المقالات
السياسة
ارشيف مقالات سياسية
خرج الطيب سيخة و لم يعد حتى الآن
خرج الطيب سيخة و لم يعد حتى الآن
08-19-2011 05:20 AM

خرج الطيب سيخة و لم يعد حتى الآن

شريفة شرف الدين
[email protected]

كدي النسألكم من الخير .. ما حدن فيكم خابر شيئ عن الطيب إبراهيم محمد خير المعروف بـ: الطيب سيخة .. الراجل ما لقى العافية من يومات فلت بجلدو من وقعة الطيارة بتاعة الزبير و أروك طون .. عايزاكم تركزوا معاي في الإحتمالات:-
1. لأنو الراجل كان شاهد عيان و كان طلّع المستورة بتتلخبط الكيمان خصوصا إنو موت الزبير لحدة الليلة دي فيها حاجات كدي ما واضحة و أنحنا ديل كرأي عام .. يموت نائب رئيسنا و ما يملكونا أية معلومة .. يا جماعة الإنقاذ كم بقينا في عيونكم ضان برضو شوية شوية علينا و بيني و بينكم إنتو الدفنتو داك هو و لاّ (حاجة) تانية؟ أصلي أنا قابلت واحد الشبه الناطق من الزبير .. بس ده لا بودي و لا بجيب... يعني ما منو خطر.. جنّو يدندن بعابر طريق لأبو اللمين.

2. يكون لمن صراع الديناصورات بدأ جوة (زريبة) النخبة .. كل ديناصور حبّ يلعب بجوكرو (يعنى الورقة الرابحة) و الطيب سيخة القايل نفسو ديناصور كشف ورقتو فغطسو حجرو بحبة خلتو يمسح أية حاجة متعلقة بـ( إنقاذ – طيارة – الزبير – مؤامرة – تصفية – العرّاب (العراب دي دهن ما واضحة و ما داير ليها فهامة) و ينشّط بدل العبارات دي حاجات زي (أنا دايرسَلَطة بدل أنا داير سُلطة و سرير بدل وزير يعني يا جماعة الخير كان لقيتو ليكم واحد لسانو فالت بكلمة سلطة و سرير .. اعرفو طوالي إنو ده الطيب سيخة و ما تعتمدو على ملامحو لأنو ما بقى منها حاجة و بدل السيخة بكون شيلوهو ايسكريم). بس الله يستر ما يكونو أدوه الحبة ديك .. الحبة اللي زول لمن يبلعا بتبقيهو عميان طرشان بكمان.


3. يكون لقى جزاء سنمار (الناس الكبار أشرحو للناس الصغار منو يبقى سنمار ده).. طبعا بعدما قتل زميلو بولاد في تمرد دارفور لأنه الجماعة معتبرنو (دسبوزل) يعنى إستخدام مرة واحدة لغرض محدد ثم يرمى و في حالة الطيب سيخة دي .. ممنوع حتى يعملو ليهو (ريسايكل) (يعني إعادة تصنيع) .. سبحان الله .. شنو البشتنة الشافا الراجل الكان ليهو شنة و رنة يومات كان وزير للخدمة العامة و زياراتو (المفاجعة) ديك

4. يكون مرضان شديد و مسكين ما لاقي حق العلاج .. طيب في الحالة دي ما توضحو لينا عشان نعمل حق اللزوم (يعني كَشِف) و كلمة كشف ذاتها عندها تلاتة معاني المعنى الأول كشف الدكتور و ده أنا ما قاصداهو و المعنى التاني معناه الرقيص بالكتفين و الرقبة وسط دائرة الشلة و طبعا ده برضو أنا ما قاصداهو – يعني كيفن نرقص ليهو و هو عيان؟ ما بتجي؟ ما ممكن.. مش كده؟ المعنى العايزاهو يعنى نعمل ليهو تبرعات عشان يقدر يقابل نفقات القطن و الشاش و الحقن و يدفع بالمرة فواتير الكهرباء و الموية .. ما هو ده الواجب برضو.. معقولة بس نقصر؟ الجيران حيقولو شنو؟ و انحنا كرامتنا ذاتها ما بتسمح نشوف لينا وزير تعبان .. و المسامح كريم.

5. عاملين ليهو إقامة جبرية و قاطعين منو الإتصالات .. لا يزور و لا يُزار و حاجاتو بتاعة الضرورات اليومية الدايرها برسلوها ليهو (ديليفري) عن طريق ماسورة كبيرة من النوع البودي لكن ما بجيب.

6. يكون في إجتماع من الإجتماعات استفزوه و طلع ليهم سيختو فرفدو .. لكن كم عملتها إنت الغلطان يا الطيب الياريتني أقدر أقول ليك يا أخوي .. حكاية السيخ و المرق العنقريب و قالب الطوب دي كلها إنتهت من زمان و بعدين الإعلام ما حيقدر يهضما.. حسع فيه أساليب تانية معاصرة .. آي هي تقدر رخوانة شوية لكنها فعالة .. تقدر تقول زي تكتلات سرية .. أو تحفر لخصومك تحت تحت .. أو تلبسهم قضايا ما يعرفو راسها من قعرها و القائمة طويلة.


7. يكون زعلوه و قام حِرِد أية حاجة.

8. يكون طلق السياسة طلاق تلاتة و نزل بيزنس بالتقيل و مرطب آخر طرطيبة و كابي زوغة شديدة من الإعلام و الفضوليين.

لحدت هنا أنا كملت الإحتمالات بتاعتي .. في إنتظار احتمالاتكم و برضو عشمانة تجيبو لينا طاري الراجل الطشا أقصد الطششو.
حاجة قبل الأخيرة .. كده أسالوا لي عن واحد برضو كان اسمو .. اسمو .. اسمو .. اسمو يا ربي .. غايتو كما خانتني الذاكرة اسمو حاجة كده إبراهومة إيدام نايل عشان نلم الجهود و تفتيشنا ما ينبهل.

حاجة أخيرة أسأل الله ببركة رمضان ربنا يدينا الصحة و العافية و يقبل صومنا و صلاتنا و يغفر لينا و يتوب علينا و يشوفنا وجهو الكريم و ينعم علينا بشوفة النبي في الجنة يا منان يا رحيم .. ربنا يغفر لوالدينا و لوالد والدينا و يسدد ديونا و يفرج همومنا و يشفي عليلنا و يدينا الأمن و الأمان و يشيل لينا ناس الإنقاذ كلهم و يبدلهم بآخرين سمحين صادقين أمينين وطنيين عادلين حقانيين .. اللهم آمين يا رب العزة


تعليقات 16 | إهداء 0 | زيارات 6551

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#197913 [المسيرى]
0.00/5 (0 صوت)

08-21-2011 01:09 PM
بر اكيد من شخص قريب الطيب سيخة اقاد انو الطيب فى البلد انقطع للعبادة وربنا يشملوا بى رحمتوا وم تاب تاب الله عليه


#197535 [ناجي]
0.00/5 (0 صوت)

08-20-2011 01:54 PM
اغرب حاجة أنهم صاروا يلقنوا لتابعين لهم من طلاب الجامعات أن كادرهم الفكري والسياسي د. التجاني عبدالقادر حامد ( شيوعي) ... فقط لأنه غادر قطار الضلال بتاعهم دا منذ 1996 أستاذا في الجامعات الأمريكية ثم في مملكة البحرين ... ويفسر آيات القرآن قيكشف عوراتهم كأن تلك الآيات قد نزلت مفصلة علي هؤلاء الظلمة القتلة.


#197516 [كمال أحمد]
0.00/5 (0 صوت)

08-20-2011 12:51 PM
أعرفه منذ كنا طلاباً فى جامعة الخرطوم فى السبعينات من القرن الماضى. لم يجنده بولاد فهو قد جاء مجنداً من الثانوى الذى لم يزامله فيه بولاد. آخر منصب رسمى تقلده كان وزير رئاسة الجمهورية وعمل بعده فى حزب المؤتمر الوطنى ثم تفرغ منذ مدة لإعداد رسالة الدكتوراة. يدير الآن معهد إسلامية المعرفة الكائن فى الركن الجنوبى الشرقى من الساحة الخضراء، وللمعهد نشاط راتب ونشر للمعرفة فى منهجية المعرفة الإسلامية. وحسب علمى أنه (نصيح) وما به من مس أو جنون. وعلى الكاتبة والسادة المعلقين إلتماس أساليب أكثر جدية فى المعارضة لتنضج التجربة السياسية السودانية، فالتجربة لن تنضج إذا كان كل اطرافها يصرون على السلبية. فما دام المعارضون يرون أن تذهب الحكومة، فما هو الخيار الفاضل الذى تطرحه المعارضة أو كل من لا يريد الحكومة؟ قطعاَ لن يكون ذلك بإختلاق الخيال والتمنى وسب ولعن الظلام بينما نعجز عن إيقاد شمعة واحدة.


#197457 [مراقب بعين واحدة]
0.00/5 (0 صوت)

08-20-2011 10:46 AM
وكأني بالطيب وقد قرأ هذا المقال وأطلق تنهيدة عميقة ثم قال (اللهم إني صائم) ;( ;( ;( ;(


#197363 [خالد حسن]
0.00/5 (0 صوت)

08-20-2011 12:55 AM
ببركة هذه الايام نسال الله ان يبقيه علي جنونه وان يحشره وكل إنقاذي قاتل سارق دجال معذب لشعبه مع هامان وفرعون
حتي الذين ماتو منهم ناس الزبير وشمس الدين نسال الله ان يعذبهم في قبورهم علي ما اقترفوا في حقنا وان يلحق بهم البشير ونافع والترابي وكل إنقاذي وكوز


#197301 [مندي]
0.00/5 (0 صوت)

08-19-2011 08:23 PM
يا تري ما الذي جنن عبد القادر؟


#197233 [عبدالواحد المستغرب جدا!!]
0.00/5 (0 صوت)

08-19-2011 04:31 PM
ياشريفة المسألة (ما هى كيميا ولا هى غلوطية!!) ولا تحتاج لفهامة المسألة وما فيها،علينا أن نطرح بعض الاسئلة من نوع من الذى خطط لاغتيال الرئيس المتنحى حسنى مبارك ؟ وماذا كان يشغل وقتها ثم الدبلماسيين السودانين وكانوا وقتها من المحسوبين كقوات صديقة ولكن بفقه (الضرورة ليها أحكام او بالاحرى تبيح المحظورات )نفس اليد الاثمة إمتدت اليهم وقتلتهم !!والاغرب ان التحقيقات بقصد لم تسفر عن اية نتائج حتى يومنا هذا كشأن كثير من القضايا التى كنا نسمع عنها !! ثم مقتل الزبير ورفاقه فى طائرة الموت وربما لم يكن المقصود الزبير فى شخصة لكن فقه التمترس الذى يبيح قتل كل من كان فى دائرة المستهدف يسمح بذلك وخاصة أن خلو الوظيفة التى كان يشغلها الزبير كانت مطمعا للذين خططوا لقتل ركاب الطائرة المنكوبة وكانوا يرون انهم الاجدر وفعلا نالوا مرامهم بخلو الوظيفة من شاغلها بسبب الموت ، و(بفقه)00كاد المريب يقول خذونى فلم يتأخر الفاعل الاصلى او القاتل الاصلى فعوض إبن المقتول فورا جزاءا وفاقا على حسن صبره ولان الحى ابقى من الميت (كريمته) ووهبهما قصرا فخيما لعل هذه المكرمات تنسيه والده وتندمل الجروح


#197176 [النجيض ..]
5.00/5 (1 صوت)

08-19-2011 02:54 PM
طبعا ..الطيب سيخة عنصر فاعل في الانقاذ وليس مثل صلاح كرار ولا سليمان محمد سليمان أو محمد عثمان محمد سعيد ولا هو مع الترابي ..ولم يخرج من زريبة العصابة الا لانه أراد أن يستعمل قرونه أكثر من الحد المسموح به. ولذلك الدوائر العليمة تقول أنه دبروا ليه أخراج فيلم ( علمي ) مع حمامة في تجربة مباشرة وقالوا له مع السلامة والا الشريط سيعرض في سينما الحلفاية !
وبعدين شريفة ما تورينا ..صورتك ولا انتي منقبة.. وعلي فكرة اخبار ااستيلا شنو ؟ ان بعض الظن .. اسم ولا أقول أثم ولو ترجم الي شمالي..


#197155 [wahied]
0.00/5 (0 صوت)

08-19-2011 02:10 PM
ظلم العباد لا ينتهى بالتقادم الطيب سيخة كان آخر واحد فى الثلاثى يلقى حتفه السياسى يقال انه كان عامل ليهم خميرة عكننة ولديه اسرار كان يساوم بيها الجماعة فى حالة اختلفوا معه ويهددهم بافشائها فقام هؤلاء الثعالب بتنظيمه وعماوا فيه عملة يقال انه اصبح لا مجنون ولا نصيح مصاب بحاجة اسمها ( الانـدراوة ) وهذه اخطر من حالة الجنون ولا علاج لها الانقاذ يا بنت شرف الدين فيها ألغاز كثيرة وخطيرة وكلها سوف تظهر يوم زوال هذا العهد الدكتتاورى سوف تظهر كل هذه الجرائم والفضائح - الكيزان يقتلوك ويمشوا فى جنازتك . الكيزان يقتلوك ويعرسوا زوجتك اذا كانت جميلة . الكيزان يعملوا السبعة وذمتها فى سبيل البقاء فى كرسى الحكم . هؤلاء درسوا الاجرام وكيفية معاملة المعارضين وتصفيتهم من أكاديمية ايـران بطهران . المهم لقد انكشف لنا الان لغز محاولة مقتل الرئيس مبارك فى التسعينات والذى نفته الحكومة اولا جملة وتفصيلا وباقى تفاصيله مع د/ على الحاج المتهم ببلع ملايين الدولارات من طريق الغرب ولا زال ممسكا بهذا الملف مهددا ومتوعدا . المهم يوم زوال الانقاذ سوف تعرف الالغاز الثلاثة مقتل الزبير وابراهيم شمس الدين وجنون الطيب سيخة وباقى المستـــــــــــــــور .


#197132 [الباشا]
0.00/5 (0 صوت)

08-19-2011 01:08 PM
من المعلومات الاكيدة آخر مرة ظهر فيها الطيب سيخة كان فى مناسبة عقد قرانه على فتاة عمرها 23 سنة بالقضارف و طبعا دى كانت زيجته الثالثة و الله يعلم يمكن الراجل اللآن أكمل النصاب بالرابعة - الكيزان عندهم هوس بالنسوان - الله يفقع مرارتهم كلهم 0


#197128 [بت الخرطوم]
0.00/5 (0 صوت)

08-19-2011 12:51 PM
اللهم لا شماتة ربنا يشفيهو ان كان مريضا فالانسان لا يضمن نفسوا الى يدخل قبرو وان كان مرطب فى ماليزيا او تركيا او فى اى بقعة فى العالم فنقول ليهو ربنا يمهل ولا يمهل


#197119 [مازن]
0.00/5 (0 صوت)

08-19-2011 12:10 PM
يعيش الطيب سيخة مرتاحا ومرطبا في كوالا لامبور بماليزيا وقبل فترة إنتبه بعض الطلاب السودانيون الدارسون هناك إلى وجودهم معهم في صلاة الجمعة بأحد المساجد فحاصروه بالأسئلة وقاموا باستفزازه فاستقل سيارته وهرب منهم.


#197117 [عبدالعظيم الهجا (الكاس)]
0.00/5 (0 صوت)

08-19-2011 11:59 AM
اللواء الطيب ابراهيم محمد خير الراجل دا بقى درويش ساكت وهسة ساكن فى شمبات
بقى مجنون عديييييييييييييييييييييييييييل


#197112 [كشف حال]
0.00/5 (0 صوت)

08-19-2011 11:33 AM
(يا أستاذه منو القال ليك كشف 3 معاني فقط في معنى رابع

(((و كلمة كشف ذاتها عندها تلاتة معاني المعنى )))

الرابع كشف الحال ، وناس الصحافة ديل بقوموا بالواجب بس ادوهم راس الخيط علشان يعملوا ليه ( كشف حال) جماعي الما عارف يحدث العارف وينكشف المغطى كله كان ليه ولا كان عليه .. الزول ده الله اداه عمر طويل وفاجئهم لمن جا حصل الصلاة على المرحوم وكمان في الصف القدامي ولا هو امكن اساسا ما مشى ورفض الخطة .. واستفغر الله استفغر الله ادوه كهرباء كدا 1000 واااااط ولا أمبير وشحنوه بي طاقة تانية تودي فقط ( (للسجاجة ) منها يسبح ومنها يسطح ...

الله يكضب الشينة بس حبيت اوضح ليك انه في كشف رابع ( كشف الله )


وعقب بجيك صاد اذا لقيتو طرف الخيط كلمونا علشان نجي نشارك في الكشف نحن ناس واجب برضو


ردود على كشف حال
Sudan [ضحوي] 08-21-2011 01:39 PM
بالله عليك الصحافة بتعرف كشف حال ؟؟؟ لوكان بعرفوا ماتقوم به سودابت والله يندي له الجبين كتب قبل ايام سام بقول في فضائح وفظائع يندي لها الجبين وكشف الحال الانت بتقول ده اصبح لا يهم زبانية سودابي لانو الواحد شدت ما خم من اموال الشعب اصبح لا يهمة رب ولا مربوب ولا فضيحة ولا غيره هل تصدق انه موظف سواني في اقل من سنه يسحب من سودابت وبمباركة الادارة سلفيات تتجاوز الستمائة مليون بالقديم من ةين يسددها وباي حق يجعل هذا غنيا لهذه الدرجة اليس في السودان رجال اليس فيه من يشفق عليه من هذه العصابه المامعروف جايه من وين
لو كان في كشف حال فهم اولي به لو مانهبوه خلال ثلاثة سنوات جدير يغيير وجه الخرطوم ان كان لها وجه اصلا
ويا ناس الصحافه لو دايرين تكشفوا حال سودابت وما تفعله بالشعب السوداني وبماله ردو علي علي هذا الموقع وانا متابع وبعرف كيف اوصل ليكم اصلو الما بخاف الله خافو اصلو عندنا ناس سفروهم الصين بلا عوده والباقي تمو


#197088 [عثمان محجوب الصاوي]
0.00/5 (0 صوت)

08-19-2011 09:51 AM
و الله يا شريفة يا اختي كان ما اخاف الكضب زولك دة اول مسمار في نافوخو حلجوهو ليهو لمان اجبروهو يكتل داوود بولاد بي نفسو - طبعا انتي عارفة انو داوود بولاد هو الجند سيخة (للحركة الاسلامية) في الجامعة - اها باقي باقي الصواميل اتحلجن في (كتلة) الزبير ( و تحت تحت قالوا في شيتن كبير بالحيل اكتشفو سيخة و ما قدر اصدق انو ديل الناس البقولو هي لله هي لله )


ردود على عثمان محجوب الصاوي
Saudi Arabia [جيفارا] 08-20-2011 10:35 AM

عندك كمان قوش بصور فيديو لكل المسئولين في اوضاع غير محترمة . فقالوا عرضوا ليه ملفوا الفيديو بتاعوا هو مع كرتي في وضع غير محترم

على حسب افادة واحد عضو مجلس قيادة ثورتهم سابق


#197075 [الاقرع بنحابس]
0.00/5 (0 صوت)

08-19-2011 08:05 AM
هذا الارهابى و امثاله لااحد داير يشوف خلقتهم او يعرف اخبارهم مرة اخرى.... فليذهب الى مذبلة التاريخ.........غير ماسوف عليه..وسيلحقه الاخرون الذين برزوا الى سطح الاحداث فى غفلة من الزمان !!!!!


شريفة شرف الدين
شريفة شرف الدين

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة