الليلة جيت شايل الفرح
08-03-2010 04:05 PM

حاطب ليل

الليلة جيت شايل الفرح

عبد اللطيف البوني

يبدو أن كلام أحد أعمامنا الذي قال (السودان دا ربنا بريدو) صحيح وإلاّ قلْ بربِّك في قمة الاحتقان السياسي وشيل الحال.. من تقرير مصير إلى جنائية.. ومن دارفور إلى مشاكسات الشريكين فجأة يطل علينا ما يفرحنا ويدخل البهجة في نفوسنا، ليس على المستوى الخاص بل على المستوى العام؛ (بيني وبينكم ) المسافات تلاشت بين العام والخاص، وكما قال شاعرنا الكبير المُجيد محمد المكي إبراهيم: تركنا الغناء للوطن واتجهنا للحبيبة فوجدنا الحبيبة الوطن ووجدنا الوطن الحبيبة؛ فالوطن عبارة عن شجرة واحدة إما أن تخضر وتزهر كلها أو تذبل كلها، فلن تتباين أغصانها إلاّ في الطول والقصر. عودة إلى موضوعنا وإن لم نخرج عنه، فوسط هذه العتمة والحصار النفسي من جهة السياسة تهطل الأمطار وتعم ربوع السودان (الخبر الأكيد قالوا البطانة اترشت).. كل مناطق الزراعة الآلية في القضارف وماحولها، والدالي والمزوم تقول الأخبار الواردة منها إنها استقبلت كميات من الأمطار تفوق المُعدل، وغرب السودان كذلك حتى المناطق المهددة بالزحف الصحرواي يُقال إنها (اترشت). ولكن تبقى الحسرة على دارفور فالمطر جاء ولم يجد المزارعين لأنهم في المعسكرات، وليتها معسكرات آمنة! فالدواس انتقل إليها فنزح النازحون منها فأصبح نزوحًا مُركبًا. عودة إلى موضوعنا وإن لم نخرج عنه، فبالأمس القريب أصاب فريق الهلال بوابل من الأفراح حيث عزّز انتصاره في أم درمان الذي كان 5/صفر بثلاثة / صفر على كابس يونايتد الزيمبابوي، فخرج شعب الهلال في القرى والحضر فرحًا وهاتفًا باسم الهلال. عندما رأيت أطفال قريتنا يغنون باسم الهلال طربت من أعماقي وقلت الحمد لله أن جعل في السودان ما يفرح له أطفال السودان، واقتربت منهم وعلمت أن بينهم مريخاب فخفت عليهم من أن يكبروا ويجدوا إعلام التعصب فيكرهوا انتصارات الهلال الدولية كما هو الحال مع الهوس الكروي الموجود في بلادنا اليوم. عودة الهلال وهو منتصر ومتأهل لدوري المجموعات ذكرتني بأغنية حمد الريح (الليلة جيت شايل الفرح قصدك تعوضني اللفات )، وذكرتني بأغنية وردي السياسية (ياحارسنا وفارسنا ويابيتنا ومدارسنا كنا زمن نفتش ليك جيتنا الليلة كايسنا). قد يقول قائل إن فرحتنا بانتصار الهلال تجعلنا نظهر وكأننا (مودرين لينا فرح)، وهي فعلاً كذلك ولكن الكرة في عالم اليوم أضحت سفارة وتجارة وهوية، ولبنة في صرح البناء الوطني، وممسك من ممسكات الوحدة لذلك تبذل الدول الغالي والنفيس فيها إلاّ السودان، فالدولة فيه يمكن أن تصرف على أي شي إلاّ الكرة. ولكن، بارك الله في الشعب السوداني الفضل فهو يصرف عليها من دم قلبه، فالرياضي يشجع، ويدخل الإستاد، ويتابع التمارين، ويقرأ الصحيفة، ويستقبل الفريق المنتصر، ويبكي ساعة الهزيمة. الهلال اليوم بعد أن تركه صلاح إدريس مُعرّض إلى إفلاس تام، فهو غارق في الديون، ومدربه الذي استبشر به الجميع حقيبته جاهزة، وكذا المحترفين الأجانب والمحليين.. بالمناسبة، الهلال انتصر في هراري بدون أي لاعب أجنبي . المريخ هو الآخر مهدد بالإفلاس بعد استقالة جمال الوالي اليوم، فذهاب الرأسماليين العديلين الرياضيين صلاح وجمال يعني أن مرحلة الرجل الذي ينفق على النادي خمسمائة مليون في الشهر قد ولّت، وعليه لابد اليوم قبل الغد من أن يجلس أهل الكرة ويفكروا في كيفية تسيير هاذين الناديين ومدى إمكانية العودة إلى فترة ماقبل جمال وصلاح وكمال (الأخير هذا كمال شداد).

التيار


تعليقات 9 | إهداء 0 | زيارات 2074

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#13194 [عبد العزيز النور]
0.00/5 (0 صوت)

08-05-2010 01:11 PM
عودة الهلال وهو منتصر ومتأهل لدوري المجموعات ذكرتني بأغنية حمد الريح (الليلة جيت شايل الفرح قصدك تعوضني اللفات )، وذكرتني بأغنية وردي السياسية (ياحارسنا وفارسنا ويابيتنا ومدارسنا كنا زمن نفتش ليك جيتنا الليلة كايسنا). قد يقول قائل إن فرحتنا بانتصار الهلال تجعلنا نظهر وكأننا (مودرين لينا فرح)، وهي فعلاً كذلك ولكن الكرة في عالم اليوم أضحت سفارة وتجارة وهوية، ولبنة في صرح البناء الوطني، وممسك من ممسكات الوحدة لذلك تبذل الدول الغالي والنفيس فيها إلاّ السودان، فالدولة فيه يمكن أن تصرف على أي شي إلاّ الكرة.


يشهد الله نحن (مودرين لينا فرح) حتى الكورة ( القربنا نبقى فالحين فيها) والظروف الدايرة تجيب لينا كاس فى بلدنا(بطولة المحليين) .الوزيرحارسنا وفارسنا ماجد سوار ,حالف اسوى لينا سور يبعدنا بيهو من العالم .
ياوزير ماقلنا ليك أدعم الكورة ... لكن كمان ماتودر لينا دعم الفيفا.

أستاذى الجليل;(النبى والرسول كان تقول شجرة واحدة , لانو ذاتو الشجر انواع فيهو النخيل والنقة والجوافة واللعوت والمسكيت).
لك التحية


#12954 [فنجال السم فج الدور]
0.00/5 (0 صوت)

08-04-2010 08:01 PM
هل شجرة الوطن يا د البوني مثل شجرة ود المكي التي قال عنها
(الكوخ المائل لايهوي00000والشجر الزاوي ليس يموت0000ولناس لها اعمار الحوت)
ام شيئ اخر سهل الاجتثاث كثير الزبول والافول لا يستطيع ان ينهض عل سوقه ولا يعجب الزراع؟؟؟؟؟؟؟؟؟؟؟؟؟؟؟؟؟؟؟؟؟؟؟؟0


#12805 [ميزووو]
0.00/5 (0 صوت)

08-04-2010 12:58 PM
تحية احترام وود وتقدير الي ود الحلة الدكتور عبد اللطيف البوني الكاتب الشفاف الذي يكتب بكل مهنية وغير مطبلاتي لل 00000000000 ونرجع لموضوعنا اولا يادكتو ر البوني الهلال موسسة عريقة عراقة التاريخ يذهب صلاح وتبقي الموسسة وانشاء الله حايكون في مليون صلاح ومن الافلاس ماتخاف علي الهلال بكرة الكبار بظهرو وبدعمو الهلال امثال طه علي البشير والكاردنال وغيرهم كثر وحواء الهلال ولود يادكتور البوني
بس ناس الوصيف الخوف عليهم هم لانو الوالي كان الدعم بتاعوا من 0000000 وطبعا الجماعة قالو ليهو ياقدم استقالتك ياشوف ليك مكان بقرة حلوب غيرنا لانو نحنا صابر ده كرهنا الدولار والرجل مؤدب جدا مارد عليهم الابكلمة حاضر
ونرجع لااطفال قريتنا الحبيبة لعوتة الكرم والجود من حق الهلالاب فيهم ان يفرحو غاية الفرح وحقو المريخاب ينقلبو لانهم صغار لسه بعد اكبرو بتبقي ليهم صعبة شوية
ونجي للكبار بالله كيف حال العم جادين محمد جادين والعم علي جودو مع خروج الحمام الميت والله تمنيت لوكنت في هذه الايام موجود في الحلة عشان امشي الزنكي واستمتع بنقاشات الاسطورة مصباح محمد الطيب والكباتن عبد العزيز دكين وعبد السلام محمد مضوي واحمد دكين ومالك العوض وجادين محمد جادين والعم احمد الطاهر والعم الاستاذ مصطفي العاقب والعم علي جودو وطبعا ديل مقسومين لمجموعتين والقاسم المشترك الخال عبد الله الطيب لانو لاهلالابي ولامريخابي بس بحب اعيش في الجو العكر وهو فاكهة هذة المجموعات الهلاليه والمريخية ( مزمل سعيد)


#12789 [بت دارفور ]
0.00/5 (0 صوت)

08-04-2010 12:16 PM
والله يا دكتور البوني لو بخاف الكضب صنفتك موتمر وطني عدييييييل كده. والله يكضب الشينة


#12710 [ابو اسامة]
0.00/5 (0 صوت)

08-04-2010 07:29 AM
اشهد الله افتكرت الوحدة او مشكلة دارفور اتحلت .. تجى تقول الهلال .بالغت وشذيت
عديل كده يادكتور فرح بتاع مين ياطيب وشداد قلب الطاولة وكسر الكبابى
والكورة اصبحت فى خبر الفيفا . زيها زى دارفور والوحده ومافى حد احسن من حد
وفريق كابس يادكتور فريق درجة سابعة .. واتمنى الفيفا توقف النشاط لمدة اربعة
سنة عشان نرتاح من المريخ والهلال وباقى الفرق . قال جيت شايل الفرح قال .


#12621 [سوداني مخلص]
0.00/5 (0 صوت)

08-03-2010 07:34 PM
والله يا ابو يوسف وعبداللطيف الزيكم المتشائمين ديل كان ختونا البلد دي بتتصلح وربنا يكضب الشينه يا ابومحمد والله يخلي لينا البوني لو عملو جايزه لاكتر سوداني مخلص ارشح ليها الدكتور طوالي ربنا يديمك بصحه وعافيه


#12595 [ابو محمد2]
0.00/5 (0 صوت)

08-03-2010 05:51 PM
الاخ البونى.تحياتى. فعلا يا اخوى السودان ربنا بريدو والدليل علي ذلك خيراته وامطاره وفعلا الهلال انتصر لكن فى ناس مادايرين رحمة ربنا والفرحة للسودانيين .انت ما سمعت قرار الفيفا وكلام حاج سوار ربنا يكضب الشينة


#12580 [أبو يوسف]
0.00/5 (0 صوت)

08-03-2010 05:08 PM
أعتقد أن مباراة الهلال انتهت 3-1 و ليس 3-0. و عودة إلى موضوعنا و إن لم نخرج منه -كما يقول كاتب المقال- إذا أرسل الله الأمطار تسمعنا نتذمر و نقول \"السيول و الأمطار\" . أما إذا لم يرسل الله الأمطار تسمع \"الجفافو التصحر\" و إلى بقية الاسطوانات المحفوظة صم.


#12577 [عبداللطيف الما بوني !!]
0.00/5 (0 صوت)

08-03-2010 05:01 PM
الوطن ما شجرة يا بوني .. شوف ليك حاجة غيرها !!


عبد اللطيف البوني
عبد اللطيف البوني

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة