إلى عزيزى الفساد
10-29-2011 01:26 PM

ساخر سبيل
إلى عزيزى الفساد

الفاتح يوسف جبرا

عزيزي الفساد
تحية طيبة وبعد

أرجو أن تكون في أتم الصحة والعافية (مع إنو ده شئ مفروغ منو) .. أكتب إليك هذه الرسالة لما بيننا من معرفة قديمة بلغت سنين عددا ، فقد عاصرت نشأتك يا عزيزى منذ أن كنت طفلاً صغيراً يقوم (المسئولون) بتقويمك وتأديبك متى ما أردت أن تمارس هوايتك فى السرقة والإختلاس والمحسوبية حيث كانوا حينها يقيمون لك مجالس المحاسبة ويحولون بعض ما تجنيه يداك عند الضرورة إلى المحاكم المختصة لتحاكم وفق القانون وتنال جزاك الرادع حتى تكون عبرة لمن يعتبر.
عزيزي الفساد :
الآن وقد كبرت واصبحت رجلاً مفتول العضلات عريض المنكبين متين البنيان تعوس وتجول طولا وعرضا غير ابه بآهات المواطنين الذين تفتك بأموالهم وآمالهم وأحلامه فى حياة كريمة رأيت أن أخاطبك عل وعسي أن يرق قلبك و(تخفف اللعب شويه) وترضي (بالقليل) الذي لا يؤثر علي معاش الناس وحياتهم فالناس -عزيزي الفساد- قد وصلت إلى حالة من الفقر في ظل (الهبر واللغف) الذي يتم بإسمك لم تصل إليها من قبل (وقالت الروب عديل) .
عزيزى الفساد :
أكثر ما يدهشني في أمرك هو أنه رغم ممارستك اليومية لعملك البغيض وإكتشاف امرك وعرضه علي الملأ على أعمده الصحف مدعماً بالوثائق والبراهين الدامغة إلا أن أحدا من المسئولين لا يستطيع محاكمتك وأن الحكومة لسبب نجهله لا تستطيع مواجهتك والوقوف أمامك ، لقد تساءلت وتساءل معي الكثيرون عن هذه الحصانة المتينة التى تمتلكها ? عزيزي الفساد - وهذه الحماية التى تجدها ولكن لم نجد لتساؤلاتنا إجابة مقنعة !
عزيزي الفساد :
على الرغم من أنو (عمايلك) بقت ظاهرة وواضحة للقاصي والداني و ما عاوزه ليها أمثله (وإنتا عارفا زى جوع بطنك الما بتجوع) لكن هنالك بعض الأمثلة من أفعالك يحار فيها المرء (عديل كده) ولا يدانيه أى شك في انك قمت بالإستعانة فى تنفيذها بعد مقدر من (الأبالسة) وجهابذة الشياطين كفعلتك تلك التى نجوت فيها ? حتى الآن- عندما قمت ببيع خط (هيثرو-الخرطوم) والشئ المحير كبف إنك استطعت (دغمسة الحكاية) لحدت ما (اللجان الإتكونت) دى كووووووولها ما قدرت تعرف الحاصل شنو؟ والمواطن ذاااتو قنع من الموضوع !
عزيزى الفساد :
خليك من كده .. خلينى أديك واحده (خطيرة) من إنجازاتك (المدهشة) .. أمبارح القريبة دى قرأت في تقرير للبرلمان عن تجاوزات المدينة الرياضية (البقت ميدان باسكت) إنو تم تمليك 42000 (إتنين وأربعين ألف متر مربع) لمنظمة إسمها (أهل الميمنة) !! .. في الحتة دى ممكن (تعمل رايح وما عارف) وتسألنى تقول ليا : طيب المدهش في الموضوع شنو؟ أقول ليك وأنا مندهش من (عبقريتك الفذة) بأن التقرير يقول أن هذه المنظمة غير مسجلة لدى (مسجل التنظيمات) !! يعني منظمة (وهمية) ، بالله يا عزيزى الفساد (دى عملتها كيف؟) والله دى مفروض تدخل بيها موسوعة (غينيس للفساد المدهش) منظمة وما (مسجله) وكم أربعين ألف متر مربع؟؟ (طيب لو مسجلة كانوا أدوها كم) ؟
عزيزى الفساد:
هل تعتقد أن الإسلام يبيح ما تقوم به من أعمال قبيحة شريرة تؤذى البشر وتفقر المجتمع وتهتك نسيجه الإجتماعي ؟ لا يا عزيزى .. عفوا .. إنك لا تعرف ديننا الحنيف لذا دعنى (أديك عينه منو) : عن عائشة . أن قريشاً أهمّتهم المرأة المخزومية التي سرقت ، فقالوا : من يكلم فيها رسول الله ، ومن يجترىء عليه إلا اسامة ، فكلمه أسامة ، فقال الرسول : أتشفع في حد من حدود الله ، ثم خطب فقال : إنما أهلك من كان قبلكم إذا سرق فيهم الشريف تركوه وإذا سرق الضعيف أقاموا عليه الحد ، وايم الله ! لو أن فاطمة بنت محمد سرقت لقطعت يدها ، فأمر النبي بقطع يدها . ( رواه البخاري ومسلم) !!
عزيزي الفساد :
لا تفرح لأنك تسرح وتمرح وتتمدد في كافة المرافق والمؤسسات دون أن يسألك أحد تلت التلاته كم؟ فمهما تراكمت أفعالك القبيحة ونزلت عليها (ستائر النسيان) كما تقول (أم كلثوم) إنما يؤخرك الله ليوم تشخص فيه الأبصار ...يوم لا توجد فيه (حصانة) ولا (صهينة) ولا يحزنون .. (وبعدين شيل شيلتك) !
كسرة :
عزيزنا الفساد ده يكون عامل للحكومة (عمل) عشان تصهين !!



تعليقات 34 | إهداء 3 | زيارات 5685

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#233161 [أبو أواب]
0.00/5 (0 صوت)

10-30-2011 01:25 PM
مقالك يا أستاذ يدرسوه في المدارس، لكنه مقال تلميحي وناسك ديل لو أتهمتهم عدييل كدة ما شغالين بيك خليك من تلمح ليهم.

الخرخرة بتجي بعدين لما يطلعوهم من الخيران

وأروع تعليقين لأبو محمد و السودان الفضل


#233079 [شباب الثورة]
0.00/5 (0 صوت)

10-30-2011 11:49 AM
اتدرون من هو الفساد ؟

الفساد هو البشير بشحمه ولحمه

لن يضرب الفساد مالم يضرب البشير فى عنقه


#232964 [أبو محمد]
0.00/5 (0 صوت)

10-30-2011 09:49 AM
ماكنت تسألو عن حال تعليمنا وجهجهة وليداتنا بين الشقق المسماة مجازاً مدارس خاصة ؟ وكنت تسألو عن حال فلذات أكبادنا الذين لا يجدون ثمن وجبة الفطور ومنو الكان السبب في كراهيتهم لفسحة الفطور حتى لا ينكشف حال فقرهم أمام زملائهم في المدرسة؟ وكنت تسألو عن حال ناس كتاااااااااااااار ماتو من الحسرة بسبب الصالح العام الخلاهم تطلع بت الواحد فيهم للجامعة وما معاها حق الفطور والمواصلات وماكنت تسالو عن الناس القرو في كليات الطب في أرقى الجامعات السودانية بنسب غير منافسة لأنهم دبابين ولمن تجي الامتحانات تفرز لهم امتحانات خاصة تسمى امتحانات المجاهدين وما كنت تسالو عن الأمانة الأكاديمية راحت وين وكل من هب ودب ولخوف المشرف على رسالته ينال درجة الدكتوراه / وماكنت تسألو عن ضياع أخلاقياتنا التي اشتهرنا بها بين كل الأمم ولماذا تحولنا إلى ذئاب ياكل بعضنا البعض ؟ وما كنت تسألو عن الطبقة الوسطى التي كنا جميعاً نتشرف بالانتماء إليها وحينما نتذكر من هم أعلى منا أمثال ولاد النفيدي وولاد الشيخ مصطفى الأمين نذكرهم على سبيل الحكي لا على سبيل الغيرة وعندما نذكر من هم أدنى منا تقسم امهاتنا نصف البطيخة وتنادينا تعال يا ولد ودي البطيخة دي لناس خالتك فلانة أو يخرج آباؤنا في جنح الليل ليدسوا حق ملابس العيد في يد ارملة دون أن يدري أحد في البيت أو في الحي إنهم قاموا بذلك/كنت تسألو منو الفتح صدور السودانيين وغسلها بملح الجفا وماء الحقد الآسن فاصبحنا شيعاً وأحزاباً وماكنت تسألو برضو منو الخلي نصف الشعب إلا من رحم الله يدخل بيتو ويخت الأكل قدام أطفالوا وهو عارف إن حرام في حرام دون أن تطرف له عين/ وماكنت تسألو شنو الخلى الرشوة شيء عادي والعمولات المشبوهة أمر لا يثير الريبة وخشية الوقوف بين يدي الخالق ؟منوالبدل حلم شبابنا وبناتنا من الدخول إلى الحنينة السكرة جامعة الخرطوم ونيل الدكتوراه إلى أن يجدوا فرصة في برنامج نجوم الغد وماكنت تسألو كيف صار أولئك الرويبضة من كان أحدهم يقف يهش الذباب عن وجهه لطول انتظاره في صف إعلان النتائج لأن ترتيبه دائماً مع أخوانا الكنا بنسيرهم لحدي بيوتم (الطيش الطيش لي ربو بيعيش ) كيف صاروا هم أهل الحل والعقد وكيف امتطوا الفارهات وابنتوا العمارات وماكنت تسألوا عن مكانة الكبير وتوقيره ضاعت وين ومنو الكان السبب في ضياعها؟ ماكنت تسألو ........ والله العظيم لوقعدت أطتب مكن هسه لحدي السنة الجاية ما ح أخلص


ردود على أبو محمد
United Arab Emirates [بلاك مامبا] 10-30-2011 08:31 PM
يا أبو محمد يا أخي أنت لا تقل روعة من كاتب المقال نفسه ربنا يديك الصحة والعافية ويخلي ليك وليداتك


#232920 [حمدالنيل احمد]
0.00/5 (0 صوت)

10-30-2011 08:27 AM
ياجماعة الخير ياناس الله ياسادات القصر العالي افيدوني لاني والظاهر كدا اتمتع بقدر كبير من البلاده وقلة الفهم لماذا البلد الوحيد في العالم الحكومتو مابتخجل وتقوم بترقية الفاسد السارق المختلس المزور الذي مكانه السجن اوالمشنقه حسب كل القوانين حتى قانون قراقوش الذي حكم بالاعدام على الرجل القصيرالمذنب وعندما وجدوهو لايلحق حبل المشنقة لقصره قال لهم طيب اعدموا الطويل البرئ واخشى مااخشى ان ياتوا بالمتعافي وزيرا للماليه بعد ان ترقي عبدالرحيم وزيرا للدفاع بعد كل عمايلو التي راح فيها ناس ابرياء ولايهمهم المهم هو المال الحرام اين الاسلام من هذا واين هي لله واين ......واين؟؟؟؟؟؟؟؟؟؟؟


#232911 [نادر محمد]
0.00/5 (0 صوت)

10-30-2011 08:00 AM
يا شيخ جبرا انااحد منسوبى منظمة تسرقون ومن الان حجزنا ارض مطار الخرطوم القديم ومنتظرين الجماعه بتاعين منظمة تنهبون انتهوا من لحس المطار الجديد والمدينه الرياضيه ما حا تخلص الا يوم يبعثون


#232853 [سودانى]
0.00/5 (0 صوت)

10-30-2011 12:42 AM
لو كنت محل الرئيس البشير بعد هذا المقال لطلعته من القصر الجمهورى بجلدى فقط لكن ان جبره يخاطب ناس خرس عمى


#232793 [Nagi]
0.00/5 (0 صوت)

10-29-2011 09:25 PM
عزيزنا الفساد ده يكون عامل للحكومة (عمل) عشان تصهين


طيب قولها عديل كده

الحكومه هى الفساد


#232783 [ابو امين]
0.00/5 (0 صوت)

10-29-2011 08:57 PM
كدى يا جبره لف لينا واحده تانى خلينا نفهم موضوعك ده


ردود على ابو امين
Saudi Arabia [sudani] 10-30-2011 12:43 PM
في الحقيقة لف لينا واحدة خلينا ننسى
اصله الحصل ما بنبلع ولا بنهضم ، يعني نكبر دماغنا ما دام اهلنا مطولين بالهم
وما عايزين اي غلبه . وانا احمل جزء كبير من الحصل للناس العالمة حركات منفردة
ليه تعمل لي حركة براك وتسميها احتياجاتك الخاصة في حين ممكن تتلم على الناس
يا حليتوها
ولا لفيتوها سوا و نسيتو
زا ما نحن عاملين كدة


#232775 [مندهش]
0.00/5 (0 صوت)

10-29-2011 08:39 PM
كسره:
فى الحقيقه الحكومه عامله عمل للفساد


#232743 [الطيب عثمان]
0.00/5 (0 صوت)

10-29-2011 07:27 PM
اكشف اكشف اكشف اكشف ياجبره المستخبى اكشف اكشف اكشف ياجبره اللهط والهبر المستخبى عمودك هذا يساوى محكمه بحالها فى اى مدينة سودانية هات هات هات هات ياجبره مواضيع اكثر سخونه بالله عليك عر ج على جهاز الخربين اقصد المغتربين والذين طولوا غربتنا والماهمتنا ياحلوين هناك الهم بدل واحد يكون همين ذى ما تغنى بها الاستاذ الفنان ودالامين


#232731 [عمر عثمان]
0.00/5 (0 صوت)

10-29-2011 06:32 PM
الاخ جبره لانك ساكن الخرطوم محل الريس ما بصحى طوالى بنوم والطياره بتقع وما بتقوم شايفين ال 42000 متر بتاعت المدينه الرياضيه كتيره يا اخى نحن فى مشروع الجزيره سارقوا منا 2 مليون فدان سرقوا سك حديد سرقوا الاليات الزراعيه سرقوا استحقاقات العاملين الضعفاء اصبحنا نظتظل السماء ونلتحف الارض حس لو عملتوا مدينه رياضيه العندو لياقه يلعب منو


#232728 [وحيد]
0.00/5 (0 صوت)

10-29-2011 06:16 PM
يا عزيزي الفاضل الا تدري ان فساد اصحاب \"الايادي المتوضئة\" هو في الحقيقة صلاح؟ و ان من صيحات \" هي لله لا للسلطة و لا للجاه\" تجب ما قبلها و ما بعدها من فساد؟
الا تدري ان النظام الاقطاعي يحول الارض و الموارد و غلتها بما فيها البترول - و حتى الناس الغبش من غير اصحاب الايدادي المتوضئة ، يحولهم الى \" املاك\" للاقطاعيين يعملون \" بي بطنهم\" او اقل من ملء البطون و يدفعون كل ما يكسبون الى \" اسيادهم\" من الاقطاعيين؟ و لا يعتبر ذلك فساد بل \" حق\" من حقوق الاقطاعيين؟ احد الملوك القدامى بعد ان وصل الى الى درجة الانقاذ من الفساد اصدر مرسوما بان كل عروس جديدة يجب ان \" يفترعها\" الملك و يعطي البقية لزوجها! و نحن الآن في انتظار قرارات \"اسلاموية\" تعطي المجاهدين و الشيوخ نفس هذا الحق لزوم \" التبريك\"! و هذا ما تبقى


#232708 [ابو السارة]
0.00/5 (0 صوت)

10-29-2011 04:59 PM
والله يا جبرة يا اخوي ماعايز احبطك...لكن انت بتاذن في مالطا وقد اسمعت لو ناديت حيا...الشعب السوداني انتهي خلااااص وشباب اليوم لايدرون مايحدث ولايريدون ان يدروا فهم مشغولين باشياء اهم...الهلال ,المريخ,اخر صيحات الموضة والموبايلات,واحمد الصادق عندو حفلة وندي سخانة عندها صبحية...الجوع والفقر والمرض يلتهم البسطا من ابناء بلدي والفساد اصبح يمشي بينهم واثق الخطي ظاهر وواضح زي عين الشمس واااحد بس بقول ليهو جر مافي....في اكتر من انو يغتصبوا اخواتنا قدام عيونا؟؟؟البياكل وجبتين يقول الحمدلله والباكل وجبة واااحدة يترع ويقول الحمدلله في ناس مالاقييين والبياكل يوم بعد يوم يقول نعمة,في ناس ماتو بالجوع...شباب ضائع واحزاب طائفية اكثر ضياع همها الاول حصتها من السلطة وكوما قدر شنو....وشخصيات سياسية اكل عليها الدهر وشرب ليس فيها من هو مستعد للموت من اجل البلد او التضحية لانقاذ مايمكن انقاذه...الفساد لم يضرب اقتصاد البلد فقط,بل ضرب الاهم والاغلي,ضرب المواطن نفسو ودخل اللحم الحي..المواطن السوداني اصبح كذاب ومنافق وجبان وديوث وحرامي..وده اكبر جرم ارتكبوه الاسلاميون في شخصيتنا اللي كانت مضرب المثل بين الدول..تاني فضل شنو؟؟؟ياخي ديل طالعين مظاهرة بيدينو في بشار الاسد بينما يحكمهم من يصبح الاسد مقارنة به مجرد طفل شقي ليس الا.يعني غلفاء وشايلا موسا تتطهر....


ردود على ابو السارة
Oman [kolla] 10-29-2011 09:19 PM
والله يا جبرا ما تغرق في الحفر تقوم تقرصك لينا مصيبة ساكت .. خلي الفساد اقدل قدلتو عشان انت تكتب ونحن نعلق والمواطن اشرب من الترعة زي ما بقولوا اهلنا الحلفاويين


#232703 [ود و]
0.00/5 (0 صوت)

10-29-2011 04:43 PM
اكثر ما أرهقت به الحكومة الشعب هو الفساد بكافة أنواعة (كوميشنات - بيع اراضي - رشوى - محاباة - عدم مساواة أمام القانون - دم تفعيل اللوائح المحاسبية والمالية) والغريبة الشعب السوداني كله يشاهد مايحدث ورئيسنا الهمام وطاقمه من البدريين ينكرون من رمد وهم أنفسهم والغين فيه بأنفسهم وعن طريق أسرهم واقربائهم ومحاسيبهم.. الشعب يرى من تطاول في البينيان ومن بات يتلاعب بالمليارات ويقضي هو واسرتة الاجازان بلندن ودبي والقاهرة ويدرس أبنائهم بماليزيا وهو حتى الأمس القريبك كانوا يسكنون بيوت الجالوص والآن تنكروا لأهليهم ورفعوا يايدهم عن التعليم والصحة والخدمات واصلوا ظهر أرباب الأسر بالجبايات والرسوم التي ما أنزل الله بها من سلطان.. نسأل الله أن يقتص منهم ويرينا عجائبه فيهم، والتحية لجبرا وكل من ينير الطريق ويكشف المستتر..


#232696 [اوكامبو جنني]
0.00/5 (0 صوت)

10-29-2011 04:26 PM
الشكر الجزيل لك يا استاذ جبرا
هذا العنوان ذكي جدا لانه بدلا من(الى عزيزي الفساد) يمكن يصبح (الى عزيزي البشير او نافع او كرتي او علي عثمان او عوض البنزين اقصد الجاز او هيئة علماء السودان او الشحاد مصطفي اسماعيل او كل الولاة او كل زول اكل محلية او اي واحد عمل عمارة فجأةاو.............او.........او لي حد الناس البجمعوا النفايات.
والاغرب من كده الناس وين ضاربين طناش ولاخايفين ولا لسع مشي فيهم دم عرس الشهيد وهي لله هي لله وهبي هبي رياح الجنة ولكم التحية.


#232679 [القوس]
0.00/5 (0 صوت)

10-29-2011 03:42 PM
يالفاتح ما لك ما سابتوا عن سوق المواسير - وطريق الانقاذ الغربي - وما سالتوا كيف طلعت (9) مليار دولار من اموال الشعب الغلبان - يااخ على الاقل اسألوا من اموال البترول وداها وين - والسلاح السوداني دخلوا كيف لثوار ليبيا حتى حرروا طرابلس - وسلاح ليبيا وصلتوا كيف طهران - وسلاح ايران دخلتها كيف غزة - ما دام انت تاجر سلاح شاطر - قروش السلاح دي بتمشي وين وخزينتنا فاضية - يعني الجماعة مشوا للوليد ولامير قطر - للشحدة ام من باب التمويه - سبحان الله يضع سره في اضعف خلقه
(22) سنة تسرق والناس لسع مصرين انك شريف - مش غريبة الجاهلية في القرن (21) يركب موجتها المتأسلمين


#232675 [الطيب عثمان]
0.00/5 (0 صوت)

10-29-2011 03:38 PM
والله يا استاذ جبره حيرتنا اذا كان المدينه الرياضية ليها عشرين سنه ما تمت وجاءتها الميمنه من شمالها وجنوبها وشرقها وغربها لذلك لابد من ان تأتيها المشئمة من فوقها .


#232672 [بت الخليفة]
0.00/5 (0 صوت)

10-29-2011 03:30 PM
وبعدين يا جبرا الحل شنو مرارتنا انفقعت


#232659 [احمد بابكر]
0.00/5 (0 صوت)

10-29-2011 03:03 PM
اطال الله عمك يا استاذ و حلوه حكاية اهل الميمنه دى و بالمناسبة حكاية اهل الميمنة و الاسماء المشابهة تذكرنى بلافتة فى الزمن الغابر مكتوب عليها منزل احرار ويبدو ان منازل الاحرار متوفرة بكثره فى زماننا هذا و تحتاج لامثالك لفضحها للملأ


#232651 [السودان الفضل]
0.00/5 (0 صوت)

10-29-2011 02:31 PM
عزيزي جبرة مفسدونا أفسدوا الفساد ذاتوا قبل الإنقاذ كان المفسد منبوذ من المجتمع وكانت نظرات الدونية والإحتقار تطارده أينما حل وإرتحل بل إذا ذهب المفسد إلي طلب يد فتاة من والدها يرجع بخفي حنين الأن أترك المقاربة للقاري والما بفهم بالتلاويح لايريح لايستريح الفساد بري من فعل هؤلاء لانه كان يجري عملياته بالليل والناس نيام وكان يمارس نشاطه سرا ومن تحت الطاولة حتي لاتعلم شماله ما فعلت يمينه وكان كخفافيش الظلام كان الفساد لايري بالعين المجردة ليلا أونهارا وكان أصحابه وأصدقائه قليلون جدا ولايبيحون بصداقتهم له كان من يصاب بداء الفساد كمريض الجزام تهابه الناس ويهربون من مصافحته كان من يصاب بالفساد وإن ملك المليارات منبوذ كإبن الزنا الأن حدث ولاحرجلقد أفسد ت ثورة الإنقاذ الفساد ووطنته وحمته بالقانون وأعطته الجنسية السودانية بالميلاد وأجرت له عملية تجميل جعلته مرغوبا من أي مواطن لامانع من الإرتباط به ومصاحبته بل وبزواجه إن إستطاع إليه سبيلا فمن أفسد من الإجابة أن ولاة أمرنا أفسدوا الفساد وحسبي الله ونعم الوكيل ولاحول ولاقوة إلا بالله


#232640 [الزول الكان سمح]
0.00/5 (0 صوت)

10-29-2011 02:05 PM

يا أستاذ جبرا

عزيزك الفساد ( الإنتا قاصدو ) عارف كل الحاجات الإنتا ذكرتها دى وضارب طناش


#232634 [كورس صيفي للفساد التسجيل مجانا لكن الكتب بقروش]
0.00/5 (0 صوت)

10-29-2011 02:01 PM
والله حيرتنا معاك يا جبرة كل مرة طالع لينا بموضوع جديد أقصد قديم يا خي أنت من زمن اللغف و الهبر أسع الشغل كل بتاع الفساد أصبح عن طريق معاونيين و مراسلين يقطون نص الكرة الارضية و النصف الباقي قاعد عندنا في السودان. يا معلم جبرة سمعت بحكاية كبري الجنينة البسبع مليار والي الان لا يوجد كبري ولا سمعت بفلوس المغتربين البتاخذة الحكومة وما بشوفوا منها حاجة. علي الحرام انا من شده كبدي ما واجعني من القروش الاتسرقت قربت اموت وبعدين انحن نلوم الفساد لية ما في الاستاذ سليل الاساتذة العلم الفساد زاتو أنت عارف يا جبرة انو كان في كورس صيفي للابالسة و الشياطيين وبعض الجماعة عشان يتعلمو الفساد....ولك التحية


#232633 [خط هيثرو]
0.00/5 (0 صوت)

10-29-2011 02:00 PM
يا ود جبرة ماتتعب نفسك ساكت .. عزيزك الفساد قبل كدة قال ما حايبطل البيعمل فيه دة الا تلحسو كوعكم والبتكتب فيه دة بلو واشرب مويتو وكمان تحت جزمتي دى......والزارعني يجي يقلعنى؟؟؟؟؟؟؟؟؟؟؟


#232630 [أبو محمد]
0.00/5 (0 صوت)

10-29-2011 01:57 PM
جزاك الله خير ياجبره لكن كدي زيد لينا شويه من العمليات المتلتله بتاعت عمنا الفساد الكتيره والكل الناس عارفنها آهو تذكره .


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة