يكون ده من شنو؟ا
10-24-2011 12:22 PM

ساخر سبيل

يكون ده من شنو؟

الفاتح يوسف جبرا

ما أن تقوم بقراءة أخبار الحوادث في أية صحيفة حتى تقرأ عناوين من شاكلة (القبض على عصابة تقوم بتزوير العملة) ! على الرغم من أن (خبراء تصميم العملات) لدينا ما أن يقوموا بتصميم عملة جديدة إلا ويصرحوا بان تلك العملة لن يأتيها التزوير لا من أمامها ولا من خلفها وأنها تتمتع (بكذا نوع) من أنواع الحماية ضد التزوير بداية بالعلامة المائية التى ترى عند تعرض العملة إلى الضوء (تكون شايل ليك بطارية طوااالي) وانتهاء (بالخط المعدني) والذي يمكن عمل (شبيه له) بأي من برامج الرسوم الكمبيوترية !
بالطبع كلام (خبراء تصميم العملات) لدينا عن استحالة تزويرها (كلام ساكت) وغير علمي بدليل هذه الظاهرة المتنامية للتزوير وكل نفر نفرين عندهم طابعة وماسحة ضوئية وكمبيوتر شخصي (قنبوا) يطبعوا ويوزعوا !!
العبد لله ما (خبير تصميم عملات) ولكن يعلم جيداً أن كثيراً من الدول العندها خبراء عملات وحتى لا تقف موقفنا هذا قد قامت بتصنيع نقودها الورقية من مادة البوليمر (الصديقة للبيئة) والتي تعد أكثر أمانا ضد خطر التزييف وتتضمن العديد من الخصائص الأمنية غير المتاحة لورقة البنكنوت ، مما يجعل عمليات التزييف أكثر صعوبة !
(ومش كده وبس) فإن النقود المصنوعة من مادة البوليمر لها ميزات أخرى كمقاومتها للماء والسوائل والأوساخ مما يحد من التلوث الناتج عن استخدام النقود الورقية العادية كما أنها أيضاً أثبتت الدراسات بأنها تعادل في عمرها أربعة أضعاف عمر العملات الورقية علاوة على أنها تتميز بسهولة الاستعمال في ماكينات الصراف الآلي عكس العملات الورقية ، بالمناسبة أول دولة استخدمت البوليمر فى صناعة العملات هي أستراليا (في العام 1988م) ثم تبعتها ماليزيا وهونج كونج وبنجلاديش وأندونيسيا وتايلاند وغيرها من الدول .
بالطبع ح يجيك (خبير تصميم عملات) ناطى ويقول ليك تكلفة صناعة العملة من البوليمر (غالية) ولكن الخبراء (الجد جد) يؤكدون بانها أقل تكلفة خاصة إذا وضعنا حكاية (التزوير) وعمرها أربعة مرات قدر العملات الورقية (في الاعتبار) !
ما دعاني لكتابة هذا المقال ليست هذه (الجلطة) بل (جلطة تانية) مما يمكن يعملا (طالب في أولى فنون) هذه (الجلطة) تكررت للأسف مرتين متتاليتين فعند تصميم العملة الورقية قبل الأخيرة تم استخدام نفس اللون (البمبي) في الورقة فئة العشرين جنيه (وكمان) في الورقة فئة الخمسة جنيهات (يعني خلاااس ما لاقين ليهم لون) مما جعل المواطنين يعانون كثيراً مشقة التركيز في التفريق بين الفئتين وفي كثير من الأحايين يقوم أحدهم بتقديم العشرين بأنها (خمسة) ولا يكتشف ذلك إلا بعد فوات الأوان !
كان من الممكن أن نقول إن لكل خبير (دقسة) وأن المسالة ليست عدم خبرة بل (سهوة ساااكت) ..
لكن ما حدث فى صناعة وتصميم العملة التى صدرت مؤخراً يؤكد بما لا يدع مجالاً للشك بأن (عبدو الميكانيكى) هو من يقوم بتصميم عملاتنا فها هي الورقة فئة (الخمسين) تحمل ذات لون الورقة فئة (الخمسة جنيهات) ! .. طيب يا (عبدو يااخ) وكت ما لقيت ليك لون تااانى خاااالس والألوان انعدمت طيب خلي (العشرة) تشبه (الخمسة) عشان الفرق (عند الدقسة) يكون (خمسة جنيهات) بدل ما يكون (خمسة وأربعين جنيه) عشان يا عبدو القصة ما بتتحمل وجيوبنا ما ناقصة وكده !
عزيزى القارئ .. بينما خبراء تصميم العملات (الجد جد) يركزون عند تصميم وصناعة العملات البنكنوت على شيئين هامين .. أولهما عدم قابلية العملة للتزوير ..وثانيهما اختلاف الألوان (الوااااضح) بين الفئات واختلاف مقاساتها منعاً للإلتباس نجد (خبراءنا) يركزون على (الرسومات) التى تحتويها (العملة) وهل يقومون بوضع (أفيال) أم (زراف) أم مصفاة البترول (الما شفنا ليهو حاجة) ؟!!
كسرة :
يكون ده من شنو يا جماعة ؟؟ والله قدر ما شغلنا راسنا (الفاضى ده) ما لقينا لينا سبب !!


تعليقات 31 | إهداء 2 | زيارات 6660

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#243320 [سودانية]
0.00/5 (0 صوت)

11-20-2011 09:31 PM
والله مقالاتك هي الاحلى, على الاقل بتضحكنا على همومناالما بتنتهي:D


#231289 [saif]
0.00/5 (0 صوت)

10-26-2011 11:51 AM
اولا ازيك انت جبت سيرة القروش طيب المحيرنى انا وماقادر افهمو كل يوم فى تلفزيون السودان النشرة الاقتصادية (اسعار العملات) يقولوا ليك سعر صرف الدولار ا274 جنية الريال 74 جنية يوميا كدة على الطلاق كذابين نحنا هنا بنحول الريال عن طريق صرافة معروفة الىالمستلم فى الخرطوم الريال بى 100 يعنى بالعربى الفصيح 1000ريال= 1000000 مليون بالقديم اكرر المحيرنى فى ناس التلفزيون اسعار العملات دى من وين بنك الخرطوم ولا البنك المركزى كدة باللة بعدين شوف النشرة الاقتصادية بعد نشرة الاخبار دة من شنو طيب ياطيب ياخى هو دة بس نتكلم عن اية ولا اية ولا اية ولا اية ولا اية ولا اية ولا اية ولا اية ولا اية ولا اية ولا اية لك التحية وطول بالك


#231234 [هندسه]
0.00/5 (0 صوت)

10-26-2011 10:05 AM
انتا يا جبرة انتا الظاهر عليك واحد منهم لانو بكرة حيقولو والله جبرا دا كلامو صاح وإذن نغير العمله... يعني هم يعملو ما انتبهو للالوان وانتا تعمل فيها نبهتهم وتكلفة تغير العمله حوالي المتين مليون دولار... ويلا نغير العمله... الشعب يريد تغير العمله


#230866 [جديد الشوري]
0.00/5 (0 صوت)

10-25-2011 04:36 PM
يا أخوي ياجبرا مادة البوليمر وعمرها ا


#230804 [marwa29]
0.00/5 (0 صوت)

10-25-2011 02:21 PM
انا البقراء في مقالك دا دقست اكتر من مرة لكن الله ستر
سبحان الله اللهم نسالك العافية


#230784 [حمدالنيل احمد حمدالنيل]
0.00/5 (0 صوت)

10-25-2011 01:49 PM
هذا يعكس بمالايدع مجالا للشك من ان كل امور نا تتم بطريقه رزق اليوم باليوم الرجل غير المناسب وكل واحد له منصب احضر كل عائلته واقرباءه للعمل معه بغض النظر عن مؤهله العلمي في ظل هذه الفوضى ماذا تتوقع ياابوجبره


#230532 [saif]
0.00/5 (0 صوت)

10-25-2011 06:44 AM
والله ياود جبرا بالغته عدييييل كده عمرها اربعه مرات العمله العاديه وانت عارف الناس دي كل سنه بتغير العمله حتي الان انا عملتين ماشفتهم تورط الناس في عمله جميله بالشكل ده خلي العمله المهلهله دي ممكن يكون في انفصال ولا .....شي جديد تتغير


#230531 [عبدالغني ابومصطفي ]
0.00/5 (0 صوت)

10-25-2011 06:36 AM
يااااااا عمنا الفاتح جبرا سلام
كدي رأسك الفاضي دا طفيهو وشغلو تااااني ممكن تحصل لينا السبب


#230519 [ زولة]
0.00/5 (0 صوت)

10-25-2011 05:02 AM
يا جبرة ، كفاية تعمل فيها رايح !


#230468 [ود حديد]
0.00/5 (0 صوت)

10-25-2011 12:29 AM
يا جبره جيب نفس .

هي وينا القروش ان بقت حمرا والا بمبي كدي خلي الناس تلقي القروش

اول حاجه يا جبرا اللون مقدور عليه ههههههها يديك العافيه ...


#230384 [ahmed abdelrahman]
0.00/5 (0 صوت)

10-24-2011 09:59 PM
الله يديك العافية استاذنا الفاتح....بالجد مقالاتك ذى بصات الوالي عنما نركبها (احيانا في نهار رمضان) .....الواحد برتاح جدا وبتفش شوية من القهر.....لك كل الود واعتزر اذا المقارنة ما عجبتك.


#230329 [ام محمد]
0.00/5 (0 صوت)

10-24-2011 07:59 PM
عارف يااستاذ جبرة عبدو المكانيكي بتاعك ده فكر انو العملة الناس ديل حيغيروها قريب عشان كدة مافي داعي للغالي


#230287 [عبدالواحد00 ]
0.00/5 (0 صوت)

10-24-2011 06:25 PM
أها ياجبرا 00خلاص قمت على قطع الارزاق00ياشيخ حرام عليك !! خلى المسألة تسلك شوية 00وبالمناسبة الجماعة ديل نكاية فيك حيأجلوا تغيير العملة الكانت متوقعة عشان يخشوا بيها (الجمهورية التانية) شوية00وكأنك ما عارف إن نظام الانقاذ ذى مرة الجيران هو الاخر داخل فى منافسة مع الامركان (إشمعنا الامركان عملتهم من فئة الدولار الواحد حتى المية دولار لونا واحد؟) وكأنك ما سمعت عبدالرحيم حمدى لمن كان وزير مالية وكلامو الشهير (بإنه سيجعل الدينار السودانى وقته عملة صعبة!!) والرجل صدق عندما جعل العملة السودانية بمسمياتها المختلفة وايضا الوانها ورسوماتها عصية على المواطن السودانى 00وبكده ما بتفرق مع المواطن إذا كانت بلون احمر او أخضر متشابه وغير متشابهة ولو حتى كانت بلون (زينب) هى فى الاول وينا عشان تتشابه علينا وكمان نقوم نغلط ؟ دى بصراحة مبالغة منك يا جبرا00 الاهم من ده كده شوف لينا حكاية الحزب الوطنى الاصل موضوعو شنو مع الجماعة ديل 00عشان نقرر نقفل الشباك ولا نفتحو؟!!0


#230271 [Nagi]
0.00/5 (0 صوت)

10-24-2011 06:07 PM
كديه اقيف شويه

الميكانيكيه مالون

ما عاجبنك يعنى

الخمسه صاموله

والخمسين مسمار سنه ناعمه

والعشرات تكيهات


#230258 [بحلم أشتغل مستشار]
0.00/5 (0 صوت)

10-24-2011 05:42 PM
أنا أفكر..

إذاً أنا موجود..


ياجبرة....

الناس ديل لما يقرأوا مقالك ده ح يفرحوا..

ويقولوا الناس ديل ما بفكروا..

إذاُ فهم غير (موجودين) ..

إذاُ فالشعب السوداني.. كلو راح في خبر كان..
وهو المطلوب إثباته...


#230191 [yasir]
0.00/5 (0 صوت)

10-24-2011 03:29 PM
بسيطة دا الحبر الباقي من فئة الخمسين عملو بيه الخمسة
الجماعة بوفروا لينا يا جماعة ولا رايكم شنو؟؟؟؟


#230181 [ود مدني ]
0.00/5 (0 صوت)

10-24-2011 03:22 PM
يكون من التعب والاكل الكعب


#230180 [المسالم]
0.00/5 (0 صوت)

10-24-2011 03:22 PM
يا أستاذ جبرة:
المشكلة في سوداننا الحبيب أنه لا توجد معايير أو مرجعيات للحكم على الخبراء و المستشارين و غيره بل تعتمد المسالة على المزاج الشخصي و المجاملات و رد الجميل على حساب المجتمع و غايتو الامور ماشة بالبركة


#230159 [اسطنبولي]
0.00/5 (0 صوت)

10-24-2011 02:48 PM
والله انت.
أقول ليك شنو ما عارف باختصار براح لي كتاباتك.


#230146 [قطبي المهدي]
0.00/5 (0 صوت)

10-24-2011 02:36 PM
سؤال في محلو

نسأل الله ان يجعل اجر وثواب هذا السؤال في ميزان حسناتك

في الاخرة ..لاني شايفك الدنيا دي قنعت منها تب

الاخ المجاهد جبرة انحنا العملة الحملية ما شغالين بيها وما بنعرف اذا كانت متشابهة

لانه اصلا ما جايبة حقها. بعدين ياخ انحنا ارصدتنا كووولها بره بي العملة الصعبة

وفي داخل البلد برضو بنتعامل بالدولار واليورو

اديك مثال حي القروش الاتسرقت من بيتي مش كانت كووولها عملة صعبة

اخوك المحتسب المجاهد؟

قـــــــــــــطبي المـــــــــــــهدي


#230120 [ودالخير]
0.00/5 (0 صوت)

10-24-2011 02:07 PM
يا عمك ما قلت تفتيحة
أها
قطعوها ليك ولا لااااااء
يكون ده من شنو يا صحبي؟
يكون من شنو يعني؟ بس براك كده فكر


#230089 [محمد سكر ]
0.00/5 (0 صوت)

10-24-2011 01:25 PM
الاخ جبره متعك الله بالصحه والعافيه عمله السودان لوزورت ام لم تزور مانافعه والورق البعملوه بها اغلى منها واحسن ادو العمله السودانيه الى حاجات الفول الفن به المدمس والتسالى عشان اصحاب المشروع الحضارى ياكلوه بىقشره وورقه


#230088 [مزمل خالد]
0.00/5 (0 صوت)

10-24-2011 01:24 PM
كلامك صاح ياجبرة


#230047 [واحد معجب ]
0.00/5 (0 صوت)

10-24-2011 12:45 PM
واللة ياجبرا امكن يكون من عدم الفهم او يكون من عدم المعرفة ولا اقول ليك امكن يكون من قصر النظر وبكرة يا سودانا تكبر وتبقي احليييييييييييي ;( ;( ;( ;( ;( ;( ;( ;( ;(


#230041 [orass]
0.00/5 (0 صوت)

10-24-2011 12:41 PM
يا أخي ديل حالفين ما يعملوا ليهم حاجة الناس تذكرهم بالخير ويقولوا ليهم كتر خيركم.
لازم يسبوهم ويذكروهم بالسوء .. من شاكلة (الله لا كسبكم , الله يا خدكم, الله ينتقم منكم) غوروا جاكم بلا.


#230036 [mokhtar]
0.00/5 (0 صوت)

10-24-2011 12:36 PM
معقولة يا أستاذ!!!! دي دايره ليها درس عصر ... عبدو الميكانيكى قصدوا إنو الحبر الملون غالي و كدا ..... و ما في داعي نكتر الألوان و كدا.


#230032 [الزول الكان سمح]
0.00/5 (0 صوت)

10-24-2011 12:31 PM

معقولة!!!يا استاذ جبرا؟؟ إنتا راسك فاضى؟؟

طيب لو كان مليان كان كتبت شنو؟؟ دى زى الواحد ولع سيجارة حمرا وفا كرا لون زينب...

أنا اقترح طباعة العملة على ورق البردى عشان نرجع لعهد التجارة البكماء لأنو المرحلة تستخق ذلك


#230027 [ودالبحر]
0.00/5 (0 صوت)

10-24-2011 12:28 PM
الغريبة انه راسك الفاضي الحاله ؟ يعني كان مليان بالهنايه ديك كان كتبت شنو ؟


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة