المقالات
مكتبة كتاب المقالات والأعمدة
الفاتح يوسف جبرا
قرشين حلوين
قرشين حلوين
09-12-2011 12:25 PM

ساخر سبيل

قرشين حلوين

الفاتح يوسف جبرا

يبدو أن الحكومة بعد أن فشلت في محاربة الفقر .. قالت أحسن تحارب (مخرجاتو) فقد أوردت الصحف قبل أيام قلائل خبراً جاء فيه بأن وزارة التنمية والرعاية الاجتماعية بولاية الخرطوم قد كشفت عن انشاء (40)نقطة (ارتكاز) بولاية الخرطوم وذلك للحد من ظاهرة التسول وأنها من أجل نجاح هذه المهمة فقد قامت بالتنسيق التام بينها وبين الشرطة وامن المجتمع وقد جاء فى نهاية الخبر الذى نقلته SMC أن (90%) من المتسولين هم من دول الجوار !
العبد لله يعتقد بان القائمين على أمر مكافحة التسول بإنشائهم لهذه النقاط الإرتكازية إنما يهدرون موارد الدولة
فإنشاء (40) نقطة إرتكاز ليس بالشئ البسيط كما أن ما يتبع ذلك من وجود شرطي وأمنى وترحيل وإعاشة لهولاء المتسولين شئ مكلف ومن غير المعقول أن يقوم المواطن بدفع هذه النفقات ليجد نفسه قد أصبح نفسه متسولاً !
لذلك فالعبد لله يقترح على المسئولين الإستفادة من هؤلاء المتسولين (بدلا من أن يكونوا عالة على الدولة والمواطنين) وذلك بإنشاء (المجلس الأعلى للتسول) والذى يقوم بتنظيم أعمال هذه المهنة وأهو برضو الحكومة تطلع ليها بي (قرشين حلوين) .
تبدأ الحكاية بإعلان يتم بثه فى جميع الوسائط الإعلامية يقول .. عزيزى المتسول عزيزتى المتسولة .. تسول وفقاً للقانون وذلك بتسجيلك فى (المجلس الأعلي للتسول) .. عزيزى المتسول .. سجل الآن وأحصل على الرخصة !!
- (صوت جهورى) : سجل الآن .. حصولك على الرخصة يضمن لك التسول بحرية !!
الحصول على (رخصة متسول) ليس بالأمر الشاق والرسوم التى قررها المجلس الأعلي للتسول جعلها تكون في متناول كل متسول ..( 100) رسوم كشف طبي ( 150) جنيها رسوم رخصة (متسول تحت التدريب) ثم( 250 ) جنيها رسوم (مدرسة تعليم فنون التسول) والتى تقوم بتأهيل المتسول تحت التمرين نظرياً وعمليا على أحدث تكنولوجيا التسول .. (120) رسوم الرخصة النهائية والتى تتيح للمتسول التسول فى محلية واحدة يقوم بتحديدها أما إذا أراد المتسول الحصول علي (رخصة عامة) تتيح له التسول في أى محلية عندها تكون الرسوم( 450 )جنيها !
بعد المهلة التى أعطتها الحكومة للمتسولين (لتوفيق أوضاعهم) تبدأ الشرطة والنظام العام فى عمل كشات وكمائن للقبض علي المتسولين (البدون رخصة) وتقطيعهم إيصال مخالفة (متسول بدون ترخيص) مقدارها( 30) جنيها أو الحبس لحين السداد !
ولأن التلاتين جنيها غرامة (ما هينة) وقد تكون هى محصلة (تسول يوم بحالو) فسوف يضطر المتسولون (غير المرخصين ) بالترخيص ! خاصة بعد إنشاء (جهاز التهرب التسولي) وكشات وكماين (مباحث التسول) !
- أقيف هنا يا زول .. رخصتك وينا؟
- إنتا ما شايفا معلقا أهي فى رقبتى
- طيب رخصتك بتقول إنك متسول فى أم درمان البجيبك الخرتوم شنو ورخصتك ما عامة !
- والله في الحقيقة أصلو .. يعني
- لا أصلو ولا فصلو .. الإيصال إنقطع يلا أطلع لينا (30 )جنيه !!
بعد التأكد من أن معظم المتسولين قد أصبحوا تحت مظلة (المجلس الأعلى للتسول) يتم إنشاء (جهاز ضرائب المتسولين) وعمل ملف ضريبى لكل متسول يحتوى على صورة من (رخصة العميل) ويحمل رقمه .
- ضريبتك يا حاج تلاتة ملايين ونص !
- (فى دهشة) : قلتا كم ؟
- قلنا ليكا تلاتة مليون !! حكاية إنك أطرش وما بتسمع دى أعملا هناك فى الشغل !
- لكن يا ولدى القروش دى مش كتيرة؟
- يا حاج أحمد ربك دفعناك تلاتة مليون وإنتا بتتسول فى (كافورى) والله الزول داك بيتسول فى (الملجه) دفعناهو 4 مليون !
يوماً بعد يوم تتزايد إيرادات (المجلس الأعلي للتسول) وفروعه الممتدة على أرض السودان (الفضل) ويقام فى وسط كل مدينة برجاً شاهقا ذو نوافذ زجاجية (مظللة)يحمل اسمه مؤثث بأحدث وأفخر الأثاثات والستائر والموكيت (وطبعن التكييف المركزى الباااارد) تقبع أمامه أرتال من السيارات الفارهة هى سيارات (العاملين) عليه !
كسرة :
بعد أن قالت وزارة التنمية والرعاية الإجتماعية بأن( 90% )من المتسولين هم من دول الجوار تأكدت تماما بأن هذه الوزارة تستخدم آلات حاسبة (صينية) !



تعليقات 25 | إهداء 4 | زيارات 5453

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#208512 [جابر برهان]
0.00/5 (0 صوت)

09-14-2011 12:30 PM
يعني والله حرام يزيدوا أعباء المتسولين بمصاريف أربعين نقطة إرتكاز شرطة وكمان أمن مجتمع


#208415 [محمد خليل]
0.00/5 (0 صوت)

09-14-2011 10:22 AM
لا استبعد أن تسارع حكومة المؤتمر الوطنى لتبنى الفكرة لأنها حكومة جبايات و طالما هذه الفكرة ستتيح لها مزيد من الجبايات فما المانع اذا لتبنيها، و اذا كانت ست الشاى و ست الكسرة المسكينة التى قد يكون ورائها أيتام تقوم برعايتهم و تربيتهم و صاحب الورنيش لم يسلموا من جبايات الحكومة فهل نستبعد ان تتبنى الحكومة هذه الفكرة لتحصد المزيد من الجبايات التى تذهب كلها الى جيوب الحرامية فى حكومة المؤتمر الوطنى؟


#208371 [الزول الكان سمح]
0.00/5 (0 صوت)

09-14-2011 09:16 AM

سليمن قش..لك التحايا.. وود حامد

نحنا ما طشيا ولا حاجة..لكن قرفنا وإستهجنا تملك صاحبك والمثل بقول التعرف ديتو أكتلو وأنا كتلتو.


#208225 [المهاجرة]
0.00/5 (0 صوت)

09-13-2011 11:24 PM
استاذ جبرا,ارجوا ان تضيف فكرة جهاز تنظيم شئون المتسولين بالخارج.


#208030 [حي ازرق]
0.00/5 (0 صوت)

09-13-2011 03:23 PM
ههههههههههههههههههههههههه :D :D :D :D

والله يا عبودي سبقتني ........... كنت عاوز اقترح تعيين الاخ المستشار الاسمو ايه ده

لكن اذا مسك منصبين اضرب مال الشعب الكابيو في كرشو في اتنين

لك التحيه ولاستاذنا الفاتح جبرا


#207855 [سليمان قش]
0.00/5 (0 صوت)

09-13-2011 12:00 PM
يا جبرا الله يجازي محنك !!!! لكن دول الجوار دي ياربي مقصودة بيها الولايات ما اصلو السودان بقي شارع النيل وكافوري وكده........وياودحامد الحرف الاول من المستشار المرشح مصطفي عثمان اسماعيل مش ويااخوي انت والزول الكان سمح طشيتو مع اولاد صاحب الكشك تحياتي للجميع


#207835 [بلتعة]
0.00/5 (0 صوت)

09-13-2011 11:41 AM
ما تنسى مجلس التسول والمتسولين


#207747 [ود الخضر]
0.00/5 (0 صوت)

09-13-2011 09:57 AM
واحد من الاخوة المعلفين قال عايز يعمل شركة تسول وأنا بقول لية انت نسيت د/المتعافى ولا شنو أوعك تفكر تفكير زى دا لانو فى احتمال تقدم للمحاكمة أحسن خليك بعيد


#207697 [ابوعثمان]
0.00/5 (0 صوت)

09-13-2011 06:41 AM
إذا الحكومة ذاتها فقدت ماء وجهها وبتتسول عند الدول العربية يعني بقية الشعب الفضل يسوي شنو ؟


#207596 [ابواية]
0.00/5 (0 صوت)

09-12-2011 10:41 PM
واللة دة قوية جدا انا لي زمن بفتش لية مالاقيها عليك اللة دة جبتها من وين اهههههههههههههههههههههههههه


ردود على ابواية
Sudan [Wolf] 09-13-2011 03:03 PM
الأستاذ جبرا ما عايز يورينا بجيب الصنف بتاعوا من ويييييين


#207518 [ابو امين]
0.00/5 (0 صوت)

09-12-2011 07:58 PM
الكسرة مبااااااااالغة يااستاذنا ربنا يمد فى همرك وتقترح للجماعه


#207509 []JAAAAH]
0.00/5 (0 صوت)

09-12-2011 07:41 PM
ما تنسى
الاكاديمية السودانية للشحدة و التسول
معليش عندي مدرسة تعليم قيادة


#207497 [مغبون]
0.00/5 (0 صوت)

09-12-2011 07:00 PM
استاذ جبره الفكره حلوة وأكيد حتتنفذ طالما العتالي الذين يخدمون بضراعهم لهم بطاقات ويدفعون رسوم للمحليه ويتم تغريمهم في حالة عدم وجود البطاقه
لو تكرمت اعمل لي وآسطه لتسجيلي متسول مغترب قبل ان ينط وآحد من الجماعه اياهم بعمل شركه اخطبوطيه للسماح بمهنة التسول بداخل السودان وخارجه ويحتكر العمل في التسجيل وعمل البطاقات ( بطاقة تسول داخليه او خارجيه ..... حج ... عمره ... علاج .. سياحه ) ويقوموا برفع الاسعار والاتعاب


#207463 [ود عجيب]
0.00/5 (0 صوت)

09-12-2011 05:36 PM
فيما سبق طرحت فكرة الجباية علي ما يتنفسة الانسان وما يملك من حيوان ةاذا بي افاجاء بان الدولة الرشيدة فرضت جباية جديدة علي اهلنا في البطانة مقابل ورود ابلهم الحفاير بغرض السقيا والجباية الجديدة بعدد الرؤس التي ترد للسقيا من الحفير ويحرس الحفير موظف حكومي بايصالاتة وعسكري للحماية لم يخطر في بالي ان عقلية حكومة الانقاذ سوف تتفتق لدرجة ان تبيع مياة الامطار التي ساقها اللة سبحانة وتعالي رزقا للعباد ومواشيهم - فمن غير المستبعد ان تسرق حكومة الانقاذ فكرة الكاتب القدير الاستاذ الفاتح جبرة ومن حقة من الان ان يطالب بالحقوق الفكرية


#207427 [أبوهاجر]
0.00/5 (0 صوت)

09-12-2011 04:22 PM
طيب يا جبرا لو أنا (سولت لى نفسى) أطلع مظاهرة مثلاً أعمل تصريح من المعتمدية (وده من المستحيلات) ولا أعمل رخصة تسولات عامة من المجلس الأعلى بتاعك ده
ولو سألت الناس إلحافاً .. ده برضو عايز ترخيص ؟
مدة دوام المتسول كم ساعة ؟
إذا عندى أورنيك مرضى ممكن أجيب واحد إشتغل مكانى ؟
فى طريقة الواحد إشتغل بالمشاهرة؟
مكافأة نهاية الخدمة كم ؟
الشغلانة دى عليها ضرائب وزكاة ودمغة جريح؟
إذا ما عندى حق الدواء ممكن أطلع تصريح (إفراج) مؤقت ؟
ممكن الواحد إعمل شركة (استثمار) فيها 400 متسول بى إعفاءات ؟
الأجانب المتسولين ديل إستثمار أجنبى ؟
ممكن الواحد إلبس بدلة وكرافتة طالما معاه رخصة ولسانه حلو وبعرف إفبرك ؟
بالله أدينا معلومات كفاية إمكن الواحد إفكر إعمل ليه دراسة جدوى


#207417 [محمد احمد]
0.00/5 (0 صوت)

09-12-2011 04:10 PM
والله يا استاذ جبرا دائما ما بتقصر ... ولكن المشكلة أن عقول المسئولين اصبحت نتيجة لعدم تجاوبها وتطنيشها لشكاوي العباد وصراخهم من الجوع والفساد أصبحت عقولهم ملتهبة ومليانة صديد من كثرة هذه الشكاوي .. وبإذن واحد أحد العلاج الجز والبتر ... وربنا يمهل ولا يهمل وحسبنا الله ونعم الوكيل


#207387 [wedhamid]
0.00/5 (0 صوت)

09-12-2011 03:21 PM

الاستاذ الرائع....جبره ...تـــبــرا.....

شنو الحماس الزايد من الاخوة الاعزاء قراء الراكوبه العلّـقوا على مـقترحك اليوم الجميل دا ؟؟ الله يستر !!الغريبه معظمهم من مغتربينا فى المملكة السعوديه!!!!
دا يوضح ضرورة انشاء هذا المجلس ....ولذا من الضرورى تعيين مستشار للرئيس لهذا الغرض كما هو مقترح بالاضافه لرئيس يكون عندو خلفيه قويه فى الشحده و الاننهازيه و تكسير التلج و دبلوماسى رخيص ..... و هذه الصفات يتميز بيـها عن اقـرانه الانقاذيين واحد فقط..... هـو؟؟؟؟؟؟؟.و اخر مقترحاتو انت .... انو يستورد فحول (ذكور) لبنات اهلو فى الشمالية لعلاج مشكلة عزوف شبابهم عن الزواج


#207374 [نصر الدين محمد عبد الرسول]
0.00/5 (0 صوت)

09-12-2011 03:07 PM
يمكن ادراج الدجالين مع المتسولين ، لزيادة الايرادات ، والله حكاية الدجالين دي تجر -لي الدقون الكبيرة-كما يمكن عمل جبايات علي الأولاد وينا ت ال(بيخلطوا)، في الحدائق والجامعات ، -خاصة ان بعضهم مرفهين واباءهم يستطيعوا دفع أي مبلغ -للجهات الضريبية-مقابل سعادة أبنائهم


#207362 [عبودي]
0.00/5 (0 صوت)

09-12-2011 02:44 PM
والله انا من زمان ما قادر افهم معني منصب مستشار الرئيس لشئون التاصيل ولا بعرف بشتغل شنو..اهو فكرة ما بطالة بدل ما نصرف قروش لتعيين مستشر الريئس لشئون التسول يكون مستشار الريئس لشئون التاصيل والتسول غلي الاقل نفهم مولانا ده بشتغل شنو ومنها نوفر شوية قريشات وكلو بي تمنو واجعلو عامر...


#207345 [Neema]
0.00/5 (0 صوت)

09-12-2011 02:19 PM
يا جبرا المفروض ما تدي افكارك الجهنمية لناس الحكومة بلاش كدا دي الفكرة تسوى الشي الفلاني


#207340 [مهاجر]
0.00/5 (0 صوت)

09-12-2011 02:16 PM
يعني لو ما قالو من دول الجوار حيقولو شنو *


#207295 [orass]
0.00/5 (0 صوت)

09-12-2011 01:05 PM
الله يهديك يا فاتح جبرا .. يا أخي إنتا قاعد تفتح عين الحكومة لحاجات كان فايتا عليها.
دراسة جاهزة بكرة حتتنفذ . بختك حتطلع ليك (بقرشين حلوين).


#207293 [الزول الكان سمح]
0.00/5 (0 صوت)

09-12-2011 01:01 PM

يا أستاذ

والله فكرتك عظيمة...ويا ريت المجلس الأعلى للتسول دا يكون على رأسه مستشار رئاسى لشئون التسول. وأرشح لهذا المنصب واحد على بالى



#207288 [orootod]
0.00/5 (0 صوت)

09-12-2011 12:55 PM
أستاذا جبرة أرجوا اضافة التالي
وبعد ازدياد عدد المتسولين و الايراضات بسبب تحول فئة كبيرة من المواطنيين لهذه الحرفة . سيقوم المجلس الأعلي للتسول بتشكيل لجان وبعثات للتسول الخارجي و الاقليمي ( الدولي والعربي و الاسلامي ) لايخفى علينا انه سوف يتم توكيل هذه المهمة
الى مستشار الرئيس للتسول الذي بدوره يلحس هذه الغنائم سنة ورا سنة .وبسبب الفساد سيضرب المتسولون عن التسول وسيهددون الدولة انهم سيعودن الى عمل او (دولهم المجاورة) وسيطالبون بالغاء الرسوم والجبايات لكن الدولة سترفض لغة التهديد و ستستمر في نفس النهج مما وتقوم بزيادة الضرائب واسعار السلع نتيجة للعجز في الميزانية بسبب فقدانها نصيب من ثروة التسول .يعلن المتسولون التمرد ويرفعون السلاح ويطالبون بحق تقرير المصير وترد عليهم الدولة بضربات جوية في الجيوب ومذابح في اقاليم التسول و بعد حرب التسول الاهلية يمنح المتسولون خيران اما تعين نائب رئاسي للتسول يمثلهم ويضرب فلوسهم او استقلال دولة المتسولين في ثلث اخر من الثلث المتبقي


الفاتح يوسف جبرا
الفاتح يوسف جبرا

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة