ح تحصل تاااني
08-03-2011 01:04 PM

ساخر سبيل

ح تحصل تاااني

الفاتح يوسف جبرا

عزيزى القارئ .. فى كثير من مقالاتي أصرح بأن هنالك إنعداماً في الرقابة في كل شئ .. المطاعم والكافتيريات وما تقدمه من مأكولات ومشروبات .. المخابز وما تقدمه من (رغيف)، المدارس الخاصة و العيادات الخاصة والمعامل والمختبرات ومدى مطابقتها للمواصفات والكثير من الأماكن الخدمية .. وقصة إنعدام الرقابة هذه سببها (طبعن) أن (أمنا الحكومة) ما بتحب (تطلع القروش) والرقابة عاوزة قروش .. موظفين وعربات وبنزين وخلافه مع إنو بتستخدم نفس (الحاجات دى) لمن القصة يكون فيها جبايات ورخص وضرائب !
إنعدام الرقابة على الحاجات الإتكلمنا عليها فوق دى (حاجة بسيطة) بالنسبة لإنعدام نوع آخر من الرقابة التى يؤدى إنعدامها إلى (الموت السريع) إذ حملت الأخبار مؤخراً بأن المواطن (م.ي.ف) ظل يمارس مهنة الطب داخل مستشفي عطبرة لمدة (6) سنوات قضاها في الكشف على المرضى وتشخيص حالاتهم ومن ثم كتابة الدواء لهم و(الروشتات) وكمان (إجراء العمليات) ! وإحتمال يكون قام بتدريب بعض طلاب الطب الذين يفدون إلى مستشفى عطبرة (ما تعليمي وكده) .. نعم عزيزى القارئ ظل هذا الشخص ينتحل شخصية الطبيب لست سنوات من غير أن يَكْتَشِفَ أحد حقيقة أمره.
تري كم حالة قام بها هذا الطبيب المزيف بتشخيصها وكتابة العلاج لها مسهماً فى إرسالها إلى الدار الآخرة ؟ (هو تشخيص الأطباء الصحى صحى بقى مرات غلط) ؟ وترى من المسئول عن هكذا إهمال ؟ للإجابة عزيزى القارئ عن قصة (المسئول منو دى) دعنى أقوم بنقل مقتطفات من (تصريح المسئول ذاااتو) وهو المدير العام لوزارة الصحة بنهر النيل إذ قال :
أن اعتقال الشرطة لمنتحل صفة الطبيب بمستشفى عطبرة وإدانته تحت مواد جنائية جاء على خلفية بلاغ لمدير طبي حوادث عطبرة بعد كشف أمره !
ونقول :
مدير طبى حوادث المستشفى ده كان وين الزمن ده كلو؟
يقول فى تصريحه : إن المتهم قد طرد من قبل من داخل مستشفى عطبرة لكنه عاد وتقمص شخصية الطبيب إبان إضراب الأطباء الثاني.
ونقول :
إذا كان المتهم طرد من المستشفى من قبل فإن عودته لمزاولة (العمل) مرة تانية معناها إنو (دوركم ميت) يا دكتور وإنو القصة (وكالة من غير بواب) كما يقولون !
يواصل المدير العام لوزارة الصحة بنهر النيل فى تصريحه قائلاً : مستشفى عطبرة أصدرت وقتها منشورا تحذيريا لكافة الأقسام بأن وسط الأطباء فيه من ينتحل صفة طبيب.
ونقول له : هى مستشفي عطبرة دى كووولها قدر شنو؟ عشان تصدر منشور تحذر فيهو من وجود طبيب مزيف داخلها ؟ وبعدين ياخى هو الدكتور المزيف ده (دبوس) أصلو؟ ما زول طول بعرض وممكن أى زول يعرفو ويقبضو .. بصراحة قصة منشور وتحذير دى (ما جايه) !
لم ينته عزيزى القارئ تصريح السيد المدير العام لوزارة الصحة بنهر النيل ففي نهاية هذا التصريح (الفطير) يقول السيد المدير واصفاً حادثة ضبط طبيب مزيف بمستشفى عطبرة بأنها لم تكن (الأولى) ولن تكون (الأخيرة) !!
عليكم الله شوفوا جنس الكلام ده ؟ بدلاً من أن يؤكد السيد المدير وهو المؤتمن على صحة مواطنيه فى الولاية بأن هذه حادثة لن تتكرر فها هو يعلن على رؤوس الأشهاد بأنها حصلت قبل كده وكمان ح تحصل تاني !! (الله يطمئنك ياخى) !!
كسرة :
تحذير لمواطني ولاية نهر النيل : بما إنو السيد المدير العام لوزارة الصحة بولايتكم قال ليكم (القصة ممكن تحصل تانى) فقبل أن تسمحوا للطبيب بالكشف عليكم عند مراجعتكم للمستشفي تأكدوا من أنه (غير مزور) وذلك بأن تطلبوا منه أن يريكم (بطاقته الشخصية) و (بطاقة المستشفى) ... بس أوع يكونوا هم ذاااتم مزورات !


الاخبار


تعليقات 14 | إهداء 1 | زيارات 5770

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#190600 [sudani]
0.00/5 (0 صوت)

08-05-2011 10:06 AM
ما بشبش منتحل صفة رئيس جمهورية فى زول سأله؟؟؟؟؟؟؟


#190104 [احمد قريب الله]
0.00/5 (0 صوت)

08-04-2011 10:50 AM
استاذ / جبرة

والله المسالة محيرة جدا جدا جدا , الشي الغريب ما قصة الطبيب المزور لانو يمكن يكون قريب واحد من الجماعة و قرن , الشي العجيب قوة العين حقة الجماعة ديل , ياخي ذرة بتاعة اختشا مافي ,.


#190087 [أبورماز]
0.00/5 (0 صوت)

08-04-2011 10:04 AM
قلت لى يا جبرا طردوهو ورجعوهو أيام إضراب الأطباء .... يعنى تابع للكتيبه الإستراتيجيه ... لو الحكايه كده أطمن أمو وأقوليها ولدك ده الحبه ما حا تجيهو إنت بس أرقدى قفا وخلى الناس تشوف شغلها .....


#189981 [طاهر زلنطحي]
0.00/5 (0 صوت)

08-04-2011 01:20 AM
ود جبره هو مدير التأمين الطبي ذاتوووو خريج بالعافية من مصر ياخ ده زهج استاذة الطب بغباءه وبلط في كلية الطب 13 سنة في النهاية زهجوا منو وخرجوهوا قال الجابري قال ، اما الطبيب المزيف ده فهو من حي الداخلة والغريبة في لوحته مكتوب انه حاصل على الزمالة لكن من وين ماااااعارف .

;( ;( ;(


#189937 [yahia ]
0.00/5 (0 صوت)

08-03-2011 11:52 PM
واللة فكرت . وتاني فكرت .ببساطة كدة لما الراجل دة اول مرة طردوة طردوة من وين مش من نفس المستشفي خلاص بس يعني حاول يبقي طبيب وطردوة بس للحد دة كدة وانتهي يعني انا امشي اي مستشفي واعمل فيها طبيب ويمكن اعمل لفترة لما ينقشوني بس بطردوني وخلاص وبعدين مفترض بعد سنين الخبرة دي وما تم كشفة الا ببلاغ ال.........(استغفر اللة اني صايم ) دي اكبر شهادة علي انو ممكن يبقي دكتور استروة يا جماعة وخلوة يواصل لانو ذي النوع دة البخدم كويس


#189877 [hajabbakar]
0.00/5 (0 صوت)

08-03-2011 07:26 PM
اذا كان عمر البشير مزوراتى وزور فى شهادة الارض واستلم قطعة ارض بالتزوير والكلام هذا ورد فى مقال قراءه الكثيرون
اذا كان حاميها حراميها البحميهو يزور شنو والبلد كترو فيها المزوراتية


#189855 [محمد حامدى]
0.00/5 (0 صوت)

08-03-2011 06:25 PM
هسع يقولوا ليك امريكا ذاتها فىها ناس بينتحلوا صفه طبيب وبيشتغلوا 9 او 10 سنوات ومافى زول عرفهن- تجى تقول لى عطبره و6 سنين وبعدين فى اشاعه بتقول ليك الزول ده شاطر شطاره مبالغه وكان احسن يخلوهو ويدوهو شهاده وخلاص-هسع مصطفى عثمان شغال كل حاجه مرات عسكرى مرات فى اتحاد نساء السودان مرات بتاع كوره والاسنان ديه بس عاضى بيها فى الحكومه-


#189849 [سودانى جدا]
0.00/5 (0 صوت)

08-03-2011 05:57 PM
ياجبرة انا طبيب وللامانة غير مزور عملت لسنوات فى ولاية نهر النيل قبل ان استقيل من الوظيفة - ياسيدى انا اعرف جيدا وزارة الصحة بنهر النيل فالوزيرة قريبة مدير عام الوزارة وهو الذى رشحها لهذا المنصب والسبب واضح - مدير عام الوزارة هو نفسة مدير التامين الصحى بالولاية ورئيس نادى الامل عطبرة و---------------- واللة الوزارة دى فيها فساد لايستطيع اى مقياس تقديرة- معلومة اطباء مستشفى عطبرة كان يفوق عددهم الاربعين اكثر من ثلثى العدد هذا استقال ففتح الباب امام كل من لدية الرغبة بممارسة المهنة كذلك اضرابات الاطباء قبل عام تقريبا جعلت ادارات المستشفيات تستعين بكل من هب ودب لاكمال النقص وذلك بمباركة المدير العام دكتور امين الجابرى ومساعدة المخلص دكتور سمير احمد عثمان


#189790 [ابو امين]
0.00/5 (0 صوت)

08-03-2011 04:04 PM
يا استاذنا عاوز تفتح للناس ديل باب بتاع جباية جديد اسمو الهيئة السودانيه للتخصصات الصحية عشان يطلعو روح الخرجين بمعادلة شهاداتهم ذى ما بحصل فى السعدية ودول الخليج بس على الاقل هناك شغالين بضمير وبمتحن الناس وبقيموهم على حسب نتائجهم لكن جماعتنا كان عملها حا يعملوها اكيد بعد كلامك ده بس بهتموا فى موضوع الجباية والنقاطه الطالعه منها والحال حايمشى للاسوء لامنى شهادات المعادله الصادرة منها حا تتباع بالسق الاسود وعلى عينك ياتاجر وبعدين تعال عليك الله اخير تموت على يد طبيب مزور ولا طبيب ماناقش لانو المزور ده على الاقل خبرة ساى امكن تصادف معاهو


#189773 [يحيى العمدة]
0.00/5 (0 صوت)

08-03-2011 03:23 PM
الاستاذ /جبرة
الظاهر انه الراجل (الطبيب المزور الذى قضى 6 سنوات وكمان يتطوع حينما زملاؤه يضربون عن العمل اولا لابد ان نسال قبل ما نظلم الراجل كم عدد المزورين فى هذه البلد وهل يتعرض جميعهم لما تعرض له الراجل المتطوع دا ؟كم عدد الصيدليات المتجولة والتى تبيع عل عينك يا تاجر وبالمكرفونات فى مناطق الزحمة ؟ طيب سؤال ثانى ممكن يكون الراجل متطوع دفاع طبى بعنى با جبره انتو دققتوا فى بطاقته ولا الراجل القلته مدير طبى وباخد ماهية وامتيازات وماكل قروشنا يطلع لينا بعد 6 سنوات ويقول لينا اكتشفت طبيب مزورا وكان الطبيب من الفيروسات الدقيقة التى لا يمكن رصدها الا عبر المايكروسكوب ؟
بالله عليك يا جبره من اولى بالبوليس المدير الطبى ولا المزور واذا كان مديرنا الطبى انسان سوى لقدم استقالتة مع التصريح ، مع اعتذار لجماهير الولاية ؟ ثم اين الوالى ولناذا لا يقيل هذا المدير الطبى هل هنالك جرم فادح اكثر ضررا من الاهمال ، وكمان الاهمال فى حياة الناس . يعلن الخبر وكانه اكتشف مصلا لعلاج السرطان او الايدز


#189741 [سودانى ]
0.00/5 (0 صوت)

08-03-2011 02:42 PM

والله السودان دة حيرنا زاتو المناصب دى بتجى لاصدفة ولا كيف تصريحات غريبة يارب تستر على اهلى الغلابة


#189740 [mohamad]
0.00/5 (0 صوت)

08-03-2011 02:37 PM
شر البلية مايضحك
طيب صاحبنا المدير دة وجماعتو الذين هو مدير عليهم , القاعدين ليها شنو ؟؟ ليه بس ياخدو فى مرتبات وامتيازات و..و.. طالعين ونازلين و... بيعملو شنو؟؟؟؟
كان الله فى عونك يا شعب .


#189724 [محمد احمد]
0.00/5 (0 صوت)

08-03-2011 02:15 PM
رمضان كريم..يا جبرا سخنت علينا رمضان رغم التكييف المركزي
مواطن مزور ليه حاجبين اسمو ولا اسمو برضو مخفي زييو لمن لافي في المستشفي دي 6 سنين ومافي زول سالو اصلها مايو كلينك اكيد في مستشفي عطبره ما بيكون في اكتر من 10 دكاترة الا غايتو يكونو كلهم مزورين عشان كده مافي واحد بيهبش التاني
وتعرف يا جبرا الدكاترة الما مزورين في السودان هم ذاتهم بقو مزورين لا بكشف عليك بامانة ولا بديك من وقتو وتلقاهو بيتكلم بالتلفون وهو بيكشف عليك يمكن المزور يمون احسن علي الاقل بيقرا في النت شوية عشان ما يتكشف وزملانو الدكاترة ما كشفوهو لانو بيكون بيعرف اكتر منهم


#189702 [الزول الكان سمح]
0.00/5 (0 صوت)

08-03-2011 01:32 PM

يا أستاذ جبرا

كدى خلينا من المديرالطبى ومدير عام وزارة صحة الولاية....وينو وزير صحة الولاية ووكيلو ...ووينو وزير الصحة الإتحادى...الموضوع ده إتكتب فيهو مرات عديدة

وبعدين يا ( شيخ جبرا ) عايز أقول ليك هى جات بس على المنتحل ده بس؟؟ ما المنتحلين كتااااار . من فوق لى تحت ...فى زول قال ليهم إنتحلتوا لييه؟؟

والله قصة غريبة الشكل


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة