الإنقاذ و ضنب الككو
11-02-2011 08:23 AM


الإنقاذ و ضنب الككو

أسماء الجنيد
[email protected]


سلام يا الحبان كلكم قرآء الراكوبة وعشرة مباركة على الجميع إن شاء الله,,,,

شفتو ناس بنو جكة ديل من ما يلبدوا بقلعوا بي مصيبة اكبر من القبالها
عرفتهم من فكوا فينا حكاية ال 20 ألف ماعز للمصريين , عرفتهم دايرين يمسكونا بيها ضنب الككو , وهم يغتسوا و يقلعوا ليهم بي قليلية تانية تحير الشعب كلو من طرف!
اليومين ديل ممسكين الناس ضنب الككو ,, آآي ضنب الككو عديل ,, سوات البشير البسوي فيها بلا نظام دي
القصد منها شغل الناس في حاجة تانية , وهم يعوسوا في عواستهم . اها خلونا من يوم سفروا المراح التاني للمصريين خلونا نردح ونداعي فيهم بي مغيستنا وهم مشوا هبرولهم هبيرة ماكنة خلاس من الوليد بن طلال
الشيء الخلاهم يقسموا في النياشين والأوسمة والشهادات الفخرية من طرف , ماهو شيتا هين تـــــــــــــــــب
هملتي يا جامعة الخرطوم الكان ليك شنة ورنة , لما كنتي بتتحسبي مع اعرق الجامعات في العالم ,, الدائم الله
بقيتي هسه مدرسة اوليه اخير منك ,, بهدلوك الما فارزين قيمتك ولا تعليمك ولا عراقتك ,, قصوا رقبتك يوم بدوا بالتعريب ’ عشان قلة فهمهم وعقدتهم الما بتخليهم حتى يقروا عربي زي الناس ,, خلتهم يحسدوا النوابغ في الجامعات على التعليم العالي الراقي,,
من الله خلقنا ما سمعنا بي طب ولا هندسة بدرسوهوا بالعربي مع المصطلحات الفيه!! لكن ناس بنو جكة بكسروا رقبة أي قانون بي كيفهم ,, صاطوها بي كراعهم ,, ربي يصوط عيونهم ويبعج بطونهم بركة العشر المباركة من الشهر الكريم ..
هسه إنت يا اب فاخورة يا البشير ,, عرفناك بتقسم في خيرات البلد برا سبب, حقارة منك بس وكره وغبينة على شعبك الما بيك ؟؟
إنت ما بني آدم على الإطلاق .. تتبوبر بي حق الغلابة والمطحونين وتقسم فيه لي الناس , امس المصريين والليلة ثوار ليبيا !!!
الكرم الجاك ده ما اولى بيهو الحرقت حشاهم ورملت حريمهم ؟؟؟
بعد ده جاي تتفوجج يا عديم العلم والفهم يا البتقسم في الغنم , جيت تتفوجج في الفاضي وتهدي في الشهادات والدكتوراة الفخرية للوليد ؟؟
اداك شنو النبي فيك . كدي قول لينا اصلو الخبر بمرق بمرق . كدي قول لينا كشحك بي كم مليون يا الدنيء يا اب بطينة ,,
الشحاد الجيعان الفجعان ,, حاتفضل طول عمرك عينك زايغة وطائرة ورا المادة وحق الغير ,
مليون دولار يا الرخيص ؟؟؟ يعني شنو مليون دولار قصاد الملايين البدفعها الوليد بن طلال لجامعات الناس البحترموها ..
ما زيكم إنتو تنططوا عينيكم من فد ألف
وكمان يا الطفل المعجزة مشتمنا قبال اليوم وقايل الشعب السوداني شحاد!!! . اها إنت الملصقك الليلة في طرف عباية الوليد شنو ؟؟؟ خجلت ليك يا اب عينا متل دبرة الحمار .. بالله الطفل المعجزة شدة مو مكنكش في طرف الوليد . قرررررررررب يتحكرلوا في حكره ,, الله يقبحكم كان مرمطتوا سمعة البلد وإسمه بي عمايلكم القبيحة البتشبهكم
عرفنا وسام النيلين ده قول اديتوا من سجم إنقاذكم دي , وسام والله ولا بشرف , ولو في مكان الوليد بن طلال ولا غيره , ما بتسمى بيه كلو كلو طالما مو جاي من طرفكم ,,
لكن دايرنك تورينا سلطتك شنو على جامعة الخرطوم البقيت تقدم في شهادتها الفخرية من طرف ؟
غنماية هي كمان ولا عجل .؟
لكن إت ماك معذور , لا درست ولاك وقفت في طابور
لا قريت ولا ساهرت بي ناس البيت . لا خابر الإمتحانات ولا إجازة الجامعات !!!
البلادة مالياك من ضفور كرعيك لي قرعتك الفاضية ..
عشان كدي ماك فارز قيمة صرح كجامعة الخرطوم ,, جامعة الخرطوم تاريخها العريق حانفضل نبكيه إلا ان تحلوا عن سمانا , ويرجع إسمها الأول وهيبتها كما كانت من قبل
انا خايفة المليون الطبيتوه الليلة ده يكون قيمة بيعة ,!!! ما بعيد من سواتكم وعمايلكم ! وتبقى الفجيعة أكبر من تحمل أي سوداني غيور على وطنه,,,
وجعتني بالحيل ووجعت قلوب الآلاف الدرسوا وإتخرجوا من جامعتهم العريقة ,, وجعتنا الشحدة بي إسمها
ومن منو ؟ من أحد الأثرياء العرب!!! اريت كان الشحدة كانت بي إسم دولة على الأقل نغطيها بي الغصب ونقول دين من دولة لي دولة , ونشوفلنا دبارة نغطيها بيها العيبة الكبيرة!
لكن تجروا الزول لي عند بابكم وتمدوا قرعتكم ؟؟ والله الجيران بالحيطه ما يسوها !!!
آخر من توصلتوا ليه من خبث وسرقة
قلبي كان محدثني يعلم الله ,, في المقال الفات(( شحدة بي كرت دعوة)) , قلت ليكم الله يستر على جامعة الخرطوم والجامع الكبير وحاجات تانية كتيرة .
ربي ينتقم منكم بركة الأيام المباركة من الشهر الكريم , ويملاكم وجع بقدر الوجع والمغايس الشبعتوا بيها الشعب المطحون,,
منكم لله يا مجارمة ,,

متاوقة
ــــــــــــــــــــــــــــــ
البشير اسمع جاي يا اب حلقوم إت والمعاك ,, جامعة الخرطوم يا اللخو بدخلوها بالشهادات
ما بي عصيكم والدبابات ,,
سرقتوا عرق الغلابة , دايرين تسرقوا سهرهم وعلمهم ,,
هانت وليكم يوم إن شاء الله
يمهل ولا يهمل
ودعتكم الله


تعليقات 12 | إهداء 4 | زيارات 3207

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#235972 [أبوأمين]
0.00/5 (0 صوت)

11-04-2011 11:28 AM
أيوا أديوف في قرعتو أمن مايعرف حاجة عجبتيني لكين.


#235778 [رشيديه]
0.00/5 (0 صوت)

11-03-2011 07:55 PM
هذا من شيم العسكر. هل نسيتى اختى أسماء ماذا قال ابو القاسم محمد ابراهيم إبان حكم مايو\" الجامعات نحن ندخلا بدباباتنا\" منطق الفاشلين و ديل نفس الحال كله عسكر فى عسكر واحمد ياهو حاج احمد والله للتعليم من الجهله


#235461 [الحافظ المعراج ]
0.00/5 (0 صوت)

11-03-2011 10:45 AM
أنتي و كاتبة أخري تكتبان بصورة دائمة و بلغة فجة و إساءات بالغة لأشخاص أكبر منكما في السن يجب إحترامهم بغض النظر من إختلافكما السياسي معهم و ذلك إستجابة لتعاليم ديننا الحنيف الذي يوصينا بإحترام الكبير و توقير الصغير ، و ما هذه اللغة السوقية التي تكتب بها مخطابةً رئيس الدولة ، دعك من أنه رئيس الدولة ، أليس هو أكبر من سنك و قد يكون في عمر والدك ، هل ترضين أن يسئ أحد لوالدك مهما كانت أسباب الإساءة ، و هل جامعة الخرطوم التي تفتخرين بها علمتك كتابة الأعمدة الطافحة بالإساءات ، و هل هذا أسلوب للمعارضة و النقد ، يا بنت الجنيد أكتبي ما شئت في معارضة هذه الحكومة و لكن بأدب و تهذيب حتي لا تسئ لنفسك و للأخرين ، يقول رسولنا الكريم صلي الله عليه و سلم : ( من أكبر الكبائر أن يسب الرجل والديه ، قيل : و كيف يسب والدي؟ قال : يسب أباً الرجل فيسب أباه و أمه ) متفق عليه .


ردود على الحافظ المعراج
Saudi Arabia [WIN] 11-03-2011 08:27 PM
غفارم عليك يا بت الجنيد .......كدى قول لينا حاجة عن (الحافظ المعراج ) ان شاء الله عرجة ما تتصلح


#235318 [شمالي]
0.00/5 (0 صوت)

11-02-2011 11:50 PM
تسلمي يا بت الجنيد
والله ما قصرتي تب
قلتي النصيحة ومرقتي الفي بطنك وبإسلوب سوداني قُح 100%;)


#235118 [السودانى الحر]
0.00/5 (0 صوت)

11-02-2011 03:49 PM
اتق الله وما تنسى يوم الحساب واكتبى كلام هادف وبناء ما خرمجه ذى ما بتعملى وخلى الالفاظ السوقية


ردود على السودانى الحر
Sudan [دقنة] 11-03-2011 09:22 AM
رخييييص والطلب غالي !!! أها و الكلام الهادف ده بتحددو انت ان شاالله !!!!! الهدف اليجيك في نص راسك الفاضي ده !!!! يازول أمشي أتعلم أصول وأدآب النقد في الأول وبعدين تعال جلبغ جلبغتك دي !!!! تكتبو ساااااكت


#235108 [خالد برعي]
0.00/5 (0 صوت)

11-02-2011 03:28 PM
عفارم عليك يا بت الجنيد فشيتي ( شوييييية) غبينتي أ اتخيلت البشير ده لو قدامك كان جضمتيهو.
شكرا جزيلا


#235054 [zahi]
0.00/5 (0 صوت)

11-02-2011 02:07 PM
هل تعلمي يا استاذه انو جامعة الخرطوم رفضت في يوم من الايام قبول امير سعودي وابن الملك للدراسه فيها لعدم حصوله علي الدرجات التي تؤهله للقبول ؟؟؟ وكان هذا الامير هو فهد بن عبد العزيز !!!!! فشتان ما بين الامس واليوم .........................................


#234899 [hho]
0.00/5 (0 صوت)

11-02-2011 11:26 AM
MIss asma please hal darasti fi gamat alkhartoum


#234829 [صلاح الامين عرقوب]
0.00/5 (0 صوت)

11-02-2011 10:01 AM
والله يابت الجنيد ابدعتى وليك كل الشكر والتقدير يابت الناس ، نقول بس آآآآآآآآآآآآآآآآمين يارب العالمين لدعواتك السمحة


#234819 [ودالجزية الخضراء]
0.00/5 (0 صوت)

11-02-2011 09:45 AM
واللة يابت الجنيد ماقصرت تب وربنا يورينا فيهم يوم ونكون حاضرييين ببركات هذة الايام المباركة ودعوات الحجاج الواقفييين علي بيتة ;( ;( ;( ;( ;( ;( ;( ;( ;( ;( ;( ;( ;(


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة