الترزي
08-15-2011 11:29 AM

ساخر سبيل

الترزي

الفاتح يوسف جبرا

الحياة بقت صعبة.. كان لابد من وضع أولويات.. العلاج أولاً (عشان الزول ما يلحق أمات طه)، الغذاء ثانياً (عشان الزول يوفر حق العلاج)، التعليم (عشان الأولاد ما يصيعوا) ثم في آخر القائمة (اللبس) وما أدراك ما اللبس، فمع قسوة الحياة وكثرة المصروف مع ثبات الدخل تبدلت أحوال المواطن السوداني، فبدلاً من ذلك الزول النضيف القيافة أصبح آخر بشتنه وبهدلة..!
وكيف لا (يتبشتن) و(يتبهدل) إذا كان الزي الوطني متوسط الخامة (سروال وعراقي بلدي وجلابية وعِمّة وطاقية) تمنهم يقارب من التلتمية أربعمية ألف!! ده غير (المركوب)..!
في زيارتي الأخيرة للإمارات العربية كانت معظم الهدايا التي منحنى إياها أصدقائي هناك (مشكورين) عبارة عن (أقمشة جلاليب)، وقد سعدت بها كثيراً لسببين، السبب الأول أنها ذات نوعية عالية الجودة بينما الأقمشة الموجودة بأسواقنا (تعبانة) بل رديئة، والسبب الثاني أنها مع رداءتها غالية الثمن وأسعارها ليست في متناول اليد (هو شنو البقى في متناول اليد؟).
لأن معظم المهن أصبحت غير مضمونة (وممكن سوّاق ركشة يبقى دكتور)، فقد تركت أمر تفصيل هذه الجلاليب حتى أطمئن للترزي الذي سوف أسلمهم له (يقوم يطلع نقاش) ويبوظهم، ومن فرط تركي لهم طيلة هذه الفترة قد كدت أنساهم لولا أن المدام كلما مرت بالكيس الذي يحتويهم كانت تقول لي (إنتا الجلاليب دي خاتيهم لشنو؟ ما توديهم الترزي).
قبل أسابيع سألت صديقي (لطفي) إن كان يعرف ترزياً شاطراً أجابني بأنه سوف يستفسر ويجيبني، أول أمس كنا معاً في أحد بيوت العزاء قام (لطفي) بالسلام على أحد الأشخاص الذي كان يرتدي (جلابية وعِمّة وشال) في غاية الأناقة ثم همس في أذني:
- ده أشطر ترزي في السودان.
- أجبته: ما هو واااضح.
تركني (لطفي) وذهب لأمر ما فوجدتها فرصة لأتجاذب أطراف الحديث مع أخونا (الترزي)..!
- كيف عاملين مع العيد والشغل؟
- والله زحمة شديدة خلاص.
هنا يرن هاتفه.. فيجيب:
- كل شئ تمام يا سعادتك.. لا لا ح أفصلو ليك زي ما عاوز وح يطلع مظبوط مية المية وبالمواصفات الإنتو طلبتوها!
بعد أن انتهى من محادثته قال لي متأسفاً:
- معليش ده رئيس المجلس التشريعي.
- هنا قلت لنفسى لا كده خلاص وكت الزول ده بيفصل لرئيس المجلس التشريعي أكيد ح يكون بيفصل لرئيس المجلس الوطني ذاتو واحتمال يكون بيفصل لي ناس مهمين تانين فانتهزتها فرصة وخاطبته قائلاً:
- المحل بتاعك وين يا أستاذ لو الواحد عاوز يسجل ليك زيارة؟ (بالمناسبة كلمة أستاذ ممكن تقولا لأي فنان واعد)..!
أجابني وهو يرتشف من فنجان القهوة الذي أمامه وهو يضع رجلاً على رجل:
- والله أنا بكون في المجلس التشريعي طوااالي، لكن عندي شغل خاص في عمارة المحامين.
قلت في نفسي.. والله معلم (تفتيحة) شغال على المضمون يعني بس لو فصل لي ناس المجلس ديل والمحامين المعاهو في العمارة بس كفاية عليهو..!
أخرجني من تفكيري (لطفي) وهو يعاود الجلوس مرةً أخرى ويخاطبني في همسٍ:
- إن شاء الله إتعرفتا على الأستاذ؟
- أيوه وبكرة ح أودي ليهو الجلاليب.
- (متعجباً): جلاليب شنو إنتا جنيت؟
- (مندهشاً): ليه؟ هو ما ترزي؟
- هو ترزي فعلاً.. وترزي ختير لكنو ما ترزي قماش!
- ترزي شنو يعني؟
- ترزي قوانين..!
كسرة:
قالت لي زوجتي.. أها إن شاء الله لقيت ليك ترزي شاطر تودي ليهو الجلاليب..؟
فاجبتها:
- مش قرّبت أديهم لي ترزي (دساتير)!!



تعليقات 9 | إهداء 0 | زيارات 5824

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#195810 [Abuahmed]
0.00/5 (0 صوت)

08-16-2011 04:15 PM
والله يا الفاتح جبرة حيرتنا. يااخي الترزية كتار في عهد الانقاذ. مثلا عندك في بعض الجامعات الانقاذية هنالك ترزية للبكلاريوسات( جمع بكلريوس مذكر) والماجستيرات ( جمع ماجستير برضو مذكر) والدكتورات (جمع دكتواه مؤنث)

قبل فتره تفاوض مع وزير ولائي ( هو ما انقاذي ولكن من الذين تالفت قلوبهم من الاحزاب الاخري) علي كتابة رسالة ماجستبر مقابل توظيف احد اغربائي. عشان كدة كل وزراء الانقاذ ومنوسبيها اصبحوا دكاترة.
ياخي البلد جاطط علينا ماعرفين الترزية من بتاعين الشرز.


#195752 [محمد محمدين]
0.00/5 (0 صوت)

08-16-2011 02:47 PM
والله أخونا جبرا (خِبرا) بعد كده ما تقدر تفصلهم لو دفعت راتبك كله لأنه الوقت زنق بالمناسبة نحن في الرياض بالسعودية صار الترزية عندنا (بنجلاديش) والله بدون مزح وبسعر أقل من السوداني مرة وديت لي جلابيتين حسب الوصف فوجدت الترزي بنجلاديشي فقلت أين السوداني قالي ما في سوداني ووراني كمية من الجلابيب المفصلهم للزبائن وكان في فعلاً مغري جداً شغل وسعر ووافقت على طول بعدما أخذ المقاسات مني وحدد لي يوم الإستلام، فتح درجه وطلع كيس تمباك وسفّ ليه سفة كبيرة .. والله ضحكت وقلت أكيد اللي علّمه الخياطة كان بسف ..


#195436 [wedhamid]
0.00/5 (0 صوت)

08-15-2011 09:33 PM


يــا أسـتـاذ جبره .......تحيه ......

انا عرفت الترزى دا ......مش اول حـرف من اسمو ع ب د ا ل ب ا س ط س ب د ر ا ت صح؟؟؟؟؟


#195276 [زوول]
0.00/5 (0 صوت)

08-15-2011 02:39 PM
اخونا جبره ربنا استر على البد من الترزيه الجدد الذين فصلوا جلباب البلد المهترى على حسب امزجتهم الخرقاء وضاعت معهم كل المعالم !!!!!!!!!!!!!!!!


#195259 [zahi]
0.00/5 (0 صوت)

08-15-2011 02:15 PM
بي دستوركم ........


#195248 [لطفي سعد احمد]
0.00/5 (0 صوت)

08-15-2011 01:47 PM
كان تديها ليهو يمكن كان غيرت لينا مسار السودان للافضل


#195201 [ابوعزيزه- مسقط]
0.00/5 (0 صوت)

08-15-2011 12:36 PM
الله يخليك لينا يااستاذ طلعت روحي من الضحك لانو امس كنت في الترزي ( هندي) وواحد لكل ناس مسقط ورفض يستلم مني القماش وقال لي اتاخرت شديد وبعد تحنيس ورجاء وافق على مضض فتحت النت القى مقالك كمان عن الترزي


#195197 [الزول الكان سمح]
0.00/5 (0 صوت)

08-15-2011 12:32 PM

يا أستاذ جبرا

الترزى ده ...مابفصل دساتير وبس...ده بفصل دساتير ..وترابيس... وطِبل ...ومفصلات و طاقات..وكراسى..وكنب..وحصالات..وبصلح السراير..ويكرب العناقريب

جلاليبك ديل وديهم لى ( نُقُـلِتى) أحسن


#195175 [l120]
0.00/5 (0 صوت)

08-15-2011 11:59 AM
خطيييييييير يا جبرة ربنا يخدر (يخضر) قلمك . واحلي حاجة الكسرة .


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة