خروف بالتقسيط ..!ا
10-10-2011 12:42 PM

ساخر سبيل

خروف بالتقسيط !

الفاتح يوسف جبرا

ما أن تم إعلان جواز شراء خروف الأضحية (بالأقساط) حتى تكاثرت أعداد شركات بيع الخراف بالتقسيط للمواطنين ، إمتلأت الوسائط الإعلامية بإعلانات من شاكلة :
- يا عوض مالك زهجان وخاتى إيدينك فوق راسك تقول القيامة قامت؟
- الخروف يا محمود .. الخروف ... الولية اليوم كلو تنق تنق .. أجيب ليها خروف بي مليون وشوية من وين؟
- كان على كده يا عوض قضيتك محلولة بس تمشى طوااالى على شركة (خرفان بالتقسيط).
- شركة شنوووو؟
- شركة خرفاااان بالتقسيط .
- وديل ح يضحوا ليا؟
- أيوااا ح يضحو (بيك ) وكمان على تلاتة أقساط!!
- (صوت جهورى مع صوت خروف كخلفية) : مهما تكون فلسان وعدمان (خرفان بالتقسيط) ح تخليك تضحي إنتا كمان !

أما شركة (خروف ببلاش) فقد قامت بترويج إعلان من نوع آخر :
- الرسول يا نفيسة خروفكم المدوعل السمين ده إشتريتوهو بى كم ؟
- والله كان قلت ليكى يا سعاد ما بتصدقى ؟ ده مجانن !
- خروف قدر ده ومجانن ما بصدق !
- لا صدقى يا سعاد .. أصلو عصام أخوى إشترى ليهو خروفين وأدوهو التالت ده ساااكت !
صوت جهورى (غير داك) : إشترى خروفين بالأقساط وأحصل على الثالث مجانن من شركة (خروف ببلاش) .. مع شركة خروف ببلاش مش ح تسدد العليك !
عبدالعال مواطن (مطحون) فهو موظف بسيط لا يقوى مرتبه الضعيف على الإنفاق على إحتياجات أسرته (الضرورية) ناهيك عن خروف العيد (البقى بالشئ الفلاني) ، بعد ضغوط شديدة من الأولاد و(أم الأولاد) توجه لشركة (خرفان بالتقسيط) حيث وجد الشركة تزدحم بالمواطنين :
- (مواطن) : هسه الناس ديل ح يدونا الخروف ده بي سعر السوق !
- (آخر) : إنتا يا زول بتحلم؟ سوق شنو ؟ إنتا قايلهم شغالين القصة دى )هواية(؟ ما طبعاً عاوزين يكسبوا؟ ويطلعوا ليهم قرش قرشين !
- (المواطن) : لا حول ولا قوة إلا بالله .. بالله ده اسمو كلام كمان فيها زيادات؟
داخل فناء الشركة الذي يعج بالخراف والمواطنين قام (عبدالعال) بإختيار خروف (مدوعل) :
- أها ده بي كم ؟
- عاوزو نظام سنة يا حاج وللا سنتين ؟
- سنة بي كم ؟ وسنتين بي كم !؟
- لو عاوزو سنة يعنى إطناشر قسط ح يكون بي مليون وتمنمية .. ولو سنتين يعنى أربعة وعشرين قسط ح يكون بي إتنين مليون وأربعمية !!
بعد تفكير وموازنات قام عبدالعال بإختيار (إطناشر قسط) ثم قام بتوقيع (عقد شراء خروف بالأقساط) مرفقاً معه إطناشر (كمبيالة) شهرية بعد أن أبرز أوراقه الثبوتية من بطاقة شخصية وشهادة سكن وشهادة مرتب من المصلحة التى يعمل بها !
وهو يضع الخروف على الركشة طلب عبدالعال من السائق أن يمر به على (الزريبة) حيث قام بشراء كمية من (أبو سبعين) وكم ربطة (برسيم) ليعلف بهما الخروف مدة اليومين اللذين يفصلانه عن العيد ، ما أن توقف البوكس حاملاً الخروف أمام منزله حتى تجمع الصبية والأطفال وهم يتصايحون فرحين بينما تهلل وجه زوجته (نعيمة) وهى تفتح باب الشارع مستقبلة (الضيف) المنتظر.
فى صباح اليوم التالى إستيقظ عبدالعال على صياح (نعيمة) وهى (تلكز فيهو) :
- (صباح اليوم التالي) : عبد العال عبد العال قوم شوف خروفك ده .
-( منزعجا) : مالو يا نعيمة !؟
- مشيت أشوف مويتو لقيتو راااقد وقاطع الحركة !
هب عبد العال واقفا وأسرع نحو الخروف المستلقى دون حراك ، ما أن نظر إلى عينيه (الجاحظتين) حتى تأكد له بأن الخروف قد فارق الحياة !
تفاجأ العاملون فى شركة (خرفان بالتقسيط) بشخص يدخل إلى الإستقبال وهو يجر خلفه (خروف ميت) يضعه فى منتصف الصالة ويتجه نحوهم والشرر يتطاير من عينيه :
- تدونى خروف بالليل يموت ليا بالصباح ؟
- وما يموت كان مات دى مسئوليتنا نحنا؟
- (فى غضب) : كيفن يعنى ما مسئوليتكم إنتو؟
- إنتا يا حاج ما قريت الكلام التحت المكتوب في العقد الوقعتو لينا ده؟ أقرأ هنا .. أقرأ هنا .. مش مكتوب (الشركة غير مسئولة عن البضاعة بعد خروجها من المحل) !!
كسرة :
إذا قابلت شخصاً يعتلي أحد (الصواني) الرئيسية رافعاً يديه وهو يصيح بأعلى صوته في تشنج مخاطباً المارة :
- الشركة غير مسئولة عن شنووو؟
- (المارة) : البضااااعة !
- بعد خروجها من وين؟
- (المارة) : من المحل .
فأعلم أن البضاعة المشار إليها هى (خروف) وإنو الزول ده (عبدالعال) !


تعليقات 12 | إهداء 1 | زيارات 5633

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#223910 [ابو همام]
0.00/5 (0 صوت)

10-12-2011 11:14 AM
انحن نطلب من السيد وزير التجارة يجيب لينا خرفان صينية


#223682 [Dhal]
0.00/5 (0 صوت)

10-11-2011 09:16 PM
يا جبرة بس زولك نسي التامين للخروف إنشاءالله تامين إجباري كان بيلقي نص تعويض

كسرة
قول لناس خرفان بان انا عندي شركة لتامين الخرفان


#223657 [lolita]
0.00/5 (0 صوت)

10-11-2011 08:19 PM
احييييييييي ياجبرا اول مرة يغلبني اضحك علي مقالك ياجماعة اخرجو من قمحنا كما قال درويش حسبناالله ونعم الوكيل ولا اله الا الله.


#223192 [كرومة]
0.00/5 (0 صوت)

10-10-2011 10:12 PM
شركة (أبيض,أقرن ,أملح لتقسيط الأضاحي)... سارع بحجز نسختك من الأضحية , لدينا كل الطلبات خروف , نص خروف , ربع خروف ... أسعارنا لاتنافس وأقصادنا مريحة ... الكميات محدودة فلاتدع الفرصة تفوتك.

ياجبرا تلقى الجماعة حضروا شركاتهم ثم فصلوا الفتوى بالمقاس( ) ( ) ( ) :D :D :D


#223105 [سباعى]
0.00/5 (0 صوت)

10-10-2011 07:33 PM
هيئة علماء الافتاء هذه اصبحت بلا شغل ولا مشغلة. ولا احد منهم يحرك ساكنا ويتفرجون على الفساد الذى استشرى فى الارض فى زمن اصبح السفهاء هم الوجهاء. سبحان الله...


#223062 [mahmoudjadeed]
0.00/5 (0 صوت)

10-10-2011 06:15 PM
يا محمد ما تحكها ( ركشة ولاّ بوكس ) المهم المضمون . على فكرة أنت قارئ جيد جداً , صدقني أنا قريت الكلام ده وما فرزت الركشة من البوكس الا بعدما قريت تعليقك .


#223053 [Nagi]
0.00/5 (0 صوت)

10-10-2011 06:01 PM
والله يا محمد بتاع الركشه والبوكس

حقو يشغلوك فى الاستخبارات


#223016 [محمد]
0.00/5 (0 صوت)

10-10-2011 04:50 PM
ركز معانا يا (جبور) عبد العال دا رفع الخروف في ركشة وهناك فتحوا الباب لبوكس؟
إنت اظنك ركزت في خروفك (الشخسي) وانت بتكتب في العمود بتاك دا
يديك العافية


#222995 [Neema]
0.00/5 (0 صوت)

10-10-2011 04:08 PM
يا مهمد سالا انت اشتريت الهروف ولا لسة رد محمد صالح والله لسة انا ما بشتري الهروف الا قبل يوم من الايد
لكن يا مهمد الشيوه قالو افدل تربيه اندك في الزريبة محمد صالح مستغربا ليه سيدنا ابراهيم ما جابو ليه جاهز في اللهزة الاهير


#222969 [hhh]
0.00/5 (0 صوت)

10-10-2011 03:13 PM
الله يجازي محنك يا خروف جبرة أقصد فاروق جبرة هي لا لا فاتح جبرا..


#222903 [الزول الكان سمح]
0.00/5 (0 صوت)

10-10-2011 01:23 PM

يا جماعة أنا غلبنى المرة دى ألم ذاكرتى عشان أعلق على جبرا


#222888 [الرقيق]
0.00/5 (0 صوت)

10-10-2011 01:00 PM
والله الله يكون في العون علي المواطن الغلبان اصبح ضحية حتي للافتاء المضحك والمبكي في نفس الاوان الناس تفتي في تقليل المضار والافتاء عندنا يجري خلف راس المال وزيادة المضار والعناء بالافتاء الحصل سيدخل كل الغلابة السجون والسبب خروف العيد . ان فرضنا ان المواطن قد ضحي بالاضحية المباحة عبر الفتوي وتعسر في السداد ماذا سيكون حال المفتي امام رب العباد عند السؤال كيف (كيف اجزت لعبدي الشراء عبر شركات الاقساط هذه ) ....................
علي هيئة الافتاء ان تفتي لنا في حال الحكومة المقاطعة عالميا هل يصلح حكمها ام لا وهل يمكن للرئيس ان يخفي المجرمين المطلوبين في محاكم العالم ان يحكم ام لا علما ان هذا الاخفاء للمجرمين هو الذي دفع بالمقاطعة ان تكون ................... والله الواحد تتزاحم في حتي الكلمات فلا يمكنه التعبير الجيد عن الحاصل بصورة سليمة اذ تتداخل الكثير من الرؤا فعذرا السادة القراء ..............
ونسال الله ان ياتي بحال افضل من ما نحن عليه


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة