حج بنو جكة
09-29-2011 09:05 AM

حج بنو جكة

اسماء الجنيد
[email protected]

حبابكم يا الحبان في كل مكان ,,,,

نواصل في موضوع الحج والفكرة القطعوها ناس بنو جكة من نافخوهم المصوفن,, النبي ماكم مهجومين زي كدي ؟؟؟
يعلم الله لي هسة مهجومة من القليلة الماكنة دي .!!!! ..
معقول يا اخوانا الناس دي الجشع عمى بصيرتها جت من طرف ؟؟ زولا واحد فيهم يقول للتانيين الكلام ده عيب ودي فضيحة راسها عديل ؟؟ زول واحد عاقل فيهم مافي ؟
بعدما كتبت ليكم المرة الفاتت , عن نفس الموضوع , بقيت ارجع اتاوق واجي تاني ,, يا بت الجنيد الكلام ده صحي ؟ ناس الحكومة ديل بي صحهم ؟
وبقيت افكر في الشيء البجينا تاني منهم شنو ؟؟
ما خلوا لينا مخ زاتو يتوقع الداهية البتجينا منهم فجعتا على قول حبوبتي
كدي خلوني افكر معاهم شوية ,,,اها الناس ديل بنوا الكعبة ,, يبنوهم حيطة إن شاء الله
اها باقي الشعائر يعملوها وين ؟
هم ما قالوا دايرين يعملوا لي الناس تدريب وبروفات ,, عليكم الله ده حج ولا مسرحية حا تمثل في مسرح قرطاج؟
عارفين عندي ليكم فكرة متبرعة ليكم بيها ساي لله في الله ,, طالما إنه العمل ده في سبيل الله , خلوني النساعدكم و أتم ليكم باقي حجكم ده..
اولا بالتبادي الحج ده بدور ليه شيطان يرجموا . تحمدوا سيدكم عندكم كتاااار وروسينهم ماكنة وعويناتها مبرقة متل البوم ,, نسعل الله السلامة ,,
دحين إن طبقتوا فكرتي دي , انا اول زول بي قبيلتي كلها بنحج معاكم ,
شفتوا كيفن ! وبضمن ليكم كل اهلي الغبش وباقي المهمشين والمطحونيين من الشعب الفضل ,,,لكن شرطنا ما تعلمونا الطواف بس.
الطواف ده سااااهل ,, نحن بندور لينا شياطين نرجمها , الحجر مرات بجلي من اول مرة , لازم نتعلم الرجم كم إسبوع كده , وبعدين نجي للطواف
, وبما إنه الحج حجنا وفي بلدنا , يبقى لازما الجديع يبقى بالطوب اللحمر واللخدر ,, آي نرصع ونفلع من مواردنا المحلية
وبما إنه المغايس كتيرة , الرجم براهو مو كفاية . ناس يرجموا , وناس بعد الرجم يتلبوا فوق رقابكم يقصوها
وناس شلاليت ساي في الضهور لامن تقولوا الروب ,, نكون خلصنا حقنا ولبينا ليكم النداء, يعني عصفورين بي فد جدعة . حسب طلبكم ,,,,
والحج مدام بقى في الساحة الخضراء , الحج يكون لعموم اهل السودان . مو بقى ساااااااهل يحمدو سيدهم لا فيزا لا تذاكر سفر,, الله ريحهم اهلنا من البعثات وسرقتها ولفحيها لي حق الغلابة ,
كتر خيركم وبارك الله فيكم بتدوروا تسهلوا لي المواطن اصعب شيء,, ما قصرتو معاه كلو كلو
آي نعم غليتوا الحاجات كلها وكتلتوا الناس بالمرض والجوع والحروب ,, لكن اها بنيتو لينا كعبة عديييل
مافي رئيسا قبالكم سواها ,, فتوا ابرهة بي غادي بي مليون سنة ضوئية
اها يقوموا يجوا اهلنا الممغوسين ديل من جموع اهل السودان ,, عشان يحجوا ويطوفوا ويفلعوا شيطانيكم ويفشوا غباينهم.
مدام الشعب ده مو داير يمرق ولا إنتو مدنو فرصة يظاهر ويعبر عن قرفو . خلوا اليجي يفلع في كعبتكم البنيتوها من دمه ورزقه ,
والفليع تلاتة يوم ,, تترصوا لينا إنتو يا ناس الإنقاذ
, ما الفكرة فكرتكم .. عاد نجيب ليكم شياطين من وين نفلعها ؟
والشيطان إنتو عارفنو مااااكن وكرشو ملانة من السحت
وراسو ملان إجرام ؟ عاد ده مو ياهو منكم وفيكم ؟؟؟
اها نجي للهدي ,, الهدي ده الرسول فوقكم ودوهو لينا مدني .. الدباغة راس ..
عاد الجلود دي نوديها وين .. ده إختصار للنقل والترحيل ....واللحم الكتير
ده صدروه بي غادي بي بورتسودان , المسافة بقت في النص .. اتبرعوا بيهو لي ناس جدة , ناس جدة ديل يخربهم معلمين الله زي المصريين اللحقتوهم بي كم مراح بقر ,, إنتو ماكم اجوادين على الأغراب , وناسكم يسفوا التراب ,,
اها نواصل حجنا , مزدلفة ومنى ديل ما بتغلبوا فيهم حيلة تب ,,
الثورات راااااقدات عندكم من الثورة الأولي لي الحارة مية والكلاكلات , شوفولكم زولا بدور يربح وقسموا عليهو باقي المناسك. وإحرام الحجاج اقترح ليكم يكون لبس الصاعقة , عشان القماش راقد عندكم ويبقى زيتكم في بيتكم ,
واهم شيء عندنا بير زمزم ,, احفروا لينا بير زمزم في جياد آآي جياد دي محلتها سمحة وفيها المترة ,,
ما عليكم إلا تغرقوا لينا المطامير وجيبوا لينا حناطير تنقل موية الله المارقة من جوف البير والمطامير وبيعوها لينا موية زمزم
بنصدقكم والله , عاد إنتو بنيتو الكعبة بندور نكضبكم في زمزم الموية الزرقاء دي ؟
وطبعا شهداء احد وبدر راااااااااااااااااااقدين عندكم ولا محتاجين تقتلوا ناس تانية عشان تعبروا لينا عن جهادكم .
دار فور براها الإعترف بيها بشيركم قال 10 ألف وما خفي اعظم
يعني اكتر من المسلمين الماتوا في زمن الرسول عليه الصلاة والسلام !!! والله لكن الحج والشهداء عندكم تحمدوا وتشكروا فضلو ,
الشفيع والبقيع , اقترح عليكم تودوهو سوبا والباقير , برضو قريب لي محل كعبتكم الإفتراضية وكلها فركة كعب , نزلوا ليكم باصات تمصوا بيها الفضل من فتات المطحونيين وبرضو إسم سياحي ليكم ,,
وشعائر الحج ما محتاجين تشيلوها من الكتب . رااااااقده عندكم , هي لله هي لله ,ولا للسلطة ولا للجاه ,,
وجبل عرفات زي ما قلت ليكم , جبال الفاو , اولا بالتبادي كتيرة , وعالية ما يقدر يتشعبط فيها زول غير القرود , التمشي الناس دي تتشعلق وتشكيكم لي الله ,,
ما الحكاية كلها بقت محلية ,, بعدين عشان الزحمة وكده , ابدوا حججوا في الناس من هسع ,,
وقولوا ليهم عندنا حج محلي ومستورد . اهلنا الغبش بجوكم تـــب ,
فش مغيسة ساي بجوكم لي فليعكم ورجمكم ,,وناسكم اليسافروا السعودية
تاني فضل شنو ,؟ اختوا لينا الجبايات في طرف الساحة الخدراء ,, عشان الناس تجيكم منبهلة ..
لكن والله يا جماعة الخير اكتر شيء وجعني تعقيب وزير الأوقاف وكلامو الغريب وعجيب ادناه ,, النبي شوفوا الزول ده قال شنو !!!!
(وحذر وزير التوجيه والاوقاف عثمان الكباشي أمس، من وصفهم بـ»المتنطعين وانصاف المتفقهين « من استصدار الفتاوي المضللة للحجيج
،ودعا امراء الافواج لجلب الحجاج الى المجسم للتعرف على كيفية اداء المناسك ) .عليكم الله المطنقعين وانصاف المتفقهين والمضللين الناس منو ؟؟؟ الناس ديل ما مبدعيين وخطيرين لدرجة قف تأمل!!!!
واحد بدور يبقى نبي ويصلي العصر في بني قريظة بي كتيبته السماها جماعة التكفير والتهكير
والتاني بنى لينا كعبة في الساحة الخضراء ويدعو لي تعليم الحج في العام 2011 لي اهلنا البدوا الحج بالإبل ,
التالت غايتو بحول بيت المقدس في مول عفراء
و الحج بقى في الساحة الخضراء والمحلي داخل عطبرة ,,
أنعم وأكرم ....
يا اهلنا الناس ديل إن ما قوموا ليكم القيامة قبال يومها بقوموا لي كل زولا فيكم كوكة في نص راسو بي محنهم دي !!!
ربي يقوم ليهم في روسينهم قمل وقراد ينتفهم ويمص دمهم زي ما مصوا دم الشعب المسكين
يمهل ولا يهمل

ودعتكم الله
اسماء الجنيد


تعليقات 18 | إهداء 6 | زيارات 2730

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#218002 [عبدالباقي طالب الله]
0.00/5 (0 صوت)

09-30-2011 06:42 PM
يقولن حج وقضاء حاجه ,,, وناسنا عندهم قضاء حاجة ثم حج للمستطيع


ان شاء الله ما نسو يحفرو بير زمزم و يشتروا العقالات


#217636 [خالد عثمان]
0.00/5 (0 صوت)

09-30-2011 12:16 AM
الجماعة نسوا مقام ابراهيم... يعملوا لينا واحد ويجيبو لينا قدم المشير الراكب على رؤس الشعب السوداني


#217596 [بت الخرطوم]
0.00/5 (0 صوت)

09-29-2011 09:32 PM
يابت الجنيد يابت عمى حبوباتنا قالوا لينا الجن بتداوى كعب الندراوية ود الكباشى الندراويةذاتا والله العظيم لما شوفت مجسم الكعبة والمجسمات الاخرى من جمرات والصفا والمروة وخيام منى وجبل عرفات اصابنى ذهول لم افق منه الابعد قرأتى لمقالك الابداع فكل سطر منه ابلغ منقبله وبعده فلندعوا حجاجنا بان يرفعوا الاكفة بان يخسف بكل من له صلة بهذا المنكر الارض وان نرى عقابهم فى الدنيا قبل الاخرة قولوا معاى اميييييييين


#217476 [من شباب الثورة]
0.00/5 (0 صوت)

09-29-2011 04:49 PM
تكلفة الكعبة مائة مليون

احمدوا ربكم ما عملوا الصفا والمروة والمبيت بمنى والله كان خسروكم مليارات


#217422 [كوماندو]
0.00/5 (0 صوت)

09-29-2011 02:53 PM
الظاهر وزير الاوقاف لقى نفسو قاعد فاضى حاول يعمل حاجة هو فاكرها جديدة عشان يستمر فى التشكيل الوزارى الجديد.......
لكن مشكلة الحجاج الاساسية هى فى الخدمات التى تقدم لهم فى الحج الحقيقى وتنسيق سفرهم وعودتهم وعدم توهانهم.....
شكرا الاستاذة اسماء على المقال الحلمنتيشى....
وحقيقة شر البلية ما يضحك......


#217418 [من شباب الثورة]
0.00/5 (0 صوت)

09-29-2011 02:48 PM
عليكم الله الكعبة السودانية دي كلفت كم الزمان بناها سيدنا ابراهيم مجاناً


#217412 [عبدالباقي طالب الله]
0.00/5 (0 صوت)

09-29-2011 02:35 PM
الحج دغمسة


#217367 [الزول الكان سمح]
0.00/5 (0 صوت)

09-29-2011 01:34 PM

يابت الجنيد

شاحد الكريم أشوفهم كلهم جاكين طالبين ( المكاشفى )


#217352 [وحيد]
0.00/5 (0 صوت)

09-29-2011 01:07 PM
نقترح تكملة لجرتق بدعة اللصوص الجديدة اصحاب كعبة ابرهة ان يقيموا مجسمات لرمي الجمرات على ان يوضع في كل مجسم بعض \" شياطين\" الانقاذ ليتم تدريب الحجاج على رمي الجمرات على شيطان حقيقي، و لما كان جماعة الانقاذ كلهم من فصيلة ابليس، فالافضل ان يوضع كبار الشياطين... الراقصين و المسودة وجوههم و جماعة فقه السترة، و لتساوي الفرص نقترح ان يتم استبدال المجموعة المرمية كل يوم بمجموعة جديدة.... على ان يكون مدير الحج و العمرة الموقوف في اول مجموعة رجم
تخيلوا فرجة الحجاج و هم يرمون الحجارة على من اذلوهم و نهبوا اموالهم .... تلك ستكون اول فرحة لشعب السودان الفضل منذ اثنين و عشرين عاما.....
و اهو برضو فرصة الجماعة يطلعوا منها بقرشين تلاتة .. وزير الدفاع يكون مسئول عن \" مباني\" الجمرات، و اذا وقعت ستقع على راس جماعته، و \" كرتة\" سيورد السيخ و الاسمنت للمبنى و المتعافي يتعاقد على التنفيذ بشركاته و ود بدر و جماعته ممكن يسجلوا شركة في الكويت و تدخل كمستثمر اجنبي و يكون لها ادارة \" المناسك\" حصريا، و جماعة بدريين تانيين يستوردوا \" حصحاص\" من الصين و ما مهم لو كان \" فاسد\" او \" منتهي الصلاحية\" ... و اهو الشغلانة كلها \" تصب\" في مصلحة الجماعة و تزيد عدد الفلل في مدينة النخيل في دبي


#217350 [Shah]
0.00/5 (0 صوت)

09-29-2011 01:03 PM
هسع الواحد يعمل شنو؟ يدخل الإسلام فى من جديد؟


#217347 [orass]
0.00/5 (0 صوت)

09-29-2011 01:01 PM
يا حجة أسماء الجنيد : ما قلتي لينا الناس الفي مكة المكرمة الزينا ديل إذا حبوا يجددوا حجهم وتكتمل حجتم برجم شياطين الإنقاذ ممكن يتحصلوا على تأشيرة أم أن الحج للمواطنين فقط ؟؟ بس يا اختي عايزين ننال شرف الرجم .. عليكي الله ما تحرمينا من الأمنية الغالية دي.
في انتظار ردك في المقال الجاييي .. فتك بعافية .. الله يوعدنا نتلاقا عند كعبتم , وندعو اللهم إرنا فيهم عجائب قدرتك .. ألا لعنة الله على الظالمين.


#217339 [Siafalhag]
0.00/5 (0 صوت)

09-29-2011 12:46 PM
يا استاذة الجنيد

الخطوة العاوزين يعملوها بعد دا حيفتحوا مدرسة بالقروش لاى واحد عاوز يمشى حج او عمرة لازم يسجل فى المدرسة دى طبعا بمصاريف كذا كذا---- و بعد التعليم سيكون هناك امتحان رسوم كذا وبعد النجاح حيدوا الواحد رخصة او شهادة بالقيمة الفلانية-

لن يعطى احد تاشيرة الحج او العمرة ان لم يستخرج هذه الرخصة او الشهادة

حيفتحوا المركز التاهيلى ليكون مركز عالمى خصوصا فى افريقيا وتاهيل الحجيج والمعتمرين---

هذا المركز سيكون تابع لهيئة الحج والعمرة وكلهم تابعين لرئاسة الجمهورية--- تخيلى المال ال حيدروا المشروع دا على---- :D

العاجبو عاجبوا والما عاجبو يحلق حواجبو---(؟)


#217233 [ابو يوسف]
0.00/5 (0 صوت)

09-29-2011 10:21 AM
عافاك الله بت الجنيد و الله ما خليتى شىء يتقال و لكن الغبن كتير كتير كتير قدر اعمالهم و عجبنى تعلبقك فى رجم الشيطان اعتقد ان الشيطان الحقيقى ترك السودان من زمان خوفا من عمايل الكيزان مرق بجلدو عديل و لكن نحن نحتاج فى كل ولايه موقين تلاته لرجم شياطينا بل شنقهم و اديها صنه شويه بعد كم يوم كده ح يكون الحج من سوريا و كربلا مش نحن ح نبقى مع ايران صف واحد لتكوين دولة التوحيد التى على ما اعتقد ح توحد السنه و الشيعة ده ما شىء بعيد نحن عندنا حكومة المعجزات


#217217 [amin]
0.00/5 (0 صوت)

09-29-2011 09:46 AM
والله الجماعة ديل حيرونا للنهاية .... وكمان شعبنا الصابر والمغلوب على أمره حيرنا أكتر منهم .... يا ربي دا صبر غضبة الحليم عشان إقوم إزر ويأكلهم وما بفضل فيهم نفس حائم ولا القصة شنو.... وبنعرف قوانين سبتمبر المشهورة طيرت النميري ... إنشاء الله كعبتهم دي تطيرهم وما تخلي فيهم ريشة.
وأعتقد دي بقايا كتاب تبع القذافي ... يا ربي أكون قاعد معانا في السودان ولا جنايني في برجوا ... كل شي أصبح ممكن ... لأن حسب علمي حراميتنا ديل بذلوا الغالي والنفيس عشان إلموا فيه وإشيلوا شيلتوا منوا ...
لكن بختكم يا بت الجنيد سهلوا ليكم الحج تسهيل شديد ... جيبي جماعتي ساي ... لافحص ولا استمارات ...ولادمغة ولا كحة ...إتسرعي قبل ما يجينا يوم ويقولوا في حج سياحي لغاية شمبات ... الله لا يجيب الشبهات علينا ... بلاويهم كترت وفسادهم كتر والله يكضب الشينة...
وبعرف لي واحد يا بت الجنيد ... قبل 20 سنة وهو ضابط في الشرطة مسك السبحة وإسم وفك الطريق مع إنو كان بتاع طريق وكان بصلي في الشارع إوقف الحركة وبصلي وعساكروا بحرسوه ... قام عمل أعمدة في بيتوا وقال دي الصفا والمروة... وعمل شوية هرولة وبعض الحركات... يعني الراجل دا لو ما أتوفي لرحمة مولاه كان العساكر المعاهوا طبقوا الفكرة وتكون وصلت لغاية عندكم .... وإمكن دي باقي أفكاروا...
الله المستعان على شعبي الصابر ومنبهر ... وين ناس خلاوينا ... وين الصالحين وأهل الدين ... الله يوريهم يوم ... كتلوا الناس بالكضب والهجم الكتير والنفخ وما من هاك وهاك وشكراً ليك يا أسماء الجنيد وأنفشي فينا من ريحة حبوبتك عشان نضوق طعم السكر لينا زماااااااااااااااااااان بنشرب الشاي بالبلح الكملوا جماعتنا ديل ولك عميق مودتي


#217216 [مظفر سيد احمد عثمان]
0.00/5 (0 صوت)

09-29-2011 09:46 AM
والله العظيم يابت الجنيد بالغت وابدعت ابداع مذهل لا املك سوى ان اقول آآآآآآآآآآآآآآآمين يارب العالمين تتحقق دعواتك المذكورة اليوم قبال باكر ، وطبعا انت عارفة انهم رواد فى مواضيع الدجل والافك بالاضافة للصوصية التى يتميزوا بها ، نسال الله ان يخلصنا منهم اليوم قبل الغد


اسماء الجنيد
اسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة