المقالات
السياسة
قطر البضاعة كمان مكندش يا حريف !!!؟ (قصيدة)
قطر البضاعة كمان مكندش يا حريف !!!؟ (قصيدة)
12-23-2015 08:34 AM


قطر البضاعة كمان مكندش يا حريف !!!؟ (قصيدة)

فد يوم بعد ما داس علي شرف الحروف
كان في الجزيرة بيوقدوا نار المهرجان
كرسيه فوق جثث الكلام..
والعرضة فوق نفَس المداد ..مزيكة بتشيع صحف
والحفلة في نص الركام..
مشروع عزيز..سكنه الخراب والغاز صفوف
بنزين صفوف..والعيش صفوف
في نشوة السكران وقف
قايل خلاص ..الأمة ناقصة الحنة مادين الكفوف
قمبور طويل فوق كل راس..وريالة جارية وما بتقيف
ذاكرتنا زي غربال بقت..صفاية ناسياها الوعود..
بيع الأصول.. بيع السفن ..بيع الخطوط..سكك الحديد
كشف المعاشات القبيل..
خرد المصانع والصقَر.. والعنكبوت سكن المَكَن..كل الحروب..
والانفصال ..وبكانا بالدمع السخين لما الدمار فات الحدود
لما الوطن بقى زي جحيم .......والكفاءات هاجرت..ومتين تعود؟
في نشوة السكران وقف
والمهرجان بقى سوق كلام
قال الجزيرة تعود أخير بي عشرة مرات من زمان..
والمواهيم صفقوا..واللصوص تكبير وتهليل ..
في سبيل الله قمنا..للعطاءات قد كسبنا..
والخزاين .. والحسابات بره بتزيد في أمان
والمهرجان بقى سوق كلام
حنصلح السكك الحديد..عرباتا تبقى مكندشة
مافيش مراسل قام سأل..
المعنى إنه الكان زمان.. ضيعته شان الحر شديد؟
عرباته شينات ما بتليق ؟ وخطوطه ما (استايل) أكيد ؟
قطر البضاعه كمان مكندش يا حريف؟
سواقه من خارج الحدود .. راجل ظريف لابس نضيف ؟
ما بشيل ملوحة ولا كجيك..لا ويكة يرفعا من رصيف ؟
عرباته باردات ما بتشيل ..
غير صندلية ومحلبية....والقماش بس قرمصيص؟
باردات عشان شحنة كريمات ما تسيح؟
شان المذيعات يرقشن ..والبنات يتعرسن..
لا زرقة ظاهرة ولا غباش..؟
والمهرجان بقى سوق كلام
ما فيش ولا واحد سأل ..
ما فيش ولا واحد سأل
ما فيش ولا واحد سأل.
معمر حسن محمد نور
23/ ديسمبر 2015

[email protected]


تعليقات 1 | إهداء 0 | زيارات 2135

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1389482 [سوداني حتى النخاع]
0.00/5 (0 صوت)

12-23-2015 08:54 AM
لافض فوك يا معمر. كلام شعري رصين وفي الصميم.
عبرت بصدق وأوفيت.

[سوداني حتى النخاع]

معمر حسن محمد نور
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة