خرمجة
11-30-2011 12:30 PM

خرمجة

الفاتح يوسف جبرا

تمتلئ العامية السودانية بنعوت كثيرة تشير إلى حالة أشخاص مختلفين بعض هذه النعوت والصفات قد يكون لأصولها نصيب في اللغة العربية الفصحى وبعضها الآخر يبدو أنه صناعة سودانية مية المية أدعوك عزيزي القارئ لتكسير بعض الوقت ونحن ننتظر التشكيلة الحكومية الجديدة بالتعرف إلى بعض هذه الحالات :
مكشكر : وهو الشخص الذي يدعوك إلى الشئ وفي دواخله ألا تفعل ككشكرة الحكومة للأحزاب بالمشاركة (مع إنها مش كشكرة آوى) !
مدستر : وهو الشخص الذي يقوم بأعمال يقال إنها بأمر الجن (يعنى مش الدستور).
مهترش : وهو ذلك الشخص الذي يتحدث طوال الوقت في أكثر من موضوع دون أن تفهم منه شيئا وقد كثرت الهترشة مؤخراً على النطاق الرسمي (ما تعرف ليه) ؟
مدردح : وهو الشخص الشفت والذي عرك الدنيا وعركته واجتاز كل دورات واختبارات(من أين تؤكل الكتف) ؟
ملحلح : والشخص الملحلح يختلف عن المدردح في انه يستخدم (دردحتو) في الوصول إلى مبتغاه بأعجل ما تيسر (كم عمارة مع انو لسه موظف صغير) !
مقرم : يجمع بين مواهب المدردح والملحلح (وده نوع خطير) !
مشاتر : الشخص المشاتر هو صاحب الرأي الأخرق الذي يخالف الجميع (يعنى الناس كووولها تقول يمين هو يقول شمال ... شرقي كمان )!
متشوبر : وهو الذي يحاول أن يفعل شيئا لا يستطيع القيام به لأن مؤهلاته دون ذلك بكثير كذلك المعلق الرياضي (عندنا طبعن) الذي قال معلقاً في إحدى المباريات لو أن مدرب البرازيل فعل كذا لكان الفوز من نصيبه !!
مزالف : تقال للشئ غير المطبوق طباقاً واحدا كضلفة الباب المزالفة أى(المفتولة)والباب المزالف غير الباب الموارب إذ أن الأخير مفتوح على إستحياء كالباب الذى دخل منه الميرغني
مدنكل : تقال للشئ المظبط (شكلاً أو موضوعاً) .. عشاء مدنكل .. عرس مدنكل .. سرقة مدنكلة كتلك السرقة ذات العملات الأجنبية التسع
مدنقس : وهى تقال للشخص (الما جايب خبر) أي الداقس !
مقودس : تقال للشخص صاحب الرأس المستطيل تشبيهاً له بالقادوس وهو جزء من أجزاء الساقية.
مرخم : تقال للشخص قليل الحركة كثير السكون الذي يعاني من حالة أقرب إلى النعاس والتخدير كحالة بعض الشعوب العربية.
مزعمط : تقال للشئ المأكول منه عشوائياً .. ديك مزعمط أى منتف الريش .. رأس مزعمط أي ذو حلاقه شينة ، مدينة رياضية مزعمطة ، خريطة مزعمطة أي صارت كما (الشورت).
مكوجن : تقال للشئ الذي تم عمله بصورة تفتقر إلى النظام(ردم ساااكت) بس.
ملغوس : الشئ غير الواضح (الما ماشي عديل) والشخص الملغوس هو الذي من غير مبادئ ثابتة كما الأكل الملغوس هو الذي لا يحتوى على قيمة غذائية (لغاويس يعنى) !
مخرمج : أي غير منظم أو منتظم وتم عمله دون تدبر أو ترتيب وإذا أردت أن تعرف الخرمجة على أصولها فأنظر حال عاصمتنا القومية أو أقول ليك حاجة .. أنظر في أية حتة محل ما يعجبك.
مجوبك : أنظر مخرمج والمعنى واضح .
مكركب : أي قديم وغير متماسك وعربة مكركبة أى قديمة وطائرة مكركبة أى تنزل عجلاتها عند الهبوط يا الله يا الله وإنتا وحظك !
مشلهت : الشخص المشلهت هو شخص ملخبط الأفكار، لديه كثير من الإشكالات (خاصة المادية) التى لا يسعفه الوقت على حلها (يشترك فيها كل أفراد الشعب الفضل) ..
مشتح : هو الشخص الجالس متباعد الأرجل (أنظر جلسة الفنانين في برنامج أغاني وأغاني)
مفشق : انظر مشتح .
مكنكش : أى ماسك فى الحاجة مسكة قوية (ما عاوز يفرط) ، زى بشار وصالح وكده !
مكرمش : تقال للجلد غير مستوى السطح (هسه بقوا يشدوهو) مما أدى إلى عدم ظهور الكرمشة على أوجه واعناق كثير من المطربين والمطربات والمسئولين والمسئولات في الوطن العربي !
مشيقح : تقال للشئ الذى يتم وضعه بصورة (مزالفة) وغير دوغرية نحو سرير مشيقح ، دولاب مشيقح والمعنى واضح.
مكرفس : أى مضغوط الأجزاء في غير تناسق نحو كرفسة قميص راكب إحدى الحافلات (وما يتكرفس ليه مع كرسي النص البدعة ده).
مهلهل : غير مترابط لمزيد من تدبر المعنى يمكنك رؤية دفاعات فرقنا الكروية.
محكر : أي جالس محتكر للمجلس (ما بيدي زول فرصة) !
مسنوح : هو الشخص عديم الفائدة الذي لا يرجى منه خيرا بل على العكس من ذلك فهو دائما يجلب المصائب.
مسخوط : أنظر مسنوح.
مدغلب : تقال للخروف القصير السمين (الماكل صاح) أو الشخص القصير السمين(برضو الماكل صاح) !
مبغبغ : أنظر مدغلب.
مطرطش : تقال للشخص ذو الأفعال الطايشة غير المتزنة والمنزل المطرطش هو المطلي بطبقة من الأسمنت الخشن (المطابق للمواصفات).
مجهجه : تقال للشئ غير القاطع .. عشاء مجهجه .. خطوبة مجهجهة ، تشكيل حكومى مجهجه .. مشاركة احزاب مجهجهه !
كسرة :
بعد أن قرأ صديقي هذا المقال بعد أن انتهيت من كتابته رفع رأسه يخاطبني قائلاً :وكده .... يا جبان !!


تعليقات 33 | إهداء 9 | زيارات 6983

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#249519 [انسان ]
1.00/5 (1 صوت)

12-01-2011 10:58 PM
وكدة يا كدة انت


#249420 [زيكو]
1.00/5 (1 صوت)

12-01-2011 06:25 PM
ماقلته نوبة يازول ميم دى مافيها كلمة دغمس ووداد وامدرمان الوطنى دى كلها نسيتها حرف الراء البه كلمة رباط كل الحروف العربية تفتح لها كده وتركز على كم حرف لكن بعذرك لانه المقص قاعد والحروف دى عايزة مجلدات ممكن تكتب فيها سنوات لك الف شكر


#249345 [شقى ومجنون]
1.00/5 (1 صوت)

12-01-2011 03:50 PM

ممغرز......شوف عثمان ميرغنى ...والطيب مصطفى دلوكة


#249328 [ibrahim]
1.00/5 (1 صوت)

12-01-2011 03:17 PM
Last descr iption and I hope last event is..MAKHOOOZAG like Gadafi


#249272 [Ibrahim]
0.00/5 (0 صوت)

12-01-2011 01:36 PM
I forgot the most important accusation ...sorry ..I mean descr iption MAZROOOR Wa ....MATAWAK


#249212 [تونا المغبونة ]
0.00/5 (0 صوت)

12-01-2011 12:02 PM
ويا استاذ جبرا ضيف ليها مهبلس والهبلسة من الشئ الميؤس فيه اي hopeless case


#249188 [Ibrahim]
0.00/5 (0 صوت)

12-01-2011 11:24 AM
Add Mustankih Mustahbil ....Mustabitt


#249183 [saad]
0.00/5 (0 صوت)

12-01-2011 11:20 AM
ما تنسوا وين يا خال (الخال الرئاسي)


#249069 [شقى ومجنون]
0.00/5 (0 صوت)

12-01-2011 09:24 AM

سا أستاذ

لكن كسرتك ..ما جبانة...وبرضو تقول لى ...الطيارة ما فيها ( جناحين )


#249033 [أبو شبال]
0.00/5 (0 صوت)

12-01-2011 07:57 AM
جبنه...الجبان على قول صديقك ارعن ... دمك (بضم الدال والميم ) ... ثم أهطل ... قد تشترك جميعها في معنى الذي لا ينظر إلى تبعات ما يقول و يفعل من أفعال خرقاء .. كما يفعل آل (البيتين ) و أنجالهم فقد قدموا أنفسهم لجيل الفيس بوك على أحسن ما يكون كأنما هي بذرة فنائهم التي يحملونها في أحشائهم منذ عهد القدسية الدينيه الزائفه و ذلك من خلال مراوغتهم و جشعهم في اللحاق بقطار جمهوريتهم الثانية ( الخامسة حقيقة ً ) في تحالف مهين مع عدو الأمس و جريهم و راء الكراسي والتعويضات متناسين بأن عهد الأسياد و الحوار الطرش قد ولى .. أما الشعب السوداني المغلوب على أمره عندهم فليذهب بصبره عليهم و معاناته وحرمانه إلى الجحيم ..
آل .. حكومه قوميه .. آل
آل .. حكومه عريضه .. آل
حاشية :-
خليك نائم في العسل يا نافع .. و أرجع لمعنى أهطل أعلاه ..فكما الربيع العربي ... الثورة وقودها الشباب و الحجارة .... و ليست هذه الديناصورات الهالكه


#248974 [شفت]
0.00/5 (0 صوت)

12-01-2011 01:12 AM
يا شفت كنت فاكرك مفتح بس شكلك مبووش راندوك
فوم قد قبل يجازفوك
حنكك بييييييييييييييييييييش


#248959 [نوح الخليفة ابو جولة ]
0.00/5 (0 صوت)

12-01-2011 12:27 AM
مركز مجلبخ مهوهو مكشكش متلوه مقعد متربل مترتق مفرفش مرطب مطوطح مجلبغ مشتت مقبر ثقافة من دارفور الشرح مركز مالى هدومو مجلبغ لا يثبت على راى مهوهو غير منظم غير مرتب مكشكش عندو لوثة متلوه غير منضبط مقعد موزون الكلام متربل طبق متربل غير متساوى الجوانب مترتق للماعون مزلط البويه مفرفش مرح مرطب مبحبح مطوطح موعود ولسع مشتت مبهدل مقبر مدفون حى


#248925 [wahid]
0.00/5 (0 صوت)

11-30-2011 11:30 PM
الاخ الفاتح اهلك في الجزيرة عندهم مرمد ومسجم ومتجوعل ومسطح ومدروش وملحوس ومضبلن ومتبورك ومجذوب ومهبوش ( تري زي حالتنا دي) و مطاول(زي حالة الجماعة) ومتكهرب (يعني سلوكة عريانة) ومشوكش(علي الراس يا ساتر) وممسوخ ومطجن ( خلي بشرحها ليك زول مروق زي دكتور البوني)


#248922 [ودأمدرمان]
0.00/5 (0 صوت)

11-30-2011 11:27 PM
المرة دي يا أستاذ جبرة شايفك كتبت النص الفوق من المصطلحات السودانية لكين شايف المعلق ود البلد ده خرم بيك ليك مصطلحات من النص التحت :D :D :D


#248917 [القوس]
0.00/5 (0 صوت)

11-30-2011 11:16 PM
ياود جبرا نسيت كلمات مهمة مثل
عيان - المريض المسكون الذي يحتاج لحفلة زار لمعرفة خيطو زمن ثم تحديد طلبات اولاد ماما
الجاك : وهو الكذاب الذي يدعي اوهام ويعتبر رقبتو راجل برد الصاع صاعين
متصبين : وهو الشائب الكبير عندما برقص في حفلة مع البنات الصغار لينال اعجابهم
واخيرا
مأزوم - وهو الوضع الذي يدخل في ازمة بعد أزمة - دون ان يجد من يغني له (شوفو لي حلل) - لمزيد من التوضيح راقب كلام مستشاري ومساعدي الرئيس القدامى والجدد


#248898 [مجنون ليلى ]
0.00/5 (0 صوت)

11-30-2011 10:50 PM
مرطب ( دي فاتت عليك كيف يا ود جبرا)

مرطب : اسالوا بله جابر فعنده الخبر اليقين والتفسير الصحيح ..



مجنون ليلى والهلال


#248871 [القمراوي]
0.00/5 (0 صوت)

11-30-2011 10:18 PM
والله يا جبرا بقينا الواحد لما يدخل موقع الراكوبة بفتش أولاً علي مقالك بعدين يمر علي أخبار الحيكومة المخرمجة، بعدين كتاباتك دي كتابات زول (ملبوك = يعني ضارب الكبنقة ذي وزير الهنا الحلل ضربها في الجامعات) وذي زول (مشوكش = يعني ماخد شاكوش ذي شاكوش مولانا الختمي الأداهو لجماعتو ناس التجمع المعارض) (؟) (؟) (؟) (؟) (؟) (؟) (؟) (؟)


#248866 [شمس]
0.00/5 (0 صوت)

11-30-2011 10:13 PM
الكوز هو هذا الكائن - المدغلب - المبغبغ- المشوبر- المحكر - المكنكش - المسخوط- المشتح (على كرسي السلطة وكده)- المرخم (لا انتفاضة يتزعجو ولا ايتها حاجة)


#248857 [ود السيد]
0.00/5 (0 صوت)

11-30-2011 09:57 PM
مخجوج انظر اتخابات


#248787 [Badr]
0.00/5 (0 صوت)

11-30-2011 07:47 PM
اها واحد يشرح لينا مخجوجه و مضروبه وو ماسوره


#248731 [ابوالسيد]
0.00/5 (0 صوت)

11-30-2011 06:28 PM
بعد ما كان معرج بي كرتين قام فك تيكة بي صادقين أقصد كرتين وما عارف دي عملها كيف ؟؟ ياربي سرق كرت؟؟ والا الكرتين كانوا دبل؟؟


ردود على ابوالسيد
Saudi Arabia [أبوعــــــــــــلاء] 11-30-2011 09:14 PM
ابو السيد تعليقك فى السلك
لكن ماطلعت مفتح وحريف شديد اقول ليك شئ اكيد الكرت سارقو عدو الورق عمر ماساهل


#248720 [ابومدين]
0.00/5 (0 صوت)

11-30-2011 06:10 PM
مبــعـم : مـن بـعـامـه ، تقـال للشـخـص الطــويل الاهـبل ، الـذي يجـرجــر كـرعـينو زي المـرفـعين الفاجـغـو فيل !! ..زى بكرى حسن صالح عديل كدة...


#248685 [بدرالدين عيسى]
0.00/5 (0 صوت)

11-30-2011 05:15 PM
والمدغمس يا (جبان)


#248670 [أبو أواب]
0.00/5 (0 صوت)

11-30-2011 04:27 PM
وما رأيك في مدغمس: مثلا تشكيل حكومي مدغمس؟!!!!


#248660 [هندسه]
0.00/5 (0 صوت)

11-30-2011 04:02 PM
يا جبرة وحاتك انتا الما بحلف بيك بالكضب انا من عنوان مقالك بستكيف ليك وبستنشقك وبكتم هواك وابدن ما بتنفسك...


كدي انرجع نقراهو كاتب فيهو شنو


#248645 [أسامة عباس]
0.00/5 (0 صوت)

11-30-2011 03:25 PM
مغبى : وهو يشمل كل الشعب السودانى لانو ماحاسى الجماعة ديل موديننا لى وين
نضيف ليها : قام من نومو لقا كومو ودى تشمل اسيادنا اولاد اسيادنا ( عبدالرحمن الصادق وجعفرالصادق ) لاحظ اشتراك اسم الصادق للاثنين


#248642 [gwarior]
0.00/5 (0 صوت)

11-30-2011 03:16 PM
مجبجب ...كده وكده الصفقة المابجب انشالله فى الانتخابات


#248592 [Khatim Alanbia]
0.00/5 (0 صوت)

11-30-2011 02:06 PM
متكتك : من التكتيك وتقال للشىء الذى أنجز بعد أمعان النظر .. ليس للمصطلح أى دخل بكلمة ( تِكّة ) التى يكرب بها السروال ,, للمزيد أرجع الى ( تكتيك المشاركة وتكة سروال المعارضة ) لمؤلفه هنـــاى ..
مدغمس : عكس متكتك والمعنى واضح ..
مُستنى : فى حالة أنتظار ( أو راجى الله فى الكريبة ) وخير مثال حالة الشعب الأمريكى الذى لم يثور حتى الآن برغم الثورات الكتيرة دى ..


#248589 [jinja]
0.00/5 (0 صوت)

11-30-2011 02:00 PM
لكن الكسرة بديعة والله .. قلبت فيها الهوبة يا دكتور


#248587 [ود البلد]
0.00/5 (0 صوت)

11-30-2011 01:58 PM
ازيدك يااستاذنا جبره شويه متملق زى كتير من وصلوا دون كافاؤات لسده الحكم موكرت يعنى باقى ليهوا كرت يغادر,يفتح يعنى سمانا مش كرتى بتاعم ده ومسطل اخر حلاوه زيك كده
متصلت ومصتقر ومسقرط والقائمه لاتنتهى ...........


#248535 [قرفان]
0.00/5 (0 صوت)

11-30-2011 12:59 PM
صديقك دا ما عارف إنك مستشار شئون تنفيس؟


ردود على قرفان
Sudan [ضد القبلية] 11-30-2011 03:44 PM
احييك. فهمتو


#248526 [مخستك ]
0.00/5 (0 صوت)

11-30-2011 12:50 PM

مقنطر:وهي كلمة تقال للحاجة المزبطه ومصلحه (شكلاً أو موضوعاً و وضعاً) كانت تقال في لعب البلي، وأصبحت بعد ذلك مصطلحاً للتعبير عن حاله التمام والكمال للتهديف، كمثال: ألان أصبح الفساد والطائفيه والهوس الديني والبيوت الخاربه السودان من حفرو البحر اصبحو كلهم مقنطرين للشعب السوداني عشان ينيش اللين بس ما بي جله بي حجر قشاشي عشان يمسح معاو اللين ونبدا نخطط من جديد لي سودانا السمح.

آها قصرته معاك يا توحه؟


#248523 [Wyoming]
0.00/5 (0 صوت)

11-30-2011 12:49 PM
وازيدك من الشعر بيت
مبشبش : تقال للرئيس الذي يرقص
مهكع:تقال للاشياء القديمة
معارض: للعود الذي يوضع في عرض الراكوبة وليس للمعارض النظام


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة