المقالات
السياسة
ارشيف مقالات سياسية

09-17-2011 08:20 AM

تراسيم

في بيتنا شغالة !!

عبدالباقي الظافر
[email protected]

زوجة السفير ألحت على اختيار شغالة حبشية (برستيج).. من المواصفات التي وضعتها حرم السفير أن تكون (البت) الإثيوبية شابة ممشوقة القوام جميلة المحيا تتقن اللغة الإنجليزية.. بعد بحث وتدقيق هاتفها الوسيط السوداني أن طلبها موجود على الرف.. الوسيط طلب من السيدة المحترمة أن تسرع الخطى حتى لا يخطف الشابة الإثيوبية زبون آخر.
زوار السفير من العامة كانوا يظنون الشغالة الجذابة كريمته الكبرى.. فقد تولت الآنسة الأجنبية تدبير كل شيء.. من شراء الاحتياجات من السوق إلى طهو الطعام.. حتى بدلة السيد السفير كانت تمر بين يديها.. الشغالة زحفت إلى غرفة النوم وباتت تتولى تفاصيل ملبس السفير.
أسرة السفير تكتشف مفاجأة غير سعيدة.. البنت الحبشية مصابة بدودة الفرنديز.. الدودة تسكن داخل جسم الإنسان ثم تثقبه من حيث تشاء.. الأسرة الدبلوماسية لم تحتمل صدمة المرض المعدي وأطلقت سراح الشغالة الجميلة.
حسناً.. اتركوا الأحباش ما تركوكم.. أبي رحمه الله تتغشاه اصاب في الاربعينات فرصة عمل في الحبشة الطليانية.. عندما ضاق الحال هاجر آلاف السودانيين مثل أبي إلى الحبشة التي كان يسيطر على أسواقها الإيطاليون.. المك نمر عندما رأى شبح الموت يترصده بين الأهل وخشي من انتقام الدفتردار القادم من أسفل النهر.. لاذ إلى الحبشة التي آوته ونصرته.
الدعة الاقتصادية التي مرت بالسودان خلال العشرة سنوات الماضية جعلته منخفضاً تجارياً تأوي إليه قلوب كثير من أهل الجوار.. ولكن هبوب الرياح الإثيوبية كان الأقوى.. الحبشيات ولجن إلى بيوتنا.. أطفالنا أصبحوا يتحدثون العربية بملمح إثيوبي.. أما الذين أوتوا سعة من المال فقد جعلوا الشغالات مثنى وثلاث ورباع.. في كثير من هذه البيوت أصبحت اللغات الإثيوبية تشكل حضوراً لافتاً.
المشكلة أن كثيرا من الأسر أصلاً لا تحتاج إلى هذه الخدمة العابرة للحدود.. ولكن وجود الشغالة أصبح جزءاً من الديكور الاجتماعي.. أسر لا تملك قوت يومها رغم ذلك تصرّ على تعيين شغالة.. بعضنا أفرط في (البوبار) وبات يستورد خادمات بيوت من الفلبين وسريلانكا.. صديق يشكو بمرارة أن زوجته عندما تشعل معركة مع (البت الفلبينية) تتصل عليه في الهاتف لتوفير خدمة الترجمة الفورية الممتازة.
وجود الشغالة واحتلالها لحيز كبير أضعف من دور الزوجة.. الآن الشغالة تعد شاي الصباح.. ثم تتابع مهمتها في تجهيز أطفال المدارس.. في هذا الحيز يضيع دور تربويّ مهمّ.. جلسة شاي الصباح التي تتحلق فيها الأسرة صباح كل يوم تعتبر اجتماع عمل لمجلس ادارة الأسرة.. وداع تلاميذ المدارس صباحاً كانت تتخلله مهام تفتيشية تهدف للاطمئنان على المسيرة الدراسية.
هنالك أمر مثير للقلق.. بعض الأسر فيها أبناء مراهقون وأزواج (عيونهم طايرة).. في الغالب الأعم هؤلاء اليافعات يتعرضن من وراء الأبواب المغلقة لصنوف من التحرشات.. ومن الممكن أن تتحول العلاقة المكانية إلى عاطفة جامحة بين شابة جميلة ومراهق جذاب.
في هذا الظرف الحرج يحدث هدر للعملات الأجنبية.. الشغالات الأجنبيات يرسلن مدخراتهن إلى خارج الحدود.. وجودهن داخل السودان ضيق فرص العمل المحدودة جداً.. من قبل كانت الأسر السودانية تستعين بعمال يومية لأداء بعض الواجبات المنزلية.
بصراحة أنا أعضد دعوة صديقنا الصحفي عادل سيد أحمد خليفة لعقد ندوة لمناقشة حكاية شغالة في بيتنا.


تعليقات 17 | إهداء 0 | زيارات 3353

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#210651 [زهجان ]
0.00/5 (0 صوت)

09-18-2011 03:58 PM
والله امرك عجيب وتفكيرك اعجب يعنى عشان شغالة لازم يكون فى تحرش وبعدين ماقدرت افهم الربط شنو بين اهلك المشو الحبشة وبين المك نمر وبين اننا نطرد كل الخدم عشان نمنع هروب الدولار ياخى اتق الله فى الناس لانوا هم برضوا عندهم اسر وبيوت ولو عملنا بى نظريتك دى معناها اكتر من 45 مليون سودانى مفروض يرجعوا من المهاجر للاسباب التافهة الذكرتها حقيقة السودان مافى شى ضاريهو غير الجهلة والسطحيين امثالك


#210533 [Abutaha]
0.00/5 (0 صوت)

09-18-2011 01:24 PM
موضوع مخستك ...تف علي كتاباتك ....
مادا تعرف عن الحبش؟ اسال احمد طه عشان يدرسك يا جاهل ....
ادا بتقكر انو انو كل زول ممكن يستغلهن جسنيا تكون انت غىر مربى
و اي زول ىعمل خارج ارضو لازم يرسل لبلدو
انتو العدس اخبارو شنو؟؟
تف و الف تف


#210473 [محمد]
0.00/5 (0 صوت)

09-18-2011 12:03 PM
يا جماعة انت بتقولوا فى شنو كلام شنيقيطى صاح
الموضوع كله (كالعادة) ان المقال ده توصية من الوالى ووزير المالية عطفا على الكلام الفارغ القالو وزير المالية :
(الناس ماتاكل فى المطاعم على شارع المطار و ما تجيب شغالات عشان الدولار ما يطلع بره)
يا جماعة الزول لمن يكتب اى موضوع ما تاخدوا الموضوع جادى فتشوا عن المصلحة


#210227 [احمد علي ]
0.00/5 (0 صوت)

09-18-2011 06:16 AM
إلى المعلق الفاضل منعم موسى.... من المجحف ان نقارن بين البيت السوداني والبيت في دولة اوروبية .... أنا اعيش مع اسرتي في دولة اوروبية والبيوت مختلفة تماما عن السودان ... اولا... لا يوجد غبار والجو يساعد علي بقاء البيت نظيف لذلك تكتفي زوجتي بالتنظيف مرة واحده فقط في الإسبوع ... وحتى التنظيف يكون سريع ولا ياخد وقت وتستعمل المكنسة الكهربييه ....

أما بيتنا في السودان فهو بيت في حي متواضع وتتعب زوجتي في التنظيف قش ومسح...الخ , خاصة وان ابني الصغير مازال يحبو ...

وهنالك نقطة اخري , في الدول الغربيه يقوم الزوج بالمشاركة في الاعمال المنزليه حتى تغير حفاظات الاطفال ...وعند ولادة طفل جدييد يقوم الرجل بالبقاء والعناية بزوجته ..... اين هذا من الرجل السوداني ؟

إذا كنا سنتخذ الدول الغربيه قدوة .... يجب التطبييق على الرجال والنساء ... في هذه الحالة استعد اخي السوداني لانك قد تضطر للإلتزام بجدول اسبوعي يقسم اعمال المنزل بينك وبين زوجتك مناصفة ....( ) ( ) ( ) ( ) ( ) ( )


#210209 [احمد علي ]
0.00/5 (0 صوت)

09-18-2011 03:40 AM
يا جماعة ويا كتب المقال مافي داعي تقول إنه كل الأسر السودانية بتجيب شغالة عشان فقط عشان البوبار , في حالات كتيرة بتستدعي وجود شغالة وأنا شخصيا بعرف كميه من الناس اجبرتهم ظروفهم إنه يجيبوا شغالات ,

يعني مامن العدل إنه نقول إنه كل الناس بتجيب الشغالة بس بوبار ؟؟؟!!!!

قول اهم شي لازم مايجيبوا أي واحدة والدقة في الإختيار ومراقبة سلوكها ...


#210139 [omer]
0.00/5 (0 صوت)

09-17-2011 09:51 PM
تحيات من الامراض التي يتقلها الاحباش مرض البكتريا الحلزونية ودا مرض حطير ومعدي ينتقل بالنفس ويسبب في نهاية الامر امراض خطيرة اقلها السرطان المعدي البطني...وخاصه مع الاكل وتناول الاكل من يد ملوثه الحذرررررررررررررررررر


#210116 [الغاضبة]
0.00/5 (0 صوت)

09-17-2011 08:35 PM
يا جماعة روقوا شوية، في اعتقادي وحسب ما شاهدت ان الموضوع خطير ويستحق المناقشة ويستحق ان تتناوله وسائل الاعلام وخاصة الصحف بصورة جادة، لان موضوع العمالة المنزلية في السودان فوضى كبيرة، هناك جهات تستجلب كميات مهولة من البشر من اثيوبيا للعمل في البيوت دون اي قيود او اجراءات تنظيمية، دون حتى تاكد السلطات الصحية من خلوهن من الامراض المعدية حتى اصبح الامر في غاية الخطورة، كما احسست هناك جانب خطير في الموضوع يشبه الاتجار بالبشر، لان بعض من هذه الجهات تاتي وتجمع أجور الشغالات ولا تدري ان كان للشغالة نصيب من هذا الاجر وكم يعطونها اي انها لا تستلم اجرها بل يستلمه الشخص الذي اتى بها، وهذه نقطة يجب الانتباه لها أيضا. لا شك أن هناك افراد يحتاجون فعلا لمن يساعد في الاعمال المنزلية، وبما ان مهمة الدولة هي حماية مواطنيها من الامراض وسلامتهم ايضا من الاخطار الاخرى التي قد يتعرضون لها بسبب مثل هذه الممارسات، إلا أن حكومتنا الرشيدة لا يهمها من قريب ولا بعيد، فهي لا تهتم باجراء الفحوصات اللازمة لمثل هذه العمالة تجنبا لانتشار الأمراض والتأكد من سلوكياتهم ايضا، ولأن بلدنا تعمها الفوضى في كل شبر منها، حدث ما حدث وما نراه من فوضى وأخطار تهددنا....والاستاذ عبد الباقي الظافر يتناول الموضوع من جانب واحد فقط وهو البوبار، اتفق معه ان الأمر قد يكون كذلك، لكن كل انسان حر في نفسه وماله يتبوبر زي ماعاوز لكن في النهاية لازم تكون في ضوابط من الحكومة وكان ينبغي ان يحاول معرفة مصدر المشكلة وكيفية حلها .....



#210029 [monem musa]
0.00/5 (0 صوت)

09-17-2011 03:59 PM
لاسف إتضح لي بعد هجرتي لدول الغرب اننا شعب فارغ وبتاع بوبار شغالة شنو يا جماعة البتجوبوها ممكن اقبل الكلام ده للناس العندها قروش كثيرة جدا لكن للناس العاديين ده ياهو البوبار في بيت الايجار!!!!انا اعيش في المانيا هنا ما بتشوف شغالة إلا في بيوت الاثرياء اما معظم الشعب الالماني مفهوم الشغالة اصلا ما عندهم علي الرغم من انه من المجتمعات الاوربية الراقية وذات مستوي اقتصادي مرتفع لكن تجدهم بيشتغلوا بنفسهم في بيوتهم!!!يبقي المصيبة في المجتمع السوداني إذا انتشرت فيه هذه الظاهرة.


#209981 [عجيب]
0.00/5 (0 صوت)

09-17-2011 02:27 PM
اعتقد انك نسيت الجانب الاهم والمهم في مسالة العمالة المنزلية!! وثقافة البترول الذي لم نتهنا به تشبها بال الخليج!!الا وهو نقال الامراض الفتاكه والتي تقعد من امر كل البلاد!!المغلوبة المنهوبة المضيعه من بنيها!!فقد سبق لاحد الصحفيين ان نشر عن تفشي مثل تلكم الامراض منها الايذر والتهاب الكبد الوبائي!!وتلكم بربي اخطر من زوج نزق او مراهق يتسلي!!! فهولاء يطبخزن للمهزلة ويصنعون الماكولات في البيوتات المدعية للثراء ولانهم اثرياء جدود لايميزون متطلبات الصحه ولااهمية الفحص بل يدركون للشغالة ان تولغ في الطبخ وحمل الااطفال واستخدام دورات المياه!! وانا من من يعلمون بان نسبة تلكم الاوبئة كبيرة مما يستدعي الا تعمل خادمة منزلية دون فحص طبي دوريا وليس لمرة طالما هي تقضي اياما برفقة بني جنسها مكدسين في البيوتات!!! فهذا ما كان يقوم به دولة الخليج في تعاملهم مع خدم المنازل!!ولكنا لم نبدا لامن حيث بدا الاخرين ولا من حيث انتهوا!!! اما عمال المطاعم!! فحدث ولاحرج او تناول وجبتك لمدت ثلاث ايام في افخر مطعم لدينا يعج بمثل اؤلئك فان لم تزر الطبيب زرة المقابر!!! وقد تفننوا الان في عرض يغدش الحياء في مقاهي عجيبة بل فلل مؤجرة!!! لاندري اين هم من جلدوا الفتاة منهم!! ام هي نيفاشا ان نغض الطرف عن شبابنا يتناولون الشيشه ويتسامرون مع فتيات غانيات في قلب العاصمه وبين دور الوزراء!!! انها ماساة امة تضاف لمأسينا!!! وهل تظن الحديث ينفع!! والدولة تسمع!! والبلاد تتمزق من اطرافها وتنخر من احشائها!! لااظن فنحن في الدولة الشركه!!! ندفع لها ونعتني بانفسها وتبخل علينا حتي بالنصيحه لالاثريائها الجدد الذين لايعلمون ولالمواطنيها السذج الذين يجهلون!! فلاصحه تعلم او تثقف ولا بلدية تتابع ولا نويا حتي!


#209972 [الزول الكان سمح]
0.00/5 (0 صوت)

09-17-2011 02:18 PM

أخى زاهى

لييه بلا يخموا براهو ...والمشغلو كمان معاهو


#209942 [جهينة]
0.00/5 (0 صوت)

09-17-2011 01:31 PM
الشغالة متاحة لمن يملك ويستطيع ، وليس فى الامر عجب . وهكذا الناس درجات ومقامات ، ولا اعتراض فى حكم الله . ولكن الكلام فى اغنياء الغفلة اكلى السحت ،القادمون من بيوت الجالوص ، والكرانك .الذين يباهون بالمال الحرام وصرفه وتبديده بغير حساب ، واكيد سفيرك المحترم يكون زى بنت قرناص ، وجد نفسه فجأة من اصحاب الجناب العالى . لا يهم يا ظافر اظنك لحقت عثمان مرغنى فى ( جملا اصهب ) وود الراجل المحترم سيداحمد خليفة ، لم يجد موضوع غير الشغالات رغم المزعجات من الليالى . التى منعت ( الجماعة ) طيب المنام . ولهذا بارت ( الوطن ) وبارت بضاعتك المضروبة .


#209904 [عادل الريح]
0.00/5 (0 صوت)

09-17-2011 12:10 PM
بعد الازمات الاقتصادية تاكد تماما ان جموع الاحباش ستتوجه جنوبا الى جوبا ده اذا الامور استقرت
بعدين ده تانى مقال ليك عن الاحباش وبنفس الفهم كله فى جمال الحبشيات


#209898 [النمر]
0.00/5 (0 صوت)

09-17-2011 11:58 AM
والله الشغالات في السودان مطاريد دول الخليج لثبوت عدم الياقة صحيا لممارسة المهنة والسودان وربات البيوت ما في انتباه لهذه المشكلة التي قد تفقدها ابنائها جميعهم تباعا ام من تبحث عن فلانه بحبشيتها لا تبكي غدا والموضوع عائز توعية شديدة جدا وقي الاونة الخيرة المراة السودانمية ما عادت تستطيع الغتسال في الحمام من الشحوم الشائلاها فلتاحذ من هذة الحبشية وصفة الرشاقة والقوام وتتركها ;) ;) ;)


#209897 [شنقيطى]
0.00/5 (0 صوت)

09-17-2011 11:58 AM
خليت كل حاجه وبقيت فى قصه الحبشيات؟
دا عشان الدولار البرسلو ولا عشان الراجال عينم ما تطير
دى وصية من والى عصمان الذى لا يظلم لدية اح ولا من واليك بتاع العدس والذبادى
خليك فى المواضيع الهامه يعنى حصل شنو مثلا فى موضوع الحج والعمره
اقدر على ديل خلى الحبشيات فى حالهم
بعدين عمال اليوميه ديل يا فالح بياخدوا فى اليوم بالدسته وشغلهم ذى وشهم
وبعدين يوم يجوا ويوم لا يعنى الواحد يكون فاتح الباب وبتلفت يفتش عليهم ذى العوير
وبعد تلقاهم يتفلسفوا ويا جوك ويا لا حسب المزاج
وعليك الله حكايه اجتماع الصباح دى ليييييسه عندكم
والله انتو ماشاءالله عليكم رايقين ومرتاحين لسه عندكم زمن اجتماع وتفتسش وخلافه


#209863 [المتنطع]
0.00/5 (0 صوت)

09-17-2011 11:10 AM
انت جاد؟؟؟؟؟؟؟؟؟؟؟؟؟؟؟؟؟


#209852 [saad]
0.00/5 (0 صوت)

09-17-2011 10:49 AM
انا في المهجر واعمل طبيب وماعندي شغاله ولا سواق خاص , اليوم الأم عملت الشاي وكوت ملابس الأولاد وأنا حممتم ووديتهم المدرسه , واقول للبوباريين اتقوا الله


#209850 [zahi]
0.00/5 (0 صوت)

09-17-2011 10:46 AM
وكمان الشغالات الاجنبيات بياكلو معانا الطماطم واللحمه والخبز واللبن بالتالي بساهمو في زيادة الاستهلاك داخل الاسره وبالتالي في المجتمع !!!!!!!!!!!!!!!!!! تفووووووو ......ز حريقه فيك وفي كتاباتك ....... الواحد لو ما عندو موضوع يكتب فيهو احسن يحتجب بدل ما يرفع لينا الضغط زياده ...... بلا يخمك ...........


عبدالباقي الظافر
عبدالباقي الظافر

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة