شداد وابو داؤود
07-29-2010 01:49 PM

بشفافية

شداد وابو داؤود

حيدر المكاشفي

نفسح المجال اليوم لمداخلة وهدية ترويحية. المداخلة وردتني من قطر ويخالفني صاحبها الدكتور هشام الرأي في ما كتبته هنا مناصرًا للبروف شداد. والهدية عدد من الطرف والملح الذكية المنسوبة للفنان اللماح الضخم معني ومبني عبد العزيز محمد داؤود الشهير بابي داؤود رحمه الله وهي من طرف صديق الحرف الباشمهندس أحمد عبد الحليم تخيرنا منها ثلاثة واسقطنا ثلاثة لأننا ملزمون فقط بنشر ما يمكن نشره وليس ما عداه على رأي الصحافي الكبير المهاجر والمثابر طلحة جبريل في مقال له بالغراء «الاحداث»...والى المداخلة والهدية....
الأخ الأستاذ حيدر المكاشفى
السلام عليكم ورحمة الله
فى البدء أود أن أسجل إعجابى بكتاباتكم والتي ظللت أتابعها بإستمرار على الشبكة العنكبوتية ونحن خارج الوطن نحلم سوياً بغدٍ أفضل
قرأت مقالكم المنشور يوم 62/7/0102م بعنوان ماذا لو ترأس شداد الإتحاد... بكل صراحة أجد نفسى متفق مع شخصكم فى كثير من النقاط حول فشل الكرة السودانية حتى من قبل شداد.. ولكنى يا أستاذى الكريم أجد نفسى مرغما على ألا أتفق معكم فيما يخص ترشيح د. شداد.. هو خبير كروى بإعتراف الجميع وكذلك مشهور بنزاهته وقوة شخصيته لكنه لم يقدم ما يشفع بقاءه فى المنصب.. نعم الكرة السودانية متخلفة حتى من قبله.. لكن أليس من حقنا أن نبحث عن غيره إذا هو فشل فى تطويرها.. ففى كل دول العالم وفى كل المناصب الإدارية و السياسية إذا لم تقدم وتطور من الأداء فالتغيير هو المطلوب...
د. كمال شداد إستلم الراية من الباشمهندس أبوحراز الذى فى عهده دعم الفيفا السودان ضمن مشروع الهدف وفى عهده دعم الأخوة السعوديين و تكفلوا ببناء المبنى الجديد للإتحاد وأكاديمية كرة القدم وكذلك تم تنفيذ الدورى الممتاز لأول مرة بصورته الحالية.. فماذا فعل شداد؟... هدم قطاع الناشئين ودمر سمعة المنتخب الوطنى بإستجلاب المدرب المغمور قسطنطين.. كان منصب رئيس الإتحاد فى عهده منصباً للأسفار والترحال والترشيحات للمناصب الدولية بالفيفا والكاف وإن كنا نحمد له وقوفه بصلابة ضد إستعلاء أندية القمة وتنفيذه للقانون بصرامة.. كان تصنيف السودان سنة 2003 رقم «103» وتصنيفه هذا العام رقم «121» فإن لم يطور فى المستوى فقد ساهم فى الهبوط النسبى
لننتظر ماذا سيفعل ويقدم الإتحاد الجديد ومن ثم نحكم عليه ولا نستبق الأحداث ونطلق الأحكام مسبقا وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ..
السودان كبلد على حافة الهاوية يحتاج للتغيير فى كل نواحى الحياة سياسياً، ثقافياً ورياضياً.. قال تعالى «إن الله لا يغير ما بقوم حتى يغيروا ما بأنفسهم»
ولكم أجزل الشكر
د. هشام المهدى
قطر
٭ كسرة مع أبو داؤود
أبو داؤد كان بغنى فى حفلة والصف الأول كان
كلو جكس حجم عائلي كل واحدة أسمن من التانية
وبعد الأغنية الأولى قام الجماعة كوركو ليهو
بالله يا أستاذ فريع البان... قام عاين ليهم وعاين
للصف الأول ...وقال ليهم فريع البان كيف مع
شجر التبلدى بتاعكم دة !
٭٭٭٭٭

أبو داؤود كان مسافر قطر - قابله واحد صاحبه في المطار- قال ليه والله صدفة عجيبة-كويس إنو لقيتك مسافر قطر كمان عشان تخلي بالك من الحاجة أصلو مسفرنها قطر عشان تولد بتها هناك ولامن تصل ما تفكها لحدي ما تسلمها أبو النسب حتلقاهو في الانتظار- طبعا أبو داؤود ما قصّرعتّل عفش الحاجة وكان تقيل جدًا لحدي ما هدّ حيلو وعمل ليهو قطايع وفي التفتيش طلع أغلب العفش عبارة عن حطب شي«شاف» وشي «كوليت» وشي ما «شاف» وطلح وصندل وهلمجرا حطب... طبعاً أبو داؤود كان زهجان من الحاجة وحطبها والعتالة وعلى التعترو لامن طلع من مطار الدوحة لم يجد أبو النسب القال عليهو صاحبو وإنما وجد أصحابو هو بفتشو عليهو وكان واقف مع الحاجة واحد من أصحابو جرّ نور طويل في الحاجة و قال ليهو: ده شنو يا أبو داؤود... رد عليه... دي.. دي... دي ما حمّالة الحطب !
٭٭٭٭٭
مرة أبو داؤد عامل حفلة في بيت عزابة في السعودية
وطبعاً المطوعين مانعين الحفلات والعزابة خايفين
ويكوركو لي بعض سكّرو الباب، سكّرو الشباك، قام
أبو داؤد قال ليهم كدي سكّرو الفنان في الأول.

الصحافة


تعليقات 6 | إهداء 1 | زيارات 1303

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#11346 [واحد]
0.00/5 (0 صوت)

07-30-2010 08:48 PM
الاستاذ حيدر المكاشفى لك العتبى حنى ترضى فقد جعلتنى العجله اعتقد أن صاحباك شخص واحد ولما كان المقال ممتعآ فقد عدت اليه = وهذا ثناء فما كل مايكتب يطيق القارئ تكراره == وادركت الخطأ وعلى كل هذا يثبت انك حريف


#11214 [واحد]
0.00/5 (0 صوت)

07-30-2010 10:25 AM
مع شداد مائه المائه ومع ابو داؤود مائه المائه وصاحبك حريف عارف رائه صفر وكثيرين حيشبو ليه فى حلقو فشتت الانتباه ب =ابو داؤود = يعنى صاحبك ده ينفع رأس حربه متسلل وما قبضو الحكم وبرضو القون باليد زى ماردونا وما شافو الحكم والله يعينك يا شداد =


#11182 [سودانى وبس]
0.00/5 (0 صوت)

07-30-2010 12:42 AM
البدوى المطشش


#11181 [ابو اســـــــــــــــــــــامة]
0.00/5 (0 صوت)

07-30-2010 12:38 AM
ياخى انت زول عسل عديل كده ياود المكاشفى . لينا زمن من الابتسامات والضحكات
والرحمة والمغفرة للفنان القامة ابوداؤد


#11091 [محمد موسى]
0.00/5 (0 صوت)

07-29-2010 06:04 PM
...ليس كل مايعرف يقال يااستاذ...فلابد من مراعاة حرمة الموتى .ومشاعر ذويهم ومايتصل بذلك من الذوق العام .. والامر النبوى فى ذلك واضح (( اذكروا محاسن موتاكم ))...والله من وراء القصد


#11084 [البدوى]
0.00/5 (0 صوت)

07-29-2010 05:41 PM
والله يا المكاشفى شداد الله يرحمو ويسكنة فسيح جناتة معى المشوكشين امين اطلبولو الرحمة الان يحاسب فى نفسو وجزاك الله خير على المقاطع الحلوة دى


حيدر المكاشفي
حيدر المكاشفي

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة