نحس شديد
09-24-2011 12:34 PM

ساخر سبيل

نحس شديد

الفاتح يوسف جبرا

نحن شعب ما محظوظ أبداً .. يعني شعب منحوس .. كثير من الدلائل والبراهين تؤكد ذلك إبتداء من (الجو السخن) معظم شهور العام .. مروراً بالكتاحات والعجاج .. إنتهاء بالحكومات التى يتم إختيارها لنا بعناية فائقة !
ورد في صحف الأيام الماضيات أن وكالة ناسا قد فقدت سيطرتها على قمر صناعي أمريكي يسمى UARS بعد أن خرج من مداره المحدد والقمر المشار إليه يبلغ وزنه 6 أطنان (بس) وهو يسير بسرعة عاليه مما يجعل مسألة تخمين مكان وقوعة أمرا متعسرا ولكن ناسا عادت لتؤكد أنه بالإمكان تحديد مكان وقوع القمر ولكن قبل ساعتين فقط من ذلك !
المشكلة ان المنطقة التى سوف يقع عليها هذا القمر الكارثه قيل أنها في (السودان) !! مافيش حظ ردئ ونحس أكتر من كده .. القمر ده ليهو خمسة سنين لافي حول الكرة الأرضية بسرعة ألاف الأميال فى الدقيقة الواحدة .. من دون دول العالم كوووووولها .. يقع عندنا فتأمل ؟
مرات كتيره يجينى شعور البلد دى محسوده (وضاربنها عين) وعاوزه يبخروها بي (بخور مسبع) من عند التيمان .. لكن أرجع واقول لنفسى .. ويحسدونا علي شنو؟ على الجوع وللا علي الفقر وللا علي المرض ... خلاااس يعني (سويسرا) وللا (السويد) وللا النرويج !
مرات بقول (النحس) ده غضب من رب العالمين علشان الناس بقت بعيده عن ربها حيث إنتشر الظلم وملأ الفساد الجو والبر والبحر !!
طيب لو ناس (ناسا) ديل إتصلوا قبل ساعتين وقالو لينا القمر ده للأسف ح يقع عندكم فى الحتة الفلانية أها (السلطات) ح تعمل أيه وح تتعامل مع الكارثة دى كيف؟ وهل هنالك أجهزة وآليات للتعامل مع مثل هذه الكوارث ! العبد لله يعتقد جازما بأن المسئولين لا يضعوا لمثل هذه الكوارث أى إحتياطات .. وأنهم بيهتمو بالآليات من فصيلة (البرادو) أكتر .. غايتو بس ربنا يكضب الشينة ويبعد عننا الكوارث ما ظهر منها وما بطن !
بمناسبة النحس الملازمنا ده تحكى تلك النكته القديمة أن عوض المنحوس .. زول نحس للغاية .. (يلاقي العضم في الفشفاش) ، ما أن يدخل ليهو فى حاجه إلا تبوظ .. بعد تخرجه من الجامعة حاول البحث عن عمل عدة سنوات لكن نحسه لا يساعده علي ذلك .. وفي المرة الوحيده التى تم إستيعابه للعمل بأحدى الشركات تم التخلص من الشركة الحكومية بالبيع ليجد عوض نفسه في الشارع مرة أخري .
شقيقة عوض المغتربة بإحدى الدول .. أرسلت له فيزاء لزيارتها حتى يستطيع البحث عن عمل هنالك .. أكمال (عوض) كل الإجراءات .. ركب الطائرة .. بعد دقائق من الإقلاع .. جاء صوت (الكابتن) منبها الركاب بأن الطائرة تعانى من عطب فى أحدى عجلاتها متسائلا إن كان هنالك شخص يمكنه المجازفة يقوم بالتبرع بتغيير اللستك المعطوب !
كل الركاب (عملوا نائمين) ما عدا عوض (ما سودانى وكده) الذى أبدى أن يقوم بالمخاطرة وتغيير اللستك .. صفق له جميع الركاب .. تم ربط عوض بسير قوى تم تثبيته داخل الطائرة .. خرج عوض وقام بفك اللستك البايظ .. ووضع اللستك الجديد وفى أثناء ذلك فلت من يده اللستك القديم إلا أن قائد الطائره أخبره بأنو ما مشكلة وأنهم سوف يقومون بتزويد الطائرة بلستك آخر عند محطة الوصول !
ما ن أن وصلت الطائرة المطار حتى وجد عوض شقيقته فى إستقباله ، وما أن جلسا داخل العربة منطلقين نحو المدينة حتى أخذت تبكى :
- مالك بتبكى فى شنو ؟
- أبوى يا عوض ابوى
- مالو ما هسه خليتو فى البيت هناك في أحسن حال !
- أبوى مات يا عوض !
- لا حولة ولا قوة إلا بالله
- هسه قبل ساعتين وشوية ضربوا ليا ورونى الخبر
- مات بشنو ؟ مات كيفن؟ ما خليتو هسه كويس
- والله بس قالو شايل الإبريق بتاعو ماشى يتوضأ عشان يصلي المغرب جاهو ليك (لستك) من السماء .. !!
كسرة :
بالله قصة القمر الصناعي ده مش زى قصة لستك )عوض( .. ده نحس شديد !


تعليقات 14 | إهداء 7 | زيارات 5482

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#215081 [البعشوم]
0.00/5 (0 صوت)

09-25-2011 09:17 PM
الحمد لله الما وقع
اصلوا الحراميه ديل راجينوا يقع ويكتل الشعب الفضل ده اصلهم تاكلين فى ماليزيا
بالتعويضات يشتروا ماليزيا
ويرحلوا الماليزين الى باقى حطام الوطن
:D :D :D


#214593 [صابر]
0.00/5 (0 صوت)

09-25-2011 12:47 AM
حتي انت يا جبرا وقعت في الفخ ؟؟؟؟؟؟؟؟؟؟؟

تضخيم اسطوانة القمر الصناعي دي صناعة كيزانية لشغل الشعب السوداني الفضل .

يعني باختصار كده الموضوع ليس بهذا الحجم واحتمال وقوعه في السودان كان نفس احتمال وقوعه في عدد كبير من الدول الاخري ومع ذلك لم يتم تداول الخبر كما تم في السودان .

يعني الكيزان سعوا للترويج لاعتزال هيثم مصطفي ثم سقوط القمر الصناعي وقبل كدا كدا وبعد كدا حيكون كدا وكدا . وآهو الناس تلقى ليها موضوع في بيوت الافراح والاتراح ومكاتب العمل وطلاب الجامعات..... و بدل ما يواجهوا مشاكلهم الحقيقية يشغلوهم بمشاكل وهمية .

قال اماسي الخرطوم ثم امدر ثم بحري وعد في المدن
هاكم الغناء دا....... كل القنوات السودانية بيوت اعراس ....

شعب سازج .... شعب فاشل ..... وللاسف انا منكم...


#214525 [Nagi]
0.00/5 (0 صوت)

09-24-2011 10:07 PM
والله بصراحه انا كنت مضرب على القمر يقع عندى فى البيت

اقوم ابيعو للامريكان بالشى الفلانى

يا خساره


#214463 [ابوفارس]
0.00/5 (0 صوت)

09-24-2011 07:40 PM
يا اخوانا عووووووووووووك القمر وقع وانتهى ( في استراليا)

عليك الله يا ود جبرا في نحس اكثر من كده .

حتى القمر الكنا منتظرنو يقع فينا ويريحنا من الكيزان ديل ابا يقع فينا
دا ما ابو النحس زاتو بي زاتو

تقول لي كتاحه !!!!!

كتيرين كانو قافلين عليهو ، لكن ما مشكلة العشرة الجاية ( اقصد القمر الجاي )


#214455 [هييع]
0.00/5 (0 صوت)

09-24-2011 07:23 PM
ممكن طبعا الريس يحلف بالطلاق عليهم يرمو واحد تاني هييع!!!


#214430 [حاج]
0.00/5 (0 صوت)

09-24-2011 06:18 PM
لاالحكومة ما حتقصر!!!ابدا يقصر الملح!!! من الان تم عمل ورشة!!!((هاك الورشة دي)وعمل غرفة طواري(ماتسال عن الجوه الغرفة ولاعن الاكل!!اكيد من البرج) ثم تم حساب الاوفر تايم والذي منو!اما الكبار فهم مشغولون مع مكتب استشاري!!لحساب التعويضات!!وكيفية تقسيمها!!! اما عندما يسقط القمر!!فسيبين المكشوف!! فقد كانت الفرفة غير مجهز بتكييف مركزي مما شتت افكارهم!! اما عربات الاطفاء فنبة لزيادة سعر الدولار فقد تم بحمدلله عمل خلطة سودانية من دقيق الذرة البلدي من اشهر عواسة كسرة!!! وهو في طور التجريب ونسبة لكون هذا الحادث الاول!فمحتاجين لسقوط اخر لنزف البشري بنجاح البدرة الذرية(من الذرة حتي لايمسك اليانكي بخناقنا ويضربونا بالصواريخ زيادة لضرب القمر!!) وسيكون اليانكي في حيرة من امرهم عند زيارتهم لموقع السقوط!! لانهما سيستعجبون مما يرونه ارضا!!! فكل المناطق لاتصلح للسكن الادمي!!! وانا البلد كلها، مضروبه بصاروخ طبيعي منذ ولادتها!! وسيقومي بتعويض كل الشعب السوداني!!!


#214387 [بلتعة]
0.00/5 (0 صوت)

09-24-2011 04:41 PM
خليهو يقع عندنا عشان نوريهو كويس ونندمو علي اليوم الرماهو هييييع نحن شيالين التقيلة ... بالله عليكم في اتقل من الإنقاذ والمؤتمر الوطني وحتى لو وقع عندنا حيعمل شنو اكتر من الموت الحصل والدمار الوقع


#214381 [ama]
0.00/5 (0 صوت)

09-24-2011 04:30 PM
لا يا أخواننا ، الحكومة ما حتكلم الشعب بي مكان و ساعة وقوع القمر الصناعي عشان يجي المواطنين الغلابة في غفلة ( الكيزان قاعدين يدعوا عشان يقع في الشعب الغلبان ) ، عشان الحكومة تقوم تطالب بي تعويضات عن الاضرار و المتوفين ( و تقوم تقابض في الدولارات )


#214379 [ابوعـــــــــلاء]
0.00/5 (0 صوت)

09-24-2011 04:26 PM
ياجبره انت شكلك مامفتح قال ليك الجماعة منتظرين وقوعو بفارق الصبر وجاهزين اصلو سمعو بانو القمر الصناعى يدخل فى صناعته الذهب
برضو تقول لى نحس


#214297 [عباس ركس]
0.00/5 (0 صوت)

09-24-2011 02:21 PM
كيف يا بروف ما السلطات كونت لجنة للمتابعة و أول ما يعرفوا مكان سقوط القمر ح يقولوا ليكم ( جاااااااااااااكم ) - اكتر من كدا يسوا ليكم شنو ؟؟؟؟؟؟؟؟؟؟؟؟


#214256 [خابور]
0.00/5 (0 صوت)

09-24-2011 01:34 PM
طيب لو ناس (ناسا) ديل إتصلوا قبل ساعتين وقالو لينا القمر ده للأسف ح يقع عندكم فى الحتة الفلانية أها (السلطات) ح تعمل أيه وح تتعامل مع الكارثة دى كيف؟


والله ياعمك وصلت لحدي الحتة دي وغلبني أكمل المقال .

غايتو الضحك حيشرطا

ههههههههههااااااااااااااااااي





#214251 [مرتضي ]
0.00/5 (0 صوت)

09-24-2011 01:30 PM
بي مناسبة عوض نحس ده في برضو دراما سودانيه للكوميدي حسن كج ..حسن كج ده برضو زول نحس يمشي الفرن يلقي مافي عيش يزوج مرتو تموت يمشي الغاز مافي او بالطريقه دي طوالي..لكن القمر ح يقع ويييييييييييييين!؟؟؟؟؟؟؟؟؟؟؟؟؟


#214212 [SUDANI]
0.00/5 (0 صوت)

09-24-2011 12:49 PM
الجاية من السماء بتتحملها الواطة - اصلوا نحن السودانيين ديل اصلنا جعانين وعريانين ومرضانين وتعبانين احسن يقع فوقنا نحن عشان البلدان التانية تسلم من شره


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة