المقالات
مكتبة كتاب المقالات والأعمدة
الفاتح يوسف جبرا
الإضراب عن الأكل
الإضراب عن الأكل
09-21-2011 10:58 AM

ساخر سبيل

الإضراب عن الأكل

الفاتح يوسف جبرا

عزيزي القارئ.. اللحم ضار بالجيب وبالصحة.. عشان كده لازم نخليهو (نعمل شنو) وهنالك العديد من الغذاءات الضاره (برضو لازم نخليها) وقد اجتهد (العبد لله) في حصر هذه الأغذية من أجل حث الشعب السوداني (الفضل) على مقاطعتها وتركها.. طبعاً (للذين يستطيعون إليها سبيلاً!
السكر الأبيض: سعرو كل يوم يزيد.. مع إنو ماده قاتلة.. فعند احتراقه داخل الجسم يقوم بتدمير كميات لا بأس بها من فيتامين «ب» هذه الفيتامينات التي تعمل على تحسين عمليات هضم وامتصاص الأغذية وبالتالي نقصها يؤدي إلى ضعف البنية والاضطرابات العصبية والعضلية والصداع والشعور بالأرق والقلق النفسي والكآبة والضجر.. (يلا خلونا نخلي السكر احتمال الكآبة والنفسيات دى تروح)!
الرغيف: الرغيفة بقت قدر (عاوزة ليها مايكروسكوب).. خمسين رغيفة ما تشبع ليها زول.. عشان كده حقو نضرب عن تناولو لأنو سبب أساسي لما يُعرف بالكرش وهو بيزيد من معدلات السمنة والعجب لو كان (بالبروميد) سرطان وأحمد شرفي على طول..
الفول: فقد ثبت علمياً أن تناول طبق كامل من الفول قد يصيب الشخص بحالة عدم وضوح الفكر؟ (يعني البلاهة) والسبب هو البروتين الموجود فيه وهو عبارة عن مجموعة من الأحماض الأمينية الضرورية لبناء الأنسجة والعضلات ولكنه في نفس الوقت يعتبر صعب الهضم لو أخذ بكميات كبيرة، إذ أن ما زاد عن حاجة الجسم من البروتين يؤدي إلى ارتفاع نسبة اليوريا، واليوريا مادة سامة إن لم يتخلص منها جسم الإنسان فإنّها قد تؤدي في أوقات مُعيّنة إلى الوفاة، فنواتج هضم البروتين تؤدي إلى تعطيل عدد كبير من وظائف الجسم وأهمها وظائف المخ ما يؤدي إلى التبلد.. (يلا بلا فول بلا عدس هو أنحنا ناقصين تبلد)..
الحليب: الرطل عمل جنيهين.. يلا نخليهو.. لأنو الدراسات أثبتت أن تناول الإنسان للحليب البقري باستمرار قد يكون له أثر سلبي تراكمي، بل يمكن إعتباره غذاءً غير صحي بالمرّة، لأنه ملوث بالعديد من مسببات وناقلات الأمراض، وقد اثبتت التحليلات أن الحليب يحتوي على كميات ضارة من مبيدات الأعشاب، والمبيدات الحشرية والمواد السامة، كما يساعد تناول الحليب ومشتقات الألبان على زيادة الوزن والسمنة، وبالرغم من الحليب يبستر أكثر من مرة قبل أن يصل إلى مائدتك (عند الخواجات طبعاً عندنا بيزيدوهو موية وبنسلين)، فإن عدد البكتيريا يتضاعف في الحليب كل (20) دقيقة إذا تركته في درجة حرارة الغرفة! يلا بلا حليب بلا بطيخ..!
الزيت: لا تحزن عزيزي المواطن لعدم مقدرتك على شراء الزيت الأصبح الرطل بتاعو بالشئ الفلان، فقد تأكد بأنه عند قلي الطعام بالزيوت تتولد مواد تسمى «الجذور الحرة» وهي كيميائيات شديدة التفاعل وتعمل على تدمير الدهون الأساسية المهمة في الغذاء، وهي تزيد من خطر الإصابة بالسرطان وأمراض القلب والشيخوخة المبكرة، ويمكن أن تدمر العناصر الغذائية مثل فيتامين (و).. (يلا فليذهب الزيت غير مأسوفٍ عليه)!
الشاي: كباية الشاي قَرّبت تعمل ألف جنيه.. نقاطعو طوااالي.. مُش الدراسات أكدت بأن الشاي يسبب الغثيان وفقدان الشهية وتناوب حالتي الإمساك والإسهال، وأن مادة الكافين الموجودة فيهو معاها مادة الثانين الحامضية القابضة وهي بدورها تزيد حموضة المعدة، بجانب الأثر القابض على شرايين المعدة الذي يؤدي إلى المغص.. كما تتحد مادة الثانين مع بعض المعادن المهمة في الجسم مكونة مركبات غير قابلة للذوبان والامتصاص مما يؤدي إلى حرمان الجسم من هذه المعادن (مثل الحديد والزنك)، وكمان الدراسات أكدت بأن شرب الشاي الساخن جداً يؤدي إلى تخريب الغشاء المخاطي للبلعوم والمرئ مما يهيئ الخلايا السرطانية للنمو لدى بعض الأشخاص.. (أها نبقى لي جنس السرطانات دي؟)!
الموز: كيلو الموز عمل جنيهين.. زمان كان فاكهة الفقراء.. هسه بقي مشكله.. بس نخليهو لأنو الموز بيتسبّب في اضطرابات المعدة، لأن مادة النشاء الموجودة فيه تقاوم الهضم وتتسبب بعسر الهضم، كما يشجع وجوده في المعدة على تكاثر البكتيريا المؤدية للاسهال (اقتنعتوا؟)!
الطماطم: طارت في السماء.. سعر الكيلو حصل عشرين جنيها، على الرغم من أنها تحتوي على مادة سامة هي النيكوتين، وقد حذرت العديد من مراكز الأبحاث، إذ أنهم اكتشفوا أنها سبب من أسباب أمراض المفاصل.
(وأنا أقول الكراسي داخل المساجد كترت كده ليه؟).. يلا خلو (الطماطم) عشان تصلوا واقفين ووجع الركب ده يروح!
الملح: الملح ذاتو عمل ليهو عظمة وبقى الكيس أبو ألف جنيه (ما يملح ليهو يومين) يلا نضرب عن شراء الملح لأنو ذاااتو بيسبب ارهاق وتعب الكُلى مما يؤدي إلى ضعف كفاءتها وزياده تناوله تؤدي إلى توترات عصبية وعضلية ونفسية وصداع مستمر وشعور بالقلق والكآبة والضيق والضجر (وأنحنا ما ناقصين ضجر)!
الأغذية المعلبة: كل الأغذية المعلبة سعرها زاد.. يلا نخليها لأنها تحتوي على مادة حمضية لحفظ المواد الغذائية من العفن وهي تسبب التهابات حادة أو مزمنة في المعدة وتؤدي إلى الإصابة بقرحة المعدة، إن هذه المعلبات قليلة الألياف وتحتوي على سعرات حرارية كبيرة وهذا يسبب الإصابة بسرطان القولون والمستقيم. كما أن تناول كميات كبيرة منها مما يؤدي إلى السمنة أو البدانة بكل مضاعفتها مثل الإصابة بمرض السكر والقلب والأوعية الدموية، كما تؤدي إلى تكوين الحصوات في المرارة وتسبب الإمساك المزمن.
كسرة:
عزيزي المواطن.. عزيزتي المواطنة.. كل الأكل ضار بالصحة.. أضرب عن الأكل.. لنكون أول شعب في العالم (يضرب كله عن الطعام)!!


تعليقات 15 | إهداء 6 | زيارات 6574

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#213465 [الباشا]
0.00/5 (0 صوت)

09-22-2011 10:02 PM
حقو نبتكر أكلات جديدة من النباتات و الاعشاب البتقوم براها دي الماليا السودان . مثلا الصينين لما كانوا بيبنوا في قاعة الصداقة شربوا شوربة الليف .


ردود على الباشا
Sudan [قيس] 09-25-2011 03:27 PM
اقتراح جميل ... وقد بدأنا تنفيذه من زمااااااان... نحن حسه بناكل تبن!! أها ي الفاتح عندك فيهو أي كلام؟؟


#213338 [ود البلد]
0.00/5 (0 صوت)

09-22-2011 05:01 PM
شئ المضحك بعض الوزراء قالوا يتضامنوا ويمتنعوا عن اكل اللحوم يا امابيستهبلو علينا ام هم سزج ولكن هي الحاله الاولى


#213245 [hamad nil]
0.00/5 (0 صوت)

09-22-2011 02:16 PM
اذا على الحكومه ان تتركنا ناكل من خشاش الارض ولاتحرمن منها برسوم وضرائب


#213001 [ابن السودان ]
0.00/5 (0 صوت)

09-22-2011 09:45 AM
الفول ........................................... معني كده البشير مخه مليان بالفول ده اذا كان عندو مخ
في واحد من الشيوخ سالو ما امنيتك قال اول شي استغفر الله .......... قال امنيتي اشوف اي زول اكل من مال الشعب السوداني ولو قرش حرام بيتحاسب ..............
يا ناس يا امة محمد علي السلام ................................ ناس البشير ديل هل بينومو ولا المتاعفن وعثمان طه والجاز وكل الزباليين ديل بياجيهم نوم كيف ................. والله الواحد مرات بيكون عندو حبت ديون الليل ما بينومو .......................... اللهم اضرب الظالمين بالظالمين واخرجنا منهم سالمين


#212929 [saif]
0.00/5 (0 صوت)

09-22-2011 07:27 AM
الفول بسبب البلاهه ياود جبرا يعني نتوقع وزير الدفاع ده رابطين ليه مخلايه في خشمو


#212759 [ابو النصر]
0.00/5 (0 صوت)

09-21-2011 07:57 PM
الفاتح جبرا اخبار القمر الصناعي القالو داير يقع فينا دا بصل متين عشان ننحنا منتظرينو بفارق الصبر عشان يريحنا من كل شئ


#212621 [TIGER SHARK]
0.00/5 (0 صوت)

09-21-2011 03:57 PM


(وأنا أقول الكراسي داخل المساجد كترت كده ليه؟).

So funny.... Entertaining....Charming

Regards


#212588 [african tiger]
0.00/5 (0 صوت)

09-21-2011 03:09 PM
الله عليك ياود جبره , الحقيقه كل الحاجات المستحيله التناول القلتها دى , نحنا قاطعناها غصبا عنا , من زمان , فقط ماء الشرب , والاكسجين للتنفس , وكمان فد مره حقه نخلى المويه , لان موية الشراب اليومين ديل , اصبحت شحيحه , وان وجدت , فلاتصلح للوضوء ناهيك عن الشرب , لتغيير لونها وطعمها . فهى مضره للصحه , وتودى الواحد احمد شرفى على طول .


#212554 [المغتاظ]
0.00/5 (0 صوت)

09-21-2011 02:31 PM
ناكل هواء واله الهوا زاته ملوث ومليان فيروسات . الاضراب احسن


#212501 [ زولة من ارض الله]
0.00/5 (0 صوت)

09-21-2011 01:44 PM
سنة 1990 اثناء احتفاليات الإمغاص { الانقاذ} بعيدها الاول ) حبوبتى مسرة بت أحمد ود الخزين قالت فى معرض تعليق لها على مظاهر البذخ والبهرجة والبوبار وفك الزرار الذى تمت به الاحتفالات ونفيخ الجضوم و لعليع الحلقوم الذى ظهر به اصحاب المعالى والسمو والسعادة من الوزراء والامراء و من لف لفهم من حملة حقيبة تمكنا ـ حبوبتى قالت وهى تتابع كل ذلك فى التلفزيون {بصرة عين} الناس ديل باين عليهم كان استمروا فرد {فقط بعامية اهل الجزيرة} سنتين يخلوكم على الشمارة والخمارة وطبعا لم افهم ما هى الشمارة وان كانت الخمارة معروفة بحكم المنشأ فى جزيرة الخير البعد شبعت وطبعت ادوها الطير . وبعد شرح وتوضيح للشمارة والخمارة فهمت ان الجماعة ديل حيشفطوا كل الموارد وعائداتها ويكبوها فى جيوبهم ويخلونا فقط على ما يستر عورتنا عند الصلاة و فقط على الذى يسكت المصارين ما تتشاكل . كان ذلك تفاؤلا من حبوبة التى قرأت الواقع والمعطيات دون الحاجة الى الالتحاق بمركز الدراسات الاستراتيجية لمعرفة ما ستؤل اليه الحال . وبعد عشريييييييييييييييييييييييييييييين سنة يجوا يقولوا قاطعوا اللحم لانه غالى ، طيييييب الغلاه منو ؟؟؟؟؟؟ المصدرين قلنا سمح ، اهه المصدرين ديل منو ، التجار ، اهه التجار ديل منو ، فهمونا يمكن نحن من كتر أكل الفول بقينا بليدييييييين ، يعنى يا ناس المجلس التشريعى لولاية الخرتوم ما لقيتو ليكم سلعة تانية تقاطعوها وتشنوا حملاتكم عليها الا اللحم المسكين ، اخجلوا واختشوا ولا كمان اجرونى النخجل ليكم ، فى كم سلعة فى السودان ده اسعارها عدت بحر المالح ولم يفتح الله على مجلس تشريعى ولاية الخرتوم بالاضراب والمقاطعة ، قطع شك الموضوع ده وراه بلاوى واكيد اساس الحكايه كلها صرف انتباه العالمين فى السودان عن سواهى ودواهى الحكومة فى النيل الازرق وجنوب كردفان وشقيقتهم الكبرى دارفور . بس الحكاية دى ما بتعدى على الجماعة المفتحين عيونهم زى الريال ابو عشرة و لمن ينعسوا لانهم بشر بوجهوا اقمارهم الاصطناعية تسجل الشارد والوارد الغاشى والماشى لحد ما يصحوا ويستلموا الباقى . وفوق كل هذا وذاك هناك اللا نام ولا أكل الطعام بسمع وبشوف ولا يشغله أمر عن أمر شحته ربى الكريم يورينا فيهم يوم لا حكى ولا بقى ،،،،،،،،،،،،،،، غايتو يا جبرا كان بقيتوا على ما جاء فى كسرتكم انا أول المكسرين والرهيفة التنقد


#212460 [jinja]
0.00/5 (0 صوت)

09-21-2011 12:49 PM
تلقي ناس الحكومة فرحوا بدعوتك للناس لمقاطعة الأكل بكل أنواعه .. حيوفروا عملة صعبة لامتياراتهم وملزاتهم وعلاج أبنائهم بالخارج .. ومن كان منهم متزوجا بأقل من أربعة يكمل السنة ( الما بعرفوها الا في العرس )


#212450 [ابو فارس]
0.00/5 (0 صوت)

09-21-2011 12:37 PM
بالله يا ود جبرا الفول بسبب البلاهة ؟ ايوااا ، عشان كده ...

لكن في حاجة مهمة ما وريتنا بتسبب شنو وهي موية الفول اها دي بتسبب شنو يا استاذ ؟؟؟

اوع يكون سرطان هههههه( إشارة لموضوع سابق من مواضيعك اللزيزة ).

يا استاذ الناس شغالة فته ( موية فول ) سااااااكت وانت تقول لي لحوم وحلبيب ، لو ما مصدقني اسأل العمال والطلبة والمعلمين ( جامعيين وغيرهم ) والرياضيين ( عدا هلال مريخ ( طبعن )وفي منشظ كرة القدم فقط وما نافع فيهم ) ، خليك من ديل امشى اسأل 70 % من الشعب السوداني ( الفضل ) لو ما لقيت كلامي صاح اكون انا ما ابوفارس ،

ولا رايكم شنو يا الشعب ( الفضل ) ؟؟؟؟؟؟؟؟؟؟؟

وبما ان فتة موية الفول لا تعتبر باي حال من الاحوال نوع من انواع الاكل ، لذالك 70% من السودانيين اصلا هم مقاطعين الاكل من زمان ولا يحتاجون لدعوة مقاطعة ، فنحن نحول دعوتك لل 30% ( الكيزان) عسى ان يكون بينهم رجل رشيد ( مستحيل ) وبما ان ذلك مستحيل ، فانا اعتبرك بتأذن في مالطه...


#212375 [سمارة]
0.00/5 (0 صوت)

09-21-2011 11:15 AM
ممتع ياودجبرة ,جد فاكهة الراكوبة


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة