كل زول يعمل حسابو
07-27-2011 01:12 PM

ساخر سبيل

كل زول يعمل حسابو

الفاتح يوسف جبرا

ضحكت حتى بانت نواجزى واستلقيت على ظهرى وأنا أطالع على الصفحة الأولى من «الرأي العام» الصادرة بالأمس خبراً عن تحرّك المراجع العام ووزارة العدل والبرلمان، لتقليب الملفات المتعلقة بالاعتداء على المال العام خلال الأعوام العشرة الماضية توطئة (كما يقول الخبر) لاتخاذ قرارات صارمة تضبط المال العام وتحافظ على موارد الدولة !
حيث كشف د. الفاتح عز الدين رئيس لجنة الإدارة والعمل والمظالم العامة بالبرلمان (كما يقول الخبر) عن اجتماع رباعي خلال الأسبوع الحالي يضم وزير العدل والمراجع العام ولجنة العمل والإدارة والمظالم العامة بالبرلمان ووزيرة الشؤون البرلمانية لمراجعة حسابات كل الشركات والمؤسّسات الحكومية لعشرة أعوام ماضية، وقال (عز الدين) ستتم مراجعة كل الحالات المتعلقة بالمال العام حتى التي مضى عليها وقتٌ طويلٌ، وكشف عن إتفاق مع الجهاز التنفيذي لمعالجة كل الملفات المتعلقة بالمال العام، وألاّ يترك أي شخص اعتدى على مال عام حتى إذا تم ذلك الاعتداء قبل وقت طويل. وأكد عز الدين، أن العمل في هذا الاتجاه يتم بشكل علمي، وقال: سنقدم تقريراً (مفاجئاً)، وأضاف أن تقرير المراجع العام القادم سيكشف عن تحسن نسبي، لكنه أكد أن العام المقبل سيكون لهذه التحركات أثر كبير فيما يتعلق بضبط المال العام، وكشف عن توجيهات صارمة للإدارات المالية والإدارية، وزاد: سنتابع ملفات سنكشف عنها في حينها. وأكد عز الدين أن الشفافية تخطو خطوات ثابتة وبلغة الأرقام، وأكد أنه ليست هناك أية أهداف شخصية وراء هذا الأمر، بل أن الهدف حفظ موارد الدولة، وكشف عن رصد قضايا محددة، وتابع: كل هذه الاجراءات حتى يحتاط أي شخص ويتعامل بروح المسؤولية والرقابة، وأردف: (أي زول يعمل حسابو) !
أيه المضحك في الموضوع .. حكومة وعاوزة تحافظ على المال العام ؟ أيه البيضحك ؟ فيها أيه يعنى لما (الحكومة) تقوم كل (عشر سنين) بتجميع ملفات الفساد والإعتداء على المال العام وتبدأ فى محاسبة من قاموا به؟ صحيح ممكن يكون ناس كتيرين من (الأكلو) قروش الشعب السودانى الفضل قد إنتقل إلى الدار الآخرة لكن مش مشكلة برضو ح يتحاسبو هناك وكمان حساب عسير والقروش الشالوها دى ح تكتب لكل مواطن فى ميزان حسناتو !
أيه المضحك فى الموضوع ؟ ناس بتحكم بالشرع الذى لا يعرف فى تبديد المال العام أو الإعتداء عليه (يمة أرحمينى) ويتعامل معه بكل قوة وغلظة .. طيب الناس دى لمن تشوف شغلها وكل (عشر سنين) تقوم تجيب (ملفات الإعتداء ) دى وتنظر فيها مش حقو نقول ليهم (برافو) بدلاً من أن نضحك؟
هو صحيح إنو القروش التم الإعتداء عليها دى خرجت من الدورة المالية للدولة والمواطن كان ممكن يكون محتاج يتعالج بيها أو يتعلم بيها أو أى حاجة بالشكل ده لكن ما مشكلة ما كووولها عشر سنوات و(إحتمال بالمحاسبة دى ترجع ليهو) !
وبعدين حكاية كل عشر سنين نحاسب المفسدين دى فيها حكمة بليغة يعنى زول شال ليهو مليار جنيه .. لو جيتو تانى يوم ما ح يرجعا ليك .. لكن بعد عشر سنين بيكون شغلا وبقت مليارات كتيرة ولو سألتو ح يقول ليك : مش المليار القلتوهو ده شيلوه ..تانى عاوزين منى حاجة؟ وعلى كده نكون وفرنا قصة التحقيقات والمحاكمات والتسويات والشنو ما بعرف داك!
العبدلله عموما شايف إنو (الحكومة) إتوفقت تماماً فى قصة (كل عشر سنين) دى وبدلا عن كل تقرير سنوى يصدره المراجع العام وفيهو الف ألفين زول معتدى على المال العام الحكومة تلم الناس ديل كوووولهم بعد كل (عشرة تقارير) فى (باتش) واااحدة وتخلص من الموضوع (بالجملة) بدلاً عن (القطاعي) !
وبعدين يا جماعة عشر سنين فى عمر (الجريمة) شوية خلاس .. يعنى القروش بتكون قاعدة في حتتا والزول لسه بيكون ما اتصرف فيها ومعالم الجريمة كووولها بتكون موجودة كما هى .. ومسرح الجريمة ذاتو ما بيكون إتغير بس يعنى ممكن لو فى شوية شهود يكونوا إنتقلوا للرفيق الأعلى أو القروش (الإنضربت) يكون الزول عمل بيها عمارات وإتباعت على التوالى من مشترى لى مشترى لحدت ما وصلوا ستة وتمنين ألف زول ! ما مشكلة أمنا الحكومة ح تقوم فى الحالة دى تبيع العمارات دى وترجع لينا قروشنا .. ونقوم نحنا نعمل صندوق دعم للناس (الإتمقلبوا) من المتأثرين بى عملية الشراء دى !
مافى زول يقوم يفهم إنو ممكن بعد التصريح ده يقوم يبدأ يلهط ويلغف فى المال العام وإنو ما ح يتحاسب إلا بعد عشرة سنين .. لا (أمنا الحكومة) دى (مكارة) وممكن ترجع في قراراتها فى أى وكت .. وممكن تقوم تغير سياسة (كل عشرة سنين) دى وتعملا (كل خمسطاشر سنة) وأهو قالت ليكم (كل زول يعمل حسابو) !!
كسرة :
كل واحد يقوم يخت الكسرة البتعجبوا !! عشان كسراتنا فى الحتت دى ممكن تجيب لينا الهواء !!

الرأي العام


تعليقات 28 | إهداء 4 | زيارات 5945

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#187137 [وحيد]
0.00/5 (0 صوت)

07-29-2011 03:40 PM
بس عايز اعرفالعمارة الوقعت قبال تتم و كان بانيها نسيب الوزير البنى للوزير عمارته و كتلت الغفير و رقوا الوزير حيتحقق فيها تاني؟
و سودانير الاشتراها الوزراء السجلو شركة في الكويت و باعوا خط لندن و رجعوا سودانير تاني و البرلمان اطرش في زفة و ما كلموهو بتفاصيل بيعها .. حيحققوا فيها تاني؟
و العقود المليارية لمدراء الادارات المخالفة لكل قانون و عرف و دين و لائحة مالية حيحققوا فيها؟
بلا فاتح عز دين بلا لمه ... هو زاتو عريبي من ود نفيع كان مفلس عدمان غنى من وين؟
كلو خربان


#187022 [قاقا]
0.00/5 (0 صوت)

07-29-2011 10:51 AM
ده دليل علي انو الجماعه ديل قطرهم صفر عشره اولي وعشره ثانية والعشرة الاخيره يركبو التونسية انشاء الله.


#186969 [يحيى العمدة]
0.00/5 (0 صوت)

07-29-2011 05:41 AM
الله يجازيك يا جبرة ويجازى محنك ، والله ضحكت من التعليقات ومن الكسرات والقثش بتاع الاولاد المسلطين ديل يعنى جابوا ليك جنس كتاحة مهما حاولت تكون حريف وتكتل ملفات الجماعة ديل لابدين ليك العيال دردفوك وكدى انا عندى وداعية تخت ليك ابونفريح ونشوق طالع ليك شنو رفدية قطع ماهية هبده قجربة
اصدق يا ابونفريح (اهى اذكرت وين بياضك ) بس انا بياضه بالغويشات


#186672 [Hani]
0.00/5 (0 صوت)

07-28-2011 03:30 PM
المسلمين في دولة الإسلام لا يدفعون سوى الزكاة، ولا يدفعها إلا القادر عليها، وبشروط الزكاة المعروفة، أما فرض الضرائب فوق الزكاة فهذا لا يكون إلا في ظروف خاصة جداً، ومؤقتة جداً، ولابدّ من وجود سند شرعي يبيح ذلك.. وإلا صارت الضرائب مكوساً، وفارض الضرائب بغير حق عقابه أليم عند الله عز وجل..
روى الإمام احمد وأبو داود رحمها الله عن عقبة بن عامر رضي الله عنه قال: سمعت رسول الله صلى الله عليه وسلم يقول: \"لا يدخل الجنة صاحب مكس\"..
ولما زنت المرأة الغامدية ـ وكانت متزوجة ـ فرجمت بالحجارة بعد أن اعترفت بالزنا لتطهر نفسها من الذنب، قال رسول الله صلى الله عليه وسلم ليعظم من شأن توبتها:
\".. فوالذي نفسي بيده، لقد تابت توبة لو تابها صاحب مكس لغفر له\"..
جاء ذلك في صحيح مسلم عن بريدة رضي الله عنه..
وفي هذا تقبيح شديد لعملية فرض الضرائب إن فرضت في غير حق، وصرفت في غير حق..
يقول الإمام النووي رحمه الله تعليقاً على هذا الحديث: \"إن المكس من أقبح المعاصي، ومن الذنوب الموبقات، وذلك لكثرة مطالبات الناس له وظلاماتهم عنده، وأخذ أموالهم بغير حقها، وصرفها في غير وجهها\"..

قال الشيخ العزّ بن عبد السلام رحمه الله: .
\"إذا طرق العدو البلاد وجب على العالم كلهم قتالهم )أي العالم الإسلامي(، وجاز أن يؤخذ من الرعية ما يستعان به على جهازهم )أي فوق الزكاة( بشرط أن لا يبقى في بيت المال شيء )هذا هو الشرط الأول) أما الشرط الثاني فكان أصعب!.. قال الشيخ العزّ بن عبد السلام رحمه الله: \"وأن تبيعوا مالكم من الممتلكات والآلات (أي يبيع الحكام والأمراء والوزراء ما يمتلكون(، ويقتصر كل منكم على فرسه وسلاحه، وتتساووا في ذلك أنتم والعامة، وأما أخذ أموال العامة مع بقاء ما في أيدي قادة الجند من الأموال والآلات الفاخرة فلا!!\"..
فتوى في منتهى الجرأة!!..
يقول الشيخ العزّ بن عبد السلام رحمه الله إنه لا يجوز فرض ضرائب إلا بعد أن يتساوى الوزراء والأمراء مع العامة في الممتلكات، ويجهز الجيش بأموال الأمراء والوزراء، فإن لم تكف هذه الأموال جاز هنا فرض الضرائب على الشعب بالقدر الذي يكفي لتجهيز الجيش، وليس أكثر من ذلك..


#186617 [معتصم هارون]
0.00/5 (0 صوت)

07-28-2011 02:25 PM
المصيبة يا ود جبرا يقومو يبدو بالعشرة سنة البعد الاستقلال ولما تصل للجيل الحالي ىكونو كوووووولهم لحقو امات طه 0


#186324 [ود العمدة]
0.00/5 (0 صوت)

07-28-2011 08:25 AM
كسرة
الفاتح عزالدين من المناقل خريج مدرسة صناعية أهلوا مشايخ دين معروفين اول مدير لمنظمة شاب الوطن ومحافظ في غبيش وبعد شوية اختفي سافر لندن ودرس دورات في اللغة الإنجليزية انا ما عارف دكتوراه في شنو؟ وعندو ثلاث زوجات
اخوه الاصغر خريج دبلوم معهد تجاري طنطا في مصر الآن عنده دكتواره في الكمبيوتر كيف ؟
كل عشرة سنين اول مره في عالم المحاسب نسمع مراجعة بأثر رجعي ، المحاسبة تقرير سنوي في ديسمير من كل عام أما لجنة الفاتح شكلها دي جديدة من جدائد الدمار الوطني.
وبالمناسبة كل اسافر اهلوا بخطبوا فيهم في صلاة الجمعة مع انو ضيف؟
هذا زمانك يا مهازل بامرحي؟


#186317 [شاذلى]
0.00/5 (0 صوت)

07-28-2011 07:54 AM

تعرف يا جبرا من هسع نقبل على الخزنة وعشرة سنين زى ما قال ود تكتوك

يا الفقير يا البعير -وممكن ربك يسهل و يسوها خمسطاشر



شر البلية ما يضحك


#186307 [اابو امنه]
0.00/5 (0 صوت)

07-28-2011 05:30 AM
وماذا عن الناس الذين اكللو فى العشرة سنين الاولى للإنقاذ


#186273 [ابوالنصر]
0.00/5 (0 صوت)

07-28-2011 01:53 AM
هوا الطقطاقة


#186222 [الزول السمح]
0.00/5 (0 صوت)

07-27-2011 11:55 PM
كسرة :خلي ود الامين الحنها بعد اغنية اربعة سنين و اغنية خمسة سنين تكون اغنيته الجاية عشرة سنين والف الباقي ياجبرة


#186196 [nubian]
0.00/5 (0 صوت)

07-27-2011 10:38 PM
طيب لو فى واحد عاش 9سنوات و364 يوم ومات فى اخر يوم فى السنة وكان اليوم سبت طبعا عطلة اليوم دة حيكون تابع للعشرة سنة الفاتت ولة حينقصو بعدين الزول دة عندو اربعة نسوان واولاد حيطلبوهم بالدفع نيابة عنة و لا حيشملهم فقة الستره مع تحياتى لصاحب الكشك


#186177 [Neema]
0.00/5 (0 صوت)

07-27-2011 09:47 PM
سجمنا يا جبرا الكلام معناهو انو الناس ديل حيحكمو البلد بمتوالية عددية اساسها عشرة ولو ما فهمت القاعدة الرياضية دي خلي ولدك يشرح ليك


#186158 [hajabbakar]
0.00/5 (0 صوت)

07-27-2011 09:10 PM
هذا الذى يتحدث عن محاربة الفساد منذ عشرة سنوات
يذكرنى بالاب الذى يلاعب ابنه الصغير ويعطيه كرباجا
ويقول له هاك السوط دا دقنى بيهو
فياخذ الصغير الوديع المدلل الكرباج ويشرع فى ضرب ابيه
فيبدا الاب بالصراخ والولولة وطفله لايكف عن الضحك
وكلاهما فى منتهى السعادة


#186110 [awooda]
0.00/5 (0 صوت)

07-27-2011 06:59 PM
كمية الدغمسة الفى مقالك دى براها بتجيب الكتاحة بس الجماعة ديل ما فاضين لناس الجوايد عايزين يلملمو حكاية جنوب كودفان بعد دغمسة نافع والخال وما بينها


#186069 [اسماعيل الجزولى]
0.00/5 (0 صوت)

07-27-2011 05:31 PM
بعد عشرة سنيين ياربى فندق قصر الصداقة بكون سيدو هو زاتو ك----------------------------


#186064 [ام خالد]
0.00/5 (0 صوت)

07-27-2011 05:24 PM
انا اجيب ليك الهوا ... ياجبرا خليهم يبدو بالزول ده ذاتو (القافل سرق الدين ) ده .... يسالوه القروش العملت بيها شركه (سما ميديا ) الاتعاقدت مع الهلال والمريخ بي أكتر من مليون دولار ... والاحتلت احسن مواقع الاعلانات (الشاشات العملاقه ) في شوارع امدرمان الانت كنت معتمدها ... اهاااااا جبت القروش دي من ويييين ؟؟؟ كسرة ..... المشكله ياجبرة يقول دي جبتها في العشره سنين القبل دي لمن كنت في الدفاع الشعبي !!! يعني بره الحساب


#186024 [ابو مروة]
0.00/5 (0 صوت)

07-27-2011 04:14 PM
كسرة
عشرة سنين تجربة وزاد ومهرجانات لغفو مليارات
الشرح:
الكسرة ما بتتشرح لكن ....العشرة معروفة والزاد هو ما زاد عن حاجة المواطن فقام لاغف بحفظ هذا المال الزائد حتى يكبر الشعب والاستدلال من سورة النساء بشأن اليتامى حتى يكبروا وطبعا الشعب السوداني يتيم ومسكين وما بعرف يتصرف في اموالو وعليه العشرة سنوات بتكبرو شوية ولو ما كبر نديهو تاني عشرة عشرتين.
نعود للشرح (هو نحن فتنا وين؟) مهرجانات : المهرجان معروف وهو عبارة عن تجمع يتم في قاعة الصداقة او روتانا او قلة القذافي المسكين ، تصرف عليه الخزينة العامة من مال اليتامى ليناقش كيفية ادارة التنوع في افريقيا استهداء بتجربة السودان الرائدة في ادارة التنوع بصورة رائعة جعلت المتنوعين ينبسطو جدا ويعملوا ليهم دولة عشان يكرموا قادة التوع الوطني
نعود للشرح (هو نحن فتنا وين؟) لغفو: استغفر الله
نعود للشرح (هو نحن فتنا وين؟): مليارات وتعني مليار زائد مليار فاذا حصلت اربعمائة نخصصها لبناء برج كبيييير نخزن فيه الموية لزوم الصيف الجاي
اما كسرة


#185965 [مروة]
0.00/5 (0 صوت)

07-27-2011 03:00 PM
يا جبرا ما تظلم الجماعة .امكن في العشرة سنين في واحد ولا اتنين بس المعتدين على المال العام الما سايييييب


#185956 [TIGER SHARK]
0.00/5 (0 صوت)

07-27-2011 02:53 PM


This is a JOKE..!! as usual...the regime just try buying time


#185920 [أبوهاجر]
0.00/5 (0 صوت)

07-27-2011 02:19 PM
ماهى دى الخطة العشرية ياجبرا ..((محاسبك يا حبيبى)) الأغنية دى أنا سمعتها ويييين ..؟؟ سمعتها ووين .. ؟؟ هو دى بغنيها كم فنان ؟ .. يعنى بتاعين المراجعة ديل إنوموا عشرة سنين ورواتبهم حارقة تش .. ،
- 22 سنة فاتت وبرضو حتكون فى عشرة سنين جاية للناس عشان يعملوا حسابهم من العين الحمرا دى .. يا جبرا عايز تعمل لينا سكتة قلبية !؟
- إذا كان الجماعة ديل يقولون ما يفعلون ..حيفضل فيها منو؟


#185903 [العجب]
0.00/5 (0 صوت)

07-27-2011 01:54 PM
كسرة : العشرة سنين الجفلن خلهن اقرع العمارات والفنادق الواقفات !!!!


#185902 [الساير]
0.00/5 (0 صوت)

07-27-2011 01:54 PM

كسرة :

يا جبرا يا جبان

ما تقول عديل : يسقط ال... ( بسم الله ما تقول عديل : يحيي العدل يحيي العدل )

أها جا ك الهواء الساقط يا ابو الجباربة ؟؟؟؟؟؟؟؟؟؟؟؟؟


#185899 [Alshaik]
0.00/5 (0 صوت)

07-27-2011 01:52 PM
ما تخاف من الكسره!!!

بيعتمد علي نوع الهوا
امكن يكون هوا بارد من جهه ناس الراي العام وكدة


#185887 [Alshaik]
0.00/5 (0 صوت)

07-27-2011 01:42 PM
ايه البضحك..!

السؤال المهم هو ايه البشغلك في الراي العام من اساسو
دي مش جريده كيزان ياعمنا??


#185885 [ودالفاضل]
0.00/5 (0 صوت)

07-27-2011 01:39 PM
ماتجيبو لي الهواء ماتجيبو لي اصلو الهواء ماليو دواء ماتجيبو لي


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة