المقالات
السياسة
ارشيف مقالات سياسية
شحدة بي كرت دعوة
شحدة بي كرت دعوة
10-23-2011 08:46 PM

شحدة بي كرت دعوة

أسماء الجنيد
[email protected]

ــــــــــــــــــــــــــــــــــــ

سلام إخواني وأخواتي الأعزاء قرآء الراكوبة,, لكم التحايا والتقدير ,,,

بالله يا بنو قرعة , عديـــــــــــل كده ولاكم داسنها ؟
تنادوا الزول البتشحدوه في عقر داركم وتمدوا قرعتكم المقدودة ,؟ لا بتشبعوا ولا بتقنعوا ؟؟ لا دي تستاهلوا عليها جائزة معتبرة , والمفروض الوليد بن طلال يزيدكم بخشيش فوق شحدتكم دي,, عالم مبدعة ومتألقة في الفساد لامن حيرت كل الأبالسة والشياطين زاتهم ,,,!!!
عينكم امانة ما قوية وحمراء , رسلتوا كرت دعوة راسو عديل للوليد بن طلال ؟
والله لكن بالحيل سباقين للشينة المنكورة ,
بمناسبة الوليد بن طلال وسباقين دي , النحكي ليكم يا قرآء الراكوبة الإعزاء الطرفة دي,
في الرياض عندي قريبا لي ظريف و مسلط بالحيل . حكى لي الواقعة دي قبل سنتين
قال لي في عز هجير شهر 7 في السعودية , وفي الشارع السريع الجاي من المدينة للرياض, كان في سوداني واقف في الزلط الشمس اكلت عضام وشو وما لقى ليه عربية تشيلوا
أها ربكم رب الخير تجي عربية طائرة ما شاء الله زي الصاروخ ومكندشة , وقفت فجعتن على قول حبوبتي
ونادوه الجماعة عزموه يركب معاهم يوصلوه,,,
, كان في العربية خالد إ بنه للوليد بن طلال وواحد سوداني , يبدو إنه عرفوا الرجل سوداني وقفوا ليه
المهم. الراجل الشمس مزغللة عويناتو يا حليلو , ركب وطواااااااااااالي جاء داخل بي النفاج قبال قولة تيت,
السلام عليك يا جماعة , ما عرفنا الأخوان من وين ( كعادة السودايين )
قبل عليهو ولد الوليد بن طلال ,,
قال لي معاك خالد بن الوليد
صاحبنا طوالي نط ليهو في حلقومو,
قلت لي خالد بن الوليد عديييييييييييل كده ؟؟
والله ما شاء الله ما قصرت تب
اها يا خوي معاك انا الخليفة عمر بن الخطاب رضي الله عنه , قومتوا ليكم من تربو عديييل ,, ما الحكاية بقت زمن صحابة وكدة!!
وصفق يدينو في تعجب , قلت لي خالد بن الوليد ذات نفسو ؟؟
خلى الجماعة يضحكوا فيه لسرعة بديهتو وروح دعابته
طبعا اكيييد بكون خجل لما عرف فعلا إنه الراجل إسمو خالد بن الوليد بن طلال,,

اها نحن البخجل لينا ناسنا ديل شنو ؟ عارفين عوجهم وشادين عيبهم سروج يقدلوا بيها قدام الخلوق
وطبعا الحكاية زنقت تـــــــــــب, عشان كده مش يغسلوا وشهم بمرقة !! ديل يسلخوا جلدهم ويلبسولهم جلد تاني ويستمروا في خيبتهم وعيبتهم
وبعدين الوليد بن طلال أكيد فااااااااااهم اللعبة , لا غشيم ولاهو جهلول متلهم , وفرفرة المذبوح القايمة عليكم دي , لازم يستثمرها ببراعة شديده
آآي صاح نعم بجدعكم بي شوية ملاليم , بما إنه العالم كلو عرفكم رخيصين ودميمين وبطينين,,
لكن كمان عارف جشعكم وبيعكم لوطنكم وترابه بتراب القروش,
ما طاقيكم حجر دغش في الوطن , ولا هميكم الشعب ,
اها متوقع تماما إنكم ما عندكم شورة ولا مواضيع تهم الطرفين غير البيع والشراء ’ وقبالهم الشحدة
لكن النبي فيكم فضلتو شنو عشان تبيعوه.. ما خلاص كملتوها وكردتوها لامن شلتو المحرق في آخر الحلة منها!!
تاني ما فضل شيء , غايتو إلا كان دايرين تبيعو الجامع الكبير ولا جامعة الخرطوم!! ولا يا ربي بتدوروا تبيعو مقرن النيلين بي بحورهم الإتنين , منظر بديع يا الوليد بن طلال,
الله يستر على الكباري البجروا فيها الناس كداري!! والله يستر على إذاعة أم درمان وسجن كوبر!!
ولا يا ربي بتدوروا تبيعوا الأسواق بي ناسها؟؟
ربنا يستر من الزيارة والشحدة البي كرت دعوتها دي ,
ما نتفآجأ بعد يومين هنا في حوش الراكوبة ده بي عقود موقعة بشراء الوليد بن طلال لأحد معالمنا البارزة
منكم لله يا الما بتخافوا الله
ليكم يوم قريب إن شاء الله
يمهل ولا يهمل

متاوقة
ــــــــــــــــــــــــ
شدة ماني متوقعة نوادر بنو إنقاذ الما حكت ولا بقت
اتوقع في البيعة والمزاد مقابر شرفي وفاروق
والله يرحم امواتنا والشعب النايم زيهم
ودعتكم الله
أسماء الجنيد


تعليقات 13 | إهداء 1 | زيارات 2814

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#230123 [عبدالله محمد عبدالله]
0.00/5 (0 صوت)

10-24-2011 02:09 PM
والله ياسلمي عرفتي للجماعة...


#230101 [الشعب الفضل]
0.00/5 (0 صوت)

10-24-2011 01:40 PM
ح يبيعوا حدائق 6 ابريل عشان ما تذكر الناس بانتفاضة 6 ابريل
وفجاة كدى معاها المقرن
وطبعا شوية ملايين من الافدنة التي من هملتها حتى المصريين اخذوا منها ملايين مجانا فما بال الوليد بن طلال صاحب المو الملكي


#230059 [محمد صالح العميد]
0.00/5 (0 صوت)

10-24-2011 12:59 PM
تسلمي يا سوما لقد كفيتى ووفيتي لقد سطر قلمك كلام جميل في هؤلاء القوم نأمل من الله الكريم أن يورينا في يوم مثل ما حصل للقذافي حتى يتفرج فيهم كل العالم ويشفي صدور كثير من الناس على عمايلهم السوداء وتاريخهم المنيل.


#229965 [صبر الدين ]
0.00/5 (0 صوت)

10-24-2011 10:39 AM
سلمت الأنامل يا اسماء على هذه الكتابة الطاعمة والمدنكلة ، طيب هم ليه طالبنه تاني ، مش جائه وزير خارجيتنا الملقوف كمان بهديته دا لحدي عنده ، ولا ما قدر يقنعه ياربي ؟

غايتو زيما قلتي بكرة نلقى نفسنا باعونا للوليد دا ولا كتر خيرنا ذاتو ، ما أصلوا نحن ناس الإبتكار في كل شئ ، حتى رئيسنا أول رئيس مطلوب في المحكمة الجنائية وهو على سدة الحكم ، يعني شنو نكون أول دولة تتباع لرجل أعمال .

خلونا نايمين كدة بس ونشوف آخرتهم الفضل شنو أصلو بعد كدة ..!!


#229873 [دقنة]
0.00/5 (0 صوت)

10-24-2011 04:57 AM
عليك الله يا أخت أسماء , شفتي الأمير الوليد بن طلال كان قاعد مفجوخ كيف بي كل كبرياء وأنفة وثقة في النفس , وسكرتيرتو آخر ستايل و خالفة كراع في كراع بي كل قوة عين ومستهترة بوزير خارجيتنا الذليل والوفد الوضيع الجاي معاو يشحد ,,,,,,,, عليك الله عايني للصورة مرة تانية وتالتة ورابعة لأنو فيها عبر ياااااااما ,,,, وبالمناسبة ,,,, حبابك عشرة في الراكوبة بين أهلك وناسك وما تشتغلي كتير بتعليقات أذناب الذئاب الرخاص رخسة ,,,,,,,,,,, رخسة شنو ياربي !!!!! والله مافي شي رخيص في بلدنا المغلوب على أمرها غيرم هم


#229867 [wad aljazeera]
0.00/5 (0 صوت)

10-24-2011 03:10 AM
طبعآ الإتباع كثييييير لكن الظاهر عندهم حاجه متينه فبركت بيعتها جاااااهزه عِشان كِده عملوا الدعوة للوليد.(الايام دى الشعوب دي ما مضمونة). تسلم إيدك على المقال الرائع;)


#229821 [السودان الفضل]
0.00/5 (0 صوت)

10-23-2011 11:57 PM
يا بت الجنيد الله يستر لكن تحت تحت سمعت إنو الجماعة الطيبين ديل عرضوا للأمير الوليد كل السودان الفضل للبيع وشرطهم الوحيد أن يخليهم في السلطة لكن الرجل مختلف معهم في أنه لايريد بشر ليحكموهم بل يريدها أرض بلا شعب والجماعة محتارين الان ماذا يفعلون وتحت تحت سمعت إنو البشير ذاتو لازم يكون في البيعةوطبعا الجماعة رافضين بحجة أنه رمز سياده المهم الجماعة دول بقنعوا في الأمير لشراء الشعب والأرض وتم الإتفاق علي الأرض ومختلفين علي الشعب لانو الأمير دفع علي الراس جنيه والجماعة يطالبون بخمسة جنيه وعشرة هواده ذي قرع ودالعباس يا جماعة نحن معروضين للبيع والمكضب يجرب يلحس كوعوا وتصبحوا علي خير وتشوفوا أحلام سعيدة في المنام


#229792 [جاكسون]
0.00/5 (0 صوت)

10-23-2011 10:54 PM
بوركت ابنة الجنيد ....
دا كل كوم والكوم الثانى بدعة ود المهدي في صحيفة الرائد (بيان فى العقيد القذافي)
نحنا يا جماعة السودان ماااااااااالنا والحاصل علينا دا شنو سوينا فى دنيتنا شنو والدعاء علينا منو مره انقاذ ووهم ومره انصار وقرف كرهتونا السودان الله ينعلكم دنيا وآخره ....
ـــــ قال بيان قال ـــــ
* الم يكن صديقك ياحقير
* الم يمدك بالمال والعتاد لترويع اهل الخرطوم يامرتزق ياواطي
والا اصلا انتم كدا اهل الساسه فى السودان عايشين على الاوانطه وامجاد اجدادكم ؛ليتنا مستعمرين حتى الآن خيرا لنا من اشكالكم الجشعه المابتختشى ...
....


#229767 [محمد سكر ]
0.00/5 (0 صوت)

10-23-2011 10:24 PM
الاخت متعك اله بالصحه والعافيه شحده وبس كمان معاها ضياع هويه ووطن وضياع زراعه وصناعه وضياع اخلاق سودانيه وتفشى قبليه وجهويه ومحسوبيه وقلاء فاحش وجنيه منهار امام عملات العالم


#229765 [حسان احمدحسن ]
0.00/5 (0 صوت)

10-23-2011 10:20 PM
الخليج كلو جرب السودان ملقى غير الكضب والفساد والأمور واضحة ذي الشمس مصر مدنها قريب اربعة مليار وقطر اشترت منجم في اليونان وابت تدي البنك المركزي السوداني لمن شحدها بعدين بلد فيها حرب يعني فيها فساد وقروش ماشية للحرب الجماعة ديل قايلين الخليجيين ذي زمان دى اكتر حاجة بيفهمو فيها هي البزنس اصحو ياشحادين يانس المشروع الحضاري بتكافحو في التسول وانتو اكبر متسولين


#229760 [يا ريت لو ما كنت سوداني ]
0.00/5 (0 صوت)

10-23-2011 10:12 PM
لك التحية استاذة اسماء
ماذا بقي لنا من كرامة بين الشعوب العربية .. حكومة بكامل طاقمها تطرق الابواب تستجدي بلا استحياء !!!!!! لاحول ولا قوة الا بالله
والله الناس ديل حيرونا عديل كدا رؤؤس الاموال التي يمتلكها هؤلاء ويكنزنوها في الخارج كفيلة تماما بإخراج السودان من مأزقه الذي فيه وهو ( المازق ) نتيجة افعالهم ومع ذلك يرفضون .

الان صارت لدي قناعة تماما بأن هؤلاء الكيزان ليسوا سليمي العقل وانما فئة تمكن منها الجشع والطمع ومصابة بامراض عقلية مستعصية ويعانون من الشيزوفرينيا في مراحل متقدمة وكل منهم يصرح ويعوعي كيفما شاء وقتما شاء واينما شاء لا اخلاق لهم ولاضمير يظهرون امام العامة بمظهر العفيف الشريف الطاهر التقي الورع وفي الخفاء يخلعون كل كذلك ويبدون اسنانهم المسننة التي تقطر دما ولكاني بهم في خلوتهم مع بعضهم وهم يأكلون لحوم غيرهم متلذذين في بهيمية تامة وكان الدنيا قد حيزت لهم . فهم في غفلة نسوا الخالق فأنساهم انفسهم وظنوا انهم خالدين مخلدين لايستعصي عليهم شيئ ولم ينظروا بعين العقل لما يدور في ساحة الوطن العربي بل يقول قائل منهم ان الشعب كله (وليس اغلبه ) كله يدين لنا وان الشعب لن يجد غيرنا بديلا .

اللهم انك تعلم ان هؤلاء اذلوا العباد وافقروا البلاد فصب عليهم سوط عذاب وارنا فيهم بأسك الذي لايرد واجعلهم عبرة لغيرهم .


#229748 [babiker]
0.00/5 (0 صوت)

10-23-2011 09:52 PM
وطن حدادي مدادي ضيعهو تجار الدين وبقو يشحدوا الوليد طبعا هذه إهانه للشعب السوداني وللسودان وللدبلوماسيه السودانيه منذ ان عرفت الدول بعناها الحديث .إنتهت الشخصيه السودانيه وضاعت هيبة الدوله السودانيه منذ قدوم الاسلامويون الحهله إلي سده الحكم في السودان،قريبا سينزاح السجم منا وسنتأصل السرطان و إن طال الزمان . اشكرك الله يخدر قلمك كما قلت لك من قبل ربنا يجعل قلمك صاروخا يدمر الكيزان آميين


أسماء الجنيد
أسماء الجنيد

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة