المراعي 00اين القطن ؟؟ اين الصمغ العربي؟؟ اين المحالج والمدابغ وووووووو000( اين شرف وكرامة وكبرياء الانسان السوداني ) الم يدوسوا عليها ويبعونها في سوق النخاسة بثمن بخس 00بئس الانقاز وبئس الامتنان وبئس الالسن المأبلسة000000000


#183359 [wedhamid]
0.00/5 (0 صوت)

07-23-2011 10:19 PM
يا عثمان افندى

أول شى ....مبروك عليك قعداتك مع صاحبك الوالى ود الخدر......... الما بنظلم عندو احد......... و............ الما رجع للزول الما انتحر....... كشكو ............و............. اولادو........... الطشو .........
تانى شى...المعتمد بتاعك دا كان ينظر لسيرتو الذاتية و مؤهلاتو و يقارنها مع شاغلى هذه الوظيفه فى فترات الحكم اليموقراطى و يورينا الفارق !!!!!!و يقارن مرتبو و حوافزو و مخصصاتو مع اولاد دفعتو من الاطباء مثلا !!!!! دى الحاجات الممكن تعمل مقارنة علمية و تجد الفارق بموضوعية لان المقارنة بتبقى بالارقام !!!!!!
ثالثاشى تعال اعمل المقارنه الهو عايزا عن حالة المواطن !!!! ((طلب منهم أن يقارنوا بين حالهم الآن وما كانت عليه، ويلقوا نظرة عادلة للتطور في مستوى الحياة والبيئة حولهم))
شنو التطور فى حارات محليته؟؟؟ هل يعنى نمط بناء المساكن ؟؟ هل يعنى تخطيط الطرقات ؟؟ هل يعنى التشجير ؟؟هل يعنى تصريف مياه الامطار ؟؟ و الصرف الصحى و ازالة النفايات ؟؟؟؟ و دى كلها هل بتعملها المحلية و توزعها على المواطنين ؟؟؟ ام يقصد مستوى الخدمات التى تقدمها المحلية للمواطن تحسنت من رقابة الاسعار و توفر السلع الضرورية بشكل كافى او معقول و خدمات الصحة و التعليم و الامن و تمويل تكلفتها ؟؟؟ كدى يا عثمان قول الفارق بين زمان و الان !!!! فى كل شئ من توفرها ............. و بالمقابل ما تتحصل عليه محليتهو مقابل تلك الخدمات من اتاوات و رسوم و عوايد و نفايات و زكاة وضرائب لمّا المواطن صار يئن و يتجرس منها !!!! باختصار بس انظر للسيارة الحكومية الراكبها زولك دا و نوع سيارة ضابط المجلس زمان و كمان يقول لينا من وين تم دفع تمنها من ميزانة المالية ام من الرسوم و الاتاوات ( بالمناسبة اقصد بكلمة اتـاوات رسوم الدرداقات فى الاسواق و الرسوم المفروضة على بائعات الكسرة و الشاى و الاولاد الببيعوا الاكياس و بائعى الفراشات و رسوم تصريق العمل للعتالة و بس تصوروا المحلية تؤجر مكان فى الموالد مساحة 3×4 متر لدكان الحلاوة بمبلغ 5 مليون جنيه لشهر المولد النبوى بس!!! دا كان بيحصل متين؟؟؟)


#183312 [ezoo]
0.00/5 (0 صوت)

07-23-2011 08:59 PM
انت عارف الفرق بينا واثيوبيا شنو بل اريتريا كل الدول الحوالينا سبب تقدمهم علينا شنو انتو عارفين

السبب انو ما في فساد فساد يعني فساد مسئولين في الدولة لو في واحد مد ايدوا للمال العام قطعوها ليهو امام الشعب لكن نحنا ما شاء الله كلو مسئول لابت للاخر كايس منو اقل دقسة عشان يبتزا لي نفسه زي اخونا المستشار ومن دار ولف حولهم

يوم ما نعدم واحد مفسد تنصلح الحال وبعدها تعال شوف البيحصل شنو


#183268 [بت الخرطوم]
0.00/5 (0 صوت)

07-23-2011 08:03 PM
السؤال موجه لرابطة مناصرة الزول الكان داير انتحر ولسةما انتحرانتو يا اخوانى ود ميرغنى حكايتو شنو مع ود الخضر الذى يظلم عنده احد هل تم تعينة مستشار صحفى للوالى اما خبير وطنى لشئون الصحافة والاعلام بمكتب الوالى حيرتنا الله يحيرك زى ما حيرتنا ياود ميرغنى صاحب جريدة التيار لسان حال ود الخضر واخوانة












#183265 [سوداني ]
0.00/5 (0 صوت)

07-23-2011 07:59 PM
حتي لو قارنا بأثر رجعي بمثل مايقول اهل الانقاذ ،نجد في الماضي وقبل مجيء هذه الحكومه الخدمات الاساسية من تعليم وصحه ومعاش تقدم للمواطن مدعومة أن لم نقل شبه مجانية ، أن هذه الحكومة جعلت من التعليم والصحة عملاً تجارياً ورفعت يدها منه وتركت المواطن الأغبش للمجهول يعاني ويعاني ، وحقيقة نقول أنه لولا الرعاية التي كانت تقدمها الدولة سابقاً لمواطنيها لما تعلم ودرس ونال الذين بيدهم مقاليد الامور الآن أرفع الشهادات من الخارج ، فهم كانوا ابناء صغار موظفين وابناء عساكر بوليس وجيش ، والفضل في ذلك يعود لله ثم للشعب السوداني ، ولكنهم عندما تسلموا السطة واصبحوا أثرياء سعوا الي حرمان الشعب السودان وأبناء الشعب السوداني تلك الرعاية الاجتماعية التي كانت تقدمها الدولة ، حتي تظل الثروة والسلطة محصورة فيهم ومن شايعهم وتركوا الشعب السوداني للفقر والتخلف والامراض والجوع وشغلوه باللهث وراء تأمين لقمة العيش فقط وبذلك جعلوا أقصي طموحه وتفكيره كيفية تأميت القوت اليومي له ولأسرته .


#183246 [شيخ تُلب]
0.00/5 (0 صوت)

07-23-2011 07:34 PM
باشمهندس انا برضو امبارح شايفك فى قناة الشروق قاعد تلعلع وتتفاصح . بعدين تعال هنا معتمدك ده ليييييييييه يطلب من المواطنيين يعملو مقارنة يا ابومقارنة انت؟؟؟؟؟!!؟؟؟؟؟ الشعب لا يريد مقارنة ولا النظر للوراء بل يريد تغير ................. ؟ اها صاحبك ودالخدر عمل شنو فى موضوع الراجل ..الما انتحر ..واولادو.. الطشو؟ لا مشيت تشوف باقى القريشات للفيلا المليارية؟ الجاب شمارها الزول الكان سمح ولازال ! وسؤال صغير كده بموضوع الكاميرا الختفها الزول بتاع الركشة؟


#183245 [سوداني مستحي]
0.00/5 (0 صوت)

07-23-2011 07:33 PM
انتو عشان تعرفوا مستواكم الحقيقي شوفوا نشرة الاخبار ما هو الخبر الرئيسي. (( رئيس الجمهورية يستقبل وزير دفاع جزر القمر )) وهذا ما يجب ان ننظر اليه . لانو ده مستوانا الحقيقي


#183232 [hajabbakar]
0.00/5 (0 صوت)

07-23-2011 07:00 PM
كان ابعاج يقول سنحارب العطش فى الغرب والجوع فى الشرق والعرى فى الجنوب والحزن فى الشمال
ولكن بفضل ثورة الانقاذ الوطنى
صار العطش والجوع والعرى فى العاصمة
والقتل والسحل فى كردفان ودارفور
اى غضب هذا؟ واى نحس هذا؟
كل ذلك فى جمهوريتهم الاولى
لم يبق شئ لامير المؤمنين ان يفعله فى جمهوريته الثاتية
اللم الامزيدا من التشطير
ودون كيشوت يحارب فى طواحينه
ولك الله ايها البلد المنكوب


#183216 [حمدان]
0.00/5 (0 صوت)

07-23-2011 06:37 PM
ابو عفان
الله يكضب الشينة..
علمت ان علي..حافة كدة.. عرض عليك انت والظافر ان يسكر الرائد......
وتبقي التيار في الواجهة...تفتح الباب للكل بما فيهيم صلاح عووضة...
خلي الشعب يستمتع بالنقد...
سيمدونكم بكل المستندات التي تدين العصبة بما فيههم نافع وبشبش... وابو ريالة


وتكشفوا المستخبي..الفساد..وهلم جرا..
هناك يتقدم

عليوة..
وينقذ الوطن
بثورة تصحيحية..
ويسلم بشبش الي الجنائية...وتعفي امريكا الديون...ونرفع من قائمة الارهاب..
ويتوج علي..رئيسا علينا
ويعود قوش
ويذهب نافع الي الجحيم


ويقبض عم علي ثمن الانفصال ونيفاشا
ونحن نحن
من كوز الي كوز..


#183214 [الزول السمح]
0.00/5 (0 صوت)

07-23-2011 06:35 PM
يا اخوانا والله حيرتونا !!!
الزول ده كلو ما يقول ليه كلمة حق
ينطو ليه جماعة الكشك إياهم في رقبتو !!!
جماعة الكشك ديل شعوعيين وله شنو ؟؟
ولا يا ربي يكونو كيزان عديل ؟؟


#183212 [سليمان قش]
0.00/5 (0 صوت)

07-23-2011 06:34 PM
تاني الوالي ياعثمان !!!! انت ياعثمان داير تصل لشنو دائما تبدا مقالاتك علي شكل (كنا في جلسة مع الوالي كنا في رحلة داخل بص الوالي هاتفني مين كده ما عارف زارني صحفي برطاني رسالة في بريدي)كانك محط انظار كل العالم هو الوالي دا قلنا ليك بس اسالو عن الزول الما انتحر واولادو الطشو ما قدرت طيب كان قلنا ليك اسالو عن علاقته بالمدينة المحورية حتسوي شنو ؟ولمن لايعرف المدينة المحورية فهي مدينة قامت علي اراضي زراعية .......وكلك نظر وانا ما فسر وانت ماتقصر...


#183165 [حمدان]
0.00/5 (0 صوت)

07-23-2011 05:39 PM
عثمان ميرغني
فات عليك ان تقول لهم انظروا ما انا...
من حتة مغترب في السعودية... ما شاء الله... اين انا انا الان.....
صاحب اكبر جريدة توزيعا واعلانا...
العب بالبيضة والحجر..
احتكر اغلب الاعلانات
اوظف الظافر والمهزوم..

سبحانك ربي انا لك من الشاكرين


فقط استبدل كلمة ربي بعلي
اختشي

قل الحق يوما ما
قلت لا يظلم عنده احد


#183164 [مندي]
0.00/5 (0 صوت)

07-23-2011 05:39 PM
يا باشمهندس والله موضوع ما بطال لكن امبارح شايفك في قناة النيل الازرق مع صاحبك ود الخضر الوالي الذي لا يظلم عنده احد الما رجع الكشك للزول الكان داير ينتحر ولسة ما انتحر والاولادو.......... .......الخ
لكن يا باشمهندس الناس الكانو معاكم ديل منو؟ والله اول مرة اشوفم....ملاحظة انو صاحبك الوالي كان بتعامل بفظاظة مع الناس وبصبر نافذ وكتر من عبارة خشي في الموضوع


#183163 [المندهش شديييييييد]
0.00/5 (0 صوت)

07-23-2011 05:38 PM
شايفك امس مع صاحبك ود الخدر فى الثوره الحاره100تكسر فى التلج سااااااااااااكت بس صاحبك ود الخدر بالجد (لايظلم عنده احد)يمرق لى الحاره100 ويتفقد احوال الناس بس ياريت تريح الزول الكان سمح وتظبط ليه الحكايه اياها بتاعت الكشك


#183158 [المتجهجه بسبب الإنفصال]
0.00/5 (0 صوت)

07-23-2011 05:35 PM

واصل استاذ عثمان عل هؤلاء المتخلفين يصلحوا ما خربوه قبل الطوفان ...


#183157 [حاتم]
0.00/5 (0 صوت)

07-23-2011 05:33 PM
عثمان اخوي قول لي لجماعتك ديل امس كلنا بلد المليون ميل مربع والان اصبحنا بلد المليون الا ثلث


#183154 [ممغوص]
0.00/5 (0 صوت)

07-23-2011 05:30 PM
عن تغيير اي خطة تتحدث اتق يوما يجعل الولدان شيبا من تسبب في هزيمتنا عشرة صغر على مدى بضع وعشرون عاما يجب ان يتغير هو لا ان يتغير تخطيطه


#183150 [الطاعون]
0.00/5 (0 صوت)

07-23-2011 05:28 PM
طيب ياخي لما انت قاعد مع صاحبك ود الخضر المابنظلم عندو حد والمارجع للزول المانتحر كشكو واولادو طشوا - كان تعيد طلب الزول المانتحر كشكو واولادو طشو


#183120 [ابوالنصر]
0.00/5 (0 صوت)

07-23-2011 04:34 PM
تاني مكتب والي الخرطوم الذي لايظلم عنده احد ياكوز يامتملق اكيد مشيت تسألو عمل شنو مع صاحب الكشك الي ما انتحر


#183104 [James ]
0.00/5 (0 صوت)

07-23-2011 04:13 PM
طبعا الكلام ده كلو بعد ما اكلتوا الجداد والماكولات الطرية يا عثمان .
والدعوة جات من صاحبك والخضر ..... كمان ما بتخجل تكتب وانت تشارك في تدشين اكل اموال الشعب؟ اكيد ده ما حرام كونو تشارك صاحبك ود الخصر;) ;( ;(


#183103 [معليش حكموه ناس البيش]
0.00/5 (0 صوت)

07-23-2011 04:11 PM
اتدري مالسر !!فالذين جلست معهم ينظر كل منهم لماضيه!! فيري بؤسه قد تحول نعيم بيوت وعربات!!فيعمم علي الجميع!!!ففي عشرون عام صارت ماليزيا ماليزيا وفي عشرون عام غدت سنغافورة قبلت!! ولكن هل اديرت من قبل مل اصحابك!! الين لايملكون للعلم ولاالقدرة علي قيادة ولاية!!لاعلميا ولاجهويا ولااسريا!!! نعم فنحن اكثر يقينا الان!! بان الشان العام يجب ان يوكل لمن ليس له ماض يرزي به فقرا ويغريه في ان يحيل العام لمزرعة له في غياب دولة المؤسسات!! وكنا نظن المثل المبتشوفو في بيت ابوك يخلعك ترفض !!لكن هؤلاء اثبتوا انهم مايزالون مخلوعين!!لذا لم يوقفوا الافساد والتعالي ومحاولة تغفيل الجميع!!!!


#183087 [الساير]
0.00/5 (0 صوت)

07-23-2011 03:56 PM
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

تاني يا عثمان رجعت لمجالس الوالي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

حسنا
لعلك سألته هل أعاد للرجل كشكه واولاده الطشو ؟؟؟؟!!!!!!!

أنا عارفك سألته لكن أداك هرشة المرة دي ! مش كده صاح يا عتيمونة ؟؟؟؟؟؟؟؟

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

والمعتمد ده يا خوي اتعلم السياسة وين حتي يطلب من الناس مقارنة ؟؟؟؟؟

لماذا لا يطلب منهم رأيهم في التدني في الأخلاق والاقتصاد والسودان الذي أصبح كالجبون وليس الجابون ؟؟؟؟؟؟؟؟؟؟؟؟؟؟؟؟؟؟؟؟؟؟؟

آه يا بلد !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!


عثمان ميرغني
عثمان ميرغني

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة