المقالات
مكتبة كتاب المقالات والأعمدة
صلاح الدين عووضة
اكلوا (لَحْمَتْكُم) ودَعُوْا (الحَرَكَات) .. !!ا
اكلوا (لَحْمَتْكُم) ودَعُوْا (الحَرَكَات) .. !!ا
09-20-2011 05:40 PM

بالمنطق


اكلوا (لَحْمَتْكُم) ودَعُوْا (الحَرَكَات) .. !!!

صلاح الدين عووضة
[email protected]


* الآن تأكدتُ مما كان محض شكٍّ لديّ لا يرقى إلى مرتبة اليقين ..
* تأكدتُ من أن الإنقاذ تتعامل مع شعب السُّودان وفقاً لمقولة (أُخدوهم على قدر عُقولهم) ..
* فهي لا ترى في أفراد هذا الشّعب سوى (دلاهات) تسيلُ (ريالاتُهم) على جوانب أفواههم ، وتتأرجح (قنابيرهم) فوق رؤوسهم ..
* فقد سارع نفرٌ من أهل الإنقاذ هذه إلى إعلان مقاطعتهم للحمة بدورهم مثلهم مثل شعب السّودان المسكين ..
* لقد فعلوا تماماً مثل الذي فعله أخ لهم في (الكنكشة) ـ وهو القذافي ـ في بدايات ثورة الشّعب اللّيبي ضد نظام حكمه ..
* فقد قال إنّه سيخرج أيضاً مع الخارجين إلى الشّارع مُطالباً بالإصلاح الذي يُطالبون به ..
* وضحك العالم أجمع لـ(استهبال) القذافي هذا إلاّ شخصه وحاشيته وأولاده ..
* ولمّا أدرك القائد الأممي أن (الكلام) يمكن أن يدخل (حوش) العزيزية ـ وليس (هِزَاراً) ـ أعلن الحرب على شعبه (زنقة زنقة) ..
* والإنقاذ الآن إذ تفعل أمراً (مضحكاً) مماثلاً فإنّما تريد أن (تستثمر) في غضب شعبي تعلم أنّه لا يستهدف (حوشها) ..
* وبالفعل ؛ انساقت بعض الصُّحف بـ(سذاجة) وراء هذا (الاستهبال) الدّعائي فاحتفت بما قالت إنه رصدٌ لـ(فلان) وهو يأكل (مُلاح الرُّوب) ، ورصد لـ(علانة) وهي تتغدَّى مع أسرتها بالعدس ، ورصد لـ(فلتكانة) وهي تُعدُّ (السّخينة) ..
* وبما أنّ كاتب هذه السُّطور كان أوّل من طالب بمقاطعة اللّحمة إلا إنه يتمنَّى مقاطعة الإنقاذ نفسها (تصحيحاًَ) للحال كله وليس صينية الطّعام وحسب ..
* يتمنّى حُدوث ذلك ـ صاحب هذه الزّاويّة ـ ليرى إن كان آكلو العدس والرُّوب والسّخينة ـ من أهل الإنقاذ ـ سيتجاوبون مع (عذابات !!) الشّعب هذه أيضاً أم يتحسّسون مسدساتهم كما فعل القذافي ؟!! ..
* وأغلب ظنِّي أنّ منهم من سيقول خلال اجتماع لتدارس الأمر : (والله لَنَخُجَنَّهُم حتى يصيروا روباً ـ أو يقولوا (الرُّوب) ـ وأعينهم تقطرُ دماً \"سخيناً\") ..
*فالإنقاذ إن كانت صادقة في تعاطفها مع النّاس فلتبحث عن الأسباب التي أوصلتهم إلى هذه الحالة المعيشية المزريّة بدلاً من (الحركات المظهريّة) التي لا تُسْمِن ولا تُغْنِي من (جوعٍ) ..
* فإن وجدت أن الأسباب هذه تعود إلى سياساتها هي نفسها فلتتذكر أنّها قبل إثنين وعشرين عاماً انقلبت على (الشّرعيّة) بحجّة (إنقاذ) النّاس من (الضّائقة المعيشيّة) إضافة إلى حجج أخرى ..
* فإذا ما فعلت ؛ وكانت صادقة مع نفسها ـ ومع الله ـ فلتطالب منسوبيها بمقاطعة (شهوة) السُّلطة والمال والجاه عوضاً عن مطالبتنا النّاس بمقاطعتها ..
* ثم فالتستغفر الله الذي توعَّد ـ حسب الحديث الشّريف ـ من يلي أمراً من أمور المسلمين ثم (يَشقُّ !!) عليهم بأشد العذاب و(المشقّة !!) ..
* ثم فلتطلب الصّفح من النّاس ..
* علَّ وعسى !!!!


تعليقات 16 | إهداء 0 | زيارات 4152

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#212943 [الزول الكان سمح]
0.00/5 (0 صوت)

09-22-2011 09:13 AM

كلوا لحمتكم وبطلوا إستهبالنا...ومطرح ماتسرى( تهرى) لو ضانى أو عجالى


#212532 [Mohammed]
0.00/5 (0 صوت)

09-21-2011 03:05 PM
أتفق بشدة مع الامدرماني,أنتا رائع ياعووضة لكن فقط بالثوب السوداني فلا تنخدع للقبلية وحقيقة ابيخ مقالاتك هي التي تتحدث عن النوبة وما أدراك ماالنوبة والتي تجعل غير النوبة ينفرون منها فلك ان تخاطب هموم السودان ولا كرامة فانت تمتلك بيانا ناصعا وحجة قوية وسخرية عرف بها اهلنا في تلك المناطق من السودان.


#212493 [nasreldeen ]
0.00/5 (0 صوت)

09-21-2011 02:38 PM
كدى ي أخوانا خلونا ناخد الأمر بساطة وسذاجة وريالة دافقة ( عشان نريّح الجماعة )
الناس ديل ما جو عشان يفكونا من الضائقة المعيشية ( مش كده ؟ )
الآن الضائقة المعيشية وبعد حوالى ثلاثة وعشرين سنة ( ماشه زايدة ) ونحن طبعا مافينا روح لحروب ومضاربات زى باقى الثورات العربية عشان كده ولتأكد السبب الذى أتى بهولاء الجماعة والذى حسب قولهم أنه يستدعى تغيير النهج وطريقة الحكم فأننا نطلب منهم بأخوى وأخوى أن يتخارجوا ويخلوا لينا باقى الروح دى نباصر بيها ولا بباقى الروح ده بنقوم نكاتل ويمكن ربنا يفتح علينا بروح جدية وهم يروحوا فيها..... انتو معاى ولا وحتوا وين ؟؟؟؟؟؟؟؟؟
آآآآآآآآآآآآآآآآآآآآآآآآآ آآآآآآآآآآآآآآآآآآآآ آآآآآآآآآآآآآآآآآآآآآآآآآآآآآآآخخخخخخ


#212307 [الكلس]
0.00/5 (0 صوت)

09-21-2011 11:13 AM
الكيزان منافقين وكذابين ومرائين. امبارح جابو نسوان حالتهم بالبلاء قال شنو قال بيعملوا زاد للجيش فى الدمازين ... والله قعدت اضحك زى المجنون من الخبر الجابو تلفزيون الكذب والنفاق ...ياخى النوسوان لنفسهم دايرين اليعمل ليهم زاد


#212205 [Shah]
0.00/5 (0 صوت)

09-21-2011 09:23 AM
يا بوى ما تصدق كلامهم ديل لو خلوا أكل اللحمة بجيهم إسهال.


#212203 [سودانية]
0.00/5 (0 صوت)

09-21-2011 09:20 AM
اتساْل ياأخى اين أمانة الكلمة ومصداقية الصحافة أم هو الخوف الذى افقد الصحافة السودانية صدق اقلامها وحتى التمسك بنصر الفكرة المطروحة والتى هى فى الغالب واقع حال المواطن المطحون مابين غلاء المعيشة وتجاهل الدولة لمعالجة الوضع علاجاً جذريا يرفع عن كاهله المعاناة .


#212109 [مالك]
0.00/5 (0 صوت)

09-20-2011 11:55 PM
الاستاذ صلاح عووضة لك التحية هى على طريقة الكرة الفريق المتقدم يسعى لتجميد اللعب وامتصاص حماس الفريق المتاخر زالانقاذ تحاول ان تلهى الناس عن مشكلتهم الاساسية وفى بالها الثورات العربية التى تتوفر شروطها تماما وذلك لتستمر لوقت اطول وتجعل الشعب يطعن الضل بدلا عن الفيل .من الذى تسبب فى ارتفاع كل الاسعار وليس اللحوم؟من الذى تسبب فى تقسىم السودان ولا زال يهدده تقسيم وتقسيم؟من الذى جعل المواطن عاجزا عن الايفاء بضرورات الحياة؟من الذى جعل المواطن ينفق على الحكومة وليس العكس؟طبعا ليست التنقاذ ذات المسيرة القاصدة ولاقادتها الذين يفوقون الخلفاء الراشدون عدلا وتقشفا زنحن الغلابة من تسبب فى ذلك يعاوننا الاستعمار والصليبيون واعداء الاسلام والامبريالية والانقاذ براء وطاقمها يربط الحجارة على البطون لذا علينا دفع الثمن والاستفاقة من هذا الثبات.الشعب السودانى بخير ولم ولن نفقد الثقة فيه وان طال الزمن


#212107 [إبليس]
0.00/5 (0 صوت)

09-20-2011 11:44 PM
يا (مولانا) الشهوات المذكورة ناقصة وقللت من (كمال) العمود.. شهوة الفرج.. ( فلتطالب منسوبيها بمقاطعة (شهوة) السُّلطة والمال والجاه عوضاً عن مطالبتنا النّاس بمقاطعتها ..)

ولا أنا غلطان


#212060 [الامدرماني]
0.00/5 (0 صوت)

09-20-2011 09:23 PM
والله العظيم هذا اعظم و اشجع كاتب سوداني مر علي تأريخ الصحافة السودانية.لكن اعيب عليه احيانا قليله توجهه نحو قبيلته الصفة التي ارادت الانقاذ ان توصل لها الناس فانصاع لهم لكن احيانا.و ليس ذلك عيب كبير بل دقسة معلم.ارجو ان تستمعوا له.وارجو ان لا يجيب سيرة النوبة مرة اخري بل يتكلم باسم مواطن سوداني عامة و ليس قبيلته.وطبعا شجاعته من ايام التسعينات ايام مافي رجال اتكلموا.شكرا لك عووضة و اصل.وشكرا.


#211996 [مدحت عروة]
0.00/5 (0 صوت)

09-20-2011 06:54 PM
يا صلاح ياخوى الناس فى شنو و انت فى شنو هسع عليك الله اهم الزراعة و الثروة الحيوانية و رفاهية المواطن فى الريف و من ثم المدن ولا الجهاد فى سبيل الله ضد الكفرة و العلمانيين من السودانيين ؟؟ الاسلام فى خطر و تجى تقول لى لحمة و خضار؟؟ هسع قبال الانقاذ دى كان الناس فى السودان بيصلوا و يصوموا او يزكوا او يمشوا للمساجد او يوروا انهم مسلمين؟؟ كان اعداء الاسلام ضبحوهم!! احمدوا ربكم انه الانقاذ جات و خرجتم من دار الارقم لتنشروا الدعوة و تعلنوا اسلامكم بكل فخر و حرية !! لحمة شنو يا زول؟؟!! ما تشوف لينا عمود كده نكتبه فى جريدة انقاذية ولا انت ذاتك ما لاقى؟؟؟!!!


ردود على مدحت عروة
Sudan [منو] 09-21-2011 10:53 AM
الاخوة عروة السلام عليكم
في تعليقك بتقول للعم صلاح(هسع قبال الانقاذ دى كان الناس فى السودان بيصلوا و يصوموا او يزكوا او يمشوا للمساجد او يوروا انهم مسلمين؟؟ كان اعداء الاسلام ضبحوهم!! احمدوا ربكم انه الانقاذ جات و خرجتم من دار الارقم لتنشروا الدعوة و تعلنوا اسلامكم بكل فخر و حرية !! لحمة شنو يا زول؟؟!!)
نحمد الله علي نعمة الاسلام.
لكن الماقدرتا افهمو من كلامك (المدغمس) انو لو ما الانقاذ يعني كنا حنكون بوذيين مثلا او هندوس(شئ عجيب والله)
والواحد بحمد ربنا جا في زمن الانقاذ(بمب تاخ) عشان(يسبح ويصلي ويصوم)علي قولك
وياعروة انت داير تقنع الديك (روحك) لكن الديك مبرمج علي عدم الاقتنا(والقناعة)
والله ضحكتني.
قولتليا الانقاذ هي الخلتنا نضبط موضوع الصلاة دا.لكن عاد يالانقاذ(علي قول امي)اتلومتي الخليتني اصلي صلاة مافيها(طمانينة).
لنا عودة ياسيد عروة


#211980 [البو سامي]
0.00/5 (0 صوت)

09-20-2011 06:31 PM
قصة الانقاذ مع الشعب السودلني زي قصة حمار ام بلينة الجات تردى بيه قعدت تردى ليه .... باللبدة نام و بالقربة قام وحسب القصة فإن العجوز ام بلينة اعياها جلب الماء من مسافات بعيدة على ظهرها ففكرت وقدرت وباعت احدى نعيزاتها واشترت حمارا ولكن ويا وجعة ام بلينة عندما حاولت ان تسرج الحمار فنام على الارض بمجرد وضع اللبدة على ظهره ولم يتحملها مما جعل ام بلينة تذهب إلى مورد الماء لتجلب الماء كعادتها على ظهرها والمصيبة الاكبر من ذلك عندما وجدت الحمار يكاد يموت من العطش فصبت له القربة كاملة فشربها دون حياء وبذا اصبحت ام بلينة تجلب الماء للحمار على ظهرها هي فاصبح مضرب للمثل .......... وهي حالة الانقاذ مع الشعب السوداني عندما اتت على صهوة الدبابة قالت لتنقذ الشعب السوداني واقتصاده وتحمي حماه وتسلح الجيش للدفاع عن الحياض واليوم بعد 22 سنة كبيسة تضع كل الشعب السوداني دروع للدفاع عنها من مشنقة اوكامبو ام الاقتصاد ؟؟؟؟؟؟؟؟؟؟؟؟؟؟؟؟؟؟؟؟


#211978 [hasco]
0.00/5 (0 صوت)

09-20-2011 06:30 PM
ديل خزنو الخراف المذبوحة بالفريزرات قبال اسبوع من يوم المقاطعة ياحبة


#211975 [جهينة]
0.00/5 (0 صوت)

09-20-2011 06:19 PM
كان الطلاب الحربيون يهرولون ويخففون علىن انفسهم بارجوزة تقول : يا شاويش يللا علّمنا حركات الجيش . وما درى الناس ان هذه الحركات ستكون يوما تدجيل واستهبال تنقله تيار عثمان مرغنى بلقاء من توردت خدودهم ، وانتفخت كروشهم ، من اكل ى السحت ، وهم ياكلون الروب ، وفات عليهم ان الروب صنو اللحمة . ماذا فعلت يا متعافى بعجولك التى تباهى بها امام الرئيس . ؟ ماذا يفعل وزير الثروة الحيوانية فى مكتبه ؟ هل ياكل العدس كذلك !!!!!!!!!!!! . حقا ( الما عارف يقول عدس ) . ضاق الحال من كلو ، ليس اللحمة ولكن اللُحمة بالضم هى المطلوب البحث عن حلول لها . اللهم لا تسلط علينا بذنوبنا من لا يخافك ولا يرحمنا


#211969 [قرفان خالص]
0.00/5 (0 صوت)

09-20-2011 06:14 PM

علَّ وعسى دي ما معانا يا ود عووضة ..

نحن شعارنا :

شعب راصد
شعب شاطر
شعب صابر ما هو فاتر
واذا الصبر لحدوده عابر
لا بجادل ولا بعافر
شعب واعي شعب صاحي
شعب حارق ما هو دافي
تاني مافي تاني مافي
على ما سلف الله عافي !!
تاني مافي تاني مافي
على ما سلف الله عافي !!
يبقا مارق كل سارق
ويبقا راكز كل معاكس
يبقا واقف كل لاغف
يبقا طالع كل بالع
ويبقا خايف كل زايف
تاريخو ناصع
شبابو واعد
الله واحد وموتو واحد
وعدو واحد
كل عسكر وكل فاسد
تاريخو شاهد
اكتوبر المرصع
وابريلو عايد عايد


أخخخخخخخخخخخخخخ


ردود على قرفان خالص
Sudan [عمر ] 09-20-2011 08:50 PM
سبحان الله --- -- اخخخخخخ بقي شاعر -- -- يا ما حتشوفو


صلاح الدين عووضة
صلاح الدين عووضة

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة