عشان ما نرفس وكده ..اا
09-19-2011 12:14 PM

ساخر سبيل

عشان ما نرفس وكده !

الفاتح يوسف جبرا

بينما كان (حاج صديق) يجلس وسط زوجته وأبنائه يشاهدون النشرة الرئيسية في التلفزيون أذاعت المذيعة خبراً مفاده أن (المجلس التشريعى لولاية الخرطوم) يدعو المواطنين لمقاطعة شراء اللحوم بعد أن وصلت أسعارها إلى أرقام قياسية .
عليك الله الناس ديل ما ببالغوا يا أبومحمد
كيفن يا حاجة؟
هو هسه القادر يشتري ليهو لحمة منو؟
والله صدقيني يا حاجه هسه لينا كم سنة البيت ده ما دخلتو لحمة
ما أن إنتهت نشرة الأخبار حتى تم الإنتقال إلى أستديو البرامج الحوارية حيث كانت الحلقة عن (مقاطعة اللحوم
(المذيعة) : في البداية يحدثنا عضو المجلس الأستاذ (فلان الفلتكاني) عن هذا التوجيه الذى أصدره المجلس بمقاطعة اللحوم .. إتفضل يا استاذ
بسم الله الرحمن الرحيم .. هذا هو دور المجلس وهو يقوم به خير قيام .. المجلس قلبو على المواطن عشان كده في ظل الغلاء والأسعار السائبة دى لازم المجلس يتدخل تدخلا فاعلا وقويا ويطلب من المواطنين يتوقفوا عن شراء السلع .. كل السلع السعرها يزيد مش اللحمة وبس
(المذيعة) : عن خطورة أكل اللحوم يحدثنا الدكتور (علان العلاني)
والله اللحمة دى يا جماعة لو إنتو عارفين ختره جنس ختورية ، اللحم ده شي خطر شديد وله آثار مدمرة على صحة المواطن وهو منبع الكثير من الأمراض التي تصيب الإنسان، وهو سريع التعرض للعدوى وللميكروبات التي تنتقل إليه من الأتربة والذباب وإنتو براااكم شايفين الضبان البيكون راكى فى اللحمة عند الجزارين قدر شنو؟
شكراً ليك يا دكتور على التنبيه ده .. طيب ننتقل للشيخ (فرتكان الفرتكانى) يحدثنا عن مشروعية شراء اللحوم الباهظة
بسم الله الرحمن الرحيم وبه نستعين .. أما بعد فإن الله يوصينا بعدم التبذير لأن المبذرين أخوان الشياطين وشراء اللحم بأثمان باهظة لا شك أنه تبذير وهو حرام والله أعلم.
(الحاجة وهي تقوم بقفل التلفزيون) : مش اللحمة دى خليناها من زماااان .
في اليوم التالي (لقرار المقاطعة) وبينما كان حاج صديق يقوم بشراء مستلزمات أسرته من السوق إندهش من خلو (الجزر) من أى مشترين ، كان الجزارون يجلسون أمام محلاتهم الخالية من الزبائن بينما اللحوم تتكدس على الطاولات والشناكل !
ما أن خرج حاج صديق من السوق إلى الشارع الرئيس حتى تناهى إلى سمعه أصوات مايكرفون :
يلا علينا جااااي ... العجالي عشرين .. عشرين العجالي
نحنا عاوزين نبيع .. نحنا عاوزين نعيش
يلا علينا جاي .. بي عشرين .. كلو الليلة ح ياكل لحمة
بس بي عشرين .. بي عشرين بس ..
ما أن وصل عم صديق الى مصدر الصوت حتى وجد (بوكس) يهرع نحوه المواطنون من جميع الإتجاهات (الأعمي شايل المكسر) موظفين .. عمال .. نساء .. أطفال .. بعد (مدافرة) وصل (عم صديق) إلى البائع وهو يقول في نفسه :
دى فرصة تاني ما بتتعوض .. الأولاد ليهم سنتين ما أكلو ليهم لحم
(ثم) : بالله أدينى كيلو ونص من الفخده دى !
ما أن دخل عم صديق إلى منزله حتى وضع الكيس (بزهو) على التربيزة وهو يسأل أولاده والحاجة !
أنقروا جايب ليكم الليلة شنو؟
طماطم؟
كذباً كاذب
موز؟
كذباً كاذب
وهنا لم يستطع طفله الشقى (حمادة) الإنتظار فقام بخطف الكيس وفتحه
لحمممممممممممممة !
في لحظة إنطلقت تظاهرة تجوب ارجاء المنزل .. (الشعب يريد شية بالفحم) .. (الشعب يريد شية بالفحم) !!
سرعان ما قامت الحاجة بتوضيب اللحمة .. وتنويع طبخها .. شي (شية بالفحم) وشي (دمعة) وشي ما بعرف شنو و(طبعن) تركت بعضاً منها (لليوم الأسود) ، تغدى الجميع (غدوة كاااربة) .. بعد الغداء ذهب حاج صديق إلى الصالون حيث إستلقى على السرير ليطالع إحدى الصحف الإجتماعية التى قام بإحضارها معه !
ما أن قرأ حاج صديق (المانشيت الرئيس) حتى أخذ (يرفس) فقد كان المانشيت يقول :
مصدر مسئول ينفي أن تكون بقايا الحمير التى تم العثور عليها في أطراف العاصمة قد أستخدمت فى الإستهلاك الآدمى !
كسرة :
الشعب يريد رقابة صارمة وفحصا للحوم الفى الأسواق والمطاعم (فى الوكت ده بالذات) عشان ما (نرفس) وكده !


تعليقات 8 | إهداء 6 | زيارات 5673

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#212119 [ابوفارس ]
0.00/5 (0 صوت)

09-21-2011 12:42 AM
والله ضحكتني كالعادة يا استاذ جبرا ، لكن الضحكني اكثر اخونا المعلق سيف الحاج ( كلو ولا الهنيق ) لانو ده الفضل لاثبات اننا فعلا حمير بنصدق اي كلام يتقال .

انا اتفق مع الاخ المعلق ( واحد طافش ) فيما قاله ................ كلامو صاح مليون في المية .


#211679 [saad]
0.00/5 (0 صوت)

09-20-2011 10:59 AM
الجزارين المساكين ذنبهم شنو, بس حكومة السجم والرماد دي ما لقت الا الجزارين , عشان لحمتهم لو ما اتباعت بتعفن , و عشان باقي السلع محتكرنها تجار الحكومه الوسخانه


#211504 [سوداني اصيل]
0.00/5 (0 صوت)

09-20-2011 02:25 AM
والله يا جماعة الحكومة السجمانه خلتنا زي المصريين . نفرح باللحمة . الله يرحم زمن الدنيا بخير وزمن السودان كان خالي من الاخوان . . الزمن داك كان البشتري لحمة بقري بدسها عشان الناس ما يشوفوه لانه كان عيب وما من البرستيج تاكل لحم بقر .. لازم تاكل ضان وما ادراك ما الضان وكان عيب الواحد يشتري بالكيلو اقل شئ تشتري كراع كاملة .. الله يرحم زمن الزنكي الخضار بالقفة والفواكة مستورده بالكراتيين . . ويجينا الجنى الممسح ده ويقول السودانيين كانوا شحاتيين والله شحات انت وغنم حوش بانقا الكانوا شغاليين طلب وما عندهم حق اللحمة الغلوها دي . . ملعون ابو دي دنيا دواره..


#211434 [hamed]
0.00/5 (0 صوت)

09-19-2011 11:14 PM
حاج صديق رفس بسبب اللحمة لكن نحن رفسنا من بلويك البسوي فيها ياجبرا


#211154 [أبوهاجر]
0.00/5 (0 صوت)

09-19-2011 01:50 PM
أكيد الجماعة الطلعوا قرار المقاطعة ده أول حاجة ملأوا تلاجاتهم وديب فريزراتهم ,اشتروا ليهم كم خروف كده وكم عجل ودوها مزارعهم الخاصة ..حتى بعد داك طلعوا القرار ... الكروش دى بتقدر تقعد بدون لحمة ؟
خلاص نقاطع اللحمة والرغيف والخضارات والكهرباء والملابس (نقعد أم فكو) مش دى كلها حاجات غالية... أخخخخ نسيت الدواء والقراية
والواحد برضو يقاطع حبيبو الغالى
وما ينزل فى محطة الغالى
ومانسمع أغنية يا غالى على ونور عينى
والحكومة تقاطع الدولار الغالى
وما تنسوا المواد البترولية .. دى سبب كل المصائب


#211130 [مهاجر]
0.00/5 (0 صوت)

09-19-2011 01:15 PM
والله اليلة رفسة قوية أقصد كسرتك ديل ماعندهم ضمير بسوها \" الجوع كافر\"


#211099 [SaifAlhag]
0.00/5 (0 صوت)

09-19-2011 12:39 PM
كان بقت على الرفسى كويس عشان نرفس الكيزان العواليق ديل ...بس ما تجبيليها هنييق...


#211091 [واحد طافش]
0.00/5 (0 صوت)

09-19-2011 12:32 PM
ههههههه والله يا استاذ الناس لو لقت لحمة حمير رخيصة ما اظنها تمانع المهم لحمة ...
وبالنسبة لقرار مقاطعة اللحوم يااااااااااااا الشعب السوداني الفضل الكلام ده عشان انتو ما تستهلكو لحمة ويصدروها كلها وطبعاً العائد يمشي لجيوبهم عشان كده خليكم اذكياء ولو لمرة واحدة حرقتو دمنا بسذاجتكم وغبائكم ده ..... افهمو ولو لمرة واحدة الله يرضى عليكم ......


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة