دااااااك زراعي
09-02-2011 01:24 PM

دااااااك زراعي

د. عزت ميرغني طه
[email protected]

أوقفني مرة أحد رجال شرطة المرور وهو منزعجا (بالله وراء العربية الاندكروزر ديك) وهو يغلق باب سيارتي بعنف يعبر عن انفعاله وجلس متحفزا.. (أيوه العربية المظللة ديك).... ولكن كانت العربة المظللة تسابق الريح لا تستطيع سيارتي المتواضعة معها سبيلا. فطيبت خاطره... قائلا ان تلك السيارة سريعة لا نستطيع بها لحاقا.. وأردقت (وهو صاحب العربية مالو).
فقال الشرطي (لقد تخطت العربية الاندكروزر الاشارة الحمراء بسرعة شديدة وقربت تضرب ليها كوريلا). ..

(يا أخي الناس الأيام دي بقت ملخومة و كل زول سايقاه همومه).. قلت له؛ طبعا دي لم يبلعها لعلمه بأن أصحاب العربات المظللة ليس لهم هموم كغيرهم من المواطنين فأعقبت له (ربما سيد العربية دي زول مهم .. يا أخي مالك والمشاكل، ناس العربات الكبيرة ديل دايما بيكونوا مهمين هسة يمكن سايقها وزير)...

هنا لاحظت تراجعا من جانبة أصلو السيارة (اللاند) لم تعد في الأفق وابتدأ يهدأ ولكنه أجاب اجابة أذهلتني وعرفت بأن رجل الشارع يميز ما بين وزير وآخر ولا يستوي كل الوزراء في نظره فقال (والله وزير زراعة ما يعمل كدا... بالله نزلني هنا)...!!

هنا عرفت لماذا غادر نفر كريم من زملائي من كلية الزراعة وذهبوا الي الزقازيق بمصر و(درسوا طب) وتحسرت علي حالي أنا الزراعي الذي بلغ شأنا رفيعا في سلم الأكاديميات في العلوم الزراعية، يعني بالله حتى كان بقيت وزير زراعة فهذا هو رأي رجل شرطة المرور في الزراعة فيبدوا أن الوزير لديه وزير خارجية أو داخلية بحكم موقعه فيها أو دفاع يتزين بالعلامات الحمراء...

والغريبة هذا هو رأي ناس الانقاذ في الزراعة كما ظهر خلال السنون الماضية، فهي وزراة الترضيات.... (ياخ أمشي الزراعة سنة سنتين كدا وبنجيبك الخارجية)، وكان ما رضى يقوموا يجيبوا ليها (طبيب)... لا أعرف ما علاقة الأطباء بالزراعة... يبدو والله أعلم أن من يقومون بزراعة الأعضاء يستطيعون زراعة (عباد الشمس) لا محالة؛ فلقد تعاقب على وزراة الزراعة ثلاثة أطباء وبروفسير بتاع علم نفس قربوا (يلحقوها أمات طه) ولمن استجابوا لنداء العقل وجابوا فيها زراعي مرة تبين أنه يعشق الأمن وعلومه فحولها لسكنة أمنية وأنشأ أستقبالا فيها مستقطعا جزء غير يسير من حديقة الوزارة أجلس عليه رجالا غلاظ لا تستطيع دخول الوزارة دون سؤال فقللت أنا الزراعي الدخول الي زيارة زملائي في المهنة خوما من تقليب أغراضي وبطاقتي وليت ذلك الاستقبال وما يعلوه من مباني كان من شكل وطراز المبني القديم المتميز بمنحنياته وشرفاته التي تطل علي شارع الجامعة ولكنه سيظل شاهدا علي عظمة البنيان في غير مكانه.

الطامة الكبرى الآن وبعد ذهاب (تلت) البلد وما بباطنه من ثروات نفطية يصر ناس (الانقاذ) في استبقاء ذلك الوزير الطبيب الذي يظن أنه يعرف أي شي وفي رأيه (هي وزارة الزراعة دي دايرا ليها قومه وقعدة... أنا ممكن أفتي فيها) حيث أسر لي بعض العالمين ببواطن الأمور أنه شوهد في مكتبه وهو يطالع كتبا من شاكلة (الرائد في علوم البستنة والممتاز في الميكنة الزراعية والنادر في المحاصيل الزراعية) في مشواره بأن يتحدث ويفتي في (التقاوي) وكيفن بجيبوها.. وناصب ناس البحوث العداء... (ما تكلموا ناس البحوث شان يأخرونا بي كلاماتهم بتاعت التحور الوراثي، وشهادة فحص التقاوي الدولية، وشهادة الانبات والمعاملة والفطريات والكلام الكبار كبار دا)... أذ أحسب أنه جد مقتنعا انو مافي بذرة (دخلوها الواطة وسقوها ما قامت... فالبحوث شن لازمتا غير ما بيأخرونا ويخلونا ما نلحق الموسم) ولم يكلف نفسه بالاستعانة بالمستشارين الزراعيين والعارفين ببواطن الأمور بدل ما يتعب يا عيني ويذاكر في علوم الزراعة وقام كمان أطاح بمن يعرف في علوم الزراعة كوكيله العالم في البحوث وعلوم الزراعة وفي بالوا (يا غرقت يا جيت حازما) وكان (غرقت) أكيد هناك من يقف بجانبة... فالمتتبع للأمور وقضية التقاوي التي تفحص في ردهات وزارة العدل هناك من أتى وأعلن وعلى الملأ في احدي المهرجانات (كلام التقاوي دا جعجة ساكت) مبرءا الوزير من أي مسئولية ومطمئنا له باستراحة المحارب أكان وقع الفاس في الراس......

فيا حكماء الانقاذ كان في حكماء فيها.... ان وزارة الزراعة هي الشئ الوحيد الذي تبقى لنا وهي المنقذ الوحيد لاقتصاد السودان ورفاهية شعبه... فلم الاصرار دائما لتولية من لايعرف الفرق ما بين الفتريتة وأب سبعين ولا المسطبة من السرابة...


تعليقات 5 | إهداء 0 | زيارات 1454

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#202750 [نيام]
0.00/5 (0 صوت)

09-03-2011 05:02 PM
قلت ليك يادوك عزت انتا الكروزر البوليص ساكيها لي شنو ما كحلو و لا شنو؟
هسع كان حصلتوها و لقيت فيها المتعافن تقول ليهو شنو . امضي ليا اجازتي؟؟


#202744 [أب أحمد]
0.00/5 (0 صوت)

09-03-2011 04:44 PM
بروف
كمان قول يا ريت لو كانوا جابوا لينا دكاتره سمعنا بيهم قبل دا زي الجزولى و أبو صالح
علا ديل لا نافعين طب لا زراعه لا سياسه ديل ناس ناكل مما نلهط و بس
ألله لا كسبهم دنيا وآخره (؟)


#202377 [wedhamid]
0.00/5 (0 صوت)

09-02-2011 10:45 PM
يـــــا دكتـــور عزت الله يعزك .....
متين شفت انو الانقاذ وضعت الرجل المناسب فى المكان المناسب؟؟؟؟؟ يعنى لما الدنيا جابت متخصص لوزارة الصحه جابوها سستر و اللا لا ؟؟؟ و للخارجيه طبيب اسنان و الان تاجر سيخ و اسمنت يقال انو خريج قانون كل خبراتو و الدراسات العليا ليهو فى الشئون الامنيه و الجاسوسية و للداخلية فنى هندسة ميكانيكا يا مهنس مدنى عديل
و انا بينى بينك متاكد لو جابوا ليكم جهبوز زراعى وزيرا لوزارة الزراعه ما حيقدر يفيد فى شئ لانو لا يستقيم الظل و العود اعوج !!!!! انت نسيت بروفيسور د. محمد على قنيف اكبر باحث زاعى فى البلد و كان على اعلى مستوى اكاديمى و اول وزير زراعة للانقاذ....... الشبكنا بالحزم التقنيه و ملاء البلد شعارات من جنس ناكل مما نزرع و نلبس مما نصنع و حنمزق فاتورة القمح و هو مقترح مشروع حفر ترعتى الرهد و كنانه الوهمية و استقطعوا بسببها من رواتب العاملين فى الدولة شهريا و لسنوات قروش الدنيا الما اتعرف حتى الان راحت وين و فى النهاية وين ازاتها الترعات دى؟؟ ؟؟ و خدّر النا س بالاحلام و صار اول زرعى بـشـتـن مشروع الجزيرة العملاق ركيزة الاقتصاد السودانى و العديد من المشاريع الزراعية الناجحة بدواعى التطوير؟؟؟؟ لذا لا تستغرب تعبير ذاك الشرطى المغبون الما ساعدتوا فى ملاحقة سيد اللاندكروزر المظلله ديك .....قال زراعى قال !!!


#202286 [gasim ali]
0.00/5 (0 صوت)

09-02-2011 05:59 PM
انشاء الله يسمعوك....ويستجيبوا ليك يا دكتور


#202192 [ع.حسن دلوكه]
0.00/5 (0 صوت)

09-02-2011 01:49 PM
تعرف المتعافي الذي امرض الزراعة قبل بالزراعة ليه!! لانو شبع مقاولات وهمبت في الولاية!! وفي ذهنه ان يعمل لنفسه مزرعة ليعيش فيها برومانسية ليتمتع بالاموال التي بلعها من الولاية!! وبدل مايجيب خبير او حتي مزارع اختار ان يمسك وزيرا للزراعة لتكون مزرعته بحجم الولاية!!وبعدين يرتاح قبل مايمسك وزارة الرعاية الاجتماعية ليتزوج كوم من الحراير بعد زيارته للبيوت بحجة الاجتماعيات!! انها ياعزيزي حكومه المواطن حسن دلوكه!!!


د. عزت ميرغني طه
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة