متى يعتزل السياسي ؟ا
11-21-2011 01:01 PM

ساخر سبيل

متى يعتزل السياسي ؟

الفاتح يوسف جبرا

متى يعتزل السياسي ؟
* عندما يفتكرو ربنا طبعاً .. شفتو ليكم زول دخل السياسة دى عندنا مرق منها قبل ما روحو تمرق ؟ عندنا سياسيين عمرهم فات التمانين والشئ العجيب وغريب إنهم مما دخلوا السياسة ما في زول فيهم اشتغل ليهو شغلانة .. أنا شخصياً ما عارف فى جوازات سفرهم كاتبين ليهم فى حتة (المهنة) شنو؟ ...!!
- متى يعتزل لاعب الكرة (عندنا طبعن)؟
* عندما يضيع ليهو 1123 هدفاً منفرداً بالمرمى (هو والقون يعنى) .. عندما يدخل مرماهو 123 هدفاً (لم يحرزها الخصم) .. عندما يقوم بتركيب (طقم) أسنان .. عندما (يهندز) البلنتي ... عندما لا تساعده (صلعتو) فى التهديف بالراس ... عندما لا يسمع كلام المدرب (عشان أضانو تقلت وكده) ! .. عندما تكثر تمريراته للخصم (عاوز ليهو نضارات) .. عندما يخاطبه الحكم بـ(يا عمو الكبتن)!!
- متى يعتزل المطرب (عندنا طبعن) ؟
* عندما تصبح حباله الصوتية غير صالحة حتى لنشر الغسيل؟... عندما لا يستطيع الإمساك بالمايك (الشلل الرعاش طبعن) !!
- متى يعتزل الوالي؟
* عندما يخرج كل سكان ولايته هاتفين وهم يقولون : (لله يا محسنين ) .. عندما يجلس كل تلاميذ ولايته فى كراسى (جايبنها من بيوتم) .. عندما يشترك كل تلاميذ ولايته (في كتاب واااحد) .. عندما يترك كل مواطني ولايته العلاج في المستشفيات ويتجهون للعلاج (بالأعشاب) . !
-متى يعتزل حكم الكرة؟
* عندما يحتسب 3234 هدفاً غير صحيح .. عندما يقوم بتكسير أكثر من عشرين إستاداً (مش هو.. الجمهور طبعن) .. عندما تؤهله لياقته لإدارة المباراة لمدة (ربع ساعة فقط) .. والباقي يديرو من دائرة (السنتر) وكده !
- متى يعتزل رئيس النادي؟
* عندما يقوم بشراء لاعب بملايين الدولارات ويطلع (حنفية) .. عندما لا يحوز ناديه على أي بطولة خارجية لمده عشرين سنة ... عندما يقوم بضرب الحكم (لكمة خطافية) ما يقوم منها إلا بعد ما يرشوهو بالموية ! (طبعن ولا دي ذاااتا ) كما أثبتت التجارب !
- متى يعتزل الوزير ؟
* بعدما يلف الوزارات كوووولها .. بعد ما يزور كل (دول العالم) .. بعد ما يحج إلى بيت الله 55 حجة .. بعد ان يشطب العمارة التانية .. بعدما يعرس (عشرة مرات) .. بعد أن ياخد 3 دكتوراة .. بعد أن يكون لديه 32 حساب بنكى كل حساب (عملتو) براااها .. (الإجابة : راجع متى يعتزل المسئول) !
كسرة :
بصراحة كده لو منتظرين ليكم واحد من الناس الفوق ديل يعتزل (الترابة دي كالت خشومكم) !



تعليقات 15 | إهداء 1 | زيارات 4816

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#244492 [ابو امين]
0.00/5 (0 صوت)

11-22-2011 07:50 PM
متى يعتزل المغترب بالحاله الفى البلد يا استاذنا حتى دخول لبنات الجامعات الكان زمان بخليهو يعتزل اصبح بخليهو يكوس التجديد عشان يوفر مصاريف الجامعه ليهم


#244169 [Neema]
0.00/5 (0 صوت)

11-22-2011 11:28 AM
ومتى يعتزل الصحفيين اللي في بالي عندما يتوقف مصنع التلج


#244045 [واحد تانى]
0.00/5 (0 صوت)

11-22-2011 04:15 AM
يا جبرة......انت كعب شديد ....!!


#244024 [ساميه]
0.00/5 (0 صوت)

11-22-2011 01:10 AM
هى ياجبرا ياخوى التراب كايله خشومنا من الليله ...... ماكالت وكالت لمن الكيل تعب من كيلها .... لكن الله فى وغابة الفيل تريانه ورويانه ... وانشاء مايموت شجرها


#243962 [تمتم]
0.00/5 (0 صوت)

11-21-2011 10:34 PM
متي يعتزل الصحفي


#243940 [الزول الكان سمح]
0.00/5 (0 صوت)

11-21-2011 09:39 PM


متى يعتزل السياسي ؟

لمن ينصبوا قدام عماتو صيوان


#243905 [البعير]
0.00/5 (0 صوت)

11-21-2011 08:18 PM
الاستاذ/ جبرا تحية طيبة وبعد

هولاء القوم لا يستقيلون الا بشتاء سوداني كاسح بعد ما فاتنا الربيع العربي فأرجو

أن لا نفرط في الشتاء بكل الوسائل المتاحة ، وتقبل مرورى وشكراً 0


#243899 [فارس]
0.00/5 (0 صوت)

11-21-2011 07:58 PM
تحية للجميع ....

كلو كوم والسياسين عندنا كوم ... حتى لو الواحد خلاص بقا زي الزول المرض تب والدكتور حماهو الأكل برضو حيوصف ....

يا زول شيل اللحمة ديك .... حرم تشيل القطعة دي .... يا زول حرم تحسن الصحن ده ... ويكون عنده إحساس أنه هو من يتناول الأكل وليس من باب الكرم ....

ولي مقارنة ...

ما هي العلاقة بين الجداد .... والسياسيين ....

حصل يا جبرة شفت ليك جدادة عجوز ولا مشيبة ولا عندها صلعة ..... تمشي تغترب وتاخد سنتين ثلاثة أربعة تجي تلقاء الجداد الخليتة زمان في حالتة .... لا زادت لا نقصت .... نفس الشكل ... إلا تموت موت الله أو يضبحوها ....

بعدين في فرق بين الجداد والدجاج طبعاً .....
الجداد حقنا الزمان البيكاكي ويبيض وفي البيت وفي الكوشة .... والدجاج ده حق الشواية .....

إنت يا جبرة السياسيين ديل خاتهن في ترمسة .... لا بيبردوا لا بيحروا .... ياهن زاتن ... ستين وخمسين وتمانين واحد عندهم .... حتى الموت قليل .... حصل قريب سمعت بي سياسي مات .....

مليون تحية ...


#243896 [wander]
0.00/5 (0 صوت)

11-21-2011 07:54 PM
ومتي يعتزل الشعب!!! اها دي اجابته شنو!! لاننا مادايرين نعتزل للان!!


#243771 [القوس]
0.00/5 (0 صوت)

11-21-2011 03:43 PM
معليش يالفاتح أنا ما بتفق معاك في دي
الراجل يمكن ان يقدم استقالته في حالة ابلاغه بموعد تكريمه كمحارب اجاد النفاق بشرط ترقيته عاجلا للعمل في وزارة أعلى - مكافأة على فشله في الوزارة الاولى
وهناك اسباب كثيرة قد تعجل بالاستقالة مالم
يلاحق في قضايا الفساد - ومن اين لك هذا واقرار الذمة
مالم يتزوج بزوجة صغيرة اجمل من زوجته الاولى
- أو مالم يسب امريكا في العلن ويدخل معها في مفاوضات في السر
واذا حول بيته الى صرافة بها كل العملات الاجنبية وطالب الناس بمعادات الغرب
اومالم يدعو الناس للجهاد والزهد والتقشف وذهب يستثمر اموال الدولة لحسابه الخاص في الشركات الوهمية والفلل والفنادق - اي دعا الناس لتجارة الاخرة وتاجر هو في الدنيا
نعم الراجل ممكن يستقيل اذا لم يبع اخرته بدنياه الفانية ولكن دلني على من من رجال الانقاذ يستطيع ان يقول بغم او يتاجر مثل عباد الله في السوق ويدفع الاتاوات التي لا تحصى - خلوها مستورة
كسرة
وَإِذَا قِيلَ لَهُمْ لاَ تُفْسِدُواْ فِي الأَرْضِ قَالُواْ إِنَّمَا نَحْنُ مُصْلِحُونَ (11) أَلا إِنَّهُمْ هُمُ الْمُفْسِدُونَ وَلَـكِن لاَّ يَشْعُرُونَ (12) وَإِذَا قِيلَ لَهُمْ آمِنُواْ كَمَا آمَنَ النَّاسُ قَالُواْ أَنُؤْمِنُ كَمَا آمَنَ السُّفَهَاء أَلا إِنَّهُمْ هُمُ السُّفَهَاء وَلَـكِن لاَّ يَعْلَمُونَ (13)
البقرة


#243759 [kaka]
0.00/5 (0 صوت)

11-21-2011 03:23 PM
متي يعتزل الرئيس : ؟؟؟
عندما يصبح غير قادر للرقص وهز العجز (طبعا نسبة لتصلب العمود الفقري) ههههههههههها ودي نسيتها يا شيخنا علي العموم مقال رائع ....


#243723 [حجيتكم ما بجاتكم خيرا جانا و ما جاكم]
0.00/5 (0 صوت)

11-21-2011 02:34 PM
والله كلامك صاح وميه الميه لكن نحن التراب في خشمنا من سنة 89 والي الان المهم في الموضوع انو ما في حد عاوز ينزل معاش او يعتزل وده لانو الظروف بقت صعبة و الحياة غــــــــــــــــــــالية وهو يعمل شنو اذا كان رئيسو ذاتو ما عاوز ينزل معاش تقول الواحد وارثا من ابوه وبعدين حتي لو فرضنا انو وارثا من ابوه انحن اقصد الشعب يكون يا ربي حاسبنا في الورثة اقصد انو بقينا حجات وممتلكات والله ديل الله يفكنا منهم الداينصورات (التجارة) و التيران(القصر) و التماسيح(نواب البرلمان) و الصقور(الداخلية) و النسور(الاعلام) و العقبان(المتكوزنين) و بعض الافيال الما بتشبع وافراس النهر(وزارة المالية) و القائمة تطول بس خايف بعد اجلط ولكم التحية



#243703 [orass]
0.00/5 (0 صوت)

11-21-2011 01:57 PM
طيب يا عمو \\\\\"الفاتح\\\\\" الوالي ما استقال ليه حتى الآن؟؟؟ .. ما كل شروط الاعتزال منطبقة عليهو!!!!


ردود على orass
Sudan [awap] 11-23-2011 11:24 AM
نا قلت اسمي خلوهو عشان مقدم لي وظيفه

ياخونا انتو الزول الاسمو الخضر ما بختشي ولا بخجل نشف والقضراف او جاي يتمها في الخرطوم قال شنو الما قادر يعيش ف الخرطوم امشي الولايات عليكم الله في بجاحه اكتر من كدي ياخي البحلنا من الناس ديل شنو لاحول ولا قوه اابالله .


#243690 [apohind]
0.00/5 (0 صوت)

11-21-2011 01:39 PM
nova thetas jop


#243679 [sudani-online]
0.00/5 (0 صوت)

11-21-2011 01:23 PM
طبعا ماعندنا أى أمل فى اعتزال واحد من الجماعة .......الامل الوحيد هو الوارد فى بداية مقالك أن يفتكرهم الله جميعا مرة واحدة و كدة ...يعنى انتقال جماعى باذن الله


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة