أقيف أول
09-23-2011 06:40 PM

أقيف أول

طلال دفع الله
[email protected]

*********
يا هيي أقيف أوَّل
قول لينا من وين جيت
جيتها الوطن واحد ..
العاصمه فيها قريت
من شعبها المسكن
الحضن و المأمن
و العاكَسَنّو ظروف
وجبات سكن مصروف ،
وطن الكرام الزين
فرطقتوا لى بلدين
لو كان فضل واحد
ما كان بجينا عبيط
و يقول بقوة عين
داير يشخطو شخيط ؛
الفقراء ديل بره
ديل ناس زعيط و معيط
معقول سهيت و نسيت
ما جيتوا بالسلبيط
و الدوشكا و الديناميت.

خليكْ من التاريخ
مَسِّكنا طرف الخيط
لو داري حبة دين
جاوب علي الآتي
و أوعك من النطيط :
الكان أمس عدمان
ما شايفو راكب أيه ؟!
يا والي يا سلطان
ما فاضي تسألو ليه ؛
زي نبتة الشيطان
من غير إحم دستور
إتطاول البنيان
الجبتوا كان من وين ؟!
ما قلتوا بدريين
لا لصوص ولا فاسدين ،
خلينا نحنا يجوز
عملاء و كمان حاقدين ،
بالشايفو شوف العين
بالله مقتنعين
ناس عُشه ما لاقين
مما بدا الهِمبيت
و سياسة التمكين
مالكين قصر قصرين !!

أديك مثل مثلين
الكان مؤجِّر بيت
مِيتين متر في الديم
عامل إمام جامع
يفتي و يسوط في الدِّين
تلميعو تلفزيون
مكياج خبيرو حسين
سيرة رسول الحق
و الخلفاء و الراشدين
دلَّس لحدة ما .. بكَّاهن العينين
أهو شوفو من مشروع
باللم و كتر الخم
الليله أصبح وين ؟!
في أركويت ساكن
عدد الطوابق كم
في مساحة الألفين ؟!
لو ما الضمير معطوب
سعر المتر بى كم
حق الحديد و الطوب
هَندس حقوق الناس
سَندس حديقتو بكم
و قبال نمش قدام
هو و إنت .. من ناس وين ؟!

و هسه اللي يقعدوا مين
الفقراء مفقورين ؛
ولاّ اللي أثروا حرام ؟!
العام وراهو العام
قالها المراجع العام
مليار طقش مليار
عِدمت ديارنا الفار
مع إنكم عارفين
وين حقنا المقروم
و عارفين محل ما طار
ما سمعنا بى محكوم
بالجد ولا بهظار !!
يا واسع الحلقوم
مسئول من السكر
تمن الرغيف والزيت
و في الكهرباء المويه
الصحه و التعليم
قول لينا شن سويت
و دعمت أيه ولا أيه
بالكم جبيت و جبيت ؟؟!
باللهِ مُش خُسران
لو قِسنا بالميزان
علي ضو شريعه ودين ؟؟!!
بالكانوا قُبّالكم
المِننا الطاهرين
لا ضاع ضمير لا انباع
لا اتلوثوا الإيدين
لا قطّعوا الأرزاق
لا كتّلوا الزينين
الطيب الصالح
إحتار معانا و قال
ديل جونا ياخ من وين !!؟

ننساهو يلا اللوم
يوم القيامه تقوم
يوم يسأل القيوم
حتردوا .. وين من وين
فـقـَّرتوا كل الناس
شعبآ كريم وحليم
جرَّعتوا مُر الكاس
ما تنسوا غضبو كظيم
لا كيف شديد الباس
يوم يبدا في الدمديم
و الفاس يقع في الراس
حتشوفوا كيف كناس
و محاكمو لما تقوم
و تنضِّف الأرجاس
في مزابل التاريخ
ترميهم الأنجاس
العهدهم مذموم
ما بشبهوا الخرطوم
رَبَّاطه ما اولاد ناس.
بيناتنا كمّين تار
أرواح .. جراح .. و دموم
حنجزّوا بالبتـَّار
عهد المهانة الشوم
و تعود بلادنا تمام
أسيادها نحن عموم
نقدل كبار و صغار
في أمنا الخرطوم.


تعليقات 1 | إهداء 0 | زيارات 995

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#213924 [مامون]
0.00/5 (0 صوت)

09-24-2011 12:27 AM
ينصر دينك



طلال دفع الله
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة