المقالات
السياسة
ارشيف مقالات سياسية

09-24-2011 12:16 AM

البتجي من السماء بتحملها الواطة


اسماء الجنيد
somy_moon@hotmail.com البريد

سلام وتحية للجميع ,,

البتجي من السماء بتحملها الواطة

مثلنا الشعبي البسيط ده ملان حكم , وإمكن جيلنا الجديد ده معظمه ما فاهم المعني بالنص الواضح وصريح,,
لكن المرة دي بفهموه سمح لما يبقى واقع جد جد ...
المرة دي البتجي من السماء بتريح الحكومة راحة ما بعدها راحة فرد مرة
كل القنوات الفضائية وكل العالم حازم نصو وواقف ألف احمر للشيء المتوقع , إلا ناسنا يحمدو سيدهم ويشكرو فضلو نايمين وشبعانين نوم بي شخيرو,
هم زاااتهم ما فاضين من إضراب اللحمة والتضامن مع الشعب الجيعان ؟
بكرة يمكن يضربوا عن اكل الطماطم وبعد بكرة البصل وهلمجرا , اصلو خدارتنا كتيييييييييييرة نحمد الله , وكلها ولا معظمها مزروعة في قيف الجروف , يعني لا ري صناعي ولا غيره, موية جاية من بحورنا الإتنين الشاقات البلد نصين نعمة من الله ساااااااي وبرضو ما قادرين نتمتع بي أكلها ..الله غالب ..
عشان كده ناسنا ما فاضيين كلو كلو مشغولين بي الأهم من صحة المواطن وحياته ,,
وزي ما قلت ليكم وحسب ما نشر وأذيع عبر كل القنوات الإعلامية المختلفة , من تلفزيون وإذاعة وصحافة وشبكات عنكبوتية, كلها في الدول التانية نورت اهلها حرصا على صحتهم وارواحهم الغالية ,وخوفا من الجاييهم من السماء ,, بخصوص القمر الصناعي الطاشي الشبكة ليهو زمن ,
العالم كلو متحوط ومتنشن , مع إنه كل الأنباء بتشير لي إحتمال وقوعه في السودان البلد التعيس والتعاسة حارساهو من 22 سنة وداخلة في السنة ال 23 !!!!
اها المرة دي جات من الله يا الصامين خشومكم وحارقين اعصابنا ,,
كان راجين ليكم حكومة تقيف معاكم واطاتكم صبحت تب , وإحتمال كبير نصكم ما عارفين الخبر ده زاتو , لطناش إعلامنا من طرف , وباقي الناس السمعت لكن لا حولة لها ولا قوة , بكون سمعوا عبر قنوات فضائية تانية غير بلدنا..
وناس الحكومة جاتهم بااااااااااااردة و مجيهة, وبي تفكيرهم المعروف لينا كلنا وافقهم الضيق بقولوا ده دمار بالجملة , يريحنا من نص الناس القاعدين لينا وصامين خشومهم ’ لكن بقول ليهم لا قدر الله كان حصل شيء ما بفرز القصر واليخت الرئاسي من باقي الخلق الحايمة بي برة ,, يعني ما بي مزاجكم المرة دي تشيلوا وتختوهو في رؤوس الغلابة والمهمشين .
ده بجي واقع بي مزاجو هو , وإن شاء الله الرزعة تجي في القصور العالية و الفجيخ يبدأ بيكم إنتو ,
الله ده ما كريم ورحيم و شايف وعارف , وكفيل بي عباده , خاصة المظلومين
يمهل ولا يهمل الحاكم العادل,,
نسأله اللطف بي اهلنا في كل مكان ويحفظ كل الغلابة ,, قادر يا كريم ,,
ونسأله تعالى القمر الطاشي ده يجي يرك زي ركة طيارة بورتسودان ديك وقصدت القصدتو وضربت الضربتو ,,
الله يرحم الضحايا الراحوا في شأن الله والرسول , وينتقم ليهم بركة جاه النبي بي القمر ده ينتقم ليهم من الظالمين القتلة ... يجي فوق ويدور بينا البلد داك ويخبت الفي بالنا كلهم جت من طرف بي فد رصعة ,, يعزلهم عزيل ويريح خلق الله منهم ,, قولوا آمين .....

اها الشعب ما داير يأخد حقو يعملوا ليهو شنو ؟ ,
المرة دي بتجيكم من السماء , وفجعتن على قول اهلنا , بتجروا من الله وين ؟؟

متاوقة

نسأل لي اهلنا جميعا السلامة ,, و بنقول للقمر بوبا راجينك والله جنس رجية هي , رجية في قمرا نارو حي , اقصد في جمرا نارو حي

ودعتكم الله والرسول

اسماء الجنيد


تعليقات 1 | إهداء 0 | زيارات 1934

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#214044 [wahied]
1.00/5 (1 صوت)

09-24-2011 06:53 AM
ربنا يحقق مناك وهو امنيتنا الاولى نسأل الله ان ينتقم من هؤلاء الظالمين دنيا وآخرة وان نرى عذابهم بعيوننا ويكونوا عبرة وعظة لكل ظالم وفاجر . آميــــن


اسماء الجنيد
اسماء الجنيد

مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة