المقالات
السياسة
ارشيف مقالات سياسية
البشير قرر أن يساند سوريا ,, هيــع الأسد النتر
البشير قرر أن يساند سوريا ,, هيــع الأسد النتر
10-25-2011 03:39 PM

البشير قرر أن يساند سوريا ,, هيــع الأسد النتر

أسماء الجنيد
[email protected]

سلام اهلنا قرآء الراكوبة ,, التحية للجميع


شوفوا يا اهلنا محن اللسد النتر , هيـــع فات الكبار والقدروا
والله حيرتوا فرعون في قبره بي عمايلكم يا بنو جكة,!!!

البشير: سوريا تتعرض لمؤامرة خارجية (
الخميس, 20 تشرين1/أكتوير 2011 05:
ـــــــــــــــــــــــــــــــــــــــــــــــــــــــــــ
تلقى الرئيس عمر البشير أمس رسالة من نظيره السوري بشار الأسد، أبلغها المبعوث الشخصي فيصل المقداد نائب وزير الخارجية، تتعلق بالأوضاع الجارية في سوريا والإصلاحات التي تسعى إلى إجرائها القيادة السورية.

وأكد البشير أن العلاقات السودانية السورية حافظت على تطورها الدائم لما فيه مصلحة الشعبين والبلدين الشقيقين، مشيراً بعد استقباله المقداد إلى أن سوريا تتعرض لمؤامرة خارجية بسبب موقفها الثابت من القضايا العربية، وأن أي إضعاف لسوريا ما هو إلا خدمة مجانية لأعداء الأمة العربية.
وأوضح البشير أن المؤامرات التي تخطط لها بعض الدوائر لا تستهدف بلداً عربياً بحد ذاته، بل أنها تستهدف جميع الدول العربية، مؤكداً أن السودان يقف مع أمن واستقرار سوريا، وضد أي تدخل أجنبي في شؤونها الداخلية.
وشدد البشير على أهمية التضامن العربي الذي يضمن مصالح جميع الدول العربية إزاء التحديات التي تواجهها.

الانتباهة)
((ألخبر منقول من سودانيز اون لاين))

محن والله على قول حبوبتي الله يديها ألف عافية
إنت وخالك بقيتو تخرفوا وتهضربوا نص النهار, وده ياهو الخوف ابو كديس
عليك الله إت بي صحك بتدور تساند بشار وسوريا !!!, ولا دي كضيبة منك ساي وهوشة متل هوشاتك في حفلاتكم البتفنجط فيها برا سبب
هسه المحتاج للمساندة منو في زمتك دي ؟ كان عندك باقي زمة !!!
غتست حجر البلد ومرمطت سمعته في الوحل ومسحت كل ملامحنا الجميلة, بدل ما تحاول تعدل الحال كان بنعدل ولا تحل إنت عن سمانا بي عصابتك الملقطه بعناية فائقة ومدربهم حسب هواك,
بعدين يا الناجح الفالح قالوا الغرقان بتمسك بي قشة ,, وبشار خلاص بقى يفرفر في خراج الروح
بعدما قتل وعذب ابناء بلده واغتصب حرماته ,, بقى يقابض في الهواء للمخارجة , ولقاك إنت الضبانة الواحده الفضلت تنوني في رمتها , قال اخير اليهشك كان يلقي فيك فرقة ,
لكن فكرك هسه لو في مبارك ولا القذافي الله يرحمه بقبل عليك ؟ ولا بناغم إضنيك ؟
حاشا وكلا .. عاااااااارفك هنبول وجهلول وبتنقز في الفارغة بالعرض والطول ,,
وإنت إن فاكر في نفع ليك في الأسد وبتدور تبدر بالسبت عشان تلقي الأحد يوم زنقتك .. تبقى بالحيل غلطاااااااان وطفشاااااان من الحقيقة المرة ,, الأسد ده خلاص زمانه فات وغنايو مات , وبقى تيس في زريبة يلبلب ساي لامن يجي وقت ضبحو , مافي منفعة منو تــــــب , بتضارا ورا أي حيطة قصيرة ,
دحين نصيحة لوجه الله تعلى ’ ابقى في رقبتك دي . شوفلك مخارجة من بدار, والله اليسويها فيك ابو العفين علا تغرقكم كلكم لآآآ الإضنين , وتبقوا تدافروا وتعافروا وقت الحارة , والفضيحة تبقى بي جلاجل
يبقى الشعب الطيب المطحون ده , يتضارا ليكم بي إسم السودان , إسم السودان المرمطتوه بي قلة عقلكم وكترة مصالحكم
وبيعكم للزمم ومتاجرتكم بالدين , , ناسين اليوم الفيهو الخلاص بلا رصاص ’ من رب عادل فوق كل ظالم جبار.
شكيتكم لي الله, لي يوم باكر بصيرتكم مليسة تــــــــــــب ومصمتة ومشمعة .
فاكرنها فلاحة وضراع . وفاكرين السياسة رجالة وبلطجة .
حليل الحكام وهيبتهم ,وحليل هيبة السودان في ساسته وفكرهم وعلمهم,
اتلقطوا وجيتونا من وين عليم الله . كلكم من طرف شبهينا واتلاقينا , لا علم لا فهم . لا عدل , لا دبلوماسية ولا سياسة ولا وطنية
معلمين الله من كلو ؟ وحكمة الله جامعين كل الصفات الشينة ومحتكرنها برااااااااااكم تحمدو سيدكم
كضابين ومنافقين وشحادين وهوراطين وخوافين وحرامية وبعد ده كلو بتجاروا بالدين .. والمصيبة محسوبين علينا سودانيين !!!
نقبل وين ونمشي وين من فضايحكم الملت الدنيا . التاريخ الجاي للأجيال القادمة حا يكون تاريخ اسود وأزفت من الطين .
لو في طريقة الأجيال القادمة يتجاوزوه بي خيرو وشره . ما يدرسوه لي اولادنا نهااااااااائي
عليكم الله حصة تاريخ بتحكي عن حياة ابو العفين منو البقدر يحضرها ؟؟؟
هسه كدي قوم انفض مركوبك ده وطقطق ضهرك وشوفلك بلد تجري عليهو . اصلو غير الجري واللبدة مافي ليك مخارجة ولا لي رفاقتك ضمة
ولا اقول ليك امشي لم ناسك الغتسوا حجر زلطك ديل , واهبرهم من طرف أبدأ بي كرتي ده ولفخوا بي قرعته الحايم بيها دي , ونط لي ابو العفين في رقبتو وقطع إضنيهو , وطفلك المعجزة ده ساهل , ابطحوا في الواطة ومحطوا في ضهروا لامن يكورك واطرده للشعب برا في الشارع يتم الناقصة, والبقية افتح باب القصر لي عامة الناس وقول ليهم عندنا حولية خبت, ونفير لبع وخنق , تعالوا اخبتو من طرف وكل زول يخلص حقو , وإنت في النهاية قطع شك بتلقالك لفختين تلاتة , لكن بتكون أرحم من تقع فيك كلها براك , اتفشى حقك إنت قبال ما يتفش فيكم الشعب الميجوع 22 خريف
امانة مي وقعتكم سوداء ويومكم ليلو طويل طولة نومة اهل الكهف
متاوقة
ــــــــــــــــــــــ
لو يا البشير داير تساند بشار الأسد
وراجي من يساندك , اخيرلك أمشي أرجى الله في الكريبة , واخدلك نومة بي شخرة وفيها حبة هضريبة
امانة مو راجياك هجائم قدر هجايمك السويتها لي خلق الله يا ابو جاعورة
يمهل ولا يهمل
ودعتكم الله
أسماء الجنيد


تعليقات 17 | إهداء 0 | زيارات 3913

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#231768 [من شباب الثورة]
0.00/5 (0 صوت)

10-27-2011 11:57 AM
يا بنت الجنيد الاسم المقترح الجديد للسودان هو شلعووووووووووووووووووها الكيزان


#231385 [babiker]
0.00/5 (0 صوت)

10-26-2011 02:36 PM
اشكرك.كما قال الاستاذ العبقري أحمد سالم في سلسلة مقالات إن الكيزان ليست لهم علاقه بالشعب السوداني انما هم مستعمرون للسودان ويساندهم THE TOP DOGS


#231333 [أبو توفيق ]
0.00/5 (0 صوت)

10-26-2011 01:19 PM
والله يا بت الجنيد نشفتي ريق الجماعة تب وخليتيهم اصغر من النمل وعلى الطلاق انتي بطلة وفتي ابان شنبة ودقون في الشجاعة ( أكيد فارسة بت فرسان ) والكلام البتقوليه ده والله رجال جعجاعين ما يقدروا عليه وكان الواحد قال ليه كلمة من البتكتبيه ده يرجف من أخمصه لي عن شعر راسه ده كان ما ........... في هدومه


#231194 [عبد الله ]
0.00/5 (0 صوت)

10-26-2011 09:01 AM
أخاف يجي يوم نجعر على أبو جاعورة . وما نلقاه .


#231116 [مدحت عروة]
0.00/5 (0 صوت)

10-26-2011 01:33 AM
يا جماعة هى مؤامرة خارجية على سورية و الاسد الصغير و من قبله الكبير كمان الاسد الصغير ورث من ابوه الحكم و الجيش السورى بيحارب فى الجولان و باقيه محاصر القدس لاسترجاعها من بنى قريظة يقوموا يجوا الخونة من الشعب السورى و يحاولوا اسقاط النظام و يطالبوا بالحرية و الكرامة و الديمقراطية؟؟؟ هسع عليكم الله دى ما خيانة من الشعب السورى؟؟؟ اهم الحرية و الديمقراطية ولا اهم محاربة بنى قريظة و استرجاع القدس؟؟؟!!! و حتى لو الجيش و القيادة السورية عندهم حول فى عيونهم ما نصبر عليهم شوية يمكن غلطوا !! هم قاصدين يضربوا اسرائيل لكن بالغلط ساكت جات فى الشعب السورى!!! انتو مالكم ما عندكم صبر يبل الآبريه؟؟؟؟!!!!


#231110 [zein]
0.00/5 (0 صوت)

10-26-2011 01:19 AM
موقف البشير من المرشح الرابع للحفرة بشار باْمر من احمد نجاد .


#231038 [شمالي]
0.00/5 (0 صوت)

10-25-2011 10:21 PM
عفيت منك يا بت الجنيد
كتابتك بالدراجي قمة في المتعة
وفعلاً إنتى سودانية لكككككككة
شكراً على المقال ذو النكهة الخاصة


#231029 [ahmed]
0.00/5 (0 صوت)

10-25-2011 10:04 PM
طيب يا بشكير الشعب السوري يموت بسبب بشار وليس مؤامرة خارجية ___ اطفال , وعجزة ومسنيين شباب سوريين ذي ما انتا زرعت مؤامرة داخلية وليست خاجية لقد سئمنا من الحجج التي لا تروي العطشان وتشويه سمعت السودان عند الشعب السوري بعد ما خسرت الخليجيين بسبب سياساتكم مع المجوسسين احمد نجاد الان لقد خسرت ايضا الشعب السوري الذي نظامه قد يسقط في وقت .


#231012 [ود الجنيد]
0.00/5 (0 صوت)

10-25-2011 09:25 PM
يابت الجنيد بارك الله فيك .واريتو (العجب امو) كما يسميه الوالد ان يعمل بالمثل السودانى القائل (اخوك لو حلقو ليهو بل راسك)وان يخيل لى انو اخوانو الحلقو ليهم ماشاء الله كتااااااااار الظاهر عليهو انو الحلاق شغال شغل نضيف على العموم مفروض زى الميعاد ده حسب قولك الزول ده يتخارج وهو وناس اوكامبو خليهم يمشو يطلعو الخلا سااااى ده اذا عايز يختصر الموضوع ويسهلا على رقبتو ولا شنو


#230965 [انس التوم]
0.00/5 (0 صوت)

10-25-2011 07:45 PM
ساندو عشان اساندك لانك عارف انو قيامتك قربت تقوم وعلى الدرب سائرين


#230921 [كوكو داجو]
0.00/5 (0 صوت)

10-25-2011 06:22 PM
الرئيس باراك أوباما فى حملته الإنتخابية الأولى كان شعاره التغيير آتى change is coming وهذا مقصود به تغيير كل المتحكرين على مقاعد الرئاسة وخانقين الشعب الغلبان سنين عددا وكما نشاهد اليوم ذهب منهم ثلاثة والباقى إثنين بشار و صالح هؤلاء لازم يركبوا التونسية فى هذا العام 2011 ، و الباقين شكلهم برضو راكبين التونسية بس إبتداءا من العام المقبل الفترة الرئاسية الأمريكية التانية لأوباما ولو لم يفوز أوباما الرئيس الجاى برضو حيكمل مشوار التونسية مع ديناصورات جميع الدول العربية و فى مقدمتهم بشبشنا المطلع زيتنا ،،، ويسلم قلمك يا بنت الجنيد ،،،،


#230904 [شادي]
0.00/5 (0 صوت)

10-25-2011 05:53 PM
احيك الاخت الكريمةماتضايقي بارواقة_اسي لوقالواليك بساندبتصدقي يساندشنواابولفخةالهبيل داكلام بنات معديات بنات


#230895 [المتيم بالسودان]
0.00/5 (0 صوت)

10-25-2011 05:27 PM
تسلم يداك يا بت الجنيد واللة ما قصرتي معاهم تب وياريت نشوف فيه يوم ;) ;) ;) ;) ;) ;) ;) ;) ;) ;) ;) ;)


#230875 [عفاف]
0.00/5 (0 صوت)

10-25-2011 04:55 PM
والله يا اسماء الجنيد انت وشريفة شرف الدين انا بدخل الراكوبة عشان اقرا كتاباتكم لا فض فوهكن حبيباتى. موضوعية وبسيطة وسهلة ومباشرة وارتو يقرا وكان قرا يفهم الراجل ابو جاعورة دا .. لكن ما اظن
دمتى بعافية


#230871 [سامعك من جواي]
0.00/5 (0 صوت)

10-25-2011 04:45 PM
عاااااااااد اقول شنو الا أقول عفااااااااااااركم عليك
وعااااااد كريبتنا ما بجي اخت في جاعورتي دي
كااااااان كسر رأسوا من فوق
عشااان ما يعادينا بأمراض العنفة دي
الله المستعان ويوم نهايتوا جاء
بس احزابنا وناس المعارضة ابعدوا منوا سااااااااااااي
وما يتشغوا بحقائق الوزارية بتاعت النهاية دي
ولا هم ما قاعدين احضروا أفلام رعب وخياااال


#230852 [عبد الإله زمراوي]
0.00/5 (0 صوت)

10-25-2011 03:52 PM
عفيت منِك يا بت الرجال فشيت غبائن المقهورين في بلد العجايب. الله يعطيك العافية يا شاعرتنا المجيدة.

وياااريت تدينا قصيدة كدة تجيب أجلهم بضربة قاضية. بشار الأسد غارق في وحل تقتيل شعبه ورئيسنا الرقاص لا يرعوي. كان عليه إلتزام الصمت...

القومة ليكِ...


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة