عرس صناعي
11-11-2015 03:30 PM


كثر الإحتيال في الآونة الأخيرة وتنوعت أساليبه ولعل ضيق المعايش له القسط الوافر في ذلك ، كنا جماعة نحكي لبعضنا البعض آخر ما توصلت إليه عقليات الإحتيال من إبتكارات غير ان صديقنا (خالد) قال لنا إنتو شفتو إحتيال خلوني أحكي ليكم الإحتيال العلى أصولو .. قال (خالد) بينما كنت أصالي قبل كم شهر في أحد (المساجد) بالعاصمة .. وبعد إنتهاء الصلاة تقدم شخص (خمسيني) نظيف الثياب تبدو عليه علامات التقوي والوقار وطلب من الإمام التحدث ثم أمسك بالمايكرفون قائلاً :
– يا جماعو لو سمحتو دقيقة واحدة ..

– فأنصت المصلون .. إلا بعض الهمهمات هنا وهنالك
– قال صاحبنا : يا جماعة الخير .. الحمدلله ربنا رزقني بعدد من البنات كولهم زوجتا ليهم والحمدلله على سنة الله ورسوله وفضلت ليا بت واحده عاوز أزوج ليها على سنة الله ورسوله .. يا جماعة أنا عاوز ليها عريس وما عايز منو أي حاجه بس يكون زول متدين وعلى خلق يخاف الله فيها .. والرسول صلي الله عليه وسلم قال (إذا جاءكم من ترضون دينه وخلقه فزوجوه) ..
صمت المصلون لبرهة إلا بعض الهمهمات هنا وهناك .. و(فجأتن) خرج من أحد الصفوف شاب فارع الطول بسيط الثياب ما أن إقترب حتي قال :
– أنا قبلان بيها يا شيخنا
– ويرد الشيخ فرحا : وأنا كمان زوجتك ليها .. وكمان نخلي الشيخ الإمام يعقد ليكم هسه !
وفجأتن يرتفع صوت .. يلتفت الجميع ليشاهدوا شخصا تبدو عليه علامات التقوي و (الترطيب) .. جلابية سكروتة .. وشال (بيج) مطرز وساعة دهبية (غاتسة في المعصم) وعمة (توتال سويسري) :
– بارك الله في أمثال هذه الزيجة .. والله لو الناس كولها عملت كده كان حلينا مشكلة العنوسة دي وأكيد العرسان ديل عندهم مستلزمات ضرورية محتاجين ليها فحقو نجمع ليهم حاجة (يدخل يده في جيبه الفضفاض) فيخرج (ربطة) من (العملة الورقية) فئة العشرين جنيها ويقذف بها عاليا صوب العريس .. ثم تتوالي التبرعات (والدعم السريع) ..
يواصل صديقي خالد الحكاية قائلا :
غايتو أنا كنتا آخر زول طلعتا من المسجد .. وخليت (أبو العروس) و(العريس) قاعدين يلمو في القروش (ويربطو) في الرزم !
– قلنا له (مستغرشين) وبصوت واحد : طيب وين الإحتيال هنا ؟
– يا جماعة طولو بالكم شويه .. بعد القصة دي بي شهرين تلاته جاتني مامورية لي واحدة من المدن في واحدة من الولايات .. يوم الجمعة مشيت المسجد .. بعد ما صلينا .. تقدم شخص (خمسيني) نظيف الثياب تبدو عليه علامات التقوي والوقار وطلب من الإمام التحدث ثم أمسك بالمايكرفون قائلاً : يا جماعو لو سمحتو دقيقة واحدة ..
– فأنصت المصلون .. إلا بعض الهمهمات هنا وهنالك
– قال صاحبنا : يا جماعة الخير .. الحمدلله ربنا رزقني بعدد من البنات كولهم زوجتا ليهم والحمدلله على سنة الله ورسوله وفضلت ليا بت واحده عاوز أزوج ليها على سنة الله ورسوله .. يا جماعة أنا عاوز ليها عريس وما عايز منو أي حاجه بس يكون زول متدين وعلى خلق يخاف الله فيها .. والرسول صلي الله عليه وسلم قال (إذا جاءكم من ترضون دينه وخلقه فزوجوه) ..
قال خالد مواصلا .. تعرفوا يا جماعة أنا لمن سمعتا الكلام ده طوااالي قعدتا أتذكر .. سمعتو وين؟ سمعتو وين .. قمتا إتذكرتا القصة الحصلت في مسجدنا هنا .. قمتا (جريت في الراجل نور طويل) عرفتو ليك طوااالي .. وفي اللحظة و(فجأتن) خرج من أحد الصفوف شاب فارع الطول بسيط الثياب ما أن إقترب حتي قال :
– أنا قبلان بيها يا شيخنا
– ويرد الشيخ فرحا : وأنا كمان زوجتك ليها .. وكمان نخلي الشيخ الإمام يعقد ليكم هسه !
وفجأتن يرتفع صوت .. يلتفت الجميع ليشاهدوا شخصا تبدو عليه علامات التقوي و (الترطيب) .. جلابية سكروتة .. وشال (بيج) مطرز وساعة دهبية (غاتسة في المعصم) وعمة (توتال سويسري) ..
– بارك الله في أمثال هذه الزيجة .. والله لو الناس كولها عملت كده كان حلينا مشكلة العنوسة دي وأكيد العرسان ديل عندهم مستلزمات ضرورية محتاجين ليها فحقو نجمع ليهم حاجة (يدخل يده في جيبه الفضفاض) فيخرج (ربطة) من (العملة الورقية) فئة العشرين جنيها ويقذف بها عاليا صوب العريس !
– قمتا عاينتا ليهو ألاقيهو ليك (زولنا داك) ذاااتو :
– (كلنا بصوت واحد) : أها وعملتا شنووو يا خالد إنتا؟
– أعمل شنو يعني .. كوركتا بأعلى صوت … ديل محتالين .. ديل نصابين !!
– أها والحصل شنو؟
– لحدت ما حكيت للناس القصة و(إقتنعوا) … كان الجماعة (إتخارجوا)!

كسرة :
من (العرس الجماعي) وصلنا مرحلة (العرس الصناعي) …. الله يجازي اللي كان السبب !!

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)
عن هذه الإعلانات


تعليقات 5 | إهداء 0 | زيارات 6113

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1368782 [الوليد ابراهيم عبدالقادر]
5.00/5 (1 صوت)

11-12-2015 11:51 AM
احتيال علي مستوي يا جبرا.. علي اليمين فتنا اولاد "بمبة" لي "غادي" تاني ال نسمع لي بي واحد سوداني "يتريق" علي الجماعة ديل.. جينا نحاكي بدعنا.. زي ما قال صاحبي "حمادة"..هههههههه.. والله نعيش نشوف..

[الوليد ابراهيم عبدالقادر]

#1368661 [مريود]
5.00/5 (1 صوت)

11-12-2015 08:48 AM
خذوا هذه. أعرف شخوصها بالاسم.

أحداهن : يلا فلانة أمسكي لي الخاتم دا وبعدين بعد النسوان يجن إديني إياهو.
فلان: كويس .
فيلمة الخطبة وجوطة النسوان .
أحداهن : تغمز لفلانة.
فلانة : تذكرت وشالت الخاتم أدتو ليها .
أحداهن : فتحت الخاتم قدام النسوان فتحت شكرا شركرا إن شاء الله في جديد ومنو وجديد منو و لللللي للللي لللللي . زغاريد . بنتي عندها البعزوها.
فلانة : متفاجئة قالت لي داير أقول : دا ما حقي دا الأديتيني ليهو لكن الكبسيبة.
نسوان أهل العريس شعرن بالحرج. وقامن أقلع خاتم أقلع غويشة أقلع سلسلة لأم العروس

نظام ( نساكم ما أحسن من ناسنا ) .

في ( حب ) إجرام أكثر من كدا ؟؟

[مريود]

#1368561 [Khalid Abdalla Ragab]
0.00/5 (0 صوت)

11-12-2015 12:22 AM
Wallahi ya Ustaz Jabra
During this Regime era we have seen all kinds of marriages. Do you remember the Group Divorce which came after the Group Marriage during ElTayeb Mustafa, the president uncle, when he directed the national TV. Every bride and groom went to their honey moon hotel and one of the employee discovered that X one of them was supposed to go with the bride Y and not Z. They hurried to the hotel to correct the mistake and the groom told them we already finished, but bring the other one to give you this one! A big scandal but who cared?

[Khalid Abdalla Ragab]

#1368426 [بكري محمد عمر]
0.00/5 (0 صوت)

11-11-2015 05:46 PM
احياناتشعر إنك امام كتاب فارغي المحتوى إذا لم يجدوا موضوع يكتبوا فيه يستبيحون حرمة العقول ويعرج بك بخياله الواسع بقصة نسجها من بنات أفكاره لا أساس لها على أرض الواقع معتبرا قراءه كالأطفال في زمن حكاوي وأحاجي الحبوبات التي تحكى للأطفال وذلك بغرض استدراجهم الى النوم أو صرفهم عن مطالب لا وسيلة للاسرة لتوفيرها لهم . فما المخجل من أن يتوارى الكاتب عن قراءه إذا لم يجد مايستحق الطرح بدلا من الاستخفاف بعقولنا بقصص موهونة كبيت العنكبوت

[بكري محمد عمر]

ردود على بكري محمد عمر
[اللدر] 11-12-2015 03:26 PM
أؤيد كلامك دي شافع روضة ما يصدقها.

بما أننا نعرف الكاتب جبرا جيدا ولا نشك أبدا فى صدقه، لكن هل تأكد جبرا بأن هذه القصة ليست من نسج خيال صديقه (خالد.

[عبدالواحد المستغرب اشد الإستغراب!!] 11-11-2015 10:08 PM
يا بكرى لعلك المآذون البيعقد الزيجات دى ؟ مالك محموق كده؟!! ده فلم مكرر لكن بوجوه مختلفه عايشنو 26سنه!! مش ديل القالو لينا (هي لله هي لله) الشوفناهو منهم الا يستحق التوثيق وقصة جبرا إعتبرا للذكرى التي تنفع المؤمنين إذا ظل هناك مؤمنا على ارض السودان!!.


#1368385 [المتغرب الأبدي]
4.00/5 (1 صوت)

11-11-2015 04:17 PM
هههههههههههه
بس كان تضع عنوان آخر غير عرس صناعي دي عشان الناس ما يمشي بلها لي حتة تانية وكدا

[المتغرب الأبدي]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة