لبيك يا الزول كان سمح
10-13-2011 02:22 PM

لبيك يا الزول كان سمح

شريفة شرف الدين
[email protected]

لا أملك إلا أن أزجي تقديرا خالصا لمجموعة من قراء الراكوبة أصبحوا أركانها و لا يقلون بشيئ عن الكتاب الراتبين .. يأسرونك بأفكارهم و تحليلاتهم و منطقهم السليم .. بل أصبحت لهم القدرة على تصنيف و تقييم الكتاب لونياتهم .. توجهاتهم .. إنتماءتهم و قدرتهم على الكتابة .. و للحقيقة فقد أفدت من تلك التعليقات بشكل كبير و أقبل عليها بحرص شديد بغض النظر عن رأي وجهة مرسلها و لكنها تبقى عندي تلك التعليقات نقدا يرقى بنا و بكم إلى مستوى يشرفنا جميعا.

أرجو أن يسامحني معلقو الراكوبة أن أفرد الزول الكان سمح هذه المرة و قطعا إن توقيعا بهكذا اسم لم يأتي صدفة و إعتباطا فهو- زول - استفراد كامل بسودانيته القحة و يبدو أن العقدين الماضيين عملا كممحاة لسماحته التي جعلها ماضيا و لكنا نبشره بأنا نراه سمحا و سيبقى سمحا فثمة رعود تبشر بسيل هادر تغسل ما علق بنا من شوائب شوهت صورتنا و آخرها عار الشحدة الجماعية التي استنفر لها المؤتمر الوطنى كوادره على أعلى مستوياتهم يتسولون الناس .. أدرك أخي الزول الكان سمح و الذين معك مرارة هذا التسول لكم و الخليجيون يرمقونكم بعيون لا تحتمل.

استغاث الزول الكان سمح بمجموعة من كتاب الراكوبة للكتابة عن قضايا المغتربين و أكبرت فيه هذا الجانب لأنه طرح الأنانية جانبا و لم يركز على قضيته خاصة بل كان همه هما وطنيا خالصا لبني جلدته.

تكاد تكون مشكلات المغتربين موسمية تظهر على السطح مع كل عطلة دراسية و تتلخص في السفر و متعلقاته و تعليم أبناء المغتربين و معاناة الكثير منهم مع نظام الكفيل و الجفوة بينهم و بين السفارة إلا عندما يتعلق الأمر بتحصيل رسوم و لكن أيما كتابة تقتضي إلماما بأبعاد القضية المطروحة و تقف جغرافية المكان حائلا دون أن نسبر غور تلك الأبعاد و أعدك بنشر ما ترسله و أعتقد أن لك القدرة و ما عليك إلا أن تتناول نماذجا واقعية لشرائح متنوعة و أنواع معانتهم لأنك ستكون خير شاهد تشهد من أهلك المغتربين.

أعرف أن بعض السفارات تولي رعاياها إهتماما كبيرا حتى على المستوى الفردي و لكن يبدو أن هذه الرعاية مغيبة عن الرعايا السودانيين. و حدثني ممن إلتقيت بهم أنه تم تسيس و تتبيع قيادات الجاليات السودانية بمدن الخليج لتكون ذراعا أخطبوطية تاسعة للمؤتمر الوطني و بذلك أصبحوا الصوت الذي يسمع بينما الأصوات الحقيقية مخنوقة لا تصل صرخاتها لأحد.


تعليقات 15 | إهداء 0 | زيارات 1983

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#225088 [Emesary]
0.00/5 (0 صوت)

10-15-2011 01:36 AM
اصيلة والله يا حفيدة الميرم تاجة - امراة ولا كل الرجال - اشجع واشرف قلم صحفي واشمخها يا فخرنا يا فخرنا ياااااافخرنا .


ردود على Emesary
Saudi Arabia [شريفة شرف الدين] 10-15-2011 04:56 AM
بل أنت فخري و تاجي و جناحي بك أحلق


#225043 [عثمان شبونة]
0.00/5 (0 صوت)

10-14-2011 09:50 PM
لولا (عوج الوقت) الزول الكان سمح يستاهل (تكريم).. وهو ما زال مصراً على (كان) فليتها لم تكن، لأنه زول سمح (الآن) وسيظل بدون إضافة فعل الماضي... الود لك وللشريفة وللجميع.


ردود على عثمان شبونة
Saudi Arabia [ شريفة شرف الدين] 10-15-2011 05:01 AM
أخي شبونة سيبقى سمحا كل الوقت بإذن الله و لك ذات الود و الشكر


#224984 [موجوع شديد]
0.00/5 (0 صوت)

10-14-2011 04:52 PM
الزول الكان سمح بالنسبة لموضوع العربات دا انا واحد من الناس في عام 2005 دخلت بسيارة افراج مؤقت وعندما قاربت مدة الاجازة علي الانتهاء ذهبت للجمارك حتي اقوم بتخليص السيارة لكن تفاءجت بان سعر الجمارك مرتفع جدا المهم انتهت المدة وقامت الجمارك بمصادرة العربة وحضرت مرة اخري للسعودية وسيارتي قد صودرت ولم اقل شيء المهم العام الماضي ذهبت بسيارة اخري وايضا افراج مؤقت وحجزو مني السيارة بدعوي ان لي سيارة اخري لم اسدد جماركها مع العلم انهم صادروها فكيف اسدد جمارك سيارة هي عندهم وحتي انهم باعوها ولم تزل في الحاسب باسمي!!!! في النهاية دخلو لي بي حمد ومرقو بي خوجلي ومسكو السيارة التانية وللان الموضوع معلق ماعارف كيف اقنعهم بانهم صادرو السيارة وهم ن انتفع بها يعني تبيعو السيارة وتبلعو قروشا في كروشكم واجي انا تاني ادفع ليها جمارك ومشكلتي الوحيدة اني ورق السيارة الاولي ضايع مني لكن مفروض اي حاجة عندهم تكون مسجلة.
غايتو شكيتكم شكية لا تتعطل لا تتبطل اكلتو قروشنا واكلتو لحمنا الله لا كسبكم


#224959 [hammam]
0.00/5 (0 صوت)

10-14-2011 03:07 PM
أحتي شريفة كنت كأسمك اليوم تكتبين لتوحدي الصفوف. أحببت هذا المقال وكم أحببت هذا الثوب الذي تردينه وأنت تكتبين هذا المقال وأسألك بالله ألأ تخلعيه قبل أن نخلع هذا النظام.
أخوتي الكتاب و القراء أرجوا أن ندرك أن الوطن يئن من الجراحات القبلية و يكفي ما فعلته الأنقاذ من فتن. دعوها فإنها منتنه.حينئذ كلناسنكون ذاك الزول السمح.
مقال رائع ......... مبروووك


ردود على hammam
Saudi Arabia [شريفة شرف الدين] 10-15-2011 04:54 AM
أخي همام

لن تدرك مدى سعادتي لسعادتك و لنكن جميعا كصفة اسمك .. كثيري الهمة يدفعنا

هدف واحد .. صدقت و برغم التباس الرؤية أحيانا ستظلون بصري و أنتم رداء لي و

ليست مقالاتي و ثانية لك الود و دعونا لا نعطي الإنقاذ فرصة الفرح بشقاقنا


#224899 [الزول الكان سمح]
0.00/5 (0 صوت)

10-14-2011 11:31 AM

أستاذة شريفة

أرفق تعليق على تصريحات وزير مالية الإنقاذ وأيضاً يتعلق بوضع المغتربين

واشار محمود من خلال مداخلته أمام البرلمان أمس إلى مدرسة في دول عربية بها ثلاثة طلاب سودانيين فقط، وقال: إن السودان يوفر المدرسة ويصرف راتباً قدره 7 الاف دولار لكل معلم فيها مما يؤثر على المالية،

أقول له: أسأل سفارتكم فى السعودية وقنصليتكم فى جدة..عن معاناة أبناءنا نحن الذين نساهم بأكثر من 3 مليارات من الولارات سنوياً والبهدلة التى نواجهها وأبناؤنا فى سبيل تعليمهم فى( مدارس فى الهواء)

وتابع وبالرغم من أنها أوقفنا استيراد العربات المستعملة دخلت 300 عربة لدبلوماسيين عائدين من الخارج

(طبعن) والنون دى على طريقة أتساذناجبرا فى تنوين الألف...

العبد لله أرفق مقالاً لمصلحة الجمارك بخصوص موضوع دخول السيارات المستعملة للمغتربين..فى بعض مقالات كتاب المقالات فى هذه الصحيفة..وتبنته الصحفية الشجاعة الجسورة الإنسانة الشريفة شريفة

نحنا ندفع دماء قلوبنا..من مساهمات وجبايات وتحويلات ورسوم دراسة أولادنا فى المدارس والجامعات ..ويجوا الدبلوماسيين والمتنفذين ياخدوا كل المميزات..ولا عزاء لنا.

يا وزير السجم والرماد..ما ينشر بموقع الراكوبة يوضح الإنعكاسات الحقيقية لساسة وزارتكم المتردية منذ أن تم تمكينكم فى هذه المؤسسة المالية لأسباب جهوية وليست لكفاءتكم بشغل هكذا منصب..لأنه لايعتمد على شهادة جامعية فقط ولا وساطة وإنما يحتاج إلى مهار وعقلية تخطط وتفكر وتقرر..يا ( طرورة )





#224868 [الاقرع النزهىع]
0.00/5 (0 صوت)

10-14-2011 09:38 AM
عزيزتنا شريفة.......صاحبة الكتابات الرائعة....................ونحن نحتفل معك على شرف السودانى الاصيل الزول الكان سمح.............نتمنى ان نحتفل قبل نهاية اكتووووووووووووووووووووووووووووبر العظيم بزوال هذا النظام البغيض والاحتفال بتغيير اسم الزول الكان سمح الى {الزول السمح الفات الكبار و القدرو}.....ودمتى


ردود على الاقرع النزهىع
Saudi Arabia [شريفة شرف الدين] 10-14-2011 01:55 PM
بورك فيك أخي الأقرع .. نتمنى معال من قلبنا و ليس هناك مستحيل


#224865 [موجوع شديد]
0.00/5 (0 صوت)

10-14-2011 09:24 AM
لك التحية ايتها العظيمة بت شرف الدين والله نكاءتي جرح اليم المغتربين والله بقو ملطشة وخاصة في المملكة السعودية والسفارة عبارة عن نقطة جباية زي النقاط الفي كل مكان في السودان في ناس اوضاعا صعبة جدا يعني واحد يكون ماشغال ومتبهدل وعينو طالعة يمشي ليهم والله يتبهدل زيادة وياما اسر هنا بنات واطفال لا عارفين يسافرو ولا عارفين يقعدو وصراحة يااخت شريفة الاشياء دي ولدت ظواهر ماكريمة وحاجات مابتشبهنا غايتو حسبنا الله ونعم الوكيل .

تخريمة
غايتو ناس المؤتمر اللا وطني ديل ماعارفم يوم القيامة حايشيلو شنو ويخلو شنو ياربي حايعتلو الاراضي المنهوبة في ظهورم ولا العربات البقعلوها من اصحابا ولا حقوق اليتاما والمساكين الله يخارجنا منكم.


ردود على موجوع شديد
Saudi Arabia [شريفة شرف الدين] 10-14-2011 02:00 PM
أزال الله وجعك و جعله عافية .. أعدك أن أكتب مقالا عن المغتربين فور أن أجمع بعض المعلومات


#224806 [قرفان خالص]
0.00/5 (0 صوت)

10-14-2011 01:27 AM

لك كامل الود والاحترام اختنا شريفة الشريفة ..

فنحن في الراكوبة جمعنا هم الوطن المحموم وسهرنا جميعنا لرعايته وسنظل على العهد الا

ان يشفى تماما ويبلغ العافية بعد ذهاب غيبوبته قريبا باذن الله واحد احد .

ولك تقديري وتقدير كل معلقي الراكوبة ما دام هنالك من يسمع لصوتنا ويستجيب لمطالبنا ..

لك التحية دون

أخخخخخخخخخخخخخ


ردود على قرفان خالص
Saudi Arabia [شريفة شرف الدين] 10-14-2011 06:41 AM
عندي إحساس بأنك تستحق عمادة المعلقين و وددت لو أنك تجمع تعليقاتك مع كل

مقال فحرام أن تذهب هدرا .. كأنا و قد انزاح الكابوس .. نجلس تحت راكوبتنا .. نقلب

تلك التعليقات

أبدل الله أخاتك و قرفك إلى فرح دائم و ما ذلك على الله بعزيز .. قريبا أخي بل قريبا

جدا سننشد للحرية


#224789 [مامون]
0.00/5 (0 صوت)

10-14-2011 12:24 AM
أقرأ لك
ووالله للزول الكان سمح تعليقاته
وهو كما قلت من اجمل التعليقات التي تكتب تكون كتاباته هو وهي تعالج الجروح
شكر لك وانت تكتبين عن اوجاعنا والمنا من الخبث الوطني
ود الجزيره


ردود على مامون
Saudi Arabia [شريفة شرف الدين] 10-14-2011 06:49 AM
رد الله غربتك أخي مأمون و الجزيرة خضراء كما خلقها ربها .. تعطي قطنا .. قمحا و

سنابل


#224777 [الجـعـلى البـعدى يـومـو خنـق]
0.00/5 (0 صوت)

10-13-2011 11:51 PM





* تــعـظيم ســـــلام لهرم الراكوبا ( الزول السمح) ... ألفات الكبار والقدرو ...
* تــعـظيم ســـــلام للأخت (شريفه) بت (شرف) (ألدين) ..
* تــعـظيم ســـــلام للساده رواد وزوار الراكوبا الحبيبه .. فرداً فرداً ..
* تــعـظيم ســـــلام للساده المغتربين والمهاجرين والمتغربين والمهجرين ...

* (ومَشَيْنَاهَا خُطَىً كُتِبَتْ عَلَيْنَا ... وَمَنْ كُتِبَتْ عَلَيْهِ خُطَىً مَشَاهَا)

كانت لنا أيام ( أغتراب) ذات شجون فيها شؤون . فالمغترب السودانى .( ينوء) بحمل ثقيل على مقياس ريختر .. أدركنا مشكلات الاغتراب وتحديات العودة”.. تناولنافى حواراتنا العديد من القضايا وعلى رأسها هموم ومشاكل المغتربين وإفرازات الغربة وتحديات العودة والسياسات المخطط لها ...

كانت مناقشات جادة ..ناقشنا همومنا وتشاركنا فى (الرؤى) حتى نخرج من عمق البحار
صار الإغتراب أشبه بحلقـــــة دائرية يتجول فيها الشخص دون الإلمام بنهايتها ..

كان محور النقاش عن هجرة السودانيين للخارج عموماً أسبابها ودواعيها وبداياتها وآثارها على أطفالنا وثقافتنا السودانية ..طباعهم وطباعنا .. تقاليدهم وميراثنا .. تربية ألعيال ( والعيال كبرت) وتاثيراتها الاخري ايجابا وسلبا ...


وفى الختــــــــــام نقول كما قال الشاعر الهمام ...

يا غربة .. يا غشاشة .. يا بكاية .. يا مستهبله

تغرينا بى درهم قروش وراه قنطار بهدلا

جيناك سنة ..

أو قول سنين بنكملا..

نبنى البيوت فى العاصمة وبى كوم أثاث بنجملا..

وكرولا حاره نرسله أصلو التنقل مشكله..

ونكمل الدين بى مهل والسمحة جاهزة نحصلا ..

غير القروش اللى للأهل عبر الشهور حا نرسلا..

والباقى يدخل فى البنوك ونشوف دباره نشغلا..

ناس فكرت تجنى العلم تبدأ الدراسة تواصلا..

أحلام كتيره وشيقه وآمال كبيرة نأملا..

لكن حساباتنا الغلط فى كل عام بنرحلا

مرت سنين من العمر بنعزها وبنفضله

والحسبة وصلت طاشرات يمكن نعيش وندبلا

وتعال نحاسبك يا وهم من غير رقم أو أمثله

كان للقروش نجرى ونحوش لكن تقول بنشاكلا

ما راضية تقعد فى الجيوب وتقول حرامى بينشلا

لكن بترقد فى الضهور بديون تقيله متلتلا

ممحوقة ما بتقضى الغرض وأقل حاجة تكملا

كملانه سفرة وحق وزن ومجاملات مستفحله

ضرائب أبعاج المشى وإلزامى حمدي نحولا

وأحلامنا صبحت زى سراب نمشى ونجرى ما نحصلا

يا ريت يكون هم القروش يا غربة فيك هو المعضله

لكن تعال شوف الهموم الما إفتكرنا نقابلا

ذلة ومهانة واحتقار خلو النفوس متململة

سجنا كبير فيهو (الكفيل) سجان قيوده مكبلا

أشغالو شاقة ومؤلمه ودايما تكون مستعجلا

ما عاد يكفيها النهار تحتاج ليالي مليله

أمراض كتيره بدت معاك عايزه الفحوص مستعجله

ناس الضغط والسكرى ومرض القلب مع الكلى

ومصران وقرحة وإكتئاب ونفوسنا ما متحمله

وبنينا فيك كيمان لحم تحت الهدوم متندله

وأكيد يكون أكل المعلب والمجمد عاملا

عدم الرياضة والكونديشن لابد يكون ليهم صــــــلا

وكمان تعال لمعادلة ما قدرنا أصلا نعدلا

سجن العيال جوه الشقق وفراق الأهل والعائله

جيب العيال بى جيبنا مال وجيوبنا غيرو مميله

وصغارنا صبحت بالزهج متوحشة ومتجفله

لا قادرة تلعب فى خلا ولا ضل شديره يضللا

لا قادرة تدرس بى نفس من الدروس المترهله

تلقى الولد غالبو الكلام والبت كبيرة مريله

كل الضغوط سوا ما قدرنا حتى نقـللا

فى كل طرف تلقى القرف تلقى الخيوط مداخله

يا غربة أديناك كتير أدينا خاطرك يسهلا

خلينا نرجع بالفضل نلحق حياتنا نعدلا

آمالنا فيك بدرى إتنست إلاّ الرجول متوحله

وبقينا زى أهل القبور لا البره عارف يدخلا

لا الجوه يرجع لى ورا يحكى الحقيقة يوصلا

لكن خلاص هان الخلاص عندك نزل مهما علا

وإن شاء الله نحيا نودعك وتكونى ذكرى نغازلا

يا غربة .. يا بكاية .. يا غشاشة .. يا مستهبله

مـــــــــع وافــــــــر الاعتذار للجميع ان كانت فيها شطحات وتجاوزات للمقامات الطيبات وللعائلات المحترمات .. فاليسامحنى الجميع فرغم مغادرتى (الاغتراب) فها نحن نعيش اغتراب الداخل يعنى (غربه فى غربه فى غرفه) من الرياض للدندر عجبى. منها وأليها


ولحديث الغربه بقيه ... ان كان فى العمر بقيه ....


الجـعـلى البـعدى يـومـو خنـق ...


من مدينة الـدنـدر الطـيب أهـلـها ... والـراقِ جــداً زولا .....









ردود على الجـعـلى البـعدى يـومـو خنـق
Saudi Arabia [شريفة شرف الدين] 10-14-2011 07:02 AM
تستحق بمعيار اليوم أن تكون معلقة لأنها ما تركت شيئا إلا و أحصته

مثل هذه الكتابات أخي الجعلي تغسل أوجاعنا و تعمل عمل الترمومتر لقياس حرارة

معاناتكم التي هي معاناتنا جميعا .. كنت أتصور إنقلابا في الأدوار .. أهل الخليج

مغتربون في السودان بما لديه من مقومات طبيعية من ماء و تربة و بهائم و بدلا من

البهدلة التي رسمتها قصيدتك تكون أنت سيد الموقف لا تنفك تنشر القيم السودانية

الأصيلة لضيوف السودان و ليس عند الله باب موصد طالما أن النوايا حسنة تدفعها ارادات

لا تفتر

Saudi Arabia [شريفة شرف الدين] 10-14-2011 06:35 AM
أرجو ألا تفتر همتك أخي الجعلي في العمل الدؤوب على السعي في راحة إخوتك

المغتربين و يقيني أن من وضع هدفا له فهو بإذن الله بالغه طالما هناك إرادة تحركه

و لكنا نخشى ما نخشى من إرادات كسيحة أو عرجاء

واصل الخنق و أرجو أن يكون المخنوق هذا الكيان الذي جرنا كثيرا إلى الوراء


#224698 [ابو النصر]
0.00/5 (0 صوت)

10-13-2011 08:34 PM
لك التحية والتقدير شريفة


ردود على ابو النصر
Saudi Arabia [شريفة] 10-13-2011 10:52 PM
أشكرك أخي


#224689 [د. ام العيال]
0.00/5 (0 صوت)

10-13-2011 08:08 PM
الاستاذة الكريمة شريفة شرف الدين السلام عليكم ورحمة الله انني من القراء المتابعين للراكوبة ودائما اختم بها يومي الصعب ولقد فرحت بك ايما فرح اولا لانني احب الكتابة النسائية لانني اعتقد انها تصلني بسهولة وبدون تعقيد كما انها مباشرة وواضحة ، كما انني بي ميل للاسماء ومعانيها وجرسها ووقعها في النفس وقدا اعجبني اسمك \" شريفة شرف الدين\" - يا للروعة ، فهو اسم جميل وقوي وسوداني اصيل ويمكنني ان اتخيل كيف تبدو امراة من السودان وهي بهذا الاسم الذي يحمل كل هذا الزخم والالق !
اعرج الان الى القاريء \"الزول الكان سمح \" الذي يلفت نظري باسمه ودائما ما احس بالحزن يعتصر قلبي وصدقيني كنت اتمنى ان اقول له نفس ما قلتي له انه لا زال سمحا لا ن السماحة في القلب والوجدان والروح والمشاعر والاحساس وهذه لايطالها طائل وحقيقة ان الاوضاع من حولنا من سياسية واقتصادية وانفصالية كلها تفتقر الى السماحة الا انه لم يتغير فليهنأ بالا وليته يغير لنا اسمه الى \"الزول السمح\"
ولكما مني استاذة شريفة والاستاذ الزول الكان سمح اجمل التحايا


ردود على د. ام العيال
Saudi Arabia [freedom free] 10-14-2011 10:52 AM
الأخت شريفة الغربة نار وللعقول الكبيرة ودار وتشويه عيال وليست كما يعتقدون جمع مال ولكن ما العمل هي الخيار وفي نهاية المطاف هي سؤ المآل
تخيلي خسران وخسران البلد لعقول وسواعد8 مليون والبلد في أمس الحاجة لهذه العقول التي بنت حضارات الغير وفي نهاية الأمر لا حد يحس بهم والسودان الخاسر الخسران المبين

Saudi Arabia [شريفة شرف الدين] 10-13-2011 10:44 PM
لك التجلة يا دكتورة و رد الله غربتك في سودان غير مشوه و طاهر ممن دنسه


#224670 [الزول الكان سمح]
0.00/5 (0 صوت)

10-13-2011 07:03 PM

و الزول كان قصد يقصد شريف وعفيف

يفــزعو بى حفاوة ويعزو زي الضيـف

كان ما شريفة وطاهر وبكرى وود الريف*

راكوبتنا مابتلفالا صيف ولا بزورها خريف

لك الشكر يا أشرف الكتاب ..وسلم يراعك....وأعتذر عن عدم ذكر كتاب الراكوبة جميعاً لعدم ذكرهم فى إرتجالى تلك الأبيات.

*ود الريف..أقصد به أستاذنا أحمد المصطفى


ردود على الزول الكان سمح
Saudi Arabia [شريفة شرف الدين] 10-13-2011 10:54 PM
اشكرك و شعرك برضو سمح


#224651 [Adams]
0.00/5 (0 صوت)

10-13-2011 06:07 PM
\"وحدثني ممن إلتقيت بهم أنه تم تسيس و تتبيع قيادات الجاليات السودانية بمدن الخليج لتكون ذراعا أخطبوطية تاسعة للمؤتمر الوطني و بذلك أصبحوا الصوت الذي يسمع بينما الأصوات الحقيقية مخنوقة لا تصل صرخاتها لأحد.\"

1- دا كلام تقريباً صحيح 100% بالرغم من ذلك فسينكرون كما عودونا ولكنها حقيقة نغيشها نحن في المملكة مثالاً.

2- التعبير بهذه ال\\ريقة \"قطعا إن توقيعا بهكذا اسم لم يأتي صدفة و إعتباطا\" غير صحيح ومؤذي للكثيرين أنا منهم والأصح أن نكتب (توقيع باسم كهذا). والحقيقة لا أود أن أخوض في الأمر وأنا أعرف جيداً أن التعبير دخيل على اللغة العربية ولا يشبهها - وهو ترجمة ركيكة غير منضبطة - لجزئية من اللغة العربية أدخلتها الصحافة كما ظلت تفعل من فترة ليست بالقصيرة اسهاماً في تحقير اللغة العربية بدون وعي.

ولك التحية أخيتي على المقالات الجيدة والمهمة التي ظللتي تكتبينها فأنا متابع جيد لها وللكثير الذي يكتب في الراكوبة على كافة المستويات.






ردود على Adams
Saudi Arabia [شريفة شرف الدين] 10-13-2011 10:47 PM
أشكرك للتصحيح و لك بعد الله الشكر في تبصيرنا


#224595 [اسمر]
0.00/5 (0 صوت)

10-13-2011 04:04 PM
ياشريفة لست انانيا ولاكن نحن لابواكي علينا كشعب سوداني قيم في الدولة العبرية منذ عشرات السنين. لاكن سنظل حافظين لجزور التواصل لمقالاتك الممتعة عبر الراكوبة والمواقع الاسفيرية الاخري .ودمتي.


ردود على اسمر
Saudi Arabia [شريفة شرف الدين] 10-13-2011 10:51 PM
حفظك الله حيث أنت و كأني اراك و إخوة لك تقاسون مرارات و لكن سلوانا أنكم رجال

و جمال شيل و الله يصلح الحال و تعود عشان تلقى زغرودتي راجياك


شريفة شرف الدين
شريفة شرف الدين

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة