المقالات
السياسة
ارشيف مقالات سياسية
المدفع الرزام الهزا ألبلد من ليبيا لي امدرمان
المدفع الرزام الهزا ألبلد من ليبيا لي امدرمان
10-28-2011 10:37 AM

المدفع الرزام الهزا ألبلد من ليبيا لي امدرمان

أسماء الجنيد
[email protected]

الإخوة والأخوات قرآء الراكوبة حبابكم ألف

مدفعنا الرزام هزا البلد من ليبيا لي امدرمان وبالعكس
بأثر رجعي , وبما إنه اجواد ولما يعمل الخير بي يمينه لا تدري شماله , لبد فد لبده لامن الزول أنقرض وراح في شأن الله والرسول ,, ولامن عرف الفراش رفعوه , ودفنوا الجنازة الكانت عاملة ليه ورزابة , وخلتوا بالحيط يتدبا ويتضارا ,
حتى بعد داك قعد في نص السرير وجوعر زيــــــــــــــن مرق باقي خوفته . وعض جلابيته وهاك يا جرية لي اقصى الشرق . وفتح حلقوموا وقعد يفكفك في دليبه وكضبه المكرضم , وبرا خجلة قدام الضيوف وقدام الأجانب , البقوا يتكشموا ويضحكوا في العرة اب خوفا برة ,,
لكن يا رئيسنا لقيتك مرعة لامن بي هناك !!!! هوارط سااي في الهواء خوفك ينوموا بي شفعنا جت عليهم من طرف,,
عليك الله ما بتخجل يا اب جاعورة ؟؟
كمان بتتحلقم وتتفوجج وتتراجل ؟ وفي شنو ؟ في جنازة تحت التراب !!!!
عيبتك دي الحريم المرعات ما سونها , الله يخيبك ويخيب البارينك والبمرقوا يطبلوا ليك , كاربين بطونهم بي جوعها وشفعهم مرضانين ويطبلوا في شنو ما عارفة ؟!!!
الرجالة ام حلقوم والفوجاج اب ضراع السويتو البارح في كسلا يا ديك العدة , برا الخراب ما منك فايدة
ما قدرت سويتو زمان مالك ؟ أول مرة نشوف لينا زول بتسدا بعد 3 سنة ؟؟؟ القذافي بعدما مات وشبع موت إت ترجف في حوشك ,
كلامك ده ما قدرت تمرقه إلا بعدما عرفتو إندفن تحت التراب وفي نص الصحراء , وما بعيد بعد ده تهضرب بيه وخايف منه زي البعبع
ياهو صابونك الكان بمرق عفنكم في السهلة , وشوكة الحوت الواقفة في نص حلاقيمكم ,
خجلت ليك يعلم الله وبقيت اتضاير ليك , وخليت الشعب كلو يتضاير من خوفك يا المرعة شيال القرعة,
فلاحتك في اهل بلدك , العزل والمهمشين , تطحن فيهم وتنحشر تحت سريرك,,
سلاح شنو البترسلوا إنت تتسدا بيه ؟؟ قال الصاع صاعين ؟؟
الصاع القلت اتسديتو صاعين يا رمة ابو العفين , ده حصل زماااااااااااااان من سنة 2008 !!! كان كلامك صاح , ما كان تبقى راجل وترد الضربه في وقتها ....
الزمن ده كلو الحاميك تفكفك كضبك شنو ؟!
ولا خايف من السم القدر غداك ,؟ ما عرفت تكضب في الراجل إلا بعدما عرفتوا مات وشبع موت!!!
بعد ده ارجى الراجيك , كان فاكرها فلاحة بتخلي ثوار ليبيا يقيفوا معاك في التقيل الجاييك , تبقى غلطان , الكضبة السويتها فيهم دي بتجيك صادة قريب , شوف البخارجك شنو ؟
والله ذكرتني شفع الروضة والخوافين تحديدا , الشافع يكون ما قادر يشيل لعبته من رفيقه
اول ما يشوف امه يمسك في طرف توبها ويحشر رويسو فرق كريعاتها
ويقعد يجعور ويأشر بي اصبعو ويكورك , يمة فلان دااااااااااك شال لعبتي اول امس, ولا اليوم دااااااك,,,,
اها إت يا الفالح بعدما خلاص عرفت روحك كألعاده بتجعجع في الهواء وبعيد من الأسود والنمور الكانت بتبلعك كلامك ناشف بقيت تتفاصح
سمح وكت عندك سلاحا حرر ليبيا وقتل رئيسها. النبي فيك حرر لينا حلايب , وما تبلع كلام ك الأولاني الزمان,..
ما تنسا حلايب سودانية مية المية ,, وشبر قلت ما بتديهو للمصاروة.
وحرر لينا الفشقة , الله يشق فاخورتك الفاضية دي ويريحنا من كضبك البقى زي عصايتك البتنقز بيها في الفارغة ,
شاحده الله ناس قطر ديل يقبلوا عليك ويخلوا قطرك يصفر الضحى الأعلى
منظرك امس بتخطب في ناس كسلا بي هبل ورعونة , ضحك فيك ضيوفك , يعلم الله الكاميرا جابتهم يتضايروا في ضحكتهم ويتوسوسوا فيك ,,,
رئيس بهلواني بحق وحقيقة ,,
عليك الله لم نفسك عليك وتاني ما تخطب في أي مناسبة , خاصة الفيها ضيوف واغراب , لوما داير تحترم روحك , خلي حبة إحترام وهيبة للشعب المليتو وجع بي عمايلك وفضايحك ,,,
الله يخلصنا منكم بركة جاه النبي ويخلص حق الغلابة الليله قبال باكر,,
يمهل ولا يهمل ,,,

متاوقة
ــــــــــــــــــــ
دخول البشير كسلا امس بالصديري , بلبصة واااضحة وضحك على الدقون
الموجع المؤلم رقيصو وجواعيرو في نص البلد وسط الطبالة , وما زال دم ابناء كسلا في شوارعها لم يجف بعد .... عجبي !!!!

ودعتكم الله
أسماء الجنيد


تعليقات 16 | إهداء 6 | زيارات 3284

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#232715 [sheeria]
0.00/5 (0 صوت)

10-29-2011 05:38 PM
عسل والله يا بت الجنيد الله يديك العافية


#232646 [babiker]
0.00/5 (0 صوت)

10-29-2011 02:18 PM
لك التحيه اولا.اهل كسلا كتلم الجوع والسل و هو يقول ساعد ثوار ليبيا طبعا الكلام يدل علي ان بشيرنا لا يدري بما يدور في البلد لا إقتصاديا و لا جغرافيا و هو لا يدري بان الجنوب إنفصل و لا يدري با حتلال حلايت و لا الفشقه و مثلث إلمي و ننوي ولا يدري بانحطاط السودان في عهده.اختي السودان الان مصاب مريض لا ينفع مع جسده المنهك إلا بتر اسباب المرض وهي بدأت منذ الصادق عبدالله عبد الماجد ثم إنتشرت البزره الخبيثه في السودان . إذا علينا المعالجه من الجذور .


#232436 [صلاح الامين عرقوب]
0.00/5 (0 صوت)

10-29-2011 02:37 AM
والله يابت الجنيد ماقصرتى تب ، اديتيهو حقو وزيادة كمان ، لا املك سوى ان اقول آآآآآآآمين يارب العالمين للدعوات السمحات القولتيها فى نهاية الابداع


#232431 [mohammed osman]
0.00/5 (0 صوت)

10-29-2011 02:19 AM
تتخيلى ان لى زمن يا استازه اسماء ماضحكت خالص الليله اتشرطت باالضحك لى ابجاعوره اب رياله نافوره .ها ها ها ها.................


#232415 [واحد كسلاوي]
0.00/5 (0 صوت)

10-29-2011 01:05 AM
صديريتو دي ما صديريتنا
اللبسوا ليها ما ترزينا
هل شفتو في الجمع شبهنا
قريب كده تشوف ان شاء الله عرضتنا


#232282 [سمارة]
0.00/5 (0 صوت)

10-28-2011 04:56 PM
الله يعافيكي يابت الجنيد
تب ماقصرتي


#232274 [mustafa]
0.00/5 (0 صوت)

10-28-2011 04:18 PM
هسي كان ثوار ليبا ديل قالوا لينا كانت معاكم الكاميرا الخفية اب جاعورة دا بمش وين ؟؟؟؟؟؟؟؟؟؟؟؟؟؟!!!!!!!!!!!!!!!!


#232255 [الرئيس الجعجاع ]
0.00/5 (0 صوت)

10-28-2011 03:20 PM
يا سلام عليك كلامك ملئ بالتراث الشفاهي الممزوج بالسياسي احييك على كتاباتك المميزة ناخد فائدتين زيادة الامثال والمصطلحات الشعبية الاصيلة ( الرجالة ام حلقوم والفوجاج اب ضراع السويتو البارح في كسلا يا ديك العدة , برا الخراب ما منك فايدة )

هههههههههههههه
الفوجاج أب ضراع
الرجالة ام حلقوم
ديك العدة
برا الخراب

معجب الاسلوب اها خليني ازور ليك الاغنية بتاعتهم واعل ليها سمكره بي ميزاني الشخشي

الكلمات الاصلية:
مدفعنا الرزام هزا البلد من ليبيا لي امدرمان وبالعكس

بعد السمكرة

الرئيس الجعجاع ضيعت البلد
عملت فيها شجاع حريف يا ولد
الراجياك احملها
حكومة الانقاذ حكومة كذابة
قسمتو البلد وقفلتو ابوابا
الراجياك احملها
نهبتو قروشنا خليتونا غلابا
شحدتو باسمنا كرامة اليابا
الراجياك احملها




الانقاذ


#232228 [سامة شرف الدين]
0.00/5 (0 صوت)

10-28-2011 01:49 PM
لا فض فوك يا أسماء الجنيد ...والله أديتي للراكوبة طعم ورائحة دعاش لينا سنين منو ...داومي واتحفينا بالحقيقة السهلة والبسيطة وفي المليان بالتمام والكمال ....شكرا ليك تاني وتالت والف شكر


#232199 [بلتعة]
0.00/5 (0 صوت)

10-28-2011 12:16 PM
يابت الجنيد دا أبو جاعورة الطلع ماسورة. هييييييييييييييييييييييييييييييييييييييييييييييييييييييييييييييييييييع


#232191 [khalid ali]
0.00/5 (0 صوت)

10-28-2011 11:50 AM
كلامك سمح بيفش ان شاء الله تكونى شجاعه و كلامك ده من جوه ما لازينك ناس الحكومه عشان تفشى السودانيين فقط مثللما يحدث بركن المتحدث بحديقة هايدباركب بانجلترا


#232180 [محمود ]
0.00/5 (0 صوت)

10-28-2011 11:19 AM
و ما بضرب ميت ايلامي

الزول في الرقاد شيقو البريحو بخبرو والزول البليد بيدو بحفر قبرو

انا ما بفسر وانت ما تقصر


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة