الإختشوا ماتوا
08-27-2011 01:17 PM

ساخر سبيل

الإختشوا ماتوا

الفاتح يوسف جبرا

في كل بلاد العالم هنالك نظام للضمان الإجتماعي أو التأمينات الاجتماعية ينشأ من أجل حماية العاملين وأسرهم عند تعرضهم لأى من مخاطر الحياة المتمثلة في الشيخوخة والعجز والوفاة وإصابات العمل وما إلى ذلك حيث يتم إستقطاع نسبة من مرتب العامل على مدى سنوات عمله حتى إذ ما تقاعد لأى سبب كان يقوم نظام التأمينات بإعادة هذه الإستحقاقات له على داير المليم (وفى بعض الأنظمة معاها حاجه) نتيجه الأرباح التى يجنيها (النظام) عبر اكتنازه وتدويره لهذه الأموال الطائلة .
يعني بالعربي كده نظام التأمينات الإجتماعية معمول (أساساً) من أجل تأمين حياة (كريمة) للمشتركين فيهو بعد تركهم للعمل عشان الناس دى بعدما تتقاعد ما تمشى (تشحد) وكده ، عندنا (كالعادة) فالوضع مختلف تماماً .. وقد تعرفت على هذا الإختلاف من خلال عدة رسائل وردتنى عبر البريد الإليكترونى يشكو أصحابها (لطوب الأرض) ورب السماء عما يقوم به (الصندوق القومي للضمان الإجتماعي) من وقلع (راسو عديل) !
تخيل معي عزيزى القارئ أن جميع العاملين في طول البلاد وعرضها .. في القطاع الخاص والهيئات العامة والشركات والبنوك وأصحاب الأعمال الذين يستخدمون عاملاً فأكثر وأصحاب المهن الحرة وأصحاب الحرف (الناس دى كووووووولها) شهرياً يذهب ما يعادل 25% من مرتبها (7% المؤمن عليه و18% صاحب العمل) إلى هذا الصندوق الذى من أولى مهامه (ضمان) حياة كريمة لمشتركيه الذين يودعون بعضا من مرتباتهم لديه (بالسنوات) !
طيب .. ماذا يفعل (الصندوق) بكل هذه الأموال؟ سألت أحد الذين (يشكون لطوب الأرض) فأجابنى:
- شوف يا أستاذ معظم الأبراج الشاهقة فى أحسن مواقع في الخرطوم دى بتاعت الصندوق ! ومش كده وبس كمان أغلب المخططات السكنية القاعدين يعلنوا عنها فى الجرائد والتلفزيونات دى بتاعت الصندوق ! ومش كده وبس الصندوق ده عندو شركات شغالة في سوق الله وأكبر ده .. ومش كده وبس !
- أها شنو؟
- بنص القانون يا أستاذ كل أموال الصندوق الثابتة والمنقولة وجميع عملياته الإستثمارية مهما كان نوعها (معفاة) من جميع أنواع الضرائب والرسوم والعوائد والعمولات التى تفرضها الحكومة أو أى سلطة أخرى ! يعنى بيستثمروا فى قروشنا دى لا ضرائب لا رسوم لا عوائد لا يحزنون ! يعنى (ربح) مضمون !
- طيب وإنتا المزعلك هسه شنو؟
- أيوااا يا أستاذ ح أقول ليك بس في الأول إنتا متأكد إنك أخدت حبوب (الضغط) الليله !
- قول عادى بقينا نتوقع أى حاجه فى البلد دى !
- طيب يا أستاذ قول أنا أشتغلتا عشرين سنه ومشيت أشيل قروشى الكان بيستقطعوها منى الناس ديل وقاعدين الزمن ده (كووولو) يستثمروها ويشغلوا فيها مفروض يدونى أرباح عليها كم؟
- والله أنا بفتكر إنو يشوفو نسبة (الأرباح) السائده كم ويضربوها ليك فى عشرين سنة حسب كمية قروشك العندهم ! ويدوك ليها زائداً إجمالي المبلغ الأساسى الكانو بيستقطعوهوا !
- إنتا يا أستاذ (موتوأكد) إنك بلعتا الحبوب !
- يا زول قول .. يعنى ح يكون أكتر من (الخط الإتسرق) !
- الناس ديل يا أستاذ بعد (جري ومساسقة) أدوني قروشى ناقصة 18%
- (في إندهاش) : معقوله ؟ عشان شنو؟
- (وهو يبكي ضاحكاً) : قال أيه رسوم إدارية !!
كسرة :
الإستثمار قروشوا خليناها (وما عارفنها بتمشى وين) .. كمان تشيلو من (اللحم الحي) والله صحى الإختشوا ماتوا .. حسبنا الله ونعم الوكيل ... حسبنا الله ونعم الوكيل ..!

الرأي العام


تعليقات 9 | إهداء 0 | زيارات 5098

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#200985 [roud]
0.00/5 (0 صوت)

08-28-2011 09:31 PM
خلال وظيفتي أتعامل مع نظام مؤسسة التأمينات الإجتماعية السعودية ... عليه أقول تعامل هذه المؤسسة مع الفئات الاجنبية والوطنية في غاية من التحضر والرقي والأحترام ..
بخصوص الاجنبي لو أصيب أحد منهم تعبأ له الإصابة بواسطة النت ثم يذهب العامل إلي المستشفي المخصص لعلاجه وبعد ذلك يأتي للعامل تعويض بشيك مالي علي حسب نوع إصابته.... أحيانا يستلم العامل شيكا ماليا مقداره أكثر من مرتبه بخمس مرات . أما التأمين بالنسبة للوطني/السعودي فهذا حدث ولا حرج فهو في قمة التحضر حيث يصرف الوطني شيك شهريا لأسرة المتوفي إن كان رب الأسرة متوفي.


#200604 [ود جادين]
0.00/5 (0 صوت)

08-27-2011 11:23 PM
ومال المرتبات والحوافز والبدلات المليارية دي بدفعوها من وين؟؟ ما ياهو من جنس السرقة دي.. ياخ البشير نفسو في جلسة متلفزة لمجلس الوزراء وصف هذه المخصصات بأنها (نهب مصلح) وبعد كده قبل يومين قال ما في فساد.. حسبنا الله وعم الوكيل ونسأل الله لهم مصير متأرجح بين صدام والقذافي ونسأل السلامة لأهلنا بالسودان.. ياخ واحد داير احول راتبو البنك اخصموا منو 18 الف.. لييييه.. ياخ مفروض تزيدوه ليه ، ولكنه النهب المصلح والقتطاعات الغير مرئي في الصرف الكاش.. وعلى فكرة سبق أن تم طرح فكرة لأمينجهاز المغتربين مقترح أن يتم الدفع للجهاز في حساب الجهاز بأي بنك في اي مدين على أن يكون المبلغ موحد لجميع المغتربين، فهل تصدق ياجبرا أن هذا الاقتراح لم يراوح محله كمايبدو بسبب مراكز القوى والمستفيدين من النظام المترهل الحالي والذي يتم فيه كل ما هو غير قانوني مع اذلال للمغتربين وضياع وقتهم.. لنا الله .. لنا الله ولهم بئس المصير.


ردود على ود جادين
United Arab Emirates [تجاني] 09-07-2011 09:24 AM
جهاز المغتربين ده عالم اخر بس كان واحد يفهمنا الحاصل شنو رسوم خدمات شنو وزكاة فرض يعني كان مادفعت التراب في خشمك . يعني الواحد يدفع تعبو في الوقوف في طوابيرو بالقروش تتخيل تدفع لي تعبك في الحاجات دي غير كده ماشايف اي خدمات بلاي بالجد واحد يفهمنا جهاز المغتربين ده فهمو شنو


#200580 [امانى]
0.00/5 (0 صوت)

08-27-2011 09:56 PM
تعالو شوفو في السعوديه الواحد لمن ينزل معاش بينزل بنفس مرتبه ولو في واحد اتوفي ماهته شغاله زي الما حصل شي نحن الواحده راجله يموت خلاص اولاده وهي يتبهدلو بهدلة السنين والواحده تحس بانه حياته خلا انتهت واد\\مرت الله يدمركم بركة هزا الشهر الكريم


#200568 [قول النصيحة]
0.00/5 (0 صوت)

08-27-2011 08:14 PM
يا استاذ جبرة ما تنسي وداد بابكر بيكون عندها عمارة في العمارات دي بتحلب منها و تودي لندن ودائع وداد و جمال الوالي ، و الصافي جعفر سندس يا سندس ، و المتعافن التقاوي الفاسدة ، و عوض الجاز ميزانية البترول ما في حد يتجرا يسألو ، ورامبو ، و خلوها مستورة ، و فقه الضرورة ، و البشير اخوان بش بش و كلووووووووووووووو ده ، و البشكير اقول مافي فساد ، تمام يا ريس تمام يا ريس ، الله اتمك موية ، اللهم ارنا فيهم عجائب قدرتك انهم لا يعجزونك ، اللهم احعل كيدهم في نحرهم و مزقهم شزرا مزرا و لا تبقي منهم احد يا الله يا الله يا الله ببركة اوآخر شهرك العظيم تهدهم هد و تعذبهم كما عذبونا يا رب يا رب يا رب .


#200557 [الجنقوري]
0.00/5 (0 صوت)

08-27-2011 06:48 PM
انت ما سمعت بالدقوهو وشالو قرشو احمد الله انو ماجلدوك


#200545 [Neema]
0.00/5 (0 صوت)

08-27-2011 06:25 PM
يا اخوانا اليوم الاخير من رمضان وساعة الافطار كل السودانيين يرفعو ايديهم للسما ويقولو حسبنا الله ونعم الوكيل عشان ناس الحكومة ديل يبقو اصنام في اماكنهم


#200511 [وحيد]
0.00/5 (0 صوت)

08-27-2011 05:02 PM
قروش الناس دي كوووولها بتتحول الى حوافز مليارية لاصحاب الايدي المتوضئة الذين يلعبون بالسبعة ورقات بهذه الايدي المتوضئة، و كووول القروش دي بتتحول لعملات صعبة و ارصدة في ماليزيا و دبي و استثمارات ضخمة في جنوب شرق اسيا ليس باسم الشعب السوداني الفضل قهؤلاء هم العبيد و الشغيلة الذين يدفعون عن يد و هم صاغرون - بل باسم السلاطين و الامراء من اصحاب الايدي المتوضئة.. صندوقك دا و صندوق طعن الطلاب و كل الصناديق التانيه عبارة عن واجهات للسفح و اللفح و اكل اموال الناس بالباطل و تحويلها لمصالح شخصية للجماعة بتاعين الايادي المتوضئة و كده.... خليك من الضمان الاجتماعي الناس الماشه تحج و تكمل ركن الاسلام الخامس ماصين دمهم و ماكلين قروشهم و دافعنها رشاوي كمان!
غايتو الناس ديل قارنواهم بالمافيا لقينا المافيا احسن الاف المرات ، شفنا اليهود و الصهاينة لقينا اسلام الصهاينة احسن من اسلام الجماعة ديل .. ديل خوازيق عاجنهم ابليس!


#200482 [alitaha]
0.00/5 (0 صوت)

08-27-2011 03:50 PM
موش كدة وبس يا استاذ..حكي لي احد اقاربي انه اراد تحويل معاشو للبنك..في خرطوم سيدي قالو ليه حنتقطع منك 35 الف رسوم تحويل..قريبي معاشو كوولو 180 الف..عجبي..
حننتظر لمن تمشي المعاش يا استاذ وبعدين احكي لينا عن معاناتك لمن تقبض..ده لو قبضت اصلا..
احترامي لك ولقلمك النابض بحب الغلابة..


#200430 [okan]
0.00/5 (0 صوت)

08-27-2011 01:50 PM
واضح أن بلدنا في ظل هذا النظام ميؤوس منها تماما : تردي في كل شئ وسير القهقري علي وجه السرعة والفساد الضارب أطنابه في جميع مفاصل الدولة وثالثة الأثافي احتقار السلطة للانسان السوداني واذلاله وسلب حريته وارادته وخداعه ... لابد من تغيير النظام وارساء دعائم دولة العدل والقانون والديموقراطية وحقوق الانسان . من ثار من شعوب المنطقة ضد الطغيان في بلدانهم ليسوا بأشجع ولا خير منا.


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة