الدوحة بالنص
10-19-2011 12:13 PM

ساخر سبيل

الدوحة بالنص

الفاتح يوسف جبرا

فى بهو فندق (شيراتون) بالعاصمة القطرية (الدوحة) كان الجميع فى حركة وانشغال.. العمائم والجلابيب الناصعة البيضاء والمراكيب (النمر) والملافح المزركشة والعصى الأبنوسية وفي الجانب الآخر اللبسات السفاري والبدل (الفل سووت) وربطات العنق (الزاهية).. يبدو أن هنالك جلسة مفاوضات على وشك البدء :
- معليش بس أنا ماشي أجيب الأولاد من المدارس وأرجع أحضر الجلسة دي لأنو الوكت إتأخر.
- وهم قاعدين يقروا وين؟
- والله الكبير بيقرأ في (الدوحة العالمية) والصغير في مدارس (المجلس القطري الأفريقي).
- والله تعرف يا (مولانا) أنا مسألة المدارس دي عاملة ليا مشكلة.. أنا هسع مما جينا المفاوضات دي ولدو ليا ولدين وبت ما عارف أقريهم وين!
ذهب المفاوض رقم (1) لإحضار اطفاله من المدارس على أمل اللحاق بجلسة المفاوضات رقم 1452 بينما جلس المفاوض رقم (2) في بهو الفندق الفاخر مع بقية المفاوضين فى انتظار بدء الجلسة يرتشف من كوب عصير البرتقال الذي أمامه على صوت الموسيقى الكلاسيكية الهادئة الذي قطعها عليه صوت المفاوض رقم (3) وهو يقترب منه رافعا يديه:
- الفاتحة..
وبعد أن شال المفاوض رقم (2) الفاتحة مع المفاوض رقم (3) سأله في استغراب:
- المات منو؟
- أنت ما عندك خبر يا أخي المفاوض رقم (41) مات.
- يا أخي ما معقول؟
- ومات وين؟
- مات في مستشفى (الدوحة التعليمي).
- أيوه صحيح هو ليهو سنتين راقد بتعالج هناك أصلو عيان مما كنا في (مفاوضات نيفاشا) ؟
- وجلسة الليلة دي ملغية؟
- أكيد ح تتلغي؟
حاول المفاوض رقم (2) الاتصال بالمفاوض رقم (1) الذي ذهب لاحضار أطفاله من المدارس ليخبره بوفاة المفاوض رقم (41) وإلغاء جلسة المفاوضات لكنه لم يستطع الاتصال به نسبه لأن شبكة (قطر تل) كانت مشغولة فاضطر لقيادة عربته حتى فندق هيلتون حيث يقيم.
- حاولت اتصل ليك بالموبايل لكن ما قدرت.
- الحاصل شنو؟
- يا أخي البركة فيك المفاوض رقم (41) مات.
- الله ياخ.. والله فقد كبير للمفاوضات.
- والفراش وين؟
- والله كلمنا ناس الفندق يعملوا لينا (صيوان) في الحديقة الخلفية ويقوموا بى كل الخدمات وبعدين يضيفوا لينا (القروش) فى الفاتورة!
بدأت ارتال المعزين تفد إلى (صيوان العزاء) بعد أن تم دفن المرحوم في مقابر ( شرفي بن هامور) وقد تم نصب صيوانين؛ صيوان للرجال وآخر للنساء زوجات وبنات وأحفاد وحفيدات المفاوضين. اللواتى صدر قرار منذ السنة (الخامسة للمفاوضات) بمرافقة أزواجهن (خوفاً من الفتنة) !
في صيوان النساء كانت النساء فى (الصيوان) تبدو عليهن آثار (الروقة) و(الترطيب) وكيف لا و(الرجال) فى (المفاوضات) وهن فى (المكيفات) آخر راحات… الحنن ما حنن.. الدهب ما دهب… التياب ما تياب… الموبايلات ما موبايلات.
- عليكي الله يا (فوزية) توبك السمح ده اشتريتي من وين؟
- والله اشتريتو من سوق (واقف قشرة) فيهو حاجة حلوة بشكل تجنن.. عارفة التوب ده اسمو شنو؟
- عليكى الله اسمو شنو عشان أمشي أسال عنو؟
- ده اسمو (تقرير المصير) !
- مسؤولة من الخير يا فوزية.. بيتكم الفى (المنشية) تم والا لسه؟
- والله تم من زمان ليهو كم سنة مما كنا بنفاوض فى (حركة فهود الجنينة) لكن نعمل شنو كلما نقول انتهينا من المفاوضات ونمشى نسكن فيهو يطلعوا لينا ناس جداد عاوزين يفاوضوهم!!
بينما كان هذا الحوار يدور في (صيوان الرجال) :
- والله رطوبة مكيفات الفنادق دي عملت ليا روماتيزم.. عاوز أشوف ليا طريقة ايجار (فيلا) جوه المدينة.
- أنت أحسن .. والله أنا أكل الفنادق الناشف دا عمل ليا (بواسير) واشتقنا (للملاح).
- أخبار قطع الأراضي في السودان كيف؟
- والله قالوا أسعارا طارت في السماء .. غايتو أنا رسلت ليهم القروش يشتروا واحدة عشان سنين اغتراب (مفاوضاتنا) دي ما تروح ساكت.
- بالمناسبة تفتكر ح نخلص من مفاوضات (حركة نسور بابنوسة) دى متين؟؟
- والله غايتو لو مافى (ضغوط) وتدخلات خارجية أكان سنتين أكان تلاتة.
- وهسع باقى ليك دى آخر (حركة) نتفاوض معاها؟؟
- (فى اندهاش) آخر حركة ده شنو؟؟ إنت ما أدوك جدول (الحركات) العاوزة مفاوضات؟؟ (ثم مواصلاً):
- امسك عندك بعد مفاوضات حركة (نسور بابنوسة ) دى تنتهى طوالى تبدأ مفاوضاتنا مع حركة (نمور الضعين) وبعد داك طوالى ح يبدأ التفاوض الإطارى لبحث مشكلة حركة (أسود سواكن) و..
-(مقاطعاً) والله أنا ما شايل هم (المفاوضات) الكتيرة دى؟؟
- طيب شايل هم شنو؟؟
- شايل هم دراسة ومستقبل الأولاد ديل هسه واحدين درسوا الروضة في (نيفاشا) والاساس فى (أبوجا) والثانوى هسه هنا في (الدوحة) وما معروف الجامعة يقروها وين؟؟
بينما كان المفاوضان (19) و(45) يدردشان بدت حركة غير عادية داخل (الصيوان).
عدد من المفاوضين خرجوا فى عجلة وأداروا ماكينات عرباتهم.. البعض الآخر كان يتحدث فى حالة من الحزن والانفعال…
(المفاوض 19): الجماعة ديل مالهم؟ الحاصل شنو؟
(المفاوض 45) :في حركة ما عادية ..الظاهر في حاجه حاصلة.
وبينما هما كذلك إذ بالمفاوض (33) الذى جاء من خارج الصيوان يقترب منهما حيث قاما بسؤاله فى وقت واحد:
- الحاصل شنو؟؟؟
- والله يا جماعة قالوا المفاوض (27) وأسرتوا كانوا سايقين العربية ماشين يودوا (قولة خير) لى ناس المفاوض (41) قامت العربية انقلبت بيهم فى شارع (الدوحة بالنص) !
كسرة :
لو حكاية المفاوضات دى إستمرت بالشكل(الطوااالي) ده ح نلاقى السودان (الفضل) أوضة وبرندة !



تعليقات 17 | إهداء 9 | زيارات 6572

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#227991 [ذوالنون]
0.00/5 (0 صوت)

10-20-2011 02:24 PM
ذمان جدودنا ما كان عندهم اي مشاكل والبلد كانت شايله الجميع لكن منذ ان ظهر دكتور فلان وبروفيسر فلان الحكايه بقت ما مفهومه لكن من خلال تلسكوبك الساخر اظن وضحت ؟ ما ينط لي واحد يقول عندي عقدة تعليم والله السي في حقتي تؤكد اني خريج كليه الهندسه


#227953 [ابو محمد]
0.00/5 (0 صوت)

10-20-2011 01:13 PM

الله يديم النعمة على اهل قطر و سير سير يا البشير حتى يكون لكل حلة و قرية حركة مسلحة.



#227673 [ود سبيل]
0.00/5 (0 صوت)

10-19-2011 11:24 PM
أتفقنا على أن لا نتفق , والحقيقة بأننا جميعا نتحمل المسؤلية , كمجتمع لاننا بكل صراحة لم نحترم الاخر بيننا وتفرقنا ( الله يكضب الشينة )


#227671 [ابو ريان]
0.00/5 (0 صوت)

10-19-2011 11:19 PM
الله ىحفظ السودان من الفتن وشر الحاسدين


#227638 [saif]
0.00/5 (0 صوت)

10-19-2011 09:57 PM

قايتو نحن عائزين حقنا خنزيرة .

في زمن الطفولة الجميل اشتركنا كرة ( كفر) كل واحد دفع ريال ، ولكن كان من بين فريق المشتركين واحد مكاجر و مشاتر و صعب شوية و مبوظ التمرين كل يوم وتم الاتفاق علي ان نجمع له قيمة اشتراكه تعريفة تعريفة ولكنه رفض رفضا باتا و قال ما عائز ريالو ، بل يعطوه حقو من الكفر خنزية .

ناس دارفور يشيلوا خنزيرتم وناس الشرق يشيلوا خنزيرتم ، و ناس الشمالية و النيل كذلك .
ونحن ناس مديرية النيل الازرق القديمة مش ( مثلث حمدي ) بنعمل لينا كرة شراب يعني مفيش واحد يقول عائز حقو خنزية ، و بعدين مرحب و حباب الجاينا يلعب معانا من جميع السودان الكبير بمافيه الجنوب بس اهم حاجة وشرطنا الوحيد لا قبلية و لا جهوية .


#227590 [امانى]
0.00/5 (0 صوت)

10-19-2011 07:53 PM
ياود حامد انت جاهل وما امشي اقرا الانتباهه شبهك


#227554 [ملامح]
0.00/5 (0 صوت)

10-19-2011 06:49 PM
ههاااااااااااااااااااي

قلت لي اكل الفنادق الناشف دا جاب ليو شنو

ههااااااااااااااااااي

والله دي قوية شكلها من مزارع القضارف(بفتح الميم والزاي وكسر الراء)



#227548 [أمبده]
0.00/5 (0 صوت)

10-19-2011 06:36 PM
يا محمد السوداني تخريمتك دي بااااايخة زيك ! الله يشفيك من الفيك .


#227544 [Emesary]
0.00/5 (0 صوت)

10-19-2011 06:20 PM
مقال مكان نشره الانتباهة وليست الراكوبة - ممعن في العنصرية لدرجة ...... - عموما يقيني ان الكاتب جنح ربما لسرد ما بعقله الباطن و بصورة لا ارادية . الحركات التي تسخر منها و التي هي من الجنينة و الضعين و سواكن ( و دي طبعا جبتها لزوم التدليس في المقصود و كدة ) تستاهل لانها صدقت بان التفاوض يحقق لها مطالبها ناسية ان الطرف الاخر في التفاوض كله ( ساخر سبيل ) عموما اليوم و اخيرا ( فهموا ) على قول ( ابن علي ) و شيلوا شيلتكم !!!!!!!!


ردود على Emesary
Saudi Arabia [محمد خليل] 10-20-2011 09:38 AM
يا Emesary بصراحة أنا من المناطق المشار اليها و لم أشعر بأن هناك أية عنصرية فالرجل اشار فقط للمناطق التى توجد فيها حركات مسلحة و لم يقصد الا مارثونية المفاوضات و كثرة الحركات التى يتم التفاوض معها و لم يسخر من الحركات انما سخر من طول مدة التفاوض.


#227543 [يار يت لو ما كنت سوداني]
0.00/5 (0 صوت)

10-19-2011 06:17 PM
وكمان حركة ( ادوني حقي ) وحركة ( قسمتي ونصيبي )



#227396 [التنجر]
0.00/5 (0 صوت)

10-19-2011 02:30 PM
والله لك التحية يا أستاذ جبرة والله هذا حال المفاوضات الجارية و الراكدة و السع ما تولدت علي اي حال أنا عن نفسي قنعت من السودان وعاوز ابقي اي شي أخر بس اكون أنسان بمعني الكلمة بالمناسبة أنا عندي اختراح يا أخوانا شوفو حقي كم متر في سودان وادوني ليه عيش ولا اي حاجة انا قبلان قبال ناس الانقاذ ما يسرقوة ده اذا ما سرقو من اصلو


#227349 [تكتك]
0.00/5 (0 صوت)

10-19-2011 01:28 PM
شكرا استاذ الفاتح جبرا فمواضيعك المغمسة بالسخرية والمنمقة باسلوبك الرائع تجبرنا على متابعة مقالاتك المعبرة عن واقع الحال والهرج والمرج الذي اصاب الفكر السوداني والشلل الذي أحاط بمفاصل أبدان ساستنا والطوفان الذي يهز أركان مجتمعاتنا ، وحتما ستطول مفاوضاتنا اقليم اقليم وولاية ولاية وقرية قرية وفرد فرد طالما حكامنا يتحكمون بمصائرنا بهذا النهج السخيف حتى أصبح الوطن الكبير يتآكل من أطرافه وأعماقه ولا يشغل بالهم الا المال والسلطة ...


#227342 [محمد]
0.00/5 (0 صوت)

10-19-2011 01:06 PM
لا حولااااااااا .. الفاتح إت بتجيب الحاجات دي من وين؟ عامل راسك الكبير دا
أسع دا ما عالم براهو، شي بكا وشي عرس وشي طاهور وقراية وليدات وشنو وشنو
عموما ..... تسلم


#227340 [hamed]
0.00/5 (0 صوت)

10-19-2011 01:02 PM
الي تقعد فيها انت براك ياجبورا عشان نحن نقراليك


#227335 [الزول الكان سمح]
0.00/5 (0 صوت)

10-19-2011 01:00 PM

إنتا عارف يأأستاذ

يظهر إنك فى الفقرة الأحيرة دى جريت ليك نفس طويل من القوية دى وإتلخبطت فى قولة الخير بتاعت المفاوض رقم (27 )...أصلو هما كانو وادين ( قولة الخير ) للمفاوض رقم (14 ) عشان المفاوض رقم ( 41 ) الناس قاعدين فى فراشو.


ردود على الزول الكان سمح
Sudan [wedhamid] 10-19-2011 03:15 PM

برافو يا صديقنا الزول الكان ولا زال سمح ......انت كمان لاحظت القد الفى الذاكره عند الاخ الفاتح ........اكيد انت دكتور نفسانى !!!! فى تعليقى لاخونا استاذ الفاتح انا نبهتو للحكايه دى برضو.....و قلت ليهو ( فى سبيل المزاح و التنفيس)
يا أ اخى الله يستر عليك إنت ما سمعت فى الاخبار بانو علماء الطب فى امريكا قالو لما يتقدم السن عند البعض بتظهر عليهم ما يشبه أخرام فى الذاكرة ( جراء حدوث قدود فى المخ) ودى بتظهر بتساقط الكلمات و تبدلها و انا شايف مبادئ الظاهره دى بقت تبين عندك !!!! أول أمس قلت انو عبد العال رفع خروف القسط على الركشه و لما وصل البيت نزلو من البوكسى و الليله بتقول على الشاشه ظهرت قيمة الجائزه خمسه دولارات و بعدين بتقول المتسابقين غلبهم الإستحواذ على مبلغ الخمسة آلاف دولار الذى يسيل له اللعاب !!!!!! انا شايف احسن تحصل نفسك وتقابل ليك دكتور و اللا اقول ليك ........ خلى التمباك يزيدو ليك عطرون تقيل و مص قرض قديم لانو يحتوى على فيتامينات تساعد على ترميم خلايا المخ الشايخ و الله أعلم !!!!!!

و انت عزيت الحاله للصنف و الله أعلم........و لكما كل الود و الاحترام العافيه الدائمه...............


#227334 [زول]
0.00/5 (0 صوت)

10-19-2011 01:00 PM
مقال يبكى ويوضح مدى سذاجة الساسة فى بلدى الحيبقى استديو وليس اوضة وبرندة والله رايتهم فى القنوات الفضائية كل المفاوضين الواحد بقى يلمع ذى لستك العربية الطالع من المغسلة ظاهر مسجد نعمة رابط الكرفته ذى الدعول والسودان اخر همه وانسى يازول كان منتظر خير من ديل ابقى انت طيب اوى


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة