المقالات
السياسة
ارشيف مقالات سياسية

11-01-2011 08:51 AM


خاءٌ .. راءٌ .. واوٌ .. فاء

شريفة شرف الدين
bitdarfur2121@yahoo.com


يا أبوي شوف .. الحيوان ده اسموه شنو؟
وينو؟ البقول مييع و غاطيهو الصوف؟
لا يا أبوي .. التاني البقول بااااع ده
البقول بااااع ده ما منو خوف ..لازم أديهو ليك بالحروف .. ده يا ولدي .. خاءٌ .. راءٌ .. واوٌ .. فاء
ها .. عِرِفتو ليك ..ده ما مِنو خوف .. ده وديييع و ولوف .. ده البجيبوه في العيد اسمو الخرووووف
نعمل شنو؟ حنشتريهو .. رغم الظرووووف

****************
بكم يا زول الضحية؟
عشانك بس .. بألف و مية
بي ألف و مية؟ طيب ده ما كل الماهية .. و عليهو كمان سلفية
يا اللخو .. الشكية لغير الله بلية
طيب شوف لينا شِيتاً كبير و لحمتو طرية
ها يا زول .. أنا كمان بدور لي وصية؟ حرّمْ ..أشوف ليك (ضَحِيْتن) تعجبك و تبسط الولية

*************************
الراجل رجع البيت يقدل .. مليان طرب
قالتلو العزة .. خروف بس؟ طلقانة لو ما جبت الدهب
عمنا ما حاكى القادة العرب
لا استنكر .. لا ندد .. لا شجب
لا سالت دميعاتو لا نحب
و عجبو العجب و كمان الصوم في رجب
دق صدرو و قال الله أكبر .. أنا أب شنب
أتقطع حتة حتة كان أرد للعازة الطلب
شال الضحية رجع .. ما حس بالتعب
فتش لسيد الخروف فتيش .. ما لقاه تب
سام الخروف بتسعمية .. يفتح الله ..طيب بتمنمية .. قالو ليهو مليان جرب
بالسبعمية و نص .. فكاه بعد التعب
جاب للعزة توباً و معاه خاتم الدهب
فرحانة قالتلو .. مرجوعة ليك .. يا زينة العرب .. أضبح إنت الضحية .. أقوم أنا أشوف شوية حطب

******************
بعد العيد أستاذ العربي سأل سؤال
أنا أتهجأ .. يا أطفال
خاءٌ .. راءٌ .. واوٌ .. فاء .. مَنْ يَعْرِفْ هذِي الكلمة قام و قال ؟
ودْ الراجل رفع يدو .. تمتم .. تعتع .. تمتم .. تعتع و قال العندو

********************
(و الله أنا بذات نفسي شريفة دي .. غلبني أعرف الولد ده ردّ قال شنو!!)


تعليقات 8 | إهداء 0 | زيارات 1574

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#234565 [محمد الشيخ احمد]
0.00/5 (0 صوت)

11-01-2011 05:33 PM
عافي منك وراض عنك فوق رضاي ....
ياريت يا شريفة الشريفة حقا لو كل شباب و رجال و بنات ونساء بلادي مثلك ..
يا ريتهم يخافون علي البلد كما تخافين يا ليت لو لهم نخوة كنخوتك ...
يا ريتهم لو تركوا الاهتمام بسفاسف الامور ولو الي حين يا ريتهم لو
لو تركوا لاهتمام بالهلال والمريخ ودوري كرة القدم الركيك حتي الخلاص من الكابوس الذي دمر البلد في كل مجال ...
ياريتهم لو تركوا الاهتمام بالتطريب والغناء الهايف عديم المعني ولو الي حين ,,,,
حتي الخلاص من ثورة التدمير اللا وطنية ,,,,
يا ريت ويا ريت وياريت يا شريفة الحرة الابية التي تعطينا اللاحساس باننا اشباه للرجال واشباه للشباب الذي اقتلع القذافي وبن علي وحسني فرعون ,,,,,
واقترب من اقتلاع الشبل الذ1ي لا يشبه شبل الاسد الا في الاسم ,,واقترب من اقتلاع ديك العده علي عبد الله الذي لا يعرف هل كامب ديفيد ذكر ام انثي ام ماذا ,,,
mamadooom@gmail.com


ردود على محمد الشيخ احمد
Saudi Arabia [شريفة شرف الدين] 11-01-2011 07:32 PM
أشكرك كثيرا لإطرائك و أرجو أن أستحقه

ألا توافقني أخي محمد الشيخ أحمد في أن جيل اليوم الذي نصفه تارة بالسطحية و

أخرى باللا مبالاة بأنهم نتاج آبائهم و سياسات حكوماتنا؟ ما القيم التي يتلقونها

في المدارس في المساجد و في البيوت؟ ألا ترى أنهم تربوا في كنف غياب تام من

القدوة؟

أرجو ألا نفقد الأمل و المس فيك حسا وطنيا و قلقا و اهتماما بهم

ثانية شكرا


#234424 [الانصارى]
0.00/5 (0 صوت)

11-01-2011 01:55 PM
الولد رد فقال
خازوق
من الحلق ابت تطلع
امانة جد رائعة يا شريفة
بس انشاءالله توب عزة ما يطلع اخر صيحة الاسمو ثوار . فكان ب 2 مليون جنيه قبل :
1 قبل زيادة الدولار
2 قبل الجنيه ينهار
3 قبل السوق يولع نار
واخيرا بعد نصيحة المالية بالترشيد واكل الكسرة بالويكة والبهار
وكل عام وانتم مضحون


#234405 [جكسا]
0.00/5 (0 صوت)

11-01-2011 01:32 PM
عزيزتى شريفة عهدتك تهتمين بقراءة التعليقات اسفل عمودك الشيق وتجيبين عليها احيانا استحسانا فلا مكان لمن يخالفكم الرأى ياكتاب ومعلقى الراكوبة.بالامس عرضت عليك ان تكونى رائدة التغيير ومشعلة شرارة الثورة.نوارة نجم السودانية وبوعى وافق اعلى بكثير منها.فلم اجد منك اجابة عسى المانع خيرا.ولم تعجبنى طريقة العصيان المدنى نظرا لضعف النقابات وتدجينها من قبل النظام ولتفرق قلوب المعارضين او بعدهم فى المنافى ولسبب آخر لا اخالك تجهليه وهو اسلوب الارهاب بالوظيفة الذى تنتهجه العصبة الحاكمة فلن تجدى من يجازف بفقدان وظيفته ان هو عصى ولو ليوم واحد ودونك جيوش العاطلين عن العمل فى انتظار اشارة واحدة لملء الفراغ.فلم لانعول على نخوة الرجل السودانى تستفزه امراة مثلك ان اخرج وطالب بحقك من العصبة الحاكمة؟.ولك ان تقراى السباب المقذع الذى كاله لى احدهم لتعرفى اى نوع من المعارضين تبغين منهم رشدا واصلاح حال.ومالم نتوقف عن تصنيف انفسنا عنصريا وحزبيا فى مواجهة كل من خالفنا الرأى فلن تقوم لنا قائمة وسنستبدل احمد بحاج احمد اشد منه فجورا والد خصاما.علمى قراءك ان اختلاف الرأى لايفسد للود قضية.وتقبلى ودا واحتراما بلاحدود.


ردود على جكسا
Saudi Arabia [شريفة شرف الدين] 11-01-2011 05:04 PM
الأخ جكسا

لك التحية و أشكرك على تفاعلك

ما زلت في تقليب مقترحك مذ قرأته فبدا لي أن جزءا منه ممكن و عملي جدا و هو الخاص بالتنادي الألكتروني و لكن كم في المئة من الشعب السوداني ملم به و متفاعل معه؟
لك العتبى فيما قيل عنك .. أنت افترضت أني بالخرطوم و لكني أقسم بالله لولا الحائل الجغرافي لفعلت

أبق على التواصل و سنصل إلى حل سواء و بخصوص العصيان لا نريد نقابة و لا ننتظر أحدا


#234313 [الوليد]
0.00/5 (0 صوت)

11-01-2011 11:12 AM
بعد العيد أستاذ العربي سأل سؤال
أنا أتهجأ .. يا أطفال
خاءٌ .. راءٌ .. واوٌ .. فاء .. مَنْ يَعْرِفْ هذِي الكلمة قام و قال ؟
ودْ الراجل رفع يدو .. تمتم .. تعتع .. تمتم .. تعتع و قال العندو

(و الله أنا بذات نفسي شريفة دي .. غلبني أعرف الولد ده ردّ قال شنو!!)

******************************************
و الله ذكرتينا بعمك تنقو و العزة مرتو و المبدع شرحبيل احمد في مجلة الصبيان


#234308 [بت أبوها]
0.00/5 (0 صوت)

11-01-2011 11:05 AM
حلاتك يا شريفة عجبني المقطع البقول

عمنا ما حاكى القادة العرب
لا استنكر .. لا ندد .. لا شجب

وين وين نقلو زي ده؟
;) ;) ;)


#234303 [جلال مدني]
0.00/5 (0 صوت)

11-01-2011 11:00 AM
للأمانة أنا أعتبر الأستاذة شريفة كشكول إبداع حقيقي لأنها ظلت تقدم ما تكتبه بشكل متنوع و لا تلتزم لونية كتابية واحدة مثلما يفعل الكثيرون. إذا وقفنا على عنوان القصيدة فقط يعتبر أسلوب خارج عن الإطار التقليدي المعروف. يعني كان ممكن يكون (خروف) و يكون شيئ تقليدي جدا

القصيدة خفيفة و سهلة و تحس إنك تشاهد في سيناريوهات الحوار مرة الوالد مع إبنه ثم الرجل مع بائع الخراف ثم الرجل مع زوجته العزة ثم الأستاذ في الفصل و الله إبداع

نصيحة لشريفة ما تحصري نفسك في الكتابات السياسية فقط أطرقي كل أبواب الكتابة و أرجو أن يصلك بريدي المرسل إليك في هذا الصدد

دمت يا بت بلدي


#234297 [جعفر]
0.00/5 (0 صوت)

11-01-2011 10:50 AM
علي بالنعمة البنية شريفة دي موهوبة و مبدعة الله يستر الحريم يا يقرن حكاية دهب
الضحية المعا خروف و تبقى المصيبة مصيبتين. أجمل حاجة خليتي النهاية بلا نهايةز

الود ده يكون طنطن و قال للأستاذ بلا سياسة و خلينا في الدرس أجمل


#234286 [اسامة]
0.00/5 (0 صوت)

11-01-2011 10:36 AM
الله يحفظك و يزيدك يا بت شرف الدين و شرفنا كلنا

مبدعة في كل ما كتبت

أظني الولد قال كإجابة لسؤال الأستاذ واحد من ثلاثة:

1. أبوي

2. تاني حتودو أبوي السوق؟

يكون أدروبي و قال

3. حيوان هذا ما تقول


شريفة شرف الدين
شريفة شرف الدين

مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة