شلعوها الساسة..!ا
11-12-2011 01:37 PM

حديث المدينة

شلعوها الساسة..!!

عثمان ميرغين

رئيس جمهورية جنوب السودان السيد سلفاكير ميارديت شغل الإعلام المحلي والعربي أمس الأول بتصريحات (نارية) اتهم فيها السودان بأنه يتسلى عن مصائبه باتهام الجنوب بصناعة المؤامرات ضده.. بعض العبارات في خطابه اتخذت طابعاً شخصياً موجهاً للرئيس البشير.. بما يوحي أنه يرد على خطاب الرئيس البشير في الكرمك أول أيام عيد الأضحى.. وعلى خلفية هذا المشهد السياسي.. تنهمر الأخبار عن معارك عسكرية في منطقة \"تلودي\" بجنوب كردفان.. واتهامات من الجنوب بقصف منطقة في أعالي النيل.. وأعلن وزير الإعلام د. كمال عبيد أمس الأول أن ليس هناك ما يعرف بـ(القضايا العالقة).. فالعلاقة بين الدولتين ينظمها القانون الدولي!! الخلاصة أن العلاقة بين السودان وجمهورية جنوب السودان.. ورغم أنف الانفصال.. لم تخرج عن دائرة الموت والدمار والتلاعن الإعلامي.. في ذات الوقت الذي يؤكد فيه السودان قوة علاقاته مع إثيوبيا.. وإريتريا .. وتشاد.. ومصر التي لا يمضي شهر دون أن يزورها مسؤول سوداني كبير.. حتى علاقاتنا مع دولة جزر القمر.. تبدو أفضل كثيراً من جمهورية جنوب السودان.. الذي نكابده في الشمال والجنوب الآن ينحصر في كلمة واحدة (رد الفعل).. تسوق الرياح أقدار البلدين بقوة رد الفعل.. ويغيب النظر الاستراتيجي العميق للمستقبل.. وهي حالة ظلت سائدة منذ أول يوم وقّّع فيه الطرفان اتفاق نيفاشا.. ضربة من هنا ترتد بضربة من هناك.. وتصريح بتصريح والبادئ أظلم.. وفي مثل هذه الأجواء لن تتحرك أي مصالح مشتركة بين البلدين.. بل على النقيض.. تتكدر التجارة المشتركة بين البلدين ويعاني التجار الشماليون من حالات يمنعون في نقاط العبور ويؤمرون بالعودة ببضائعهم مما يكبدهم خسائر مفجعة.. لابد من الخروج من حالة سيطرة (السياسة) على العلاقات بين السودان وجنوب السودان.. الساسة أدوا ما عليهم وفصلوا الوطن الواحد وصنعوا بلدين متنافرين.. ولا سبيل لإنهاء حالة العداوة هذه إلا إذا انسحبت السياسة والساسة من أثير البلدين.. لو تركت هذه العلاقات للفن.. للرياضة.. للتجارة.. لكانت أكفى لإيقاف الحروب التي تجري بالأصالة أو بالوكالة. بعد كل هذا العمر في مزادات المحن والكوارث.. لابد من الاعتراف أننا في حاجة ماسة لاستنباط مفاهيم جديدة سديدة لما يجب أن تقوم عليه سياساتنا الخارجية.. خاصة مع دول الجوار.. كل دول الجوار لا تزال ملف علاقاتنا الثنائية في كنف أجهزة الأمن عند الطرفين.. رغم الحجم الهائل للمصالح المشتركة التي يمكن أن تبني صروحاً من الرخاء والسلام على جانبي الحدود مع كل من هذه الأقطار.. كل شيء متروك لـ(رد الفعل).. ولا تظهر في الأفق معالم سياسة منهجية مؤسسة على نظرة سديدة للمستقبل.. وبصراحة.. في الأمر ما لا يمكن أن يقال على الأقل الآن..!!

التيار


تعليقات 16 | إهداء 0 | زيارات 3393

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#239083 [مغترب]
0.00/5 (0 صوت)

11-13-2011 12:05 PM
يا عثمان انت ما شايف كويس و لا شنو دي شلعوها الكيزان و ليس السياسيين


#239055 [A.nasir]
0.00/5 (0 صوت)

11-13-2011 11:06 AM
استاذ عثمان لك التحية والتقدير على كتاباتك الرائعة رقم تعليقات القراء التي في اغلبها ناغدة نغدا انطباعيا
فعين الرضا عن كل عيب كليلة ,,,,,ولكن عين السخط تبدي المساويا
واكبر دليل على انك كاتب ناجح هو كثرة القراء فكتاباتك من اكثر الكتابات التي يعلق عليها القراء , بالرغم من ان بعضهم ينتقد ويزم ربما قبل قراءة المكتوب
ربنا يعينك على القراء وعلى الحكام ما دمت تعتقد فيما تكتب.


ردود على A.nasir
Saudi Arabia [قرفان خالص] 11-14-2011 12:49 AM

نحن بنعلق ما عشان نجاح كتاباتو يا ناغد انت ..

نحن بنعلق عشان نفشي غبننا وحنقنا على هذا الجبان الرعديد ...

اخخخخخخخخخخخ

غاب قوسين خلاصه او ادنى منه مطلب
ترونه بعيدا ونراه نحــــــــــــــن اقرب


#238968 [كوز شعيرية]
0.00/5 (0 صوت)

11-13-2011 05:44 AM
حيرتنا والله مرات بيجينى احساس انك بتكتب بطريقة ومخطط بتاع كيزان انك تفش غبينتك بعمودك ده حتى قراءك يطلعو الفى قلبهم وينفسو على نفسهم حبة وكده تبقى رضيت الحكومة وناس حزبك والقراء ومرات اقول انك كوز لكن تبت واهتديت لكن اتذكر كتاباتك من الثمنينات والتسعينات اصنفك مع الخال الرئاسى بس بدل العمة بجدك ببنطلون اكتب وفى الاخر نحن بنحب الراجل الدغرى والصادق حتى لو كان كوز لانه ما كل الكيزان اولاد كلب لسع بهم من به خير لكن الرجال البهم خير وامناء ومش حرامية انزو فى كورنر واصبحو منسين لانهم نظفين


#238916 [مدحت عروة]
0.00/5 (0 صوت)

11-13-2011 01:08 AM
يا عثمان ميرغنى استنبطوا حكومة او نظام جديد غير نظام الانقاذ هذا (اسم الدلع للاسلام السياسى الانتهازى الميكافيلى البراقماتى الخ الخ) عشان علاقاتنا اولا مع شعبنا تكون كويسة بعدين مع الجيران من خلال الثقافة و التجارة و الفن و الرياضة !! لا يستقيم الظل و العود اعوج و العود هنا هو الانقاذ!!


#238884 [مازن]
0.00/5 (0 صوت)

11-12-2011 10:46 PM
يا عثمان بيه ، لعبة التلاتة ورقات إنتهت والزمن الأصلي إنتهى زمان ونحن بنلعب حاليا في الزمن الإضافي ، ألحق نفسك وحدد موقفك ، شايت وين وبطل حركات ، يا جوه يا بره ، المركب بدت تغرق الحق نفسك مع الفيران النطت حكاية تفلق وتداوي والعدو والصديق تختهم في نفس السلة ما بتنفع وحكاية ترضي على ديل وتجبر بخاطر ديلك برضو ما بتنفع وحكاية تشتم ديلاك عشان برضو تشتم معاهم ديل ما يتجيب فائدة وحكاية تطبطب هنا وتمسح الجوخ بي هناك أيضا ما منها منفعة يا أخي حيرتنا معاك إنت ماشي ولا جاي قاعد و لا قايم . الدبارة ياااااااااااااااااااااانااااااااااااااااااااااااس عثمان بيه كرهنا الدنيا.


#238872 [عبدالواحد00 ]
0.00/5 (0 صوت)

11-12-2011 10:05 PM
يا هندسة خليك راجل مره وقولها بصريح العبارة (إنك متبرى من النظام المعفن ده) وصدقنى اللف والدوران الجميع تجاوزوه وما عاد أحد يخشى من أحد إستنادا على مواد الدستور!!! ونراك تعمل بنظرية (رجل بره00ورجل جوه) على آمل أن ينصلح حال هذا النظام !! وهيهات أن ينعدل الظل والعود أعوج !!هذا زمن التصريح وعيبك محاولة العمل بالتلميح 00والغريب انت الوحيد الما فاهم انت بتقول فى شنو!!والفرق بينا وبينك اننا بنكتب ما نعنيه ولو فى شكل تعليق ولا مجال لتزويق الكلام وراينا واضح ومباشر 00لماذا لا تقتدى بكتاب الراكوبة وتوجه نقد مباشر تلقى بها رضاء ربك والشعب ؟أركز00يا ود ميرغنى وقول العايز تقولوا اليوم وليس غدا ومليون طظ فى الجريده المقلقة منامك ومتعبه ضميرك إذا كان لديك ضمير أصلا وخاصة أنت على الاقل تختلف عن غيرك من الصحفيين الذين لا يمتهنون غير مهنة الصحافة وقديما قالوا (صنعة فى اليد أمان من الفقر00يا فقر0


#238835 [Kalifa]
0.00/5 (0 صوت)

11-12-2011 08:17 PM
استاذنا عثمان ميرغني عيدكم مبارك .....الحاصل ليه وليك وللوطن سببو أخوانك في الله سابقا,,,,,,, ديل جاطوها مــــــــا قدرو يقودها وصاطوها مــــــــــا قدرو يصفوها وربك كريم علينا وعلى عيالنا!!!!!!!!!!


#238824 [الزول الكان سمح]
0.00/5 (0 صوت)

11-12-2011 07:51 PM

أختنا بت الخرطوم....كل سنة وإنتى طيبة

إن شاء الله تسأل منك العافية

نحنا موجوديييين...فى الموقع..وبكثرة لكننا قد قطعنا العهد منذ شهور بأن لا تعليق ولا مشاركة لعديم المصداقية ..صاحب ود الخدر..لكن مرات بنعدى على عموده وإذا لقينا زول من جماعتنا زيك وزى ود حامد بنضطر نقيف ونقرأ التعليقات ونعلق عليها.

ووالله أنا برضو بضم صوتى للمعلق عممك

وينك يالبتعدى يومك خنق ( إدسيت وين ) ..(لبدت وين )

أظهر وبان ليك الأمان



#238742 [ود الشريف]
0.00/5 (0 صوت)

11-12-2011 03:02 PM


تعرف ياستاذ عثمان ميرغنى حاديك انطباعى وانطباع من كان معى فى اول ايام العيد فى الغربة بنكون حريصين اننا نحضر صلاة العيد منقولة من السودان لنعيش فرحة العيد مع اهلنا ونتخيل الايام الخوالى ولكن كانت الكارثة حينما نقلت الصلاة من الكرمك والسيد عمر البشير يرتدى البذلة العسكرية بالله فى يوم العيد يوم الفرح والتسامح يخرج علينا بالزى العسكرى ويهدد ويتوعد حقيقة كانت صدمة مدوية علينا ورددنا والله فضحتنا يا سيادة الرئيس وبصراحة سياسة الحزب الحاكم فى السودان مدعومة من حكام قطر المعروفييين بانهم ينفذون الاجندة الصهوينية فى المنطقة ولا وهى تقسيم العلم العربي والاسلامى ولن يتم ذلك الا من خلال مايسمى الاخوان المسلمييين اخوان الشيطان وخير دليل مايحدث فى بلادى هل لديك شك اذا استمر نظام الخرطوم فى الحكم ان السودان سيتمزق الى 5 او 6 دول بالتاكيد سيحدث لماذا المجتمع الدولي سامط اتجاه الخرطوم يريد ان يولد الكراهية بين ابناء السودان هل تعتقد ان الحرب فى النيل الازرق وجنوب كردفان ودارفور وقريبا فى الشرق ماذا سينتج عنها قبن كراهية وحقد وحينما يتحقق ذلك تتدخل الادارة الامريكية والمجتمع الدولي وتدعو للتفاوض وهنا يحضر حق تقرير المصير بعد ان يتم تهئية الاجواء لانجاح التصويت للانفصال كما حدث فى جنوب السودان مشكلتنا ان ذاكرتنا سطحية ومغفلييين جدا فى قراءة التاريخ لذا اتمنى ان يتنبه اهل السودان لما يحاك ضدهم والخلاص يكمن فى الخلاص من الحكومة الفاشلة فى بلادنا


#238729 [الواعظ]
0.00/5 (0 صوت)

11-12-2011 02:34 PM
من الإنصاف عزيزي عثمان أن تقول أن كل أمور السودان من طقطق للسلام عليكم أصبحت رهن الأنفعالات والتخبط والتنابذ أيضا فلا الرئيس يعي ما يقول أو يفعل ولا مستشاريه يعرفون مهامهم فيشيرون عليه بالمعقول من القول والفعل (ولا أقول الصواب فهو أبعد لهم من نجوم السماء) ولا أحد يدري ما يفعل في أي مرفق من مرافق الدولة فالمصلحة الوطنية أنعدمت تماما في كل حركات وسكنات الدوله (وأعني القائمين على الأمر) والمطلوب تخليهم عن المسئولية اليوم قبل الغد فقد فشلنا في كل شئ منذ قيام الإنقاذ وبالأخص بعد تصفية الكوادر المؤهلة في مؤسسات الدولة وتمكين عصبة الجهلاء وأصحاب المصالح .... فلا تغرنك الألقاب العلمية التي يتنادوا بها ، فالثابت أنهم عصبة تنخر كالسوس في جسد البلاد والعباد ولا أستبعد أبدا أنهم قد تحصلوا علي هذه الألقاب عن طريق الغش والتدليس أو كمكافآت لبعضهم البعض نظير خدمة الننظيم، والدليل هو التخبط في كل شئ ولا إستثناء لشئ . أسأل الله أن يكشف عنا هذه الغمة بحوله وقوته سبحانه وتعالى .


#238722 [بت الخرطوم]
0.00/5 (0 صوت)

11-12-2011 02:21 PM
المعلق عممو ما عارفة الاسم كدا صخ كل عام وانتم وجميع رواد الراكوبة بخير وعافية وبرضو تعليقى خارج النص يظهر كل امعلقين الرائعين ماخدين موقف من صاحب الوالى ود الخضر بجانب الجعلى فقدنا الزول الكان سمح والساير والندى ودقش والكثيرين والله حقيقة فقدناكم اظهروا ليزداد الموقع روعة ورونق


#238711 [Aboo deena]
0.00/5 (0 صوت)

11-12-2011 02:01 PM
كلامك مظبوط يا باشمهندس

مشكلة السودان الاساسية واساس الحروب هي السياسة الخارجية لانه وزارة الخارجية عندنا تفتقر لاي خبرة او نوع من الدوبلوماسية .. وتحتاج للتغيير من الراس للاساس .. اقرب مثال امس مندوب السودان في الامم المتحدة هو في امريكا ينفي في خبر ضرب المعسكر في الجنوب الخبر المصور والمنشور والمشاهد ... كان الاجدر ان يقول نتيجة لخطأ غير مقصود والتحقيق جاري لمحاسبة الفاعل ( هذه هي تسمى الدوبلماسية ياكرتي ) بعدين الفاعل حتى لو رقيتوه لرتبة اعلى ما في واحد راح يسألكم ..

ارحمو نا حتى لو بتعيين دكتور غازي العتباني وزيرا للخارجية بدلا عن هذا العنقالي وفرقته يمكن يخفف الزنقة شوية ..


#238706 [عمممك]
0.00/5 (0 صوت)

11-12-2011 01:53 PM
السلام عليكم ورحمة الله وبركاته والعيد مبارك علكيم ويعود عليكم بالصحة والعافية والحرية..

معليش سؤال خارج النص...

لي فترة مفتقد اخونا المعلقاتي الرااائع (الجعلي البعدي يومو خنق... من الدندر) ان شاء الله يكون الغياب لخير وما تكون كلاب الأمن عرفت طريقو ؟؟؟؟

وتحياتي للجميع


ردود على عمممك
Sudan [منزر القاضي] 11-13-2011 01:03 AM
السلام عليكم ايها الاخوة السودانين
الاخ عثمان مرغني تتصف كتابته بالنضج لانه يخاطب القضايا التي في اذهان العامة
ولكنه للاسف كوز كوز كوز كبير على ما اعتقد انه ينفذ توجهات رؤسائه وبي صراحة كنا من المعجبين بكتابته منذ ان كان في جريدة السوداني مع عمنا الواضح الزومة (وبي المناسبة دى هو وين ) ولكن لابد من ظهور الحقيقة لذلك امتنعنا من قراءت مقالته هو ومن شابهه مثل محجوب عروة والقائمة تطول والف شكر للراكوبة


عثمان ميرغين
عثمان ميرغين

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة