المقالات
السياسة
ارشيف مقالات سياسية
إلا مأمون حميدة
إلا مأمون حميدة
11-16-2011 08:13 AM


إلا مأمون حميدة

أسماء الجنيد
[email protected]

قدر ما نقول نتفوق عليكم بحسن النية يا ناس المؤتمر اللآوطني
تتفوقوا إنتو وبجدارة علينا بسوء النية والتجليات البتجي منكم كل ما طلعت شمس يوم على بلدنا المطمور وجع حد الغرق
كل يوم قرار مصيبة بنزل على المواطن البسيط المغلوب على امره
كلو عرفناه من سوء إدارة لي نهب مصلح لي فساد عم البوادي والحضر ووصل الجيران من باقي الدول وفاتها لي غادي
ده غير الحروب والمرض والجوع والتشرد والموت البقى خبر عادي في الصحف واجهزة الإعلام المسموعة والمرئية , زي كأن البموتوا ديل مابشر زيكم .. وغير الجريمة الأصبحت هاجس يقض مضجع الشعب , وكأن الشرطة والأمن في البلد موجودين فقط لقمع المواطن وقهره مش الدفاع عنه وعن عرضه وارضه
ده كلوو كووم وقرار اولى الامر بالأمس بتعيين مأمون حميدة وزير للصحة كوم تاني براه ..
من منا من لم يعرف هذا المأمون حميدة الفي زمنه ضاع التعليم وضاعت هيبة جامعة الخرطوم وعلمها المعروف للبعيد والداني
استغل موقعه كمدير لجامعة الخرطوم ، وبداها بكلية طب وفجعتن شب بين ليلة وضحاها وعملها جامعة عديل ، مص فيها دم المغتربين المشتتين فى بلاد الله لأنها كانت اياها الجامعه الوحيده الفيها الكفاءات السارقها من باقي الجامعات.
واهلنا الغبش اصحاب الشهادات الناجحين بسهرهم وتعبهم خلاهم هايمين بالشوارع , ما عندهم الدولارات البطلبها لجامعته الخاصة
بعد ده ما إكتفى , الطمع والجشع خلاه يغري الأساتذة الفي جامعة الخرطوم وفي الجامعات التانية ، وحولهم لي صالح جامعته الخاصة ، وببساطة إنتهى من التعليم العالي في البلد , وإنتو يا ناس المؤتمر الوطني واقفين تتفرجوا ، لأنه ما بهمكم اولادكم ممكن يدخلوا كليات مأمون حميدة لأنه داير دولارات ما داير شهادات ولا طلبة متفوقين , اللهم إلا من رحم ربي
وبعدها قبل على مجالوا في الطب , بداه بالمركز الطبي وقبل على ناس الكلى , عارف مرضى الكلى في السودان اكتر من ناس الملاريا زاتها
قبل عليهم واستنزف العندهم والماعندهم . ومنهم البموت قدامه مابرحمه ، يدفع ولا يمشي المقابر
وبعد ده لا شبع لا قنع فتح مستشفى الزيتونة تحت مسمى تاني عشان يموه الحكاية , وقال دكاترة جايين من لندن ، وياريت الخبرات دى فى مقدور اي مواطن يصل عتبة بابها عشان يتعالج , لكن ده مستشفى ما يجيهو إلا البهوات ورجال الأعمال والناس الخامين البلد وجاييهم القرش بارد ما طاقيهم فيه حجر دغش, حتى لو ماعيانين يبجوا ساااااي يطمنوا على روحهم الحلوة العاجباهم ؟
يعني بإختصار كاوش على اهم مرفقين حيويين فى البلد هما التعليم والصحة وقضى عليهم وقمح اهلنا البسطاء.
غايتو بإختياركم لمامون حميدة وزيرا للصحة . كأنكم حكمتوا على الشعب الفضل ده بالهلاك والموت السريع جدا
ليه بس التشفي والظلم ده على الشعب الما زال منبطح ليكم عديــــل وما فتح خشمو ولا قال بغم ؟؟
هل ده عقاب ليه .؟ ولا تشفي ولا الحاصل شنو زاتو بقينا ما عارفين ولا قادرين نستوعب قراراتكم البتدمر البلد يوماتي .
مسعول من الخير إنت يا الوزير الجديد , النبي فيك هسه إنت فاضب يعني ولا فاضي؟ معقول عندك زمن بكفيك لامن تحل مشاكل الصحة الفي البلد كلها؟
والله لو تم إختيارك بالإسم كان المفروض ترفض وتعتذر لأسباب إنسانية على الأقل , لكن الحقيقة المرة إنعدمت المروة والرحمة والإنسانية في زمنا الأغبرواصبح الرأي عند اصحاب الثروة او السلطة او الأثنان معا..
لا نقول إلا حسبي الله ونعم الوكيل
اتقوا الله في الشعب الفضل . ارحموا من في الأرض يرحمكم من في السماء

متاوقة
ـــــــــــــ
عليكم الله كفآءات قيمة ونادرة زي دكتور كنيش وغيره كتيرين هايمين بالبلود يستفيد منهم الغريب ويتحرم منهم اهلهم وبلدهم، ويجي آخرتها الملياردير رجل الأعمال مأمون حميدة المافاضي من لم قروش وإدارة ممتلكاته الخاصة يبقي وزير صحة بلدنا ؟ هملت والله يا السودان,

ليك الله يا بلد
يمهل ولا يهمل
ودعتكم الله


تعليقات 20 | إهداء 4 | زيارات 5638

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#241599 [أبوعلي]
0.00/5 (0 صوت)

11-17-2011 07:20 PM
كلنا فاكرين مشروع التمكين خلاس إنتهى والجماعة شبعوا خلاص لكن حتى الفتات الفاضل حالفين إلا يكنسوه ..
مأمون حميدة ماحرامي بس دا جزار دمر جامعة الخرطوم وإستولى على كل شيء يخص المستشفيات والعلاج وجامعات الطب ..
كل من يدافع عنه حرامي أرزقي مؤتمرجي فالراجل فايله أكثر من وسخ ..


#241545 [مواطن ]
0.00/5 (0 صوت)

11-17-2011 05:43 PM
د. مامون لا يرحم في الاتعاب والاموال
قبيل فترة كانت مقابلته هي الاغلي

د. مامون تم في عهده بجامعة الخرطوم تعريب المناهج دون اي دراسة او حتي تحضير مراجع واساتذة
وهو من نفذ هذه السياسة لكنه بعد ان ترك الجامعة وأسس جامعته الخاصة التي تدرس بالإنجليزي
جاء وانتقد الامر بشدة وكانه لم يكن الاداة التي عربت

الان جريدة الوظن تفتح ملف عن ادوية منتهية الصلاحية بمستشفي الزيتونة :

الخرطوم: الوطن:
فيما تبدأ«الوطن» من اليوم وتباعاً فتح ملف الأخطاء والمخالفات الطبية على مصراعيه، تحصلت الصحيفة على مستندات خطيرة حول مخالفات بمستشفى« الزيتونة» رصدتها إدارة المؤسسات العلاجية الخاصة التابعة لوزارة الصحة ( ولاية الخرطوم) خلال زيارة إشرافية لمستشفى «الزيتونة» بتاريخ 23/11/2010م حيث تم العثور على أدوية ومحاليل منتهية الصلاحية منها InderaI In
j والكمية كانت 32 Amps تاريخ انتهاء الصلاحية كان في 8/2010م
في العملية: lox heavy 5%) lidocaine)وكميته 20 Amps والانتهاء في 8/2010
في العملية: lidocaine( 5% lox heavy) وكميته 60 Amps تاريخ انتهاء الصلاحية 8/2010
في الصيدلية الداخلية: Aspirin IV Inj وكميته 5 Amps (أدوية غير مسجلة). وFlectadol 500mg الكمية 6 Amps (أدوية غير مسجلة). kapron Injالكمية 4 Amps (أدوية غير مسجلة) .

وقررت إدارة المؤسسات العلاجية الخاصة واستناداً على المادة (1ح) من قانون المؤسسات العلاجية الخاصة أن يدفع مستشفى «الزيتونة» غرامة مالية قدرها خمسة آلاف جنيه سوداني على أن تدفع خلال 72 ساعة من تاريخ 12/10/2010م مع إنذار بالإغلاق للمستشفى.

وفي الأثناء تطرح المخالفات الطبية أسئلة عدة مفادها - لماذا لا تخصص نيابة للمخالفات الطبية على غرار النيابات المتخصصة؟
كما أن البعض يسأل عن مصير المواطنين الذين تضرروا من الأخطاء المخالفات الطبية. ومن يعيد لهم حقهم؟
وكم عدد هؤلاء الذين قضوا جراء المخالفات الطبية ؟
ولماذا لا يتم تقديم الجهات المخطئة إلى محكمة علنية؟
ولماذا يظل الأمر قراراً إدارياً فقط؟ أليس من الأجدى العقاب المعلن للمخطئ والمخالف ؟
وما مصلحة أهل المهنة من معاقبة المخطئين وفق ضوابط مهنية وإجراءات إدارية قد لا يعلم عنها المواطنون شيئاً يجبر ضررهم؟
وهل يمكن أن نكتفي فقط بعقاب المستشفيات بهذه الطريقة؟ أم أن الأمر سيكون على طريقة جديدة؟


#241402 [بابكر]
0.00/5 (0 صوت)

11-17-2011 01:17 PM
يا استاذه مامون حميضه زي ما دمر التعليم ح يدوه فرصه ليدمر ما تبقي من الصحه اولا ح يبيع ما تبقي من مستشفيات واراضي تابعه لها ثانيا سيرفع سعر العلاج ومافي علاج إلا بالدولار واليرو هذا رجل طفيلي إنتهازي وطحلب متكاثر سريع الانتشار والعدوه ويا حليل البلد الببقه فيها امثال مامون حميضه وزير صحه


#241394 [الزول الكان سمح]
0.00/5 (0 صوت)

11-17-2011 01:05 PM

خبر طازج أوردته اليوم صحيفة صاحب (الوالى الذى لايظلم عنده أحد )

كشف والي الخرطوم د. عبد الرحمن الخضر بأن التشكيل الجديد لولاية الخرطوم خضع لمشاورات مكثفة أدت لتدخل رئيس الجمهورية لإقناع بعض الشخصيات مثل مأمون حميدة، وزير الصحة، والفريق الرشيد عثمان فقيري، وزير التخطيط العمراني. فيما أكدت مصادر مطلعة رفض معتمد كرري د. الناجي عن تولي المنصب.



#241390 [ودالهميج]
0.00/5 (0 صوت)

11-17-2011 01:00 PM
من أين أتي هاؤلا و هل ولدتهم أمهاتنا


#241287 [زول]
0.00/5 (0 صوت)

11-17-2011 11:10 AM
يا جماعة اصلا هو صاحب فكرة بيع المستشفيات الحكومية للخاص ...وبعد ما الجماعة حولو المستشفيات الي الخرطوم .... جابوه علشان يتم الشغلانة.....حيبدا بشراكة بين الحكومة الولايئة وشركات ارداة خدمات طبية .... ( طبعا شركاته )

ويلا جاك البيع



انتو وانا في
نشوف اخرتا


#241111 [واحد]
0.00/5 (0 صوت)

11-17-2011 12:16 AM
ارض الاكاديميه وقف استولي عليه الكوز مامون حميده


#240953 [محمد احمد السودانى]
0.00/5 (0 صوت)

11-16-2011 07:19 PM
شكرا استاذة
ياللة دكتور كنيش ذلك الفذ القدير... نعم لوكان لدينا امثالة فى سدة الحكم لكنا فى
مراتب عالية.... لة التحية والتجلة دكتور كنيش وامثالة وشكرا يا ستاذة على تذكيرنا بقامة كبيرة مثل كنيش.. وعاش نضال الشعب


#240916 [علي]
0.00/5 (0 صوت)

11-16-2011 06:22 PM
دي حساده ساي!!! اسه المشافي ده شن فيها ؟
مالداخل ميت فيها!!
والخارج انكتبلوا عمر تاني مابسويها!!!
يا يلم فيك بتاع امتياز لي كبدك يهريها!!!!
ولي النايب ينسي مقصو من نعاسو والد يه ما تغطيها!!
والله الكدايس البتخطف الجنه الميلود من واليها!!!
والله اسطوانة الاكسجين الديمه الرماد ماليها!!!
وله الممرضات نايمات وله بينسجن وله يروجن لفكيها!!!
ده كما العسكري في الباب نهرك ودخلك السجن تاليها!!
اها اكان بعوها او خلوها شن فايدة دحين شن فيها!!
ده جرسه ساي والموت في البلد اصلو ده الراجيها!!
ات قايله المابمشي الدفاع للشعب بينجو من واليها!!
اكان ماجيتو المشافي ؟من لاقيكم في حسنه الخاتمه وبندفعك باقيها!!!
وكما قدرنا منشيل للعيون الحلوات وبنتاجر فيها!!
اخ منكم عزبتونا ومافيهمتو المقصود!!!نحنه ماديرنك ..عديل بندق الجرس ونخصصه كلها من اوله لي تاليها!!!


#240837 [مراد حماد]
0.00/5 (0 صوت)

11-16-2011 04:41 PM
يا أسماء و يا جماعة ........... كلكم ما ناقشين
الحاجات دي كلها تبع المؤتمر الوطني
مأمون ده بعد شوية حيجنحوه
إنتو في و أنا في


#240806 [سوداني فضل]
0.00/5 (0 صوت)

11-16-2011 04:03 PM
متشفي البان جديد الحاج يوسف بقيادات إصطافها الذي يهدد الأطباء في معاركهم لأجل الصحة بـ - معانا في المؤتمر الوطني ولا لا- تبع كالسيد مأمون، والزيتونة تبع الوزير وجامعة طبية ، ياخي تعارض المصالح الشخصية ده لم يحل بينك وبين الوزارة هذا وحده يحكم عليك والأختشوا ماتوا وعلي درب المتعافي كلكم سائرون حكومة المافيا الإفريقية ليمتد...


#240805 [سوداني فضل]
0.00/5 (0 صوت)

11-16-2011 04:02 PM
متشفي البان جديد الحاج يوسف بقيادات إصطافها الذي يهدد الأطباء في معاركهم لأجل الصحة بـ - معانا في المؤتمر الوطني ولا لا- تبع كالسيد مأمون، والزيتونة تبع الوزير وجامعة طبية ، ياخي تعارض المصالح الشخصية ده لم يحل بينك وبين الوزارة هذا وحده يحكم عليك والأختشوا ماتوا وعلي درب المتعافي كلكم سائرون حكومة المافيا الإفريقية ليمتد...


#240773 [أبوكمال]
0.00/5 (0 صوت)

11-16-2011 03:11 PM
هذا الكلام فيه اجحاف شديد في حق هذا الرجل العظيم بروفسير مامون . ,مأمون ينحدر من أسرة ميسورة.وانا شخصيا أري أن المنصب و هو ولائي لأيتناسب مع مامون و لعله قبل المنصب لرفع مستوي الاداء في المستشفيات.
أكن كل الاحترام للشيح كنيش ولكنه لم يقدم للبلد ما قدمه مأمون.
أتمني أن نكون موضوعيين في كتاباتنا أكثر من جريدة الوطن.


#240766 [abohani]
0.00/5 (0 صوت)

11-16-2011 02:49 PM
وحايطلع منها يعمل ليه وزارة صحة خاصة بيه كمان ..


صدقوا الراجل دا مرة رفت دفعة كاملة من الجامعة بتاعين المختبرات لمان سألوه قال مش جامعتي ؟؟


#240735 [bkri]
0.00/5 (0 صوت)

11-16-2011 02:11 PM
صدر قرار من وزارة الصحه بمنع ادخال الاجهزه الطبيه المستعمله الى السودان والسيد الوزير الجديد الدكتور مامون حميده كان اول اتلمتضررين من هذا القرار والان بحمد الله اصبح وزير واللبيب بالاشاره يفهم


#240715 [ابراهيم قدورة]
0.00/5 (0 صوت)

11-16-2011 01:57 PM
الفرض معروف يابت الجنيد عايزنوا يفرتق باقي الخرابات قصدي المستشفيات الفضلت عشان الناس غصب عنها تمشي مستشفياتهم
حسبنا الله ونعم الوكيل


#240684 [ali omar]
0.00/5 (0 صوت)

11-16-2011 01:09 PM
غايتو ياأسماء الله يكتر من أمثالك ..
وربنا ينصرك زي ما انتصرتي للغلابة الماقادرين يقولوا البغلة في الابريق ..


#240649 [orass]
0.00/5 (0 صوت)

11-16-2011 12:02 PM
يا أسماء الجنيد يقدرك النجرك .. إنتي والمعلق (د. سيد عبدالقادر قنات) من الضحك نسيتوني الداير اكتبو.
وعليكم الله ناس السودان الفضلوا ديل يتعالج من شنو , ولا من شنو , يتعالجوا لي شنو ؟؟؟
المرض زاتو فتر منهم وقال ليهم مرضتوني عديل.
وبعدين الأعور ضربوا في عينو العورة - قال : اصلو خربانة خربانة
الله ينتقم منكم يا ناس المؤتمر الواطي .. تشوفوا في جنا حشاكم في الدنيا قبل الآخرة .. ما مسامحنكم لا دنيا ولا آخرة.


#240573 [د.سيد عبد القادر قنات]
0.00/5 (0 صوت)

11-16-2011 10:20 AM
سلامات أستاذة أسماء
مالو مامون حميدة؟؟
دا بروفسير قدر الدنيا،
عالم في الطب
وكمان عالم في لم القروش!!!
جامعة الخرتوم جابوهو عشان يفرتكا،
وتم الشغلانة بكل يسر،
أها قام عمل كلية طب خاصة وصغنتوته كدي،
مالو الزول شاطر شديد
شال مستشفي البان جديد وعملو تأليمي
تاني كمان أيدو لاحقة شال المستشفي الأكاديمي
وبرضو عملو تأليمي،،
يا أسما ما سمعتي بوفد منظمة الكنائس العالمية وزيارته ،
بعدين يستبشرون دي الموقع تمام التمام عشان البروف زول مميز علم وفهم وإنتماء وولاء،
بس المستشفي بالقروش ما خيري تب، تدفع تتعالج ما تدفع تعرف دربك بي وين!
أها الزيتونة قلنا شوية نرقيكم ونعمل ليكم حاجة تليق بيكم،
بس برضو الدفع قبال الدخول لا جوة،
والدفع بسيط جدا لمن إستطاع إليه سبيلا
وبعدين مالو برنامج حديث الأطباء
دعاية مدفوعة الأجر من الشعب السوداني الفضل وأنا بروف أضيع زمني دا ساكت؟؟؟
ياخي إنطموا وشوفو ليكم شغلة تقضوها، دا برنامج حديث الأطباء ، أطبا ما خمج وخريجين مامون حميدة، طبعا باقي كليات الطب نحن لا نثق في خريجيها، أها المرض أمامكم والزيتونة ويستبشرون خلفكم ولا أقول ليكم قول الماعندو حق الدواء نحنا ماعندنا صدقة ولا فاتحنها تكية ، عندك قرش تتعالج عندنا وعندك قرش كمان ولدك يقرا عندنا، وهو وقت ما عندو قروش القاري ليها شنو والمتعالج ليها شنو؟؟؟
بعدين أنا خلاص لميت القروش وبقيت زي الصرافة دولار ريال شيك سياحي وبجميع العملات نتعاملل، بس الدين ممنوع ومافي تأجيل للأقساط تب،،،،
أها قلتو شنو ديك شن سموها؟؟ الأيلولة؟؟ لا دي يا جماعة الخير هي الختوة الإستباقية الإحترازية والتسخين قبل المباراة ودي المناظر بتاعت الفلم الهندي، من أجل أبنائي،،، نهاية المطاف أنا بشلع ليكم مستشفيات وزارة الصحة ولاية الخرتوم وأعدما طافي النار وألحقا أمات منو داك؟؟؟ خلاص العندو قروش حندق ليكم فيها الجرس والدلالة حتكون شفافية وشرعية والماعندو قروش يمتنعون،، أصلو نحن الصحة ما من أولوياتنا للمعدمين الفلسانين الزيكم كده، رنين مغنطيسي شنو وزراعة كلي شنو؟؟؟ إختشوا ، شوفوليكم قرض ولا محريب ولا سنة مكة ولا صفق ليمون ولا زيت سمسم كلها رخيصة جدا جدا وكمان القرض ممكن تشحدو من جارك وتتعالج،،،

أليس الشافي هو الله
اليس الشافي هو الله
أليس الشافي هو الله
وأخيرا أقول ليكم سر عظيم وكبير خالص:::

يتساوي جميع المسلمين في مشارق الأرض ومغاربها بغض النظر عن لونهم وجنسهم وفقرهم وغناهم وطولهم وقصرهم في لبس الإحرام وأداء شعائر الحج كتفا بطكتف وجنبا بجنب،،
تاني شي يا جماعة الخير أنا إكتشفت أنو الكفن دا ما فيهو جيوب،
تالت شي: الأجل معلوم للواحد الأحد زمانا ومكانا وهيئة، أنظروا لملك ملوك أفريقيا ولفرعون مصر ولبن علي ، إنهم أقرب أمثلة،،،،
غدا لناظره قريب،
يديكم دوام الصحة وتمام العافية والشكر علي العافية


#240538 [حليل زمان]
0.00/5 (0 صوت)

11-16-2011 08:52 AM
يا استاذة اصلو حكومة النخاس دي كدة لامة شذاذ الافاق والمتخلفين واي واحد مستحيل يجي من بره للسودان السودان بقي بعبع ومخيف سرقة ونهب ودعارة ومخدرات


ردود على حليل زمان
Sudan [mohomed] 11-16-2011 12:32 PM
يا اخوانا انتو ماترفضوا تعيين مامون حميدة في حكومة الشلة دي . اصلو الزول ده معاهم من زمان وانتو ما جايبين خبر. كده افضل لانه ممكن الطامة تنزل عليه مع الجماعة وما تنسوا الحرامي بتاع مايو الذي دعم جامعة الخرطوم بخمسة وعشرين الف جنيه واخد دكتوراة فخرية وعندما جات الانتفاضة تمت محاكمته زي زي باقي الحرامية
ارجو المعذرة ان نسيت اسمه لكن افتكر فيه اسم خضر او الاخضر وارجو من القراء تذكيرنا به لمن يملك المعلومة.


أسماء الجنيد
 أسماء الجنيد

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة