08-20-2011 10:31 AM

ساخر سبيل

العبث ذات نفسو !!


الفاتح يوسف جبرا

قبل حوالي (عشرين سنة) وبتاريخ 4 يناير 1991 صدر قرار السيد رئيس الجمهورية رقم 45 بتخصيص مساحة مليون و488 ألف و144 مترا مربعا لتشييد ما يعرف بالمدينة الرياضة وعلى الرغم من أن أى (شافع) في أى (روضة) يعلم تمام العلم بأن إنشاء مدينة رياضية مهما كانت مواصفاتها ليس بامر (صعب) على دولة تنتج 74 طناً من الذهب سنوياً وحوالي 400 ألف برميل (نفط) يومياً إلا أن (مدينتنا الرياضية) لسه (خرابه) بل أصبحت مرتعاً للمشردين واللصوص ووكراً من أوكار الجريمة !
وده ما الموضوع لأنو إحتمال الحكومة عندها أولويات و(المدينه دى) يمكن تكون ما من أولوياتا ... طيب الموضوع شنو .. أقول ليكم : إكتشفت وزارة الشباب والرياضة مؤخراً وجود مبان لا تمت لخارطة المدينة الرياضية التى ما زالت تحت التشييد بصلة .. وعندما تم حصر مساحات هذه المساحات التى تم (بيعها) والتى خصصت لأغراض غير أغراض المدينة وجدوا أنها تبلغ نحو (مليون) متر مربع وتحديداً (941.415) متر مربع (يعنى باعوا تلتين المدينة وخلو تلت) !!
طبعا القصة دى ما ممكن تحصل فى أى (نظام في الدنيا) .. رئيس جمهورية يصدر قرار بإنشاء مدينة رياضيه .. ويقوم المهندسون والمساحون يمشوا يمسحوا (الحتة) ويحددوا الأبعاد (بتاعتا) ويحددوا (المساحة بتاعتا) ويعملوا ليها (كروكى) يوضح جيران المدينة بالجهات الأربعة .. ويسجلوها فى الأراضى والمعماريين يقعدوا يعملوا ليها (خريطة) .. الملاعب بي جاى .. والمسابح بى هنا .. والمتفرجين بي هناك والمضمار بي جاي .. والشنو ما بعرف بي هنا .. ويتعاقدوا مع شركة ويدوها الخريطه للتنفيذ والشركة تبدأ الشغل ... وبعدين وزارة الشباب والرياضة التى يتبع لها هذا المشروع تفاجأ بأن (تلتين المدينة) إتباع !!
لعلك عزيزى القارئ قد إندهشت ونفسك تسأل (البيع ده حصل كيف) ؟ مصلحة الأراضى دى بتبيع وبتسجل ساااكت؟ .. لكن العبد لله. بعد ما (خط هيثرو إتباع فى سماهو) ولسه ما عارفين (الباعو منو) بقي ما بيندهش لو أى حاجه (إتباعت) !! شنو يعنى لمن (المسئولين) يبيعو (واطات مدينة رياضية) ؟ دى حاجه صعبه ؟ الواحد يمشى الأراضى ويقول ليهم أنا عاوز ليا قطعه فى (المدينة الرياضية) يقوم المهندس المسئول يطلع الخريطه بتاعت المدينة ويسألو :
- أها القطعه دى عاوزا فى ياتو موقع ؟
- فى الإستاد بتاع الكورة طبعن !
(وهو ينظر الي الخريطة) : أها نديك ليها فى (دائرة السنتر) وللا في خط (طمنتاشر)؟
- والله ياخى لو لقيت ليا واحده في (خط سته) يكون كويس
- القطع بتاعت (خط سته) دى كووولها إتباعت عشان الناس كووولها عاوزه تكون قريبه من القون !
- وبعدين؟
- ما مشكلة ممكن نشوف ليك واحده (ناصية) فى خط التماس (مواصلاً) إنتا القطعه دى عاوزا سكنية وللا إستثمارية؟
- عاوزا إستثمارية !
- وعاوز تعمل فيها مشروع شنو؟
- والله عاوز أعمل فيها مطعم سياحى
- طيب (خط التماس) ده ح يكون كويس معاك ؟ أى لاعب الكورة تطلع من خصمو (رمية تماس) يخش (المحل) يضرب ليهو (بيرقر) وكباية عصير ويطلع يرميها يوصلا القون التاني !
لعلك تسأل عزيزى القارئ : أين وزارة التخطيط العمراني الولائية من هذه (الخرمجة) وما هو دورها فى إيقاف هذا العبث؟ وللإجابه علي هذا السؤال (خلي أعصابك قويه) ففي عهد (المسئول) قامت وزارة التخطيط العمراني الولائية (ذات نفسها) بالمشاركه فى هذه (الخرمجه) وذلك عن طريق الاستيلاء على 999 قطعة بمساحة تقدر بحوالى 513 ألف متر مربع بثلاثة مواقع مختلفة من المدينة الرياضية ... (شفتو الكلام ده كيف؟) !!
لعله من المضحك (المبكى) أن يصرح بعض المسئولين المتورطين فى هذا العبث بأن (البيع) قد تم بموافقة جهات حكومية (لم تتم تسميتها) وأن الجهات التى أشترت لديها شهادات بحث صحيحة ، كيف (يا جماعة الخير) توافق هذه الجهات الحكومية على بيع جزء من أرض مسجلة فى سجلات الأراضى (بقرار رئاسى) بإسم (المدينة الرياضية) إن لم يكن هذا هو العبث ذات نفسو ؟
العبدلله بصفته مواطن وعندو نصيب و(جعل) في أموال بيت المسلمين (الهامله دى) شأنه شأن بقية مواطني الشعب الفضل يطالب بالتحقيق فى هذا العبث ومحاكمة ومعاقبة كل من تورط وشارك فى هذه (الخرمجه المقصوده) التى تسببت فى إهدار مليارات الجنيهات التى تم صرفها على هذه المدينه (حتى اللحظة) والتى تسببت فى تعطيل (إن لم يكن إلغاء) قيام هذا الصرح الذى إنتظره الرياضيون طويلاً لا سيما أن هذه الخرمجة قد طالت قراراً رئاسيا واجب التنفيذ (كما هو) .
عزيزى القارئ : بعد أن أصبحت المساحه المتبقية من المدينة الرياضية المعتدى عليها لا تصلح لأن تكون (ميدان دافورى) العبد لله يقترح على الجهات التى قامت بالبيع أن تتم (جميلا) وتبيع (الباقى) علي أن تتم تسمية المشروع (مخطط المدينة الكانت رياضية السكنى الإستثماري) حتى يكون هذا المخطط شاهداً (للأجيال القادمة) على الخرمجه والتلاعب الذى يمارسه مسئولو هذا الزمن (الأغبر) بأملاك هذا الشعب (الفضل) .

كسرة :

إقترح بعض نواب البرلمان إنشاء مدينة رياضية بديلة فى مكان آخر .. العبدلله يقترح عند إصدار القرار القادم بإنشاء المدينة الرياضية (البدل فاقد) أن يشتمل (القرار الجمهورى) على مساحة المدينة الجديدة زائداً مساحة الأراضى التى سوف يتم الإعتداء عليها !!



تعليقات 21 | إهداء 2 | زيارات 5377

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#198207 [الشعب الفضل]
0.00/5 (0 صوت)

08-22-2011 02:07 AM
اين الرياضيون و الاندية و جماهير الرياضة المهووسة و الصحف الرياضية لماذا لا تعقد الندوات بخصوص هذه السرقة لانتزاع هذه الاراضي و اعادتها 000بعد ما تقع الغاس في الراس نقعد نولول 0000و اخيرا السودان الفضل باعوه للمصريين 000و الجماعة شادين الرحال لماليزيا لاحقين قريشاتنا يستمتعوا بيها لان البلد دي بعد الزنقات دي بتركبهم تونسية بن علي


#197873 [هندسة]
0.00/5 (0 صوت)

08-21-2011 11:41 AM
بعد ما تتباع المدينه كوللللللللها نجي نكتب في الراكوبه !! والفايده شنو يعني؟ واصلا بقى مافي خبر غريب في البلد دي حتى لو اتباع القصر الجمهوري برضو عادي


#197789 [ود قلبا]
0.00/5 (0 صوت)

08-21-2011 03:31 AM
يا جبرا من باع دينه ودماء شهداء الجنوب ويبيع يوميا مواطني هذا البلد لا يتوانى في بيع المدينه الرياضيه.
هل بتفتكر أنه حيجي يوم يحاكموا ليك المتسبب في العبث ده ؟
أنت تحلم !
فقط نحن من يمكننا محاسبتهم .. ونحن هنا تعني المواطنين البسطاء الكادحين أصحاب الحق الأصيل .. وسنحاسبهم طال الزمن أم قصر.
----------------------------------
كسره
لو الواحد لبس ليه حزام ناسف وطرشق ليهم جوووووه أجتماع مجلس الوزراء بكون خاتي ؟


#197736 [عبد الملك]
0.00/5 (0 صوت)

08-20-2011 11:50 PM
المفروض المدينة الرياضية بعد مسحها صارت من املاك وزارة الشباب والرياضة . فهى الجهة المناط بها توضيح الحقيقة وكيف جرى هذا التلاعب ولماذا صمتوا كل هذه المدة (فلا مدينة أنجزت ولا أرض بقيت ) ثم لماذا لاتنزع هذه الأرض من المتغولين عليها لتعود للمالك الحقيقى فها هى وزارة الأوقاف تنزع أراضى إستولت عليها الحكومة منذ عشرات السنين لتعود لملكية الأوقاف مرة أخرى .


#197724 [nubian]
0.00/5 (0 صوت)

08-20-2011 11:09 PM
باللة ياجبرة من هسى اكتب لينا عن المطار مش بعدين تجى تقول لينا كان يا ما كان


#197643 [خالد عثمان]
0.00/5 (0 صوت)

08-20-2011 06:17 PM
اذا كان رب الدار بالدف ضارب فشيمة اهل البيت كلهم الرقص


#197638 [ود العطوبة]
0.00/5 (0 صوت)

08-20-2011 06:07 PM

كل يوم فضيحة جديدة؛ يوم فضيحة أستاد ؛ ويوم فضيحة تقاوي؛ و فضائح حج؛ و ... ؛ فضائح لا حد لها؛ تساوي في مجملها المالي مليارات الدولارت؛ هذا غير الفضائح التي لم تري النور و هي يومية ؛ يا عمر البشير؛ يا رئيسنا ؛ أما آن لنا أن نري بضع رووس تتطاير في المياديين العامة؛ هل يرضيك أن الكل يخدعك ؛ من أصغر مسئول لديك ؛ لأكبر و زير؛ هل تعلم يا سيادة الرئيس أن أزمة السودان الإقتصادية تسبب فيها من أوليتهم ثقتك ؛ أسال مدراء الشركات الحكومية و مدراء شركات البنوك؛ كم مرة في السنة يسافرون إ:D لي الخارج؛ ما هي نثريات سفرياتهم ؛ ما هاي الفائدة التي جناها السودان و الإقتصاد من تكاليف سفرية لمدراء الشركات الحكومية و شركات البنوك ؛ لا شئ ؛ لا شئ ؛ صرفوا عدة آلاف من الدولارات كل سفرية ؛ ثم لا شئ ؛ هل يرضيك سيدي الرئيس أن تعلم أن أس مشروع تم و يتم في السودان تكون تكلفته مضاعفة عدة مرات ؛ هل تعلم سيدي الريس أن الشركات الإجنبية و رجال الأعمال الأجانب يعلقون بأنهم لم يروا فساد في العالم كما في السودان ؛ و يطول الكلام عن الفساد ؛ لكن أختم قولي للرئيس عمر البشير بكلمتين : الذين حولك من عدة سنوات \" كفاهم \" هنالك ألاف من السودانين الجيديين الذين يمكن أن تستعين بهم لإدارة البلد ؛ و فوق كل هذا تذكر سيدي الرئيس أننا كلنا ذاهبون إلي يوم تسأل فيه


#197619 [hajabbakar]
0.00/5 (0 صوت)

08-20-2011 05:26 PM
اين الفساد يااخى الكريم
نحن فى دولة الصحابة
انهم متدينون متوضئون
انهم الغر المحجلون الدين يصومون الاثنين والخميس ويصلون الفجر فى جماعة
يقول امير المؤمنين انه تاكد بعدم اى وجود للفساد وان كل هده دعاوى مغرضة من الجاقدين اعداء المشروع الحضارى واضاف بانه عندما واجه احد الصحفيين الدين يكتبون عن الفساد عجز عن تقديم الدليل
امير المؤمنين يطالب بالدليل
والدليل يااستاد تمسكو الجماعة والسماسرة القاعدين يبيعو فى الارض وتمسكوهن من اضنينن وتبدو فى رحلة البحث عن الرئيس حتى تسلموهو الحرامية ديل ويقتنع بان فى بلاد الطهر فساد ادا تمكنتم من لقائه الدى عجز عنه شريكه فى جرم الانقلاب لمدعو صلاح دولار
هاتو الدليل والفاس وقع فى الراس(؟)


#197605 [الصاحب]
0.00/5 (0 صوت)

08-20-2011 04:36 PM
ياجماعة شيشكم القطع دى موزعة لاساتذة جامعات ولواءاَت بالقوات النظامية وكذلك اسر الشهداء. انا شخصياً اشتريت من اسرة شهيد وتم التسجيل فى المحكمة


#197588 [عبدالواحد المستغرب جدا!!]
0.00/5 (0 صوت)

08-20-2011 03:55 PM
يا جبربر!! والله أنا ظنيت إن رئيس جمهورتك لغاية الان ما مصدق انو (رئيس جمهورية) وعشان كده هو مامهتم بالقرارات التى (تصدر بإسم رئيس الجمهورية) وفى حساباته إنها مجرد (فض مجالس) واتحدى اى واحد يقول لى ويشير لو بصباعه او حتى (بحنكه) الى قرار مهره فخامة الرئيس ووضع موضع التنفيذ وربما كان آخر قرار على ما أذكر (إنشاء مفوضية لمكافحة الفساد!!) أو شىء من هذا القبيل 0 ويبدو لى والله اعلم ان فخامته لم يجد شخص خالى من الفساد ليصيغ له القوانين التى بموجبها سيكافح الفساد وكما تعلم (بأن الفى يدو القلم ما بيكتب نفسو شقى00!!) والا كيف ياجبربر؟ واسمح لى أن أعاتبك ياجبربر فقد أبرزت انتهازيتك بكل وضوح فى (الحته دى) ما صدقت الحكاية جايطة وعايز تاخد ليك (خمشة) وعلى قول استاذ/ البونى (يا حلاة تكتك!!) 00ونحن نمشى وين 00يافرده؟00وعلى كل حال مطلبى فى منتهى التواضع أنا عايز موقع الحمامات المزدوجة كمشروع إستثمارى لان الفترة القادمة ستحتاج لمثل هذه المرافق وسوف يزيد الطلب عليه00ولن اذكر سبب الحاحى على تلك المرافق حتى لا أفسد على نفسى وأجد من ينافسنى عليها!!0


ردود على عبدالواحد المستغرب جدا!!
Sudan [الصادق الهواري] 08-20-2011 05:20 PM
يا اخونا .. عبدالواحد ..يعني عليز تكاوش براك علي كل الاستثمارات ..انحن نمشي وين ..والله اسلط عليك ناس الزكاة


#197557 [احمد]
0.00/5 (0 صوت)

08-20-2011 02:37 PM
استاذنا الكريم
لولا ياتو قرار للرئس تم تطبيقو
ثانيا الرئس عارف الحاجات دي وعارف ناس السرقه قام عمل حسابهم لموضوع اللغف
الله يكون في العون;)


#197552 [خليل عزه]
0.00/5 (0 صوت)

08-20-2011 02:26 PM
وانا من من هذا المنبر اطالب السيد/ رئيس الجمهورية بتكوين لجنة من الشيوعيين والسودانيين الشحاتين و اولاد الحرام و( اللاحسين كوعهم) وفلول الخوارج والمارقين وناس الدغمسه واصحاب الايادي غير المتوضئا الانجاس محاربي الشريعه الكفره الفجره . للقيام باعمال المدينة الجديدة.

واديهم سته شهور بس..يا ريس

كسرة:

يا جماعة والله الانقاذ دي عندها حسنه كبيرة جداً جداً انتو ما عارفنها... ديل بدمرو نفسهم والله السودان العوجه ما بتجيهو .. يعني لمن تقع الانقاذ دي (الاسلاميين ) ديل ما بتقوم ليهم قائمة تاني... الحمد لله الذي اوصل هذا الحال للبلاد والعباد في عهدهم.



#197545 [ahmed]
0.00/5 (0 صوت)

08-20-2011 02:06 PM
جريمه تضاف الي جرايم العصبه


#197541 [مهند]
0.00/5 (0 صوت)

08-20-2011 02:00 PM
لا عليكم إخوتي كله مرصود ومدون .. وعهداً علينا لنرجعن كل قرش نهب


#197499 [orass]
0.00/5 (0 صوت)

08-20-2011 12:08 PM
عوووووووك يا الفاتح جبرة : الظاهر كبرتا وعجزتا ... دوبك صحيت دي اتباعت من زمان .... والمدينة الرياضية طلعت آوت , الحق المدينة الرياضية الجديدة وأعرف مكانا وين واستعد حتكون فيها ضربات جزاء.


#197482 [الزول الكان سمح]
0.00/5 (0 صوت)

08-20-2011 11:37 AM

يا أستاذ جبرا

إنت شفتا فيلم الممثل ..( سلفستر ستالونى ) رامبو؟؟؟؟


#197481 [الباشا]
0.00/5 (0 صوت)

08-20-2011 11:36 AM


مصلحة الاراضي كان مديرها (مولانا) عصام والان اصبح وكيل وزارة العدل بعد استقال زمراوي طريد كرتي في زوجته ست الاسم والان جابو مولانا جديييييد لنج مدير لمصلحة الاراضي ، هي مصلحة الاراضي علاقتها شنو بمولانات النائب العام ديل ؟؟؟؟؟؟؟؟؟


#197480 [l120]
0.00/5 (0 صوت)

08-20-2011 11:33 AM
اللعب اللعب العب اه يا سيدي لاعب حريف اوي . لو عملوها سفارة امريكية ولا مصنع هنايات . كان دخلت قروش للدولة وكان البطن ما فيها مغصة . بس مشت للكروش الزي البالونة كل ما تنفخ تزيد . والغريبة ما بتطق بالونتهم . ورايك شنو في المطار الجديد . .


#197477 [asabangi]
0.00/5 (0 صوت)

08-20-2011 11:31 AM
أستاذ جبرة .. سلام
المدينة الرياضية أساساً مخطط ليها عشان تتلهف الفلوس بتاعتها 0خاصة الدعم الخارجى.. عملة صعبة وكده) وبعدين تتشفط الأرض حتة حتة .. يا جبرا وين حديق الحيوان ووين زنكى الخضار وغابة الخرطوم وميادين الأحياء والمخططات السكنية الكانت حواشات والتصاديق التحت تحت ..
- كل شئ معروف .. وخريطة البلد معروفة ومرسومة فى دماغنا.
- البشيل أسع بندم بعدين.
- لا نحنا بننسى لا رب العالمين.
- والحساب حساب دنيا وآخرة.


#197468 [Kalifa]
0.00/5 (0 صوت)

08-20-2011 11:09 AM
ياود جبرا ...رمضان كريم...واحد قريبنا سمسار أراضي قبل سنوات وأنا بفتش قطعة سكنية ..عرض على قطعة سكنية قائلا أنها في المدينة الرياضية فصححت كلامو قائلا جوار المدينة الرياضية فرد لا دي داخل المدينة الرياضية مضيفا لعلمك الجماعة مدورين بيع وقربو يلحسو السنتر !!! فدهشت واعتبرتها مبالغات سماسرة .... ولكن وبالواقع الناس فاتت السنتر جبدا واصبحت المدينة الرياضية سريحة رياضية....!!!!!!
كسرة :
نقترح إستخراج بدل فاقد وتحويل المدينة السابقة لعدة حلال..... الحلة. الاولي يسموها شلعوها ود بانقا والتانية شلعوها يوسف الخروف ...بعدين تجي ناس شلعوها الكيزان وشلعوها التخطيط وشلعوها المفوضية.....الخ !!!!!!!:D :D :D


#197463 [ابو فاطـــــنة]
0.00/5 (0 صوت)

08-20-2011 10:57 AM
حسبنا الله ونعم الوكيل ... حسبنا الله ونعم الوكيل
اللهـــــم بك نستجير ومن عذابك نستعيذ ..
هنالك يوم عظيم ووقفة امام ملك الملوك سبحانه يامن نسي وتناسي ،
اماكم ياحكام بلادي يوم مقداره خمسين الف سنة ، وستقابلون الحاكم
العادل الذي يعلم خائنة الاعين ومتخفي الصدور ..


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة