المقالات
السياسة
ارشيف مقالات سياسية
ليه الخرخرة والزعل يوم الماهية؟
ليه الخرخرة والزعل يوم الماهية؟
08-24-2011 04:53 PM

ليه الخرخرة والزعل يوم الماهية؟

شريفة شرف الدين
[email protected]

بصدق شديد و بينك و بين نفسك بس .. قاعد تفرح يوم تقبض الماهية؟ طيب ليه لا؟ العيد بعد أقل من اسبوع ..لفقت التضريبات معاك و لا ما لفقت؟ افرح ياخي .. دي ما فلوس و حصيلة شقى و تعب و بتسد ليك فرقات كتار .. زي ايجار البيت و حق الأقساط و جارورة الدكان و الدين بتاع هناي الإستلفت منو داك و ما تنسى مصاريف العيال و دوا الحبوبة بالبتقحقح الليل كلو..و حق الصندوق اللي صرفتو و صرفتو و بتاع الجمرة الخبيثة وما تنسى الموبايل برضو داير شحن و اللحمة و الخدارات .. هيي ..ما نسينا السكر.. و خلاص تاني مافي حاجة بس المواصلات يوماتي ليك و للوليدات.
لو في طريقة إنو الواحد يخت ليهو كاميرا خفية من لحظة وقفة الموظف في الشباك لآخر جنيه بطلوعو و الله حيكون أجمل فيلم لا داير ليهو مخرج و لا يحزنون ... و لو قدرنا نسمع ونونة قابض الماهية و ماذا يقول في سره لسمعنا العجب العجاب
لكن الله ده ما ما ساوى الأصابع .. في ناس تانين ما قاعدين يعرفو الماهية دي ذاتها شنو.. زي داك السألوهو قالوا ليهو : دخلك كم؟ فرد قائلا: قبل السؤال و لا بعدو؟ و جنس ديل عندهم برضو مشاكل زي ما عندنا؟ طيب عندي اقتراح جميل جدا ..بس من باب كسر الروتين و كده .. ليه ما نتبادل الأدوار .. يعنى الزول الدخلو (مهدود) يحل محل التاني الدخلو مفتوح ومطاط و العكس صحيح بس لمدة اسبوع واحد .. لكن لازم عمنا المهدود ده يوقع و يلتزم إنو ما يكنكش للنهاية بعد الأسبوع و طبعا الزول التاني داك ما عليهو خوف لأنو ما حيخرخر.
كده تعالو نكون عمليين .. نشوف متوسط دخل الفرد و نتخيل إنو رب الأسرة عندو بس زوجتو و تلاتة عيال أساس ثانوي و جامعة و ساكن ليهو في بيت إيجار و زوجتو ما شغالة و الأسرة دي ما شاء الله لا بمرضو و لا حاجة .. و كمان في حالهم يعنى حكاية العزايم و المجاملات و الضيوف دي مافي و الزوجة الله يبارك فيها لا بتعرف البوبار و لا عندها قضية مع الصفار .. نقول إنو رب الأسرة بصرف 800 جنيه و كده كده بعمل ليهو 200 زيادة .. يلا يا علماء الحساب .. شوفو لينا الزول ده ممكن مرتبو يقبل القسمة على بنود الصرف المتواضعة دي؟
الحل إنو نكون لجنة ... و اللجن دي تنبثق منها لجان عشان تلجن الأسرة دي لأنو الحل مستحيل بس الله قادر و لطيف .. تقترحو منو من الحاكومة يكون عضو في اللجنة دي.. أكيد عرفتو .. لأنه حيديكم محاضرة بعنوان نظرية العواسة في رفع الضائقة المالية .. و النظرية دي أتوقع ليها تكون عالمية .. بس ممنوع في الإجتماع ده الدخول الجزمة و البوت و المركوبة و أي نعال يمكن استخدامه كقاذوف
يا جماعة الماهية دي ما حاجة كويسة و كل الناس شغالين عشانها و يمكن سمعتو نكتة الموظف الزواغ ناداه المدير و ديك الزرة( تعال هنا .. هي سايبة؟ تجي يوم تغيب تلاتة أسابيع .. و ين إنت و ليه مكتر غيابك؟ رد الموظف بخشوع: و الله قاعد أجي و كما مصدقني اسأل الصراف!!! طبعا الراجل قاصد بالصراف زول يعنى ما الماكينة بتاعة الصرف الآلي لأنو لسع علينا بدرييييي.
حاجة أخيرة .. ما تعالو نقسم قروش السودان و كل زول يشيل حقو و بالمرة نقسم الأرض برضو و بعد داك يكون البشيرحر لو داير يجيب كل المصريين في القطعة الخاصة بيهو ..


تعليقات 0 | إهداء 0 | زيارات 1200

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




شريفة شرف الدين
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة