شفط رصيد
10-12-2011 12:15 PM

ساخر سبيل

شفط رصيد

الفاتح يوسف جبرا

كنت جالساً مساء يوم أمام جهاز الحاسوب أكتب مقالاً عندما إستدعاني إبنى ذو العشر سنوات قائلاً :
- تعال يا بابا شوف التاس دى كوووولها ما قادرة تجاوب على السؤال ده !
- سؤال شنو؟
- حيوان بيقول باع وبيضبحوهو فى عيد الضحية !
نظرت إلى شاشة التلفاز فوجدت حساء تتمايل (ليه ما تعرف) وهى تردد فى ذات السؤال بلهجة شامية غنجة بينما يظهر السؤال نفسه مكتوبا على شريط اسفل الشاشة يتبعه عدد من أرقام الهواتف للإتصال بالبرنامج (وكده) بينما هنالك ملصق خلف المذيعة الحسناء كتب بخط عريض يوضح قيمة الجائزة وهى خمسة دولار !
- آلو ناخد إتصال ..مين معانا - معاكى أبوعبدالله من السعودية - ويش الإجابة يا أبوعبدالله - البقرة .. البقرة طال عمرك !
- آلو كمان ناخد إتصال آخر- مين معانا بدو يشترك- معاك مصلح- من فين عم تتصل يا مصلح- من اليمن- طيب ويش الإجابة - التور .. التور!
وتمضى الإتصالات الخاطئة وفي كل مرة كان إبنى يلتفت ناحيتى ضاحكاً من سذاجة المتصلين الذين لم يستطيعوا على إجابة هذا السؤال (إن كان يصلح أن يسمى كذلك) !! وما عرف إبنى أن هذا البرنامج هو في واقع الأمر هدفه الأساس هو أكل أموال الناس بالباطل إذ ليس هنالك جائزة ولا يحزنون !
فالمشاهد عندما يرى سهولة السؤال وأن جميع المتصلين لم يستطيعوا الإجابه عليه ومن ثم الإستحواذ على مبلغ الخمسة آلاف دولار الذى يسيل له اللعاب سوف يقوم بالطبع بمحاولة الإتصال بأحد الأرقام الموجودة على الشاشة ليأتيه الرد (وهو فرحان لعدم إنشغال الخطوط) :
- قناة (أكسب واربح) ترحب بكم وتتمنى لكم حظاً سعيداً .. للتحدث باللغة العربية أضغط الرقم واحد وللتحدث باللغة الإنجليزية أضغط الرقم إثنين !
- (يضغط الرقم واحد) !
- (تااااني) قناة (أكسب واربح) ترحب بكم وتتمنى لكم حظاً سعيداً .. معذرة أمامك أربعة أشخاص بعدها سوف نقوم بإدخالك إلى الأستديو على الهواء مباشرة !
- موسيقي
- (بعد ثلاث دقائق ) .. عزيزى المتصل ..أمامك ثلاثة أشخاص فقط !
- الموسيقى مرة أخرى
- (بعد دقيقتين) .. المتصل ..أمامك شخصين فقط !
وأنت تتابع البرنامج :
- آلو مين معانا - معاك عويس من مصر - أيه الإجابة يا عويس - الجاموسة .. الجاموسة- شكراً يا عويس
تعود للتركيز في محادثتك :
- (بعد خمس دقائق ) .. عزيزى المتصل ..أمامك شخص واحد فقط !
هنا تقوم بمتابعة البرنامج متمنياً ألا يقوم هذا الشخص بالإجابة الصحيحة .. وبالفعل تكون إجابته خاطئة (السمكة) .. تنتظر أن يقوم أصحاب القناة بتحويلك إلى الأستديو لكنك تستمع إلى تلك النغمة التى تعرفها جيداً والتى تستمع لها دائماً عند إنقطاع المحادثة (تيت تيت تيت)!!
كل القصة .. مذيعة جميلة .. جائزة دولارية يسيل لها اللعاب .. سؤال ساااهل .. متصلين (كمبارس) مهمتهم الإجابة الخطأ .. تأجير خط إتصالات ... ومتصل غبى (تفوت عليهو الحاجات دى كوولها) تخصم من رصيده 15 دقيقة دولية هى قيمة المكالمة!
ما جعل (العبد لله) يتذكر ما تقوم به هذه القناة من إحتيال على المشاهدين هو ما تقوم به (الشركة القومية للكهرباء لدينا) من (شئ شابه) فقبل يومين (قطعت الكهرباء) بالحى الذى أسكنه .. إرتديت ملابسى للذهاب إلى مكتب البلاغات كالعادة لتبليغهم بذلك إلا أن زوجتى وهى تعطينى (هاتفها) أخبرتنى بأن (المسألة) بقت (ساااهلة) وما عليا إلا الإتصال بالرقم 4848لأقوم بإخبارهم بمسألة الإنقطاع ، قمت بالإتصال ليأتينى صوت أنثوى (مسجل) :
- السلام عليكم .. الشركة السودانية لتوزيع الكهرباء المحدودة ترحب بكم في مركز خدمات الزبائن الموحد وتسعد بخدمتكم .. (تتبعها الترجمة الإنجليزية .. مش ممكن المتصل القطعت ليهو الكهرباء ده يكون خواجة وما استحمل الحر والسخانة؟)
- للتحدث باللغة العربية أضغط واحد .. للتحدث باللغة الإنجليزية أضغط إتنين (تتبعها الترجمة الإنجليزية .. مش ممكن المتصل القطعت ليهو الكهرباء ده يكون خواجة وما إستحمل الضلمة؟)
- (ضغطنا واحد) !
- (الصوت الأنثوى) : نرجو أن نلفت إنتباهكم أن هذه المكالمة مسجلة لأغراض الجودة !
- الموظفون مشغولون الآن الرجاء الإنتظار.
- (موسيقى)
- الموظفون مشغولون الآن الرجاء الإنتظار.
- (موسيقي)
- الموظفون مشغولون الآن الرجاء الإنتظار.
- (موسيقى)
- الموظفون مشغولون الآن الرجاء الإنتظار.
- (موسيقى)
(فجأتن) إنقطعت (الموسيقى) أعلاه قبل أن أستطيع التحدث مع (أحد الموظفين) .. إلتفت إلى زوجتى وانا أمد لها هاتفها باحثاً عن هاتفى قائلاً :
- موبايلك ده قلنا ليكى تعبان غيريهو ... أهو هسه قطع قبال ما نتكلم مع الناس ديل .
- (بعد أن إستعلمت عن رصيدها) : ووووب عليا سجمى .. الناس ديل شفطوا رصيدي كووووولو.
بالفعل القصة إتضح إنها (شفط رصيد) وليس خللاً فى جهاز (المدام) كما تخيلت ! بالله (جهة واااحدة) تحن على أفراد الشعب السوداني الفضل ده مافي ؟ أى زول عاوز (يشفط)؟ هو فضلت فيها حاجة تتشفط ما خلاس بقينا على الحديدة و(الضحية بقت بالأقساط) .. فى أى مكان في العالم خدمات الشركات دى بتكون (مجانن) وبيقولوا ليك (إتصل على الرقم المجانى الكذا) الشفط ده لزومو شنو؟
وكت الكلام جاب الكلام عاوزين إفتاء من (هيئة علماء السودان) فى قصة العداد القاعدين نشتريهوا بقروشنا وبيقوموا يأجروهوا لينا (هو ذاااتو ده) ومش لزمن محدد ..سنة .. سنتين .. تلاتة .. لا .. إيجار مدى الحياة .. ما مشروعية هذا الأمر ؟ هل يعد أكلا لأموال الناس بالباطل أم هو حلال بلال أيها العلماء الأجلاء دام فضلكم !
كسرة :
تقطعوا في الكهرباء على كيفكم وقروشنا (مقدما عندكم) ما قلنا حاجة .. أها لمن يحصل عطب وعاوزين نوريكم ليهو بدل ما تشكرونا ... كمان جابت ليها (شفط رصيد) !!


الراي العام


تعليقات 17 | إهداء 1 | زيارات 5859

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#224947 [الاقرع النزهى]
0.00/5 (0 صوت)

10-14-2011 02:35 PM
الاستاذ جبرا :....لك التحية .....هناك شفط رصيد فى فى خدمات الرسائل التى يكون الواحد دخل فيها بى هبالته ويجو كل يوم يرسلوا له 15 رسالة نصية.........كلها كلام خارم ....بارم لايسمن ولا يغنى من جوع ......تجى تكوس التحلك منها ماتلقاها !!!!............برضو فى العيادت الخاصة ...يحولونك لعدد كبير من الفحيصين لاجراء فحوصات كثيرة و مختلفة....انت لا تحتاج لمعظمها........المسالة مسالة عصابات منسقة مع بعضها....!!!!


#224866 [sudani]
0.00/5 (0 صوت)

10-14-2011 09:29 AM
ناس الكهرباء ديل ما بخافو الله.تشترى محول بقروشك ويكتبوك انو تابع ليهم.تشترى منهم عداد بقروشك ويكتبوك انو حقهم وتدفع ليهم ايجار.ده حكم القوى على الضعيف وممكن تجد ليها الف تحريم.استغلال.اكل اموال الناس بالباطل.


#224668 [رشيديه]
0.00/5 (0 صوت)

10-13-2011 06:42 PM
امال لو شفت مصيبتى انا مع الكهربا و عصابتا تقول شنو.؟ انا اشتريت العمود كاش وطبعاالعداد ووحياتك ما رضوا يركبوه الا بعد دفع الاتاوات. يعنى حتى بفلوسك الانت اساسا قاطعا من قوت اولادك وما فى فايده . الله يجازيهم .و حسبنا الله ونعم الوكيل.


#224604 [kamal]
0.00/5 (0 صوت)

10-13-2011 04:13 PM
الاستاذ/الفاتح جبرة
الموضوع في غاية الموضوعية \"شفط الرصيد\"
،لكن انا الحارقني التحصيل بدون أرنيك 15 البتحصل داخل مؤسسات الدولة والله المستعان .
;( ;( ;(


#224594 [ابوالسيد]
0.00/5 (0 صوت)

10-13-2011 04:01 PM
يا جبره أنا مشيت بي كرعي لي ناس الكهرباء قلت ليهم الحقونا الكهرباء مقطوعة قالوا لي اضرب تلفون .. قلت ليهم تلفون ليه يا جماعة ما أنا تراني جيت . قالوا : لا مفيش فائدة لازم تلفون .. عملت شمطة قالوا لي خلاص بطل غلبة دخلناك في الكمبيوتر يالله امشي انتظرم في بيتك ... يومين مفيش حد جاء .. قلت نجرب التلفون .. مرة يكون أمامي ثلاثة اشخاص وفجاتن عشرة وتاني تلاتة لحد ما رد علي ود الحلال .... لكن ما شاءالله ناس الكهرباء شغالين لحد الساعة ثلاثة صباحا.. جوني زاروني وشائلين أزهار ... وانا ما قائل حلوين ذي ديل بزوروني .. دقيقتين بس الكهرباء جات ( صلاة النبي) اتاري الحكاية فيها شفط؟ سبحان الله!!!!!!!


#224486 [wedhamid]
0.00/5 (0 صوت)

10-13-2011 12:31 PM

الاخ الفاضل جبره ......تحية ......كل كلامك جميل و حاصل..... مع انو بزيد الغم و الهم !!!!

يا أ اخى الله يستر عليك إنت ما سمعت فى الاخبار بانو علماء الطب فى امريكا قالو لما يتقدم السن عند البعض بتظهر عليهم ما يشبه أخرام فى الذاكرة ( جراء حدوث قدود فى المخ) ودى بتظهر بتساقط الكلمات و تبدلها و انا شايف مبادئ الظاهره دى بقت تبين عندك !!!! أول أمس قلت انو عبد العال رفع خروف القسط على الركشه و لما وصل البيت نزلو من البوكسى و الليله بتقول على الشاشه ظهرت قيمة الجائزه خمسه دولارات و بعدين بتقول المتسابقين غلبهم الإستحواذ على مبلغ الخمسة آلاف دولار الذى يسيل له اللعاب !!!!!! انا شايف احسن تحصل نفسك وتقابل ليك دكتور و اللا اقول ليك ........ خلى التمباك يزيدو ليك عطرون تقيل و مص قرض قديم لانو يحتوى على فيتامينات تساعد على ترميم خلايا المخ الشايخ و الله أعلم !!!!!!


#224384 [بابكر وداللمين]
0.00/5 (0 صوت)

10-13-2011 09:46 AM
يا زول كده القال ليك في شيطان في السودان منو ا؟ الشيطان زمان هرب من الجماعة ديل من تاريح 30 يوليو 1930 ... واحد سارح بيفكر قالوا ليه سارح بغنم ابليس؟ قال ليهم غنم ابليس وين ؟ ما ماسكنهن ناس القطعان ....هههههههههههههههههههههههههههههههههههههههها :D :D :D :D :D :D :D :D


ردود على بابكر وداللمين
China [neeno] 10-13-2011 01:46 PM
شفططططططططططططططططططططططططططططططططططط
ولسسسسسسسسسسسسسسسسسسسسسسسسسسسسسسسة القصة طويلة


#224349 [ابو محمد _ ابو ظبى]
0.00/5 (0 صوت)

10-13-2011 07:54 AM
ههههههههه والله يا استاز جبرة عندك حكايات مضحكة بشدة حتى أن جل احاديثى مع الشباب فى القهوة عن كتاباتك الشيقة والحقائق المحزنة حتى صاروا يحبونك مثلى فلك التحية.


#224254 [ABDALLA]
0.00/5 (0 صوت)

10-12-2011 10:35 PM
الحمد لله كلمتنا يا استاذ الفاتح

حقت الكهرباء دي ما بقع فيها

لكن حقت الجوائز دي والله طبقوا فيني جنس نظريه

عليك امان الله شافطين مني خمسين جنيه كنت مرسلها لي امي حق التذكره عشان جايه

الخرطوم .اها شفت ليك المسابقه يا زول قلت خلاص العشرين الف دولار ديل بشتري لي عربيه

عدييييييييييييييل وامشي اجيب امي

بي عربيتي


#224179 [زول كدة]
0.00/5 (0 صوت)

10-12-2011 07:15 PM
قصة الأستاذ الفاتح جبرة دي حصلت لي بالكربون أول أمبارح ،، بس الفرق الوحيد أنني لم أفكر أساسا في الإبلاغ عن إنقطاع التيار فهذا شئ بديهي ،، ولكن أخبرتني زوجتي أن جارتها أخبرتها عن رقم الكهرباء الجديد للشكاوي ،، و أيضا لم يتغير رأيي فأنا لا أثق في هذه الحكومة ولا مؤسساتها بل و أعتبرها مثل (المسيح الدجال) إذا أرتك الجنة فإنما هي النار و إن هددتك بالنار فهي في الحقيقة الجنة ///// عموما مددت موبايلي لزوجتي و قلت لها : هاك أضربي ليهم إنتي (عشان أريح أضاني من نقة النسوان ;) ) و حدث فعلا ما قاله الأستاذ جبرة من نهب للرصيد و لحس للمال ( شئ مرحبا بكم و شئ موظف يقول ليك ورينا رقم العداد تقول حيجيبوا الكهرباء دي بخشم الباب ... قرف يقرفكم)

و الله يا الكيزان إبليس ذاته أعتقد إنو أرحم منكم ... كفاية إنه في جهنم كما روي رسول الله صلي الله عليه و سلم حيكون في الدرك الخامس من النار يعني في ناس في الدركين السادس و السابع أسفل من إبليس ،،،، ما شايفين يا كيزان إنكم حتكونوا منهم ؟؟؟؟

ربنا يقلعكم و يقسيها عليكم محل ما تقبلوا دنيا و آخرة زي ما قسيتوها علي السودانيين


#224137 [وحيد]
0.00/5 (0 صوت)

10-12-2011 05:39 PM
سعادة \" مولانا\" رئيس برلمان \" نوام\" الشعب الخالد و المخلد في رئاسة برلمان انتخابات الخج تحدث عن \" بني قريظة\" ... بالله عليكم من هم بنو قريظة السودان الذين نعرفهم و تعرفونهم بسلوكهم و افعالهم و اكلهم اموال الناس و كذبهم و تدليسهم .... كم \"شيلوك\" يقطع من لحم الشعب كل يوم كيلوهات من العافية يوجد في التنظيم \" الرسالي\" الحاكم في دولة المشروع الحضاري؟


#224122 [المريخابى السعيد]
0.00/5 (0 صوت)

10-12-2011 05:13 PM
غايتو ضحكتنى وانا فلسان
الله يخليك لينا يا مسلينا


#224087 [ود البلد]
0.00/5 (0 صوت)

10-12-2011 03:49 PM
يا الاستاذ الفاضل الفاتح يا اريت لو كانت علي الرصيد البطن ما فيها مغصه وكانت سوف تكون حمى خفيفه لكن والله العظيم ديل شفطونا نحن ذاتنا ومصوا دمنا وهسع نفتش في باقي الرصيد لو في امكانيه نسير لقدام طبعا يا اخونا الفاتح نحن هسع متحركيين بالمصافي (باقي الفلاتر)


#224076 [ودالجزيره]
0.00/5 (0 صوت)

10-12-2011 03:19 PM
يااستاذ جبره شفط الرصيد الانت بتتكلم عنه ده فى الموبايل ؟
مارايك فى شفط الرصيد الذى ابتدعته ادارة المياه بولاية الجزيره .حيث تم دمج فاتورتى الكهرباء والمياه معا .بحيث انك اذا قمت بتوريد اى مبلغ لشراء كهرباء سيتم شفط 14 جنيه بالكمال والتمام لصالح ادارة المياه من المبلغ الذى وردته .
ولقد علمت بان من اعطى هذه الفكره لادارة المياه بولاية الجزيره هو صحفى من ولاية الجزيره ايضا .فبدلا من سيتخدم قلمه ضد من دمرو مشروع الجزيره وهو يعرفهم بالاسم نجده يدلهم على الطريقه التى يتحصلو بها على الرسوم من اهله ناس الجزيره الكادحين القابضين على الجمر.
وعلى فكره يااستاذ جبره الفكرة دى لو نجحت فى الجزيره ونحن اصلنا بقينا حقل تجارب .انتو ياناس الخرطوم بلو راسكم وخاصة المناطق الطرفيه .وشكرا


#224022 [احمد القهران]
0.00/5 (0 صوت)

10-12-2011 01:43 PM
نحن اصلا يا أستاذ اتعودنا على الحاجات ده كل شى دخلوا حرام خاصة الوزارات والمؤسسات الحكومية عشان كده الله سبحانة وتعالى ما مبارك لينا فيهو

اللهم انصر المظلوم على الظالم


#224006 [الزول الكان سمح]
0.00/5 (0 صوت)

10-12-2011 01:07 PM

يا أستاذ جبرا...بتنكت فى جنس مصايب..

ومن ضمن الشفط ..يكون عندك رصيد ب 3 أو 4 ريالات ( وده عندنا هنا ) تجى تعمل مكالمة يديك رسالة صوتية ( رصيدك الحالى لايسمح بإجراء المكالمة ..نرجو إعادة الشحن ).....تخيل..


#223976 [وجعه]
0.00/5 (0 صوت)

10-12-2011 12:38 PM
ده كلوووووووووووووو ساهل ياجبرا...الخوف من عفوا لقد نفذ عمركم مع الكيزان...تييييت تيييت تيييت ...


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة