سرقة هبطرش
10-06-2011 09:23 AM


سرقة هبطرش

أسماء الجنيد
[email protected]


سلام يا اهلنا في كل بقاع الدنيا ,, حبابكم كلكم

خالي زول الله ساي راجل بسيط وحنين وعلى نياته خالص, مشى الحج يا حليلو ,الحج الجد جد مو كعبة بنو كوز دي
اها اول ما سافر مشى المدينة المنورة للزيارة, , وكانت يا دوب بدت الأفواج تصل المدينة , كلنا عارفنو ممكن جدا يروح في أقرب مكان ,,
الوصايا كترت عليهو , عشان يعمل حسابو , في النهاية قال اكتبوا لي العنوان الساكنين فيه كان رحت يوصلوني ليكم ,,
ود اخته اداهو ورقة كتب ليه العنوان وكل ارقام التلفونات
وقال لي لو رحت وما عرفت ترجع , اقرب زول ليك قول لي اضرب لي الرقم ده
, يوم اصر يمشي الحرم براه والبيت قريب جدا للحرم , بعد ده كلو يا حليلو راح
طوالي طلع ورقته واداها لي اقرب زول جمبو , طلع هندي , لكن فهمو داير شنو,,, ضرب ليه الرقم واداهو السماعة
اها لما في ود اخته قال لي خير يا خال ,هسه بجيك , وريني إنت وين وصف لي اي محل قريب ليك ولا أسال الجمبك ؟؟؟
قال لي والله انا في فجة فيها عربات هبطرش
قال لي يا خال البلد دي كلها عربات وناس هبطرش , وصف لي سمح ولا اديني زول جمبك,
والحمد لله اخيرا وصل بالسلامة ,,

نجي لي هبطرش حقت سرقتنا,, نحمد سيدنا السرقة عندنا هبطرش وين ما تقبل لفحي وهمبتة, كل انواع السرقة واساميها ,
شيء سوق مواسير وشيء مزارع وفنادق وشيء بيوت وشيء ما بتوصف زاتو, ده غير الوقع غي أيدي الصحافة وصورت مستنداته بالبينة الثابتة ,,
وكلوووو ملفوح من عرق الغلابة ورزق المطحونين الملقطنو من شحم اللحم وشوالات الفحم ورزق اليومية , والله غالب
المؤذي في الوجع ده كلو إنه الناس باقي عليهم ميتة وخراب ديار
لأنه رغم الفساد الطامح ومغرق الدنيا , وناس كرتي سافروا برا يصرخوا ويكوركوا , جضيض شديد...
لكن بعد ده كلو المطبلين الحوالين الجماعة ديل يغالطوك في عينك وشايفين وسامعين وعااااااااااارفين
وبرضوا يقولوا ليك لا.. لا.. ما في فساد ولا في خراب ولا في بشتنة حاصلة
ده كلو كوم ,و رجال الدين المعيننهم بي مواصفاتهم المرضية ليهم ولي مصالحهم كوم تاني,
علماء الزمن ده عندنا لا ما شين بالسنة ولا الشريعة ولا بخافوا كلام الله ,, يسنوا وينجروا حسب الطلب , وعينك يا مواطن ,
وما خفي اعظم , اللهم إلا من رحم ربي ,,,
الجماعة ديل كمان موضوعهم برااااااه
تكون قاعد في امانة الله والرسول تسمع داعية ولا إمام مسجد ولا رجل دين ’ يفتي ليك من اجل الناس السرقتهم هبطرش والمبشتنين البلد 22 خريف
يفتي بي اي طريقة ورغم انف اي زول تسمع ولوما اقتنعت تلحس كوعك
ادهشني هذا التصريح وفي بيت من بيوت الله , تصريح عن سبب الغلاء والبلاء في البلد وسبب التدهور الإقتصادي ,,
اقروا واتمحنوا ساااي عليكم الله ,,,,
م((إمام مسجد بامدرمان يقول : ندى القلعة وبعض الفنانات سبب ارتفاع الأسعار

فتح إمام مسجد الحارة (40) بأمبدة النار في كل الاتجاهات علي فنانات اليوم و بالأخص ندي القلعة التي أصبحت تغني الهابط الذي لا معني له إطلاقاً و

أضاف قائلاً بان من الأسباب الرئيسية التي أدت الي الغلاء في الأسعار هو ما تتغني به الفنانة ندي القلعة و عدد من الفنانات السودانيات و ذلك نسبة

للمظهر العام الذي أصبح من سلبيات الفنانات السودانيات و الذي قاد الي كل هذا الغلاء و العيش الضنك الذي يشهده الشعب السوداني اليوم كما أن هناك
عدداً من الفنانات أصبحن لا يراعين الذوق العام و يظهرن بشكل غير لائق و مناسب مع الفتاة السودانية التي يضرب بها المثل في العالم و انه يطالب

بان يتغير الحال عند الفنانات السودانيات من حيث المظهر العام و الشكل و تغيير لون البشرة مما قاد الي تقليد بعض الفتيات لهن و التشبه بهن بالإضافة

للغناء الهابط الذي يتغنين به مما أدي الي حالة الغلاء الفاحش ))

عليكم الله ده تقولوا فيهو شنو ,, بالغتي والله يا ندي القلعة وإتلومتي لوم الجبال والحجار ,
غناك فلس بينا وسقط حجر جنيهنا ودمر إقتصادنا , كملتي الهدوم الفي السوق وكملتي الدولارات الفي البنوك , وجهجهتي الغلابة والمساكين,
الكاش الفي البلد طفشتيهو وين ما معروف !! , من وين نجيب قروش رسوم للتلاميذ, غليتي اللحمة والطمام , جوعتي الشعب وكملتي العلاج الفي البلد
جوعتي الشعب يا بت الناس ,,,,!!!!! الناس الجيعانة ومرضانة دي كلها سببها إنتي ,, تطقمي في الدهب كملتيهو كلو في السوق وكملتي التياب
خليتي حكامنا ملطشة وسط البلدان , المرض الفي البلد سببو إنتي دي ,,
خطب الجوامع بقت بي إسمك, بختك اسهمك طارت السماء , شيء جوامع
وشيء مسارح ,, !!!!

نتوسل ليك نحن الشعب المغلوب على امره ,, ان تقعدي في بطن بيتك شوية وتخلي الحال ينعدل , لمي غناك عليك , عشان اولادنا تمشي المدارس واللحمة ترخص في السوق
بلاش تغني يا ندي علييييييييك الله ,, اقعديلك بس فد شهير
النشوف الحال المايل بنعدل ولا الناس تطير وتقع في البير !!!!!! ,,,


متاوقة

الحج في الساحة الخضراء , وخطبة إمام الجامع بي ندى القلعة

وغنانا الهابط سبب الجوع والمرض و الغلاء ..

إذا عرف السبب بطل العجب ,,, السبب ندى القلعة ,,,
لا حولة ولا قوة إلا بالله العلي العظيم ,,

شكيناكم على حيا دائم صاحي ما نائم يا الكيزان

كان كملتوا البدع والمحن , وإبليس زاتو طفشتوا زماااان من السودان

يمهل ولا يهمل

ودعتكم الله


تعليقات 7 | إهداء 2 | زيارات 2623

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#221718 [ود جادين]
0.00/5 (0 صوت)

10-07-2011 01:41 PM
ندى القلعة لو اكتفت بس بغناء السمحة أم ولدي بما تحمله من قيم ووصايا لفاقت هولاء المنافقين الذين اغراتهم السلطة بالمال والرواتب والمخصصات والشعب يعلم سبب نفاقهم.. احترموا أنفسكم وتنحوا أو اعملوا لوجه الله بدون قروش . نسأل الله أن يرينا يوماً في كل من أكل أموال الشعب بتزلفه للسلطة وبعد كد عامل فيها غمران وقائل الناس مافاهمين.. تف على سذاجتكم ياهولاء ..


#221657 [ود الشيخ]
0.00/5 (0 صوت)

10-06-2011 11:46 PM
الجميل في الأمر أن كثير من الكتاب وحتى في المظاهرات الحدثت أخيراً ، عاد الناس لإستخدام كلمة ( الكيزان ) ، وهذا شيء يطمن أن ذاكرة الشعب السوداني صاحية ، وإن شاء الله لن ينجو أحد من الحساب الذي أراه قريباً لكل من أذل الشعب السوداني وسفك دمائه وأهدر كرامته ونال من شرفه .


#221611 [بابكر وداللمين]
0.00/5 (0 صوت)

10-06-2011 08:31 PM
كروش شىوخ الكيزان هي سبب تدهور السودان واقتصاده وجوع البشر وهجرتهم


#221600 [بابكر وداللمين]
0.00/5 (0 صوت)

10-06-2011 08:07 PM
السبب شيوخ الكيزان وفسادهم ودجلهم


#221554 [gwarior]
0.00/5 (0 صوت)

10-06-2011 05:38 PM
الامام اختلطت عليهو الجضوم و الكضوم النديانة بتاعت الكيزان فحبة يوريكم بى طريقة فنية وكدة ماخاااااااااااااايف ..قال ندى قال بكرة تتطلع ليكم واحدة زى بتاعت الشريف اه تمشى ويييييييييييييييييييييييين يا ابو كرش يا امام الكدابين


#221454 [ahmed]
0.00/5 (0 صوت)

10-06-2011 12:53 PM
يا جماعة بعض ائمة المساجد لصلاة الجمعه غير مقبولين لأنهم منافقون يتوددون للسلطان حبا في الدنيا الفانية.
أتمنى منهم أن يعلموا أن حسابهم بعدين سيدخلهم النار مع المنافقين والمتملقين .
هذا الامام وزيادة عليه الحرامي الأكل سندس وهسع رقوه مدير وكمان عملوه مستشار .......ياناس خافوا الله .........بديت اصدق كلام ياسر عرمان عندماقال الحرامي في الانغاذ يدوه استراحة محارب وبعدها يعينوه في مكان آخر و بمزايا افضل من الاولى هل هذا ذكاء أم غباء ؟طبعا غباءمركب لهذه الشرزمة الخربة.


#221321 [احمد]
0.00/5 (0 صوت)

10-06-2011 10:20 AM
الشيخ الكذاب سبب الغلاء الساكت عن الحق شيطان اخرس الصحفي المطبل سبب الغلاء مسكينه ندي القلعة واخواتها جاءت عليها وحدها كثير سبب الغلاء .


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة