ألعرضة فوق كم ؟ا
11-05-2011 01:37 PM

ألعرضة فوق كم ؟؟؟

أسماء الجنيد
[email protected]

الأهل الطيبين في كل مكان حبابكم الف
والعيد مبارك عليكم ,, علينا وعليكم يتبارك ,, العفو لله والرسول

الموجع المبكي ما يحدث في بلادنا من حروب ودمار وقتل وتمزيق وتشريد لأبناء الوطن الواحد!
المثل بقول انا واخي على إبن عمي وانا وإبن عمي على الغريب ,,
ناس الإنقاذ قلبوا المثل وكسروا رقبتو , وقلبوا كل القيم الفيه
بقى شعارهم اخنق فطس من طرف , الأخ وإبن العم والأبو والخال والعم ,, كلهم يضربوهم بي بعض ,,!!!
لا مثل ولا دين ولا سياسة ولا وطنية ولا إنسانية !!!
الحكومات السابقة كلها حتى زمن الإستعمار . لما كنا تحت رحمة المستعمر الأجنبي الغير مسلم , ما حصل البحصل في زمن الإنقاذ وتحت رايتة إسلامهم الرافعنها غش ودجل ونفاق !!!
يتاجروا بإسم الدين ويطحنوا في الأبرياء , وكبار السن العجزة من الرجال والنساء , وتشريدهم للأطفال وقتلهم للشباب دون وجه حق ,
زرعوا الفتنة بين ابناء البطن الواحدة !! السودان كلوا بقى مليشيات وعنصرية وتفرقة وفتنة واسلحة في ايدي اطفال وجهلة لا يفقهون شيئا حتى عن إستعمالها, حرموهم التعليم وعلموهم الضرب والقتل والحروب في الفارغة, الجهاد الفي البيت الواحد ده يطرشنا ما سمعنا بيه إلا عند بنو جكة الإسلامهم قاطعنو من نافوخهم براهم ....
جندوا جيشهم كلوا في دمار المواطن في كل السودان . بدوا بالتمزيق من الجنوب ,, وواصلوا حتى عمت الفتنة وإنطلقت في كل الوطن زي النار في الهشيم ,, والموجع فعلا تكبيرهم وتهليلهم وفرحتهم في ضياع ارواح ابناء الوطن الواحد
الحكومات الفاتت كلها . مافي حكومة فتنت ابناء منطقة مع منطقة تانية
مناطق طول عمرها آمنة وناسها مسالمين , لا يعرفون للحروب والفتن درب, كل همهم زراعتهم ورعيهم وبعضهم تجارتهم
عايشين في امن وامان ,,
في زمن الإنقاذ , سمعنا وتعجبنا لإحتلال وتمزيق قري ومدن طول حياتها آمنة ومستقرة , وأهلها عايشين في امان الله , مثال ابيي والكرمك وكادقلي والدمازين , وغيرها مدن وقرى كثيرة لا حصر لها ,
ذنبهم شنو الأهالي , تطاحنوا إنتوا وسطهم وتقتلوا البتقتلوه وتشردوا البقية , من اجل السلطة والجشع ؟!!
بقينا نسمع المدن دي في الأخبار زي ما كنا بنسمع رام الله والضفة الغربية وغيرها . لكن الفلسطينيين على الأقل بدافعوا عن اراضيهم المغتصبة من اليهود !! إنتو فوق شنو ؟؟ وليه اصلا تزرعوا الفتنة عشان تحصدوا الموت والدمار للشعب الغلبان ؟؟؟
تتجزموا وتتحلفوا بنصلي صلاة العيد في بني قريظة و في كادقلي وفي الكرمك ,, إنتو ما تصلوها في حلايب والفشقة المحتلة من الأجنبي, رجالتكم دي محلية بس ولا شنو ؟؟ ضراعكم ده بتشمروه في وش اهلكم العزل المهمشين بس ؟؟؟
الجيش الضكران ده ما توجهوا يرجع اراضي الوطن المحتلة .
ولا بس الأسلحة دي والقروش البتصرفوا فيها دي عشان تدمروا بيها الوطن ؟؟
حكومة جاية من يوم ما استلمت السلطة طالبها مغسة في الشعب والوطن كلو !!
جايين مشمرين للخراب ومكشرين للفتنة والقتل والتعذيب ؟
إن فتشنا التاريخ كلو حتى في زمن الجاهلية والناس ما متعلمة كلو كلو . زيكم مافي نهاااااااااائي
مافي زولا سبقكم في السرقة ولا النهب ولا البهدلة البهدلتوها للسودان الكان منارة علم وسلة غذاء لكل العالم ,
حتى الشعب غيرتوه . شعب طول عمره مسالم ومكافح , وقوي عزيمة , معروف بالكرم والشهامة وعزة النفس , لا يخشى ولا يهاب , وقت الحارة بتسدر وبتندر,,
بالله الملامح دي كلها مسحتوها ودفنتوها في قاع القاع ,
واتحكرتوا إنتوا وجندتوا ناسكم زي المرض الخبيث. فيكم كل الصفات الرذيلة والطباع المخجلة البتشبهكم براكم ,
المغسة محسوبين علينا وعلى السودان الوطن الحر ..!!!!
البحصل في كادقلي وقراها وفي كل شبر من السودان دمرتوه , يخلصوا منكم رب العباد بركة يوم عرفة المبارك ,,
يخلص حق كل الغلابة الماتوا بالجوع والعطش والحروب , غير الإتشردوا
ربي ينتقم منكم بركة اليوم المبارك وبدعوات كل الحجاج في بيت الله الحرام . نشوف فيكم يوم زي ما حرقتوا حشا الأمهات ورملتوا الصغار ويتمتوا الأطفال
ينتقم للغلابة الكايسين فرحة العيد زي كل الناس . ودايرين الفرحة السرقتوها منهم عينك عينك ..
منكم لله , وحسبي الله ونعم الوكيل عليكم جميعا

متاوقة
ــــــــــــــــــــــ
التعتيم الإعلامي الإنقاذي فرد جنحاتو وداسي الحقيقة المرة
بعض القرى النائية مدمرة دمار كامل ومافي اخبار حقيقة عنها في منطقة الجبال الشرقية تحديدا , مثال مناطق امبريمبيطه و خور الدليب و هبيلا و شرقا تاندك و مشمشكه ,,
دي كلها ما منها خبر وفي الجبال الغربية جنوب كادقلى مثال منطقة الحمراء و طابولى وأم دورين و لحدى تلودى
وبرضو إنتوا ترقصوا وتعرضوا , العرضة فوق كم عليكم الله ؟؟
يمهل ولا يهمل

ودعتكم الله
أسماء الجنيد


تعليقات 8 | إهداء 1 | زيارات 2607

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#237137 [سوداني ]
0.00/5 (0 صوت)

11-08-2011 05:15 AM
والله كلام حر من مراة سودانية حره الله اكبر لسع في امل والله مادام في وعي من زيك يا اسماء الله يحفظك وامثالك لهذا البلد الزي تقطع من انياب كل ذئب غادر ولاكن بكره احلي والنصر قادم باذن الله


#236724 [ABO YOUSIF]
0.00/5 (0 صوت)

11-06-2011 05:35 PM
ما على الا اشكرك و ادفرك شويه ليقدام


#236640 [abuafarouq]
0.00/5 (0 صوت)

11-06-2011 10:37 AM
والله يا أختى أسماء كلامك كلام رجال وزياده كمان حبتين ديل عصابة لو ما قتلو زول فى اليوم ما بعرفو النوم يا كافى البلا . الناس فى قرى السودان ما كانو يعرفو الخوف إلا من الحرامى يسرق البهائم أو السكران فلان شاكل مع علان لكن حكومة تنظم نفسها لقتل المواطنين ما حصل ولاح يحصل إلا فى عهد الانقاذ الملاعين الصاقعة تنزل من السماء تشيلهم من الارض يارب أمين أسلوب وكلام عسل يا أسماء شكرا لك وعلى وطنيتك .;) ;) ;) ;)


#236611 [ود عبود ]
0.00/5 (0 صوت)

11-06-2011 03:17 AM
الاخت اسماء الجنيد الخبر الشين في الغربة نحن كل يوم بنسمع فيه يوم فصلو الجنوب يوم اعدموا 28 ضابط من خيرت شباب ورجال البلد يسرقوا وينهبوا في خيرات البلد قتلوا معظم افراد القوات المسلحة وتزوجوا نساءهم من بعدهم كل شهداء السودان راحو فطيس علي حسب قول كبيرهم الذى علمهم السحر شيخ حسن الدابي ان شاء الله بالتراب التكيل خشمو بركة حرمة هذه الايام الفضيلة والاخ الرئيس يعرض ولا علي بالوا ولاحياة لمن تنادى الشعب السودان الذى تميزى الغني من الفقير فيه اليوم العزيز فيه صار يشحد زى ماقال واحد من الجماعة انقلع الوتد واتوتد المقلوع وجاعت بيوت الشبع وشبعت بيوت الجوع تتخلي انو في كم اسرة اليوم في السودان لم تستطيع ان تضحي من ضيق الحالة كم طفل متوقعين خروف الاضحية ولم ياتي اليهم والسبب حثالة البشر الذين استولوا علي السلطة ليلا الله لا يوفقهم حياتنا كلها صارت اخبار شينه في الغربه لكن هل سوف يظل الخبر الشين في الغربه هكذا علي طول لابد من نسمع الخبر السمح في الغربه يا اخت اسماء لكن متي الم يحين الوقت بعد


#236561 [المهموم]
0.00/5 (0 صوت)

11-06-2011 12:04 AM
والله ديل مش بيقلبوا المثل ويقلبوا القيم ........... ربنا يقلب منفعتهم ويشردهم.
ديل ناس ما بيفهمو ودي حكومة (عصابة ) ماعندها توجه ومعرفة بالسياسة ديل دايرين يسرقوا وينهبوا الشعب السوداني.
بيعملوا بسياسة فرق تسرق وتنهب ....................... السؤال المهم : ليه الشعب ساكت ؟


#236456 [مستغرب]
0.00/5 (0 صوت)

11-05-2011 06:14 PM
ح يعرضوا وح يعرضوا لو نحن ساكتين ساي
ح بعرضوا وكمان يقدلوا فينا مادام احزابنا ومعارضتنا ماقادرة تترجم الظروف الموضوعية والذاتية والأزمة الخانقة دي لخلاص نهائي لشعبنا الغلبان هذا، وتنظم هذه الجماهير التواقة للديمقراطية والحياة الإنسانية، في اشكال بسيطة وغير معقدة عبر احيائهم ومدنهم وقراهم،، بعد ان جُردة الخدمة المدنية من نقاباتها من عمال وموظفين وطلاب كانوا من قبل هم الترياق لكل حاكم ديكتاتور الخ بعد الخراب الكبير والماحق الذي قام به المؤتمر الوطني في الفصل من الخدمة حتي بلغت الملايين من موظفين وعمال وأساتذة جامعات ومن قوات نظامية في البوليس والجيش وغيرها، من هم كانوا جديرون لقيادة الوطن عبر وظائفهم ومسؤلياتهم التي كانوا يتقلدونها وما يتمتعون به من حس طني واخلاص مجردين عن كل مصالح شخصية وذاتية.
- وح يعرضوا ولسانهم ممدود للشعب السوداني،، لأننا ننتظر المؤتمر الوطني أن يدعو للحوار فيما أسموه بالقضايا الوطنية، وما يواجهونه من عزلة، وأن يدعو الاحزاب للمؤتمر الدستوري، والمؤتمر الاقتصادي،، وغيرها وكمان بعد ذلك المشاركة في الرايخ الثالث،،
- الأحزاب وجميع القوي السياسية والمثقفين، والمفكرين، وغيرهم،، مطالبون بانقاذ السودان اليوم قبل غد،، وان يتفقوا جميعا من (غير المؤتمر الوطني) على ثوابت من اعداد مسودة الدستور والاتفاق عليه وشكل الحكم وفصل المؤسسات الدستورية والتشريعية والتنفيذية،، من سطوة الحزب الواحد اي كان،،وإرجاع سيادة البلد المنهوبة وان يتفقوا ايضا في شكل ونمط الاقتصاد وعلاقات الانتاج وغيرها مما تتناسب وتتوافق وظروف بلدنا ،، وهذا مربط الفرس،، فجربنا من قبل رأسمالية الدولة والرأسمالية الطفيلة لحد ما أوصلنا المؤتمر الوطني الي ما يسمي بالاقتصاد الحر الذي أغرق السودان وما يزال في ما نشهده الآن من كوارث وأزمات وما زالوا يدافعون عنه ،، فإذا لم نحدد مستقبل البلد الاقتصادي واي شكل من الاقتصاد يحكمنا فسوف نغير فقط الاشخاص بآخرون ونقع في نفس ما وقع به هؤلاء القوم.
- مطالبون ايضا وبشجاعة في هذه المؤتمرات المطالبة بارجاع كل مشاريع، ومؤسسات الدولة المخصخصة،،وحصرها وتأميم ومصادرة كل اشكال الطفيلية ممثلة في الشركات والمؤسسات والبنوك التي بنيت وقامت على اموال الشعب وما نهب منها عن طريق المحسوبية والقرار الاقتصادي الذي يصب في مصلحة من هم منتمين للمؤتمر الوطني، وارجاع كل أراضي الدولة التي نهبت بغير وجه حق وحصرها وتحديدها ،،، الخ
- وعلى الأحزاب ان تنظم صفوفها من غير استقطاب ولا خداع فقط تنظيم برامجها وأفكارها بوضوح دون غش او دسائس او مؤامرات او مكابرة او خداع باسم دين او قبلية او جهوية،، فقط بنظرة شاملة للوطن،،
- ان الفقر والجهل السياسي (الانتهازيون والوصوليون، واصحاب المصالح الآنية الخ) مرتعين خصبين لكل حزب يملك المال والسطوة دون ان يملك الفكر والبرنامج الوطني (السياسي والاقتصادي والاجتماعي) الذي من شأنه أن يقف عليه عامة الناس دون غموض او لبس ليحددوا موقفهم الداعم الي هذا الحزب او الي ذاك ومحاسبت الحزب الذي يخرج عن ما قدمه من برامج وأفكار،، لنعيش في وطن جدير بالكل.
- الحوار مع حزب الامة والاتحادي الاصل لماذا،،؟ الحوار مع من؟ مع من يملك كل شيء!! الدولة ومؤسساتها، الاقتصاد والاموال والبنوك،، والوظائف الاستراتيجية،، والاعلام والأمن والقوات النظامية وغير النظامية،، والمؤسسات الدستورية والتنفيذية الخ الخ اذا ماذا تبقي؟ هل المشكلة كلها تقسيم الوزارات صوريا ومن ثم المراوغة والكذب والالتفاف حول القضايا دون حلها بل تأزيمها والخروج منها بانتصار واهم؟ كما فعلوه من قبل مع الحركة الشعبية،، ومع سليمان أركو مناوي، ومن قبلهما مبارك الفاضل وحزبه،، ومع مالك عقار وكل من مرة على السلطة التنفيذية كديكور فقط.. هل يستطيع حزب الامه او الاتحادي ان يمليان شروطهما وباختصار باعادة الوطن للسودانيين ونتزاعه من هؤلاء وبالحوار ومعهم فقط؟ يستحيل،،،،
- فقط مواجهون بتنظيم انفسنا،، ونحن من حسن الطالع ليس كالبلاد من حولنا (أتاها الرّبيع الطّلق يختال ضاحكا )ً اتاهم الربيع بحركات بدأت عفوية عبر وسائل مختلفة من دون قيادة واضحة، مما تسبب في كثير من الاحاين،، فك خط سيرها،، اما نحن فنملك القيادات واحزابنا اغلبها صارعت هذا النظام وانتزعت منه الكثير، وانتظمت مجتمعه في هذا الشكل او ذاك بجانب قطاع واسع من المفكرين والمثقفين الذين يملؤن ويسودون الصحف الورقية والاسفيرية بحسن الكلام الذي يقدح في ازالت هذا الظلم،، وبعدها الاخت العزيزة شوفيهم تاني كان يعرضوا ولا يتنقزوا..


#236426 [مغبون]
0.00/5 (0 صوت)

11-05-2011 04:20 PM
سؤالك في محله وسؤالي لمصلحة من كل هذا ؟ الا يوجد رجل رشيد ؟ انظري للتكلفه الماديه فقط راجمات صواريخ ذخيرة تكلفة استعداد الجنود في مناطق العمليات من يدفعها ؟؟ الانفس من الجانبين التي ازهقت من يتحمل وزرها ؟ ماذا يضير اذا تمت الموافقه علي الاتفاق وتم تعيين الحلو وآليا ؟ واخيرا اين حرمة هذا الشهر ؟ ولماذا يحب رئيسنا قتل الانفس في المناسبات الدينيه ؟؟ لا زآلت الحيرة تتملكني !!!!


#236414 [nahed]
0.00/5 (0 صوت)

11-05-2011 03:14 PM
جميل جدا يااستازة ياربت يفهموا المقال المكتوب ويطروا الاخرة اللصوص المنافقين الدجالين والعنصريين الما فاهمين الدين


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة