للبيع
09-28-2011 12:41 PM

ساخر سبيل
للبيع

الفاتح يوسف جبرا

* للبيـــع
جـابى ضرائب بحالة جيدة .. (عكليتة) وذو (روح شريرة) ولا يمكن أن يمر منو (عميل) دون أن يجبره على سداد ما عليه بأية طريقة كانت حتى لو استدعى ذلك أخذ (أطفال) العميل كرهائن ... للجـاديـن فقــط !
* للبيـــع
مشروع زراعى يقع على بعد( 30) كيلو جنوب الخرطوم ، لم ينتج (ليمونة واحدة) منذ أكثر من عشرين عاماً دفع فيه المغتربون حصاد غربتهم وشقاهم ، تنبيه : البيع لا يشمل (المسئول الذى جلس على رئاسة المشروع 20 سنة) لحاجة المجتمع إليه فى تبصير المواطنين بأمور دينهم من خلال الإذاعات والقنوات الفضائية.
* للبيـــع
وظائف شاغرة بمؤسسة حكومية ... للـراغبيـن في ملئها تسجيـل أسمائهم وتقـديـم (الـواسطـات) قبل (المعاينات الوهمية) بفتـرة كافية !
* للبيـــع
معلق رياضى يجيد (فن التنبؤ ) بحيث يستطيع أن يتنبأ (للمستمعين ) إن كانت الكرة سوف تخرج (ركنية) أم ضربة (تماس) قبل أن يحدث ذلك .. لم يمارس في حياته أي نوع من أنواع الرياضة .. يجيد التحدث بأربع (لغات) .. التونسية .. الجزائرية .. المصرية .. وعربى (جوبا) .. التسليم فوراً ..
* للبيع
كرسى مستشار لا (يشار) ... بجميع مخصصاته من منزل و(عربات) وتذاكر سفر وبدل سفريات وبدل عطلات وبدل (بدلات) ... وبدل (أعياد) ، الكرسى مريح ومصمم حسب (المواصفات) المحلية .. ضمان مدى الحياة !
* للبيع
موظف يحمل (دكتوراة التفنن) في تعطيل مصالح المواطنين كما إنه حاصل على دورات مكثفة في ( فن التعامل البيروقراطى) ... يجيد شرب القهوة والشاى وقراءة الجرائد وحل كلماتها المتقاطعة كما يتقن التحدث في (الثابت والمحمول) لساعات طويلة أثناء ساعات العمل الرسمية !
* للبيـــع
عدد (2) أندية (غمة) بلاعبيهم وإدارييهم ومشجعيهم .. ملحوظة: الناديان لم يتحصلا على (علبة صلصة) منذ عشرات السنين على الرغم من ملايين الدولارات التى تصرف عليهما .!
* للبيـــع
مستوصف طبى به كافة (التخصصات) وجميع الأجهزة الطبية عالية (التقنية) .. لا يمكن لأى مريض أن يتم إستقباله حتى لو عندو جلطة في (النخاع الشوكى) ما لم يسدد مبلغ (خمسة ملايين) مقدماً تحت الحساب .. ليس هنالك أي إستثناء لأية حالة .. (الواطة ليل) .. البنوك (قافلة) ..لا إستثناء ولا تأجيل .. يمكن أخذ (المشغولات الذهبية ) فقط كرهائن حتى تسديد الحساب بعد أن يلتحق (المريض) بالرفيق الأعلى ! ? الوسطاء لا يمتنعون !
* للبيـــع
مخبز يقوم بتصنيع الخبز الفاخر بالبروميد المسرطن ، العرض يشمل المخبز فقط ولا يشمل البروميد إذ سوف يتم استخدامه فى مخابز أخرى لعدم وجود رقابة ..
* للبيـــع
إذاعة FM تقوم بإذاعة جميع الأغنيـات الهـابطــة على مدار الساعة .. بها عدد مقدر من برامج (الونسة) والدردشة و(الميوعة) على الهواء .. البيعة تشمل طاقما من المذيعين والمذيعات (عمر يوم) وكذلك المستمعين لهذه الإذاعة !
* للبيـــع
أمنيات لشعب كان يحلم بأن (يأكل مما يزرع) و (يلبس مما يصنع) فأصبح (يضحك مما يسمع) كتلك المقولة التى أطلقها ذلك المسئول مؤخراً والتى تقول (الما قادر على العيشة فى الخرطوم يشوف ليهو حتة تانية) ، تنبيه : على المشترى ترحيل (الأمنيات) مباشرة بعد رسو العطاء عليه وذلك بعد أن يوضح لنا (نطير وين تطير عيشتنا) !
* للبيـــع :
قنـاة تلفزيونية فضائية ... بجميـع مـوظفيهـا وكـوادرهـا ومذيعيها ومقدمى برامجها (اللزجة)... العـرض لفتـرة محـدودة!
* للبيـــع
عدد من الشركات الكبرى التى تقوم من آن لآخر بتنظيم مسابقات لعملائها (بمليارات الجنيهات) بينما يعانى مصابو (الفشل الكلوى) من المواطنين من تكلفة عمليات الغسيل الباهظة (ثلاث مرات إسبوعياً) .. ملحوظة : البيع يشمل جميع الشركات دفعة واحدة لعدم (استفادة المجتمع) !
* للبيع
عربة (حكومية) ? لوحة صفراء- موديل 2012 مهمتها توصيل الأولاد للمدارس وإعادتهم .. إحضار (الخبز) من (الفرن) .. توصيل المدام (بيت أهلها) .. إحضار (الحنانة) .. الذهاب إلى شاطئ (أبوروف) لشراء (الشاف) و(الطلح) واللازم منو ... العربة (مظللة) .. مكيفة.. والتنك بتاعا (مليان) على طول .. (الحكومة) غير مقيدة بقبول أدنى أو أعلى عطاء ...
* للبيع
مدينة رياضية تحولت بعض أجزائها إلى قطع سكنية ، البيع يشمل فقط (حلبة الملاكمة) وميدان (الكرة الطائرة) ودائرة السنتر وخط (18 ) لأن هذه هي الأجزاء المتبقية من المدينة (الوسطاء لا يمتنعون لأنهم وآخرون المسئولون عن تشليع هذه المدينة) .
* للبيـــع
مفتى جاهز لتفصيل فتاوى حسب الطلب لا تمس حياة المواطن بصورة مباشرة بينما يعجز (المقص الذى يستخدمه) ويصيبه الصدأ والكساح من إصدار أي فتاوى تمس حياة المواطن المغلوب على أمره كالغلاء الطاحن والأسعار الطالعة كل يوم والصرف الحكومى البذخى وإهدار المال العام .. وتطاول (عمارات) بعض المسئولين في (البنيان) .. وتفشى الفقر والرشوة والمحسوبية والعطالة والعنوسة والأمراض الخطيرة وأكل أموال الناس بالباطل ! ملحوظة : البيع يشمل (المفتى والمقص) معاً !
* للبيـــع
عدد من الشركات الحكومية (الرايحة) والتى لم يتمكن المراجع العام من العثور عليها ، يتم البيع بنظام (حمدو في بطنو) ، الحكومة غير مسئولة عن البحث عن هذه الشركات وعلى المشتري أن يشترى (وبعدين يفتشا وين) !
كسرة :
البضاعة لا ترد ولا تستبدل



تعليقات 36 | إهداء 8 | زيارات 7325

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#217701 [mohamed]
0.00/5 (0 صوت)

09-30-2011 05:01 AM
عليك الله ياود جبره سيجارتك دي بتجيبه من وين؟


#217661 [هييع]
0.00/5 (0 صوت)

09-30-2011 01:46 AM
للبيع ولية سمسارة!!!
ولها في الاراضي غرام ومهارة!!
وجضومة منفخة من اللهط والشطاره!!
السعر مهاود بس اعمل حسابك كتلت واحد والتاني في طريقه للمغاره!!!!
الوسيط وجيه رياضي مرشح للوزارة!!!!


#217537 [ابن فاروق]
0.00/5 (0 صوت)

09-29-2011 07:12 PM
نسيت دي:

فرصة لن تتكرر للدكتاتوريات والانظمة الشمولية للبيع شعب وديع صابر لايتظاهر ولا يثور على أولى الأمر يصبر على الجوع والمرض والضرايب والجمارك والرسوم والايصالات والمواصلات والاتصالات والاحتفلات والافتتاحات والخطابات مهما كانت سخيفة أو سفيهة. الأنتخابات مضمونة للمشتري.

البيع يشمل صناديق الانتخابات ودليل استخدام الخج.


#217491 [الرماد كال حماد]
0.00/5 (0 صوت)

09-29-2011 05:20 PM
رقاص بحلةوسط رجلو الشمال معووجة يجيد الرقص على كل الأنغام خصوصاً قيقم ومحمد بخيت البيع يشمل أمر القبض (ساري المفعول)


#217425 [sudani]
0.00/5 (0 صوت)

09-29-2011 02:55 PM
عايز حقى من المال العام


#217377 [hesho]
0.00/5 (0 صوت)

09-29-2011 01:49 PM
للبيع
منطقة طرفيه تصلح لقيام تمرد اتلاف البلد التابعه له وقتل المواطنين والمرافق العامه

العرض لايشمل التوصل الى اتفاق سلام


#217370 [متفائل ابو أمل]
0.00/5 (0 صوت)

09-29-2011 01:39 PM
استاذ...ما تود بيعه هو عبارة عن نفايات نووية ضارة ......................يجب كنسها ودفنها بعيدا حتي لا تتسبب في كوارث بعد نجاح الثورة ان شاء الله


#217331 [رشيديه]
0.00/5 (0 صوت)

09-29-2011 12:37 PM
لا فض فوك استاذ جبره والله انت اللى بتبهجنا حتى نضحك رغم اننا كاالطير يرقص مذبوحاّ من الالم . بحلوقنا غصه ومراره لا يهون علينا الوطن ولكن الله يجازى الكانوا السبب. الله يخرب بيتهم زى ما شردونا من بلدنا


#217292 [ود البلد]
0.00/5 (0 صوت)

09-29-2011 11:43 AM
شكرا الاستاذ الفاتح جبرا وحقيقه انت تشير الى حقائق وهي صارت واقع لنا وكل يوم ماثله امام اعيننا والمغسه تقطع في مصارينا ونستغرب ماذا اصاب هذا الشعب ولكن نجد له العذر لان كثيرا منهم خريجي مدارس هذا العهد الذي يريد ان يحكم مدى الحياة واذا فتحوا التعليم واتوا بالمؤهلين من المعلميين اكيد حا يتعلم ابناؤنا وسوف يرفضوا هذا الواقع . واطلب منك ان تعطينى كرسى المستشار مادام بدون اشاره بقدر عليه ههههههههههههههههههههههههههههههههههههههههههههههههههههههههه


#217283 [فلانة]
0.00/5 (0 صوت)

09-29-2011 11:34 AM
دليل الجرس وييين ....فى كافورى واللا القصر الجمهورى


#217208 [ممغوص]
0.00/5 (0 صوت)

09-29-2011 09:37 AM
للبيع مره جباية رخص محلات ( لميضه ولسانها طويل ) بايره وحاقده وشكاله مستعده تقلع توبها وتقيف معاك الف احمر لكن توريدتها مظبوطه وميه الميه

واحد بتاع طبليه


#217167 [عبدالماجد عثمان]
0.00/5 (0 صوت)

09-29-2011 07:19 AM
اهديكم النكتة دي وقد يكون البعض سمع بيها واحد( اخونا )نزل بصات لنج وعاوز سواقين واعلن في الجرلئد والحضور للمعاينة المهم اول واحد دخل للمعاينة 2222 ماسمك 222محمد 2222اقراء لينا سورة محمد 222نجح واخذالمفاتيح والذي منو ا222 البعده اسمه طه ونجح الذي يليه طبعا سال الاول والثاني عن نوع الاسئلة وحكوا ليه الحاصل صاحينا اسمه اراهيم ودخل وواجه المصير المحتوم وعند الاجابة عن الاسم والله انا اسمي ابراهيم لكن تحت تحت بسموني الكوثر


#217082 [hajabbakar]
0.00/5 (0 صوت)

09-29-2011 12:00 AM
للبيع رئيس سارى المفعول يجيد الرقص والتقسيم الوسطاء يمتنعون الدفع باقساط مؤجلة يبدا السداد بعد فترة لاتزيد عن ثلاثة وعشرين عاما وبدون فوائد ربوية التسليم فى عرض بحر المانش خارج المياه الدولية لهولندا


#217074 [Muslim.Ana]
0.00/5 (0 صوت)

09-28-2011 11:33 PM
للبيع نسبة لقرب إنتهاء فترة الصلاحية:
وطن سريع التبخر والذوبان، ذاب ثلثه والباقي في السكة.
في حالة الدفع نقدا يتم إعطاء المشتري هدية شعب وديع يقبل اي حكومة وممكن تعمل ليهو اي حاجة وما يقول بغم


#217058 [wedhamid]
0.00/5 (0 صوت)

09-28-2011 10:48 PM


الاستاذ جبره ......تحيه....سقط سهوا اعلان

للبيع...........

مجلس أعلى للــ ( سخافه و المضبوطات) على قمته رأس آيل للسقوط و امينه العام مهرج و بهلوان تحفه يجيد التنطيط على الحبال .....مبيد ذو تأثيرقوى و مضاد لحرية الرأى و مكمم جيد للافواه لا تعجزه حيله و مجرب .........


#217042 [مؤمن ]
0.00/5 (0 صوت)

09-28-2011 10:29 PM
الشعب يرد كرسي المستشار


#217035 [ابوفارس]
0.00/5 (0 صوت)

09-28-2011 10:10 PM
يا ستاذ جبرا


المشكلة منو بشتري البلاوي دي .

والله حتى الانجليز تاني ما عندهم رغبة في اعادة استعمارنا مرة اخري .



غايتو النشوف اخرتا .............


#217003 [elghefari]
0.00/5 (0 صوت)

09-28-2011 08:36 PM
اطال الله عمرك ؟ بس يبدوا ان احد اندية( الغمة) في طريقه للفوز ( بعلبة صلصة!!!!!)
قال كاس الاندية الافريقية قال؟!! هاك علبة الصلصة دي يا البرنس!!!!!


#216971 [salah]
0.00/5 (0 صوت)

09-28-2011 07:26 PM
للبيع : السودان كووووولللللو
نفتش لينا بلد تانى


#216895 [younis ali]
0.00/5 (0 صوت)

09-28-2011 05:58 PM
ya nas wali kalam ajeeb .taslm ya gabra wali baktni adeel allah akbr alihom


#216880 [عبدالواحد00 ]
0.00/5 (0 صوت)

09-28-2011 05:31 PM
بس000ياجبربر ارجوك واتوسل اليك (ارسى) على00(المستشارده) وأنا مستعد أدفع باقى عمرى مقابله ورسوم الدلالة والقيمة المضافة ودعم الشرطة ودعم الطالب ودعم الرصاص الذى يقتلون به الشعب بعد أن أصبح البمبان شىء من الماضى، وبعداك مافى زول يسألنى (عايز تعمل بيه او ليهو شنو؟!!) لاننى ببساطة سوف أفشى السر للمستعد يدفع مقابل السر ماتقدم وما تأخر من عمر المشترى او أقلها أديه( زرة)ذى زرة (مفتى القذافى) بعد أن القى الثوار القبض عليه وأحيل حياته الى (يوم نحس مستمر) والعياذ بالله 00وارجو أن لا تتراجع من عروضك وانا على يقين سوف لن تبور بضاعتك 0


#216871 [حاتم عبدالله]
0.00/5 (0 صوت)

09-28-2011 05:16 PM
المشكله الحاجات المعروضه دي معظمها ما بمشى لكن حكايه المستشار دي ممكن الواحد يشتريها لانو فيها شويه فايده الله يخليك لينا يا جبرا اضحكتنا فى الزمن الصعب


#216846 [صلاح]
0.00/5 (0 صوت)

09-28-2011 04:42 PM
أجمل حاجة يا جبرا الطلح بتاع أبرووف هاهاهاهاهاها لكن قالوا أحياناً بكون مرطب شويه يعني الواحد ينوم لم الطلح يولع وإنت من سكان أمدرمان على ما أظن.


#216809 [نجوى]
0.00/5 (0 صوت)

09-28-2011 03:47 PM
اصابتنى عبره وانا أقراء مقالك اليوم ففقدان الامل بغد افضل وحلم التغيير لنا ولاجيالنا اللاحقه صار مفقودا والحل هو التخلص منه


#216777 [Siafalhag]
0.00/5 (0 صوت)

09-28-2011 03:21 PM
وطن حدادى مدادى ... كنا بنحلم بيه يوماتى ... والماقادر على العيشة فى السودان يتخارج سشوف أى بلد تانى....;( ;(

بس أدونا حقنا


#216775 [ابو سامي]
0.00/5 (0 صوت)

09-28-2011 03:21 PM
للبيع رئيس يحكم بامر الله ولا يستشير مستشاريه ولا يرجع لمجلسه التشريعي ويصدر قراراته الحربية دون الرجوع لقيادة جيشه وغير مستعد للتنازل عن السلطة فهو حاكم مدى الحياة ..... البيع يتم بالكاش والشيكات لا تقبل وليس على البائع تسليم البضاعة


#216767 [orass]
0.00/5 (0 صوت)

09-28-2011 03:11 PM
يا فاتح جبرة .. الله يفتح عليك : أعلن الشعب الفضل للبيع أكان في واحد بيرضى يشتريهو .. الحكومة ما محتاج لشعب تمامة عدد ساكت وعشان تستفيد من البيوب وكدة.. وترتاح من النقة . بلا لخمة بلا غلاء لحمة .


#216755 [سودانية]
0.00/5 (0 صوت)

09-28-2011 02:58 PM
امشى لاهاى عروضك دى كلها بتلقى ليها اعلى سعر....والله انت ماساهل بنظاراتك ديل


#216749 [ام الحسن]
0.00/5 (0 صوت)

09-28-2011 02:50 PM
حكومة ومتعلقاتها للبيع ....ده مش العنوان الاصلى للمقال ده


#216746 [بت ام الحسن]
0.00/5 (0 صوت)

09-28-2011 02:44 PM
فرصة نادرة بل والوحيدة...كوز للبيع موديل 2012 بجميع مخصصاته...للراغبيين الاتصال بمجلس قيادة ثورة الشباب ....الله يجازيك يااستاذ انت ابتديت تبيع فيهم قبال يومهم والله انت اشفت سمسار فى السودان عايز تلحق السوق قبل مايرطرط


#216733 [حسام تومابى]
0.00/5 (0 صوت)

09-28-2011 02:33 PM
انا بشترى تدفعوا كم


#216678 [الزول الكان سمح]
0.00/5 (0 صوت)

09-28-2011 01:22 PM

للبيع|

وطن لاوجيع له...كان على هيئة بنطلون وأمسى على هيئة جبون..يسرى العرض حتى على سكان ذلك الوطن .بشرط أن يتم توزيع المبلغ بينهم.

يا جبرا

إنتا مش إقترحت مرة على الحكومة تعين عوضية الوداعية فى وظيفة مستشار عشان تفتش ليها عن الشركات الرايحة دى؟؟!!!


ردود على الزول الكان سمح
Saudi Arabia [بت أبوها] 09-28-2011 05:26 PM
بريد تعليقاتك شديد يا الزول اللسع سمح .. زيدنا منها شوية و الله يخليك لوليداتك و يوردك موائد

العصيدة و الكسرة و القراصة بدل الكبسة و المندي و الما عرافها إسمها شنو ديك


#216659 [ابوساجد]
0.00/5 (0 صوت)

09-28-2011 01:00 PM
نسأل الله ان يحفظك يا جبرا والله بالجد كتاباتك دي بتخفف علينا مشاكل الدنيا دي....


#216656 [خليل عزة]
0.00/5 (0 صوت)

09-28-2011 12:56 PM

والله العظيم ما متذكر أخر مرة ضحكتا كده متين

الله يديك الصحة لكن ( المفتي والمقص ) دي بالغتا فيها!!!!

:D :D :D :D :D :D :D :D :D :D :D :D :D :D :D


ردود على خليل عزة
China [sami] 09-28-2011 07:56 PM
تعرف انو الوالى القال الما بقدر على عيشة الخرطوم يطلع منها ده هو جدادة خلا ساكت
ده جاى من ياتو قرية عشان يتحكم فى ناس الخرطوم وهو السودان الفضل ده ما بقى الخرطوم وبس و الباقى مأساة

United Arab Emirates [بت النيل] 09-28-2011 02:44 PM
والله يا جبرا كتاباتك رهيبة وجميلة وبتقول كل المفيد والمهم الله يديك العافية والله فعلا(نطير وين تطير عيشتنا ) اضحكتنى لدرجة لا تتوقعها


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة