المقالات
السياسة
ارشيف مقالات سياسية
وبدعة إنقاذية جهنمية جديدة,اا
وبدعة إنقاذية جهنمية جديدة,اا
09-28-2011 01:56 PM

وبدعة إنقاذية جهنمية جديدة,,,

اسماء الجنيد
[email protected]

سلام يا الحبان في كل مكان
عودتنا حكومتنا صاحبة الأفكار الجهنمية والخطط البهلوانية والتدابير الشيطانية
عودتنا على البدع ( بكسر الباء ) والمحن والهجائم والرجائم البقت فوق للتصور والتفكير والخيال ,,,
يعني زمان في طفولتنا كنا بنقرأ للمغامرين الخمسة وقصصهم وخيالهم الخصب ,, وغيرهم من القصص الخيالية للتسلية ,,
ده غير حبوباتنا كانوا بحجونا بي حجاوي من اسماء غريبة زي ( السعلوة و الغول اب نومة سنة ,) وغيرها من حكاوي نسرح معاها بخيالنا الصغير لعوالم تانية ,, تبدع الحبوبة في سردها بتشويق يجعلنا نغرق في نومة عميقة ونسرح سابع حلم بعد اول حجوة ,
مايصحينا إلا صياح ديك الصباح ونكتشف إنه الحجا الأمس بالليل كان مجرد حكاوي وقصص خرافية ممتعة ليس إلا ,,
لكن حالنا هنا بختلف تماما ,, يجب علينا ان نصحا كل يوم من نومنا الحقيقي ونتوقع لينا هجيمة جديدة حقيقية , اصبح الوضع اكتر خطورة وواقع مرير يجب عليك وغصبا عنك ان تتقبلو وتتجرع مرو ولا على كيفك وكراعك في رقبتك ,,ولا تلحس كوعك !!!
اصبحنا كل يوم نجد الأدهى والأمر من عجائب الإنقاذ الأكتر من 7 ملايين و التي لا حصر لها و الأبدعوا في تصويرها
قرأت مساء امس في موقع سودانيز خبر تحفة عن إحدى عجائب الإنقاذ ودواهيهم , جزاهم الله ألف خير دايرين يعملوا كورسات تدريبية لحجاج بيت الله الحرام ,, وتجلوا في الفكرة الخطيرة ,, واحد منهم قلب الهوبة عشرومية مرة وطلع لينا بي فكرة بناء مجسم للكعبة المشرفة في الساحة الخضراء , والمجسم كلف مية مليون ,, المليون ينطح المليون !!!
وإليكم الخبر كما هو والشكر مقرون للزميلة إزابيلا لنقله للقاريء المغلوب على امره
( اقامت وزارة التوجية والاوقاف والهيئة العامة للحج والعمرة ولاية الخرطوم مجسماً لبيت الله الحرام بقيمة 100 الف جنيه على الجزء الشرقي من الساحة الخضراء
بغرض تدريب الحجاج على كيفية اداء مناسك الحج، وكشفت ان عدد حجاج الولاية بلغ 9522 حاجاً،
وحذر وزير التوجيه والاوقاف عثمان الكباشي أمس، من وصفهم بـ»المتنطعين وانصاف المتفقهين « من استصدار الفتاوي المضللة للحجيج
،ودعا امراء الافواج لجلب الحجاج الى المجسم للتعرف على كيفية اداء المناسك .
من جانبه، اكد مدير هيئة الحج والعمرة ولاية الخرطوم، الدكتور علي شمس العلا ،ان الهيئة اقامت المجسم بتكلفة 100 الف جنيه
الغرض منه تعريف الحجاح على كيفية اداء مناسك الحج لادائها بصورة صحيحة)
عليكم الله ما بتوافقوني الرأي على عقول البشر دي وتفكيرهم الخطير في طريقة السلب والنهب وبعرفوا كويس جدا كيف تسرق اموال الغلابة والمهمشين ؟؟
يعني يا وزير التوجية والأوقاف ,, زمااااااااااااااااان اهلنا الحجوا على مرور السنين المضت , ولدوهم من بطون امهاتهم متدربين على الطواف ؟؟
بعدين ما قلت لينا السعي والمروة حا تعملوه وين ؟
وجبل عرفات يا ربي بتودوا الناس وين . جبال الفاو ولا جبل مرة ؟ مخيـــــــــــــر الله
لقيت نفس الخبر في صفحات الفيس بوك , اكثر ما اضحكني هذا التعليق

(وانتا قايلهم عملو المجسم من الأول ليه؟ بكرة صيانة، وبعدو توسعة، وقبر الرسول، وجبل حراء، وغار ثور،
والصفا والمروة، ومجسم لكنيسة المهد للإخوة المسيحين عشان ما يحسوا بالاضطهاد ... ياخ دي عالم مبدعة الله لا يحرمنا منهم
)
صدقت والله يا صاحب التعليق اعلاه ,فعلا عالم مبدعة جدا جدا ,, بدعتوا معانا واتفننتوا في عذابنا
عمليتكم دي فضيحة عظمى ليكم في المجتمع الإسلامي يا مدعي الفضيلة والإسلام,,
الشعب السوداني من اكتر الشعوب بتعرف تأدي شعائرها بدون إهانة منكم . في زول جاء إشتكى ليكم بقلة خبرته ومعرفته؟؟
دي إهانة واضحة وصريحة لي أي سوداني مسلم ,, بي إنه يجهل تماما حتى الطواف في بيت الله!!
إنتو لو فعلا دايرين تساعدوا الحجاج وتحلوا مشاكلهم ’ ما تسرقوا حقهم وتشيلوا قروشهم في البلد وتبهدلوهم في بلد الله ,, الحاج بعاني ما يعاني من مطار الخرطوم وميناء بورتسودان , إلا ان يرجع بلده , كل المناسك خلق الله في البلدان التانية بتأديها بي راحة نفسية وبدنية وبعثات حجهم وسفاراتهم بتريحهم على الآخر,,
نحن اهلنا مساكين مغلوبين على امرهم , تذلوهم وتعذبوهم وتبهدلوهم بي حقهم , حجاج طاعنين في السن , لا بتأخذكم بيهم رحمة ولا رأفة
ماكلين حقهم عينك يا تاجر ,, ده غير التزوير والرشاوي في إجرآءات الحج والعمرة المصائبها يشيب لها الولدان في المهد ... قلوبكم المحجرة دي ما خايفين من تضرع المساكين المظلومين ديل في بيت الله ربنا ينتقهم منكم !!!
حسبي الله ونعم الوكيل عليكم جميعا ,,

متاوقة ...
نصيحة لي وجه الله تعالى
غايتو لو دايرين تعملوا الصفاء والمروة , اعملوها لينا في شرق الله البارد ,شفتو حواشات القصب في الجنيد واسعااااات و ماهلااااااااات تعالوا جكوا لينا بي هناك , عشان نجككم حفايا وعرايا ,
والباقي خلوهو في سركم
فضحتونا الله يفضحكم بركة جاه النبي
يمهل ولا يهمل
ودعتكم الله
اسماء الجنيد


تعليقات 28 | إهداء 7 | زيارات 4159

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#217724 [منتصر فؤاد]
0.00/5 (0 صوت)

09-30-2011 08:04 AM
اديهم كمان يا بت الجنيد


#217484 [حسبي الله في الكيزان]
5.00/5 (1 صوت)

09-29-2011 04:57 PM
ياجماعة الخير الناس اغبياء للدرجة دي
يعني في قناة تلفزيونية بأسم القرأن الكريم وفيها الناس بتطوف حول الكعبة
وفي قنوات فيها شرح مفصل عن اعمال الحج والعمرة وقنوات متخصصة غير ان هنالك CD يشرح كل المناسك
دا افعال غير منطقية ومهزله مبالغ فيها والله يرد من اتي بهذه الفكرة الى صوابه واقترح ان يهدم هذا المجسم لاننا ضحكنا في القذافي من قبل عندما فعل ذلك ومن الممكن ان تؤدي الى جهاله اضافيه للشعب السوداني الذي بدأ الجهاله منذ عام 1989م


#217363 [مقيم بالمملكة ]
0.00/5 (0 صوت)

09-29-2011 01:31 PM
اولاً: لكي الاف التحايا وأنت تصورينا معاناة شعبنا يوم بعد يوم حتي وصل بنا الحال لبناء المجسم الغرض منه جمع المال والباقي مامهم.
ثانياً: لقد سهل لي والحمد لله أداء مناسك الحج مرة والعمرة عدة مرات ولقد شاهدت بعيني حجم وتسخير حكومة المملكة للإرشاد والتوجيه بالمناسك لكل الملايين وبمختلف اللغات تعبداً لله تعالي قبل أن يكون واجباً عليها، فنظرت الي الأمر أعلاه من زاوية التنظيم والترتيب فوجدت معاناة حجاجنا فيه أما التوجيه والإرشاد ومبلغ وميزانية ضخمة فهذا هو الأمر الغريب... ويا عجباً ياوطني لقد أصبحت الفتوي الدينية في بلدي بإيدي الحكومة الساسة وهاؤلاء لا هم لهم غير الدنيا والسلطة والمال...اللهم عجل برحيل كل فاسد وظالم لشعبه وناهب ماله بكل الذرائع الباطلة التي ما انزل الله بها من سلطان آميييييييييييييييييييييييييييييييييييييييييييييييييييييييين يارب يارحيم!


#217143 [Ismail]
0.00/5 (0 صوت)

09-29-2011 03:38 AM
يفوقون سؤ الظن العريض


#217131 [شمالي]
0.00/5 (0 صوت)

09-29-2011 02:52 AM
شكراً أستاذتنا بت الجنيد
طبعاً مجسم الكعبة كلف 100 مليون جنية واللبعة دي حقت وزير التوجيه والاوقاف عثمان الكباشي بما إنو صاحب الفكرة الجهنمية
أها....مجسم جبل عرفات ح يكلف كم؟؟
وطبعاً العطاء ح يرسو لعبد الله البشير....قطع شك


#217009 [Shah]
0.00/5 (0 صوت)

09-28-2011 08:45 PM
الحمد لله سيدنا إبراهيم ما لحق يذبح سيدنا إسمعيل كان نص الشعب السودانى هسة يكون فى السلخانة.


#216975 [وريتونا]
0.00/5 (0 صوت)

09-28-2011 07:35 PM
مسطول سالوه عن الكعبة ام مية مليون العملوها الجبهجية تجار الدين في الساحة الخضراء قال ليهم هوووووووي يا‎ ‎مرجفين يا ما متفقهين الناس ديل عملوها لحجاج الداخل


#216906 [ودالدكيم]
0.00/5 (0 صوت)

09-28-2011 06:11 PM
ياأختي الأستاذة أسماء الجنيد من مكة المكرمة لكي التحية والله يا أستاذة يجب أن نسمي الأشياء أولااً بمسمياتها هل هذا حزب اسلامي أنا أشك في ذلك هذا النبت الشيطاني سياسته وادارته لحكم البلاد شبيهة بسياسة اليهود الاسنيلاء علي المال والاعلام وموضوع مجسم الحج هذا اريد به الحصول علي المال وآخر نكتة ياأستاذة أسماء الولد القيادي بالحزب اليهودي السوداني الحاكم قطبي المهدي سرق منزله وبه كل عملات الكوكب الارضي


#216905 [اسامة شريف]
0.00/5 (0 صوت)

09-28-2011 06:08 PM
نفاق ودجل وشعوذة لا اكثر .... وين هئية علماء مسلمييين السودان يبقالى ديل هئية علماء المؤتمر الوطنى والله صاحب الفكرة ومن قام بالتنفيذ يستحقو العقاب
لانه شي مخزى ويدعو للسخرية تبا لكم ائها اللصوص


#216899 [كورسات للعجائز]
0.00/5 (0 صوت)

09-28-2011 05:59 PM
ما عارف اضحك ولا ابقى ساخر زي ود جبره الرجل الظريف لس ما كتب لينا عن المجسم ده .

ذكرتني قصه ( المسعودية) التحيه لاهلها الطيبين

بتذكر زمان في جهلنا كنا في رحلة زيارة للسديرة بعد ما انتهت الزيارة ركبنا البص وراجعين بشارع مدني في إتجاه الخرطوم وكان معانا في البص واحد حافظ المناطق التي تقع على الجهتين من الشارع يقول وصلنا قرية كدا و نحن اسي قربنا لي كذا . وفي واحد مسكين كدا السعودية معشعشة ليه في راسه ( الريالات ) المهم الدليل السياحي بتاعنا قال نحن وصلنا ( المسعودية ) ومن غير ما نشعر سمعنا جوطة شديده عند الباب ( قلت ليكم نزلوووووووني ابيت الا تنزلوني ) يا زول مالك قول بسم الله الحاصل شنـو؟ قال ليهم عايز انزل في ( السعودية ) ويدافر ويعافر خمسة اشخاصة يلاوي فيهم ما اتذكر الريالات ما عايز يفوت مكانها وحسب مسكنته فاكر انه خلاص الود وصل السعودية .. المهم شرحوا ليه واقنعوه وهدوه حتى هجس ... وكل اللي معانا في الرحلة ضحكوا ضحك شديد عليه . لكن بيني وبينكم اسي ما كلامه صاح قربوا ليه السعودية بي بيت الله الحرام خـاصـة في ( الطائف والرياض ) وح يحولوا الساحة الخضرا لي ( مكة ) .

نرجع لموضوع كما اشارت الاخت الرجل والمرأة السوداني ما يحتاج هذه الخسارة 100 مليون علشان مجسم . و الشاعر قال يا راحلين إلى منى بغيابي هيجتم يوم الرحيل فوادي ... يا ساكنين المنحنى والوادي )
ومنهم من وصف رحلة الحج في اشعاره من البداية للنهاية ولم يكتب له الحج .
هل بنيت ليه كعبه في زمنه ولا كان عنده تلفزيون شاهد فيه رحلة الحج كاملة .

كان بدل الخسارة دي كلها يوضع شريط مصور في الطائرة طول مده الرحلة وشرائط اخرى في السكن شاشكة كبيرة 75 بوصة ولا بروجكتر وعلى الحائط وانتهى الموضوع الكعبة لوحدها بي 100 مليون والبروجكتر بي 2 مليون وقيس على ذلك

والسلام


#216886 [Shah]
0.00/5 (0 صوت)

09-28-2011 05:48 PM
إقترح عمل تمثال لإسحق فضل الله كمان للتدريب على رمى الجمرات.


ردود على Shah
Venezuela [zoul] 09-30-2011 12:30 AM
إنتو ياناس الحاصل شنو بقيتو تسطلوا ولا شنو ..... بالغت فيها ياخينا .... جبتها من وين دي

Sudan [محمد] 09-28-2011 11:10 PM
:D :D :D :D :D :D :D :D :D :D :D :D ههههههههههه والله بالغت ( ) ( ) ( ) ( )

Saudi Arabia [بت أبوها] 09-28-2011 06:33 PM
أجمل تعليق على الإطلاق .. و الله ضحكت لمن بكيت


#216879 [ابوفارس]
0.00/5 (0 صوت)

09-28-2011 05:30 PM
يا اسماء والله شر البلية ما يضحك
طبعا هنالك فى بعض الدول الاسيوية تكون هنالك ندوات شرح وكورسات ولكن للمشرفين فى كيفية شرح غملهم فى متابعة وتيسير امور الحجاج اليومية والحياتية , وهنالك مشرفات خصيصا للنساء للامورهن الدنيوية والنسائية . وهم لا يدفعون لهؤلاء المشرفين الا بعد عودتهم من هناك واداء واجباتهم بالصورة المطلوبة منهم . وهل تعرفين كيف يعرفون المقصر من الملتزم ؟ هنالك استمارات عند كل حاج يوجد فيها مربع لرضاء الحاج عن عمل المشرف الذى يتبع له . واذا لم يجمع هذا المشرف على الاقل 80% من الحجاج بالرضاء عن عمله معهم , فهو من الهالكين لا محالة . ففى هذه الحالة لا يدفع راتبه . ولا يسمح له بالسفر مرة اخرى مرافقا للحجاج مع اجراءات جزائية اخرى . فلماذا لا نطبق هذه الاجراء هنا .
اما بخصوص كعبة التدريب هذه انها والله لبدعة وسوف يقوم بعض ضعاف النفوس بايتاداع اشياء اخرى حمانا الله منها . ودمتم


#216878 [مظفر سيد احمد عثمان]
0.00/5 (0 صوت)

09-28-2011 05:29 PM
الاستاذة اسماء الجنيد
لاتندهشى من عمائل وفعائل اولئك اللصوص والحرامية فقد اصبحنا نعيش فى زمان افتقدنا فيه الدهشة والتعجب مما شاهدناه وسمعناه من تلك العصابة والمحير فى الامر انهم فقدوا حاسة الخجل والمدارة لفعائلهم القذرة ، لايحركهم فى مجال العمل العام الا المصلحة الذاتية التى اصبحوا يتبارون فيها من قمتهم الادارية وحتى اصغر مسئول فيهم ، هل تصدقى ان قلت اننا محكومين بعصابة مافيا محترفة تتعامل مع مواردنا بنهب مباشر وعلى عينك ياتاجر لذلك لاتستغربى مما يفعلونه لكن المهم فى الامر ان ذلك العمل قد شارف على نهايته وجفت الضروع التى كانوا يحلبوا فيها طوال السنوات السابقة واليوم اصبحوا فى حالة زنقة زنقة تفوق تلك التى عاشها الطاغية الليبى ، وماعلينا سوى العمل على اسقاطهم وازالتهم من سدة السلطة بكل الطرق الممكنة


#216874 [من شباب الثورة]
0.00/5 (0 صوت)

09-28-2011 05:24 PM
بدعة ننكرها ونتبرأ منها انه ابرهه السودان


#216865 [وطنى ]
0.00/5 (0 صوت)

09-28-2011 05:05 PM
الجماعة ديل بيجهزوا ليكم علشان تحجوا فى السودان لان رسولهم الرقاصة البشير ومعه الصحابة (عملاء النظام) وامير المؤمنين بيضعوا اللبنات الاولى لديانة جديدة وعناوينها الجهاد ضد المسلمين وفقه الضرورة وفقه السترة وكل هذا بواعز من كبير الابالسة الذى علمهم السحر


#216859 [mohamed]
0.00/5 (0 صوت)

09-28-2011 05:00 PM
براءة الاختراع لطيب الذكر قائد ثورة الفاتح من سبتمبر العظيم القائد الاممي معمر بن منيار القذافي ايام غضبته من السعودية التي رفضت استقبال طائرات الحجاج الليبييين ايام الحظر الجوي 0 وهم ان شاء الله على درب معمر سائرون 00000000 ياخ ربنا يسلط عليهم طيرا ابابيل بحجارة مسومة آمييييييييييين يا رب العالمين0


#216860 [abdulgabbar Ahmed]
0.00/5 (0 صوت)

09-28-2011 05:00 PM
أخواني انتم لا تدرون الغرض الحقيقي من بناء هذا المجسم. الغرض يا سادتي هو لغف المزيد من أموال هؤلاء المساكين و الغلابة . الموضوع ليس قيمة الاموال التي بني بها هذا المجسم فهذه قد تم نهبها وانتهي أمرها بعد ان دخلت العمولات للجيوب .

الموضوع الاخطر هو ما يحصل في الايام القادمة من ابتزاز للحجاج خاصة ان موسم الحج قد اوشك ولذلك اتوقع صدور التعليمات التالية من الذين بنوا هذا المجسم

1. فرض مبلغ كبير مقابل هذا التدريب يذهب لجيوب هؤلاء الحرامية

2. يكون التدريب الزامي ويربط كشرط لاكمال عملية السفر اي نفس طريقة الخدمة الالزامية يعني اذا لم تحضر مايفيد بانك اخذت هذا التريب فليس لك طريقة ان تسافر للحج
3. يعطى امراء الحجاج نسبة مئوية عن كل حاج يتم تدريبه (وهذا حصل في كردفان في السنوات الماضية) وصل لدرجة ان الوسطاء يجوبون القرى والفيافي لتسجيل المزيد من الحجاج لتعظم عمولاتهم

4. أخشى ان يكون المبلغ المدفون للتدريب بالعملة الصعبة خاصة في ظل الندرة التي تشهدها البلاد للعملة الصعبة.

5. ارجو من الخوة الموجودين بالسودان مراقبة عمليات التدريب في هذا المجسم ويفيدونا بملاحظاتهم

6. اذا لم يجدوا طريقة لأخذ رسوم مباشرة في عمليات التدريب فسوف تضاف التكلفة لعمليات اخرى او تخصم من مال الحجاج كما حصل في السنين الماضية

انتظرو وخلونا نشوف لكن انا متأكد ان هؤلاء الابالسة لا يفعلون لشيء لوجه الله او لمساعدة او مواطن سوداني

أخشى


#216853 [kh]v]
0.00/5 (0 صوت)

09-28-2011 04:52 PM
ما تنسي دي راءها رسوم تسجيل اجبارية لدخول المدرسة يعني زي مدارس قيادة السيارات لو بتعرف تقود عربة لازم تدخل المدرسة قبل الرخصة


#216835 [أبو كلوة]
0.00/5 (0 صوت)

09-28-2011 04:16 PM
الناس الربنا سلطهم علينا ديل أى كلام؟!!...وللا الشعب السوداني دا في نظرهم أى كلام؟!!...هل من مفتى يرحمكم الله..


#216796 [sudani]
0.00/5 (0 صوت)

09-28-2011 03:35 PM
رمي الجمرات حقو يكون في القصر الجمهوري


#216758 [wadhamad]
0.00/5 (0 صوت)

09-28-2011 03:03 PM
وما تنسوا كمان لازم يعينوا مستشارالوالي للحج التخيلي والتدريب وتكوين اللجان اللازمه لتجويد الأداء وتأهيل الحجاج السودانييين لنيل الميداليه الذهبيه ........

حيرتونا عديل كدا ....................................وريتونا لكن وريتونا


#216753 [ابو سامي]
0.00/5 (0 صوت)

09-28-2011 02:57 PM
ناس حاج الماحي حجوا في القرن ال18 وبالجمال ولديه مدحة مطلعها :
نعم العنا وروح وبي سهل الفريش شاف العلم لوح زار جد الحسين
واتحدى هيئة الحج والعمرة والآلاف المؤلفة من الامراء الذين يحجون على حساب الحاج إن كانوا يعرفون أين هو سهل الفريش وللقراء الكرام سهل الفريش يقع للقاد من مكة قبل المدينة بحوالي 150 كيلو فكيف عرف حاج الماحي هذا السهل وترنم به مع انه لم يحج مع هذه الهيئة المأكلة ...... اتركوا الحجيج يحج كما كان يحج قبل آلاف السنين ..... أم هذا هو حج التوجه الحضاري والدولة الرسالية


#216752 [ود الجنيد]
0.00/5 (0 صوت)

09-28-2011 02:55 PM
سلام لى بتنا الشجاعة .انتى ماشوفتى حاجة البلد دى ال100 مليون دى مصاريف مرة المعتمد من طلح وغيرو دى حاجة بسيطة لا تكفى حرامى انقازى فى درجة غفير خلى الناس الكبار شينو يابتنا عايزة تجيبى لينا الناس ديل وين فى الجنيد اقومو اصدقو نلحق ناس امرى وابقى امرنا لله وهى لله


#216735 [علي العقيد]
0.00/5 (0 صوت)

09-28-2011 02:39 PM




بعد شويه حيقولوا عايزين يعملوا ليها توسعة زي توسعة السعودية للحرم المكي

الا بسألكم زمزم حتكون وين مع الموية القاطعة اربع وعشرين ساعة والمواسير ما تسمع منها شيء غير ( خخخخخخخخخخخخ ) زي كأنها بتضحك على واليها ...!!

أشوف فيكم يوم يا كيزان يا حرامية بقيتو تأكلونا عينك عينك زي كانو نحن هبل وريالتنا سائله في هدومنا ..

أملي في الله كبير وحيجي اليوم البشوف فيها البشير زي القذافي يتكلم من تحت الحفر وراء الفيافي.


#216731 [قرفان من الكيزان]
0.00/5 (0 صوت)

09-28-2011 02:28 PM
ماقلتى لينا رسوم الطواف كم ؟؟

الحكاية دى لازم عملوها لغرض _ الكيزان ديل مابيعملوا حاجة لله ساكت __

يعنى خلاص شايلين هم الحجاج وبيعلموها لوجه الله ؟؟؟

الايام حتثبت وحتكشف غرض _ بس مامن الحجة دى _ لانهم أذكياء جدا فى ابتكار

اشياء لسببين __ الاول كمصدر دخل _ والثانى علشان يشغلوا الناس عن بلاويهم

وارتفاع الاسعار __


#216730 [سوداني بالقديم]
0.00/5 (0 صوت)

09-28-2011 02:27 PM
عفيت منك يا بت الجنيد الله يحفظك ... والله أنا خايف بعد ما حجاجنا يعلموهم كيف يأدوا مناسك الحج يقولوا ليهم خلاص كده حجيتوا يللا أرجعوا بيوتكم ، كده حجيتو ، ودي فتوى (فقه الضرورة)


#216722 [حادب]
0.00/5 (0 صوت)

09-28-2011 02:13 PM
سبحان الله ولا حول ولا قوة إلا بالله
أين العلماء؟ ماذا يعتبر الطواف حول هذه الكعبة المزعومة؟
أليس ذلك ما أراد فعله أبرهه؟

الطواف حول الكعبة لا يحتاج لتعليم , لم ولن ينقطع الطواف حول الكعبة المشرفة, ويطوف حجاج ومعتمري السودان كما يطوف غيرهم.

معاناة الحجاج والمعتمرين في مسائل أخرى ليس من بينها كيفية أداء الشعائر وجزى الله حكومة خادم الحرمين الشريفين إذ خصصت في الحرم وحده العدد الكبير من الدعاة الذين يهتمون بالزوار لحظة دخولهم أبواب المسجد الحرام.

آمل أن يكون الخبر والموضوع غير صحيح.



اسماء الجنيد
اسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة