المقالات
مكتبة كتاب المقالات والأعمدة
الفاتح يوسف جبرا
برااااهو كده ..اا
برااااهو كده ..اا
10-03-2011 01:23 PM

ساخر سبيل

برااااهو كده

الفاتح يوسف جبرا

كتب الأستاذ (الفاتح جبرا) قبل فترة موضوعا تساءل فيه عن (الخط بتاع هيثرو- الخرطوم) الاتسرق من ناس الخطوط الجوية السودانية وصار ملكا لإحدى الشركات البريطانية على خلفية (الهوجة) التي أقامها السيد وزير النقل والمواصلات وإثارته للموضوع في البرلمان السوداني مطالبا بمعاقبة من تسببوا في عملية البيع (دا طبعا ان تعرف عليهم)...
وكعادته في تناول الموضوع واقتراح الحلول أشار إلى السادة القائمين بالتحقيق في (الخط الاتسرق) أن يفتحوا بلاغا في (القسم الجنوبي البريطاني) ويختو (الخط معروضات)...
ما أجملها من حكاية وفعلا (شر البلية ما يضحك) هذا ان عرفت عزيزي القارئ أن هذا الخط اثير موضوعه قبل ثلاث سنوات عندما توقفت الخطوط السودانية من السفر الى (هيثرو) أو الى اي حتة مماثلة في أوروبا وذلك بعد ان أقعدتها الحالة المايلة التي لازمتها وعمليات البيع (الماشة ديك) ومحاولة انقاذ (الناقل الوطني) والخروج به إلى آفاق أرحب عبر بيع الخطوط الجوية ذاتا لشركة كويتية (بتراب القروش) كما تردد وبيع بيت السودان في لندن ومقر الخطوط في لندن والتنازل من حاجات كتيرة لصالح تلك الشركة والتي لم ندري الى الآن (لسواد عيون منو فيهم) تمت تلك الصفقة المشبوهة والتي يتردد الآن أن الحكومة (تعبانة جنس تعب) في محاولتها لارجاع الناقل الوطني الى حظيرة الوطن بعد (خراب سوبا) وبعد أن يدفعوا دم قلبهم (أقصد قلبنا) فهل تساءل أحدكم ولم كل هذا التعب....؟؟
أما الحكاية المحيرة أكثر فهو تكوين وزارة النقل للجنة تحقيق وتحري في الموضوع بتاع الخط مع انو الموضوع كما أشاروا في غاية البساطة في ظل (هو فى كم زول) فى السودان ممكن يبيعوا ليهم (خط طيران)؟ وكم زول ممكن يكون عندو أوراق ومستندات (تقنع المشترى) بإنو هو الشخص المخول ليهو (ببيع الخط)؟ كما تساءل (الأستاذ جبرا) وبعدين المشكلة وين؟ فالحكومة (إتنشلت) ووجدت الحاجة النشلوها منها (قاشر بيها زول تانى) ما خلاس فلتخاطب الزول التانى ده بصورة رسمية وقانونية وتطلب منو إنو يوريها (الخط المسروق) ده جابو ليهو ياتو حرامى...!!
قد تبدو المشكلة كبيرة ولكن حلها في غاية البساطة الذي سوف يفضي الى التعرف على الجناة وتقديمهم الى المحاكمة ولكن هيهات.... فلقد صرح السيد وزير النقل بأنه سوف يكلف متحريا (انجليزيا) عديل كدا للتحري في الموضوع وسيتكلف مهما تكلف لكشف ملابسات القضية من لجان وسفر ونثريات ....
فتخيلت الموضوع الشائك الذي سوف يدخل فيهو ذلك المسئول في ظل السلحفائية في الاجراءات وتعقيداتها.....
أولا حيمشي المسئول يفتح بلاغ وسيتعب تعبا شديدا الى أن يعرف (وين) يفتح البلاغ اذ أن من المعروف أن تفتح البلاغ في أقرب قسم لمحيط (السرقة)... وهنا المسروق (خط) سيضحك (الشاويش النبطشي) لأن الموضوع جديد عليه اذ أن الخط يبدأ من الخرطوم ويستمر الى هيثرو فكيف سيحدد (القسم المعني بالموضوع) وفرضنا أزعن وبدأ في تقييد اجراءات البلاغ فسيطلب (ورق فلسكاب) و(سيارة) لمعاينة الخط وهنا بيت القصيد...
بعد ذلك سيطلب أوراق المبايعة للتأكد من اسماء البائع والمشتري وختم المحامي الذي وثق المبايعة وكيف تم (قبض) المبلغ هل بشيك أم (كاش) ومن الذي قبض وهل استلم المشتري (الخط) بحالته الراهنة...؟
في هذا الأثناء سيقوم المسئول بتكوين لجنة وسيكون أحد أعضائها (بريطاني) كما أشار المسئول لكي يتابع الموضوع في لندن وفي الغالب سيكتب (اسم البريطاني) غلط في قرار تكوين اللجنة وحيتعب البريطاني (جنس تعب) مع سفارتنا في لندن عشان ياخد التأشيرة للسودان اذ أن عدم تطابق الدعوة مع الاسم في الباسبورت قد يدفع (البريطاني) الى الذهاب للجنة الشعبية بتاعتم في (مانشستر) ليؤكد بأن الاسمين المكتوب في الباسبورت وفي الدعوة هما اسمان لشخص واحد... ولمن يقربوا يدوهوا التأشيرة سيتفاجأ بأنه لازم يرجع للجنة الشعبية عشان يختم الخطاب.... وغيرها من التعقيدات التي سوف يجدها عندما يبحث عن البائع الذي قبض الثمن بتاع الخط والذي في الغالب سوف يكون (مجرد) اسم لا سند قانوني له وبالطبع لا يمكن تتبع القروش الإستلما ثمنا لهذا الخط لأنو بيكون قبضا (كاش)...
وحتوسع القضية وتتشعب وتأخذ من حر مال الشعب الغلبان الكثير وستكون هناك سفريات وبدل سفريات وأوامر قبض لأشخاص وهميين وجرجرة وحاجات زى دي لمن الخواجة (يآمن) ، كتلك الحكاية التى تروى عن شخص غير مسلم مر بموقف مشابه عندما قام أحدهم بجرجرته جرجرة شديدة قبض في نهايتها السراب في وجود مشاوير وتعب شديدين كان في آخرها أن الرجل عند مواجهته لأحد المواقف العصيبة أن صاح قائلاً : (أشهد أن لا الله الا الله) ....
وأرى ان ما تنبأ به (الأستاذ الفاتح جبرا) سوف يكون حقيقيا عندما يكتبوا في آخر التقرير....
الجاتك فى خطك سامحتك...!!
كسرة :
هذا المقال كتبه الأخ الدكتور عزت ميرغني طه .. تعقيبا على مقال نشر لنا قبل فترة بعنوان (الخط إتسرق يا رجالة) ننشره اليوم لأنو نتيجة لجان التحقيق فى الموضوع ده (طولت شوية وكده) ولم يتم التوصل للجاني الشئ الذى يؤكد بأن الخط ده (باع روحو) براااهو كده !! ..


تعليقات 9 | إهداء 0 | زيارات 6085

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#220446 [ابو سامي]
0.00/5 (0 صوت)

10-04-2011 04:34 PM
اتنين بتونسوا في بيع الحكومة للخطوط السودانية وبيع مشروع الجزيرة وبيع سودانلاين وبيع السكة حديد جنبهم حلفاوي شااااااااايب واحد قال للي التاني ما فضل شيء الحكومة تبيعه التاني قال ليه تبيع السودان زاتو بدا الغلاط في بيع السودان وحتى لو دايرين بيعوه مافي مشتري ..... الحلفاوي قاليهم ببيعوه وفي البشتري ؟؟؟؟؟ قالوا ليه من البشتري السودان دا؟؟؟ قال ليهم يشتريه رب العزة يصلحوه شوية يسويه جهنم


#220302 [saad]
0.00/5 (0 صوت)

10-04-2011 11:55 AM
يا جماعه الوضع أخطر من خطير ديل باعوا أي شي , لكن أنا عاوز ألفت انتباهكم لموضوع تاني , الحياة البريه , ديل فتحوا البلد للخلايجه دمروا الصيد دمار , صيد جائر , والسعوديين حايميين في البلد يقتلوا الصيد بالعشرات ويعرضوا هذه العمايل في اللنترنت عشان يستفزونا


#220200 [mokhtar]
0.00/5 (0 صوت)

10-04-2011 08:46 AM
شكرا الدكتور عزت ميرغني طه.......
بس أسال الأستاذ جبرا عن الشركات الرايحة؟
لكن ممكن تشوفو عوضية الوداعية يمكن تلاقيه ليكم!




#220093 [wedhamid]
0.00/5 (0 صوت)

10-03-2011 11:07 PM

يا جبره .........تحيه......عوضيه الوداعية و التى آامل ان يشملها التكوين الحكومى المرتقب كمستشاره للرئيس لشئون الرايحه كما إقترح أحد الاخوه ...عملت شنو ؟؟؟ و الله انا غايتو مؤمل عليها اكتر من لجان التحقيق بتاعتكم دى !!!!!


#220032 [طاهر زلنطحي]
0.00/5 (0 صوت)

10-03-2011 07:50 PM
حقيقة قصة الناقل الوطني دي بالذات تحير ؟؟؟؟ دولة بطول وعرض ما قادرة على انشاء خطوط طيران قوية ؟؟؟ أذن دعونا من اسطوانة ناقل وطني ويتم بيع المتبقى لآحدى شركات الطيران الكبرى أو تحويلها الى شركة مساهمة عامة وفكووونا من هذه الاسطوانة الفاسدة



#220023 [ ahmed]
0.00/5 (0 صوت)

10-03-2011 07:23 PM
يا sudani bedon hawia


لمن تلقى الهوية بتاعتك اسال عن خط هيثرو !!!!!!

wish you all the best


to find what ever is easier

0


#219959 [عبدالواحد00 ]
0.00/5 (0 صوت)

10-03-2011 04:31 PM
(حلوه00حلوه00عافاك الله من امراض الكلوه!!) ياجبرا0والله ياجبرا لو كنت مكان رئيس الجمهورية لاصبحت اغنى رئيس جمهورية فى العالم بإحدى الطريقتين !!الاولى إستخدام صلاحياتى كرئيس جمهورية واطلب ملف اى قضية فساد واعرض على الفاسد (إقتسام المسروق) يعنى (حقى حقك)!!الكلمة الشائعة فى الحريق00وهذا ليس أدبا جديدا سأرسيه فهو مستخدم بكثافة بين أعضاء المؤتمر الوطنى ولكل واحد منهم نصيب كما الورثة !! والطريقة الثانية سأفترض أن ضميرى صاحى وبموجبه قررت تفعيل شعيرة (الشفافية) 00فأنادى على الفاسد وأسلمه لزبانية الامن ليقوموا نحوه بالواجب كسبا للوقت حتى يعترف بكل صغيرة وكبيرة00وإسترداد المال المسروق كله ثم إلزم الدولة بتسليمى 10%من قيمة الاموال المنهوبة كحق قانونى وبهذه الطريقة الغير معقدة انال رضا المولى عز وجل ثم الشعب وكفى الله الحكومة شر المظاهرات 00والقيل والقال وأمشى وتعال يا عبد المتعال!!0


#219916 [ود البلد]
0.00/5 (0 صوت)

10-03-2011 03:40 PM
ياناس الخطوط كلها انسرقت خطوط الاتصالات والسكه حديد حدث ولاحرج مره موقف بصات وبعد شويه سوف تكون حمامات وزمان كان ليها شن ورنه واقتصادنا في السما والدولار يبحت جري ما كان قادر يلم فينا هسع الجنيه بقى ممرمط في الدرام وكلو الحاصل ده لسه مامعروف من منو زي ماقال واحد اخونا من الراعي والرعيه ياربي لسه ثابت في قولو


#219841 [sudani bedon hawia]
0.00/5 (0 صوت)

10-03-2011 02:23 PM
;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;(


waaaaaaaaaaaaaaaaaaaaaaaaaaaaaaay

dayreen khatna


الفاتح يوسف جبرا
الفاتح يوسف جبرا

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة