شالوها ناس عارف؟
11-13-2015 04:33 PM


سعادة السيد وزير العدل مولانا الدكتور عوض النور، بمناسبة فتحك لعدد من الملفات (المركونة) من أجل تحقيق العدل ومحاسبة الفاسدين نرجو من سيادتكم إحالة هذا الملف للتحقيق ومن ثم تنوير (الشعب الفضل) عن ملابساته حتى يرى العدالة بعينيه
السيد الوزير :

قبل حوالي (24 سنة) تقريباً وبتاريخ 4 يناير 1991 صدر قرار السيد رئيس الجمهورية رقم 45 بتخصيص مساحة مليون و488 ألف و144 متراً مربعاً لتشييد ما يعرف بالمدينة الرياضة وبعد أعوام قلائل من هذا التخصيص إكتشفت وزارة الشباب والرياضة وجود مبان لا تمت لخارطة المدينة الرياضية التى لا زالت تحت التشييد بصلة .. (شئ منظمات خيرية ، وشئ شركات خاصة، وشئ عمارات وشئ فلل) وعندما تم حصر هذه المساحات التى تم بيعها (تغولاً) وجدوا أنها تبلغ نحو (مليون) متر مربع وتحديداً (941.415) متر مربع (يعنى باعوا تلتين المدينة وخلو تلت) !
السيد الوزير :
طبعا القصة دى ما ممكن تحصل فى أى (حتة في الدنيا) .. رئيس جمهورية يصدر قراراً بإنشاء مدينة رياضيه .. ويقوم المهندسون والمساحون يمشوا يمسحوا (الحتة) ويحددوا الأبعاد (بتاعتا) ويحددوا (المساحة بتاعتا) ويعملوا ليها (كروكى) يوضح جيران المدينة بالجهات الأربعة .. ويسجلوها فى (سجل الأراضى) والمعماريين يقعدوا يعملوا ليها (خريطة) .. الملاعب بي جاى .. والمسابح بى هنا .. والمتفرجين بي هناك والمضمار بي جاي .. والشنو ما بعرف بي هنا .. ويتعاقدوا مع شركة ويدوها الخريطه للتنفيذ والشركة تبدأ الشغل … وبعدين وزارة الشباب والرياضة التى يتبع لها هذا المشروع تفاجأ بأن (تلتين المدينة) إتباع !!
هذا ما حدث – سعادة الوزير – ولقد تساءل الكثيرون (مستغرشين) … (البيع ده حصل كيف) ؟ مصلحة الأراضى دى بتبيع وبتسجل ساااكت؟ .. لكن العبد لله لم يندهش ولم يستغرب .. شنو يعنى لمن (المسئولين) يبيعوا (واطات مدينة رياضية) ؟ دى حاجة صعبه ؟ الواحد يمشى الأراضى ويقول ليهم أنا عاوز ليا قطعه فى (المدينة الرياضية) يقوم المهندس المسئول يطلع الخريطه بتاعت المدينة ويسألو :
– أها القطعه دى عاوزا فى ياتو موقع ؟
– فى الإستاد بتاع الكورة طبعن !
– وهو ينظر إلي الخريطة) : أها نديك ليها فى (دائرة السنتر) وللا في خط (طمنتاشر)؟
– والله ياخى لو لقيت ليا واحده في (خط سته) يكون كويس
– القطع بتاعت (خط سته) دى كووولها إتباعت عشان الناس كووولها عاوزه تكون قريبه من القون !
– وبعدين؟
– ما مشكلة ممكن نشوف ليك واحده (ناصية) فى خط التماس (مواصلاً) إنتا القطعه دى عاوزا سكنية وللا إستثمارية؟
– عاوزا إستثمارية !
– وعاوز تعمل فيها مشروع شنو؟
– والله عاوز أعمل فيها مطعم سياحى
– طيب (خط التماس) ده ح يكون كويس معاك ؟ أى لاعب الكورة تطلع من خصمو (رمية تماس) يخش (المحل) يضرب ليهو (بيرقر) وكباية عصير ويطلع يرميها يوصلا القون التاني !
تساءلنا وقتها وبراءة الأطقال في أعيننا أين وزارة التخطيط العمراني الولائية من هذه (الخرمجة) وما هو دورها فى إيقاف هذا العبث؟ لكن المفاجأة كانت أن وزارة التخطيط العمراني الولائية (ذات نفسها) قد شاركت فى هذه (الخرمجة) وذلك عن طريق الاستيلاء على 999 قطعة بمساحة تقدر بحوالى 513 ألف متر مربع بثلاث مواقع مختلفة من المدينة الرياضية … (شفتا يا سعادتك الكلام ده كيف؟)
سعادة الوزير :
لعله من المضحك (المبكى) أن يصرح بعض المسئولين المتورطين فى هذا العبث بأن (البيع) قد تم بموافقة جهات حكومية (لم تتم تسميتها) وأن الجهات التى أشترت لديها شهادات بحث صحيحة ، كيف يا سعادة الوزير توافق هذه الجهات الحكومية على بيع جزء من أرض مسجلة فى سجلات الأراضى (بقرار رئاسى) بإسم (المدينة الرياضية) إن لم يكن هذا هو العبث ذات نفسو ؟
سعادة الوزير :
لقد فات علينا في مؤتمركم الصحفي الأخير أن ننبهكم إلى هذا الملف (العجيب) الذي (غتس) ولم نعد نسمع عنه شيئاً ولكن العبدلله بصفته مواطن وعندو نصيب و(جعل) في أموال بيت المسلمين (الهامله دى) شأنه شأن بقية مواطني الشعب الفضل يطالب بالتحقيق فى هذا العبث ومحاكمة ومحاسبة كل من تورط وشارك فى هذه (الخرمجة المقصودة) وهذا الفساد (الغريب) الذي تسببت فى إهدار مليارات الجنيهات التى تم صرفها على هذه المدينه (حتى اللحظة) والذي تسبب فى تعطيل (إن لم يكن إلغاء) قيام هذا الصرح الذى إنتظره الرياضيون طويلاً لا سيما أن هذه الخرمجة قد طالت قراراً رئاسيا واجب التنفيذ .

كسرة :
لقد نما إلى علمنا سعادة الوزير أن كل هذه المساحات التي تم بيعها لم يورد من عائداتها (ولا مليم أحمر) لخزينة الدولة (أها دي كمان شالوها ناس عارف)؟
سرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)


تعليقات 9 | إهداء 0 | زيارات 6702

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1369697 [عوض الحسن]
0.00/5 (0 صوت)

11-14-2015 07:06 PM
يا فاتح جبرا .. خلي روحك رياضية ياأخي.. ما دا التمكين والذي يعني في اللغة التمكين من كل ما هب ودب.. وبعد شوية حتسمع بان الجامع الناصية في الحي الفلاني قد تم تسجيله لاحد اللعيبة الكبار بدعوي ان الحي به جامعين ..وفي ذلك تفرقة للمسلمين.. وعاشت وحدة الاسلاميين.. والي المزيد من التمكين..إلي أن يتمكن الموت من المتمكنين.

[عوض الحسن]

#1369625 [awadalkareem ahmed]
0.00/5 (0 صوت)

11-14-2015 02:51 PM
يالفاتح اخوى كان الوزير الجديد يعمل حاجه فى الموضوع ده ولا غيره ده دقنى اظعطو مش احلقه - الوزير القبلو دوسه لم فارق الوزاره داس ليه على حاجه من المال الراح اوانطه - الوزير الحالى والقادم والبعد القادم مايعملوا حاجه ، ياخوى شوف كيس حبوبك وينوما تحلم

[awadalkareem ahmed]

#1369532 [المغربي]
0.00/5 (0 صوت)

11-14-2015 12:02 PM
اللهم كل من ظلم انسان السودان اجعله يشتهي الموت ولايجده

[المغربي]

#1369528 [زول 200%]
0.00/5 (0 صوت)

11-14-2015 11:53 AM
لا حول ولاقوة الا بالله يا خي الريس امكن ما سمع بالقصة دي ولو كان سمع ما كان بقول العارف انه في فساد يجيب مستنداتو وانت عارف وانا عارف وعارف بتاع خط هيثرو عارف لكن الريس ما عارف

[زول 200%]

#1369341 [الجقود ود بري]
0.00/5 (0 صوت)

11-13-2015 11:21 PM
دي ما محن دي حكم جمع حكمه والله وحكاية! !!!!

[الجقود ود بري]

#1369304 [كاســترو عـبدالحـمـيـد]
0.00/5 (0 صوت)

11-13-2015 08:32 PM
المصيبة والفاجعة والكارثة والشنو ما عارف انه رئيس الجمهورية الدلاهة دا وابو ريالة تصب وبعين قوية وصوت يلعلع وبكل بجاحة واستفزاز والشنو ما عارف يصرح ويقول وكمان معاها رقصة : انه ما فى فساد فى البلد والعندو دليل يقدموا وانا شوفوا بعمل فيه شنو . بالله الواحد يعمل شنو ؟ ؟ يبكى ؟ ماكفاية . يضحك ؟ ما كفاية . يكفر بالله ؟ ما كفاية . يقطع هدوموه ويمشى عريان فى الشارع ؟ ما كفاية . طيب يعمل شنـــــــو ؟

[كاســترو عـبدالحـمـيـد]

#1369301 [عبدالواحد المستغرب اشد الإستغراب!!]
5.00/5 (1 صوت)

11-13-2015 08:13 PM
(لم يتم تسميتها...لم يتم تسميتها...لم يتم تسميتها؟!! ياربى انا سمعتها وين وين وين ياعبدالواحد؟!! ايوااااا سمعتها في نشرة الاخبار لما رئيس وزراء بريطانيا قال الطياره الروسيه إسقطت في سينا بقنبله زرعتها داعش في احشاء الطائره ولما زرزروهو نسب الخبر لجهات لم يسميها وفى الآخر الجهة التي لم تسمى طلع الكيان الصهيونى!! ومناسبة الكلام الخارج عن الصياغ ده فيما يبدو لكم إذا فكرتوا فيه شويه حتصلوا الى حقيقه أن النظام في السودان سبق الجميع في تتويه وتغبيش ودغمسة اى قضيه بحيث تعجز عن معرقة الذنب من الرآس وأقول ليك من هسى إعتبر الموضوع إنتهى بنهاية آخر سطر في مقالتك الحائره،،ولا وزير العدل حيقرى كلامك ولا شركائك في بيت المال في ايديهم يعملو حاجه!! والله زى ما بقوليك وعلى رآى اخونا الهدندوى(النظام خط هيثرو ما يشوف) جاى يشوف ليك قطع اراضى شبعت بيع وزمانها إتنقلت من يد ليد وانا كان داير نصيحتى اعمل زينا كده وكأنك ما شايف !!لان القاعد تعمل فيهو ده جنون رسمي وشعبى والنظام زاتو على ما أظن بل إعتقد جازما موافقنى في الرآى ده!! والظاهر كون البشير تعرض في يوم من الأيام ووجه بالشروع في التحقيق في قضية خط هيثرو اداك حبة عشم فأنت (واهم واهم ياولدى) شوف عينى ليهو وهو يغمز لوزير العدل في الوقت داك وقال ليهو سماع اضانى ( خليك منو جبرا ده (ده واحد ....مجنون!!) خليهو يهضرب ساكت !!.

[عبدالواحد المستغرب اشد الإستغراب!!]

#1369292 [A. Rahman]
0.00/5 (0 صوت)

11-13-2015 07:21 PM
حتى انت يا شيخ الفاتح صدقت انه في وزير عدل جابته حكومة الحرامية ديل عشان يضع الأمور في نصابها؟

[A. Rahman]

#1369272 [Khalid Abdalla Ragab]
0.00/5 (0 صوت)

11-13-2015 05:58 PM
Ustaz Jabra Salam
The story actually started before yours along time ago. Two agriculturalists of my friends Osman Ahmed Husein and ElFatih Omran, bought two fedans from the real first owner. They didn't do anything on it. First it became a junk yard for trucks and some mechanics started to make their Garages to fix cars on that land. One day they suggested for me to make a big nursery investment together. I agreed but before we started any thing Rambo who had been the Wali of Khartoum put his hands on that area for this International Stadium and he compensated my friends by giving them two small areas to build their houses. He even visited Turkey for the preparation of that International Sport Center. He collected more than 35 million US$ for Ads in the stadium. Every thing changed later. Some officials started to build their Villas and the rest of your story.

[Khalid Abdalla Ragab]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة