كان يا ما كان
10-02-2011 08:46 AM


كـــان يــا مــا كــــان

عبدالرحمن غزالى*
[email protected]

مقـــدمـــة :
انها حكاية لاطفال الزمن القادم الذى سيجد هذا السودان الشاسع الغنى بالتنوع الذى فشلت النخبة فى ادارته بحكمة وموضوعية وواقعية قـــد تمزق الى اشلاء جهوية مبعثرة لا يجمعها رابط سوى العداء المتبـــادل والمرارات المتراكمة والغبن من فعل الاقصاء والانفراد بتقرير مصيــر بلد وشعب متنوع الاعراق والثقافات والاديان . واتمنى ان تكون حكايتى محض خيال وان لاتتحول الى واقع لان المعطيات فى الساحة الان تنذر بذلك واتمنى ان يبقى السودان الذى نعرفه وورثناه من الاجداد موحد بوعى والان الى تفاصيــــــل الحكايـــــة : -
كان يا ما كان يا اطفال يا حلوين زمان بلد كبير اسمه السودان كان جنوب شرق وغرب وسط وشمال جاها يوم غول بدقن كبيرة كبيرة راكب دبابـــة ولابس ميرى طرد السادة وعمل بيوت اشباح وشرد للصالح العام نــــــص الناس الفاهمين والعارفين التفاصيل وجاب مكانم ناس بدقون وشلوخ وشرد كمان عمال رزق اليوم جاع الاطفال الحلوين شربوا الشاى بالبلح وجاتــــم امراض اول هم ما بيعرفوا الالف من الواو الدكر ما الزمن داك المــدارس بقت بى قروش الما عندوا قرش ما يقراء خربت ديك الدنيا الكان فيهـــــــــا بعض الحاجات الكانت حلوة قامت حرب لا والله حروب جنوب شـــــــرق وغرب ما الغول وجماعتوا كرسوا للجهوية والقبلية والعصبية والعنصرية وكنكش فى الكرسى الهزازبالبندقية وبالسكين بالتكفير بالتخوين وبكـــــــل الاشكال وخفف شوية من وجع الراس الفى دارفور وشرق السودان والفى جبال النوبة والانقسنا بالتخدير ما باالكى البيعالج سبب وجع الراس لانوا ما ناوى يسيب الكرسى الهزاز وما يدى مساحة فيهوا لواحد تحرق دار فــور وكمان شرق السودان وجبال النوبة والانقسنا وكردفان وغيرم بس يقعـــد الكرسى الهزاز ما شاخت افكار السادة الاتولدت شايخة وقاعد تتخبط وما عايزين تجديد قبل كان كومين كبار الغول وجماعتوا بعثروا الكومين لى كيمان هشة واتوهط فى الكرسى الهزاز واخد راحتوا وعارف انو الكيمان لابتهش ولا بتنش وفكر يقطع جنوبا من شمالا ما جنوبا دى كان ديمـــــــا رافض للجهوية والمحسوبية وديما قايل لا قام مشى مشاكوس وما شاور حد يا اطفال تعرفوا وين مشاكوس دى فى بلد اسمه كينيا وفى نيفاشا ودى كمان فى كينيا قطع الجنوب وما شاور حد وفى يوم من اول السنة بعـــــد نيفاشا بسته سنين قال الناس فى الكان جنوب باباى يا بلد كان اسمـــــــــــه السودان باباى يا عنصرية ياجهوية يا محسوبية باباى يا ظلم نحن شعــــب حر فى افريقيا الحرة بلد جديد ودى يا اطفال كان فى زمن الجنرال ابودقن المطلوب للمحكمة الدولية القالت قتل الناس فى دارفور ومحاول يبيد الكــل كان ما لحقنا كان حايكون زى ما حصل فى جبال النوبة والانقسنا والكــان جنوب وغابت شمس السودان وشرقت فى الايام التانية خمسة بــــــــــــلاد راح الغرب تعرفوا وين الغر ب دى كان جمهورية دارفور الكبرى ودولة كردفان الحسى وبعدين راح الشرق تعرفوا وين الشرق دى كان دولــــــــة البجه الان .....................................................................! تعرفوا يااولادى السودان دى كان من اقدم دول العالم كانت فيهو حضارة عظيمة من كوش ومروى ونبته وعلوة اتعلم منا الناس كتير من الحاجات من سته الاف سنة وشوية حضارة ملوك النوبة وكوش فى الانجيـــــــــل مذكورة طبعا تعرفوا ما الانجيل وكان فيها ملوك عظام اشهر من فيهـــم بعانخى وتهراقا حكموا لمصر وسمعت بيهم كل الدنيا كانت ليهم هيبـــــة ومذكورين فى التاريخ بالعظمة وحاول دى الجنرال وجماعتوا يدرســـوا الطلبة تاريخ غير سيرة العظماء من كـــــــــــــــوش لعلــــــــــــــــــــوة وحاول يطمس معالم الناس وقال شلوخك هويتك دقنك حمايتك كان مـــا عندك ديل امشى جنوب او دارفور او للبجة فى الشرق او كردفـــــــــان وجنوبها ديك الدول النحنا عملنها للقال لا وللرطانة وللمسيح وللكفــــــار كفار قال هم عندهم القال ليهم لا كافر والضرب البندق كافر والقال انـــا مظلوم كافر والقال جعان كافر والعايز يغنى للحرية كافر والوقعــــــــــت الطرحة وانكشف راسها كافرة فاجرة تلموا عليها اجلدوها فى قلب الشارع كيف مايكون فى الراس فى المناطق الحساسة مايهم واضحك وخلى العالم يتفرج فى اليوتوب والفيس بوك والتلفزيونات ع العدل وتقويم الاخـــــلاق بالسوط وتصحيح القيم الما سمحة ...........................................! وهما العمل اهوال يشيب منها الراس طاهر معصوم والنهب المال العـــام طاهر معصوم مكافاة ترقية لمنصب اعلى عملوا قروش وكروش مــــــن عرق الناس التكدح ...........................................................! فىديك الايام قامت هبات فى بلد اسمه تونس وركب رئيسهم بساط الريح خروج من غير عودة للكرسى الهزاز وفى مصر القريبة قام الشعب وقال كفاية للمفسدين وفى داك الكان اسمه السودان قام شباب الجامعة وثــــــار وقال كفاية عايزين حرية الاسعار مولعة نار وما لقوا سند ضربوهـــــم ومات كم واحد والساسة الشاخت افكارم بيحاوروا فى الجنرال وجماعتوا قالوا ع الاجندة الوطنية والباين غير ذلك ممكن عشان يوسع ليهم شـــوية فى الكرسى الهزاز وباين بشروط الجنرال قال ليهم تقعدوا فى الكنب البرا وانا فى الهزاز وشكلهم راضين امكن متفاهمين ما مافى خلاف افكـــــــار الخلاف على الكرسى الهزاز والناس ما راضية والشباب بيغلى يفـــــــور وممكن يتجاوز ديل الساسة الشاخت افكارم واقفة فى محطة الخمسينــــات ويعمل ثورة تغير للواقع الشين والفهم السايد من ما فات الانقليز تغيــــــــر تهز عرش الطاغوت والمتفاهمين معاهو وينتج فكر جديد يستوعب كـــــل الناس ويرجع تانى السودان يتوحد احسن من ما كان بدل الكيمان الهشــــة ويبقى الكل سودانين سوا فى كل حاجة هويتم سودانية ما شلوخم هويتــــم سودانية تديهم الحق ما دقونم ويهتف فيهم كل واحد انا سودانى دنقــــلاوى جعلى شلكاوى نوباوى دنكاوى شايقى حمرى هدندوى قمزاوى شكـــــرى فوراوى حسانى رباطابى ميدوبى مسلاتى فلاتىزنداوى بقارى محســـــى عصارة موية النيل والطمى انا الابنوس المخلوط بالنخيل والدوم وبالتبلدى والدليب ان سودانى بصرخ لا للجهوية لا للعنصرية البغيضة وابواقهـــــا النشاز انا سودانى وسجل يا تاريخ انا سودانى متوتدة جذورى فى ارض جدى كوش ولد حام ولد نوح وجدنا كوش ولد حام ما ولد ســــــــــــــام ويااطفال بكره نكمل الحكاية وكلكم صلوا على النبى المختار وانشاء الله بكرة القاكم تامين ولامين وسالمين .
---------------------
* طرابلس / ليبيا
9/2/2011


تعليقات 0 | إهداء 0 | زيارات 615

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




عبدالرحمن غزالى
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة