حلااااتو
12-06-2011 11:05 AM

حلااااتو

الفاتح جبرا

طقس من الطقوس اليومية التى إعتدت عليها منذ سنوات لا أعرف كم عددها .. أن أقوم بعد توصيل الأولاد للمدارس أن أغشى

(كشك الجرائد) أشتري صحيفتين سياسيتين .. ما أن أدخل إلي المنزل حتى أتوجه (للراكوبة) التى تفتح علي المطبخ حيث أضع الصحيفتين على أحد الأسرة وأدلف إلى المطبخ لأصنع كوب قهوتى الصباحية !

أثناء وجودى بالمطبخ كانت جارتنا الحاجة (صفية) التى درجت علي شرب القهوة الصباحية أحيناً معي تتصفح الصحيفتين .. تنظر إلى (الصور) إذ أنها أمية (جيل ما قبل المدارس) ، ما أن حملت فنجانى القهوة ووضعته بيننا على التربيزة الحديدية وجلست علي السرير حتى خاطبتنى (الحاجة صفية) قائلة وهى تشير إلي صورة بالصفحة الأولى :

- حلااااااتو يا ولدي .. ده منو ؟

أمسكت منها الصحيفة ونظرت إلى الصورة

- ده يا حاجة مساعد رئيس الجمهورية الجديد !

- لكن ما حلااااتو .. لكن يا ولدي ما سغيروني بقى للمساعدة متين ؟

- يا حاجه ما تحكيها شديد ما أى زول يساعد وخلاص

- أها ووليدى ده بيساعد الرئيس في شنو؟

هنا (بينى وبينكم) ما عرفتا أقول ليها شنو فقلت لها عشان أمشى الموضوع :

- ما ا أصلو يا حاجه الرئيس بيكون عاوز ليهو مساعد يساعدو وكده !

يبدو أن الحاجه (مصحصحة) بعد أن (ظبطت راسا) برشفة من فنجان القهوة إذ ردت عليا (على طول) :

أنا عارفه الزول مهما كانت وظيفتو بيحتاج للمساعدة .. لكن سؤالى ليك بيساعد الرئيس في شنو ؟ يلز ليهو العربية أكان وقفت ؟

- يا حاجه بتبالغي في عربية رئيس بتقيف كمان لمن يلزوها ؟

- (تنظر إلى الصورة) : حلاااااتو .. لكن طيب بيساعدو في شنو ؟

- والله يا حاجه أنا لو أعرف أقول ع طول زى ما قال عادل إمام .. لكن والله ما عارف !

- حلاااتو .. والله من وشو الناير ده .. وش صلاح ده ح يساعد الرئيس والبلد دى ح تمشى لى قدام !

- (فى حزن ضاحك) : تمشى وين ! ؟

- والله يا ولدى باين عليهو وش خير .. شوف براااك كان البلد دى ما إتصلحت !

- تتصلح ؟ والله بالطريقه دى ياها الماشة الخور عدييييييل !

- قول بسم الله يا ولدي ... خور شنو؟ حلااااتو .. شوف الدم في عروقو باين !

- ما لازم الدم في عروقوا يكون باين .. هو قاعد معانا في الشمش السخنة دى ؟

- أجى يا ود أمى هو ما سوداني .. هو ما مننا ؟

- من ناحية سودانس يا حاجة فهو سوداني ومننا لكن من (الروضة) وتانى ما رجع البلد دى ، كدى خليهو يودهو الثورة الحارة 79 ويقولو ليهو أرجع براك .. كان جا راجع بيتهم تاني يلومونى !

- يعني شنو ما بعرف (الثورات)؟

- لا يا حاجة بيعرفا كويس .. وكمان كل (ثورة) لمن يطلع مظاهرة بيدوهو كم سوط في ضهرو .. والبنبان بيدخل في عيونو !

- حلااااتو .. هسه وش الصلاح ده وش سيطان وحراسات وبنبان !

- (مسترسلة) أوعا بيكون بيوزع منشورات ؟

- لا بيوزع (الراتب) !

- شغال صراف يعنى ؟

- صراف شنو يا حاجه ! الجنا ده مما الله خلقو ما إتوظف ! ودى أول وظيفة ليهو !

- حلاااتو يا ولدي هو ذاااتو بقى للتوظيف بتين ؟

- والله يا حاجه كلامك صاح .. دفعتوا لسه طايرين !

- حلاااتو .. والله أنا قلبي رادو مما شفتو .. إن شاء الله يترقي ويوصل أعلي المرتب !

- يترقي وين يا حاجة .. القدامو هي بس ترقية وااااحده .. من مساعد يبقى (ياى) !!



كسرة :

سأل أحدهم (ماون) : يا مازن إنتا بتعمل شنو ؟ فأجابه مازن : قاعد أنوم بالنهار وإشتغل بالليل ! ثم سال أخوه (حمادة) : وإنتا يا حمادة قاعد تعمل شنو ؟ فأجابه أنا بنوم بالليل وبالصباح بشتغل مع مازن !!

مبروك للشعب الفضل بتعيين (حمادة) مساعداً للرئيس !


تعليقات 45 | إهداء 17 | زيارات 7920

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#252820 [ودالخضر]
0.00/5 (0 صوت)

12-08-2011 03:41 AM
ياجماعة الخير انتوا قايلين الثورات (الربيع العربى) قامت فى شنو مش عشان التوريث ولا حاجة تانية والله حرام البتعمل فى الشعب السودانى دا دى آخر حاجة الواحد كان بيتوقع خلاص ناس الاتحادى كوادرهم جفت طبعا دا دهاء ناس المؤتمر الوطنى طعمة وبلوها السيدين لكن برضو احسن عشان الكنس يكون جماعى


#252649 [اام الحسن]
0.00/5 (0 صوت)

12-07-2011 07:05 PM
انشاء الله يرجع لينا جنينة السيد والشعيرية بالطحنية......نظرة يابو هاشم


#252601 [ابوراس]
0.00/5 (0 صوت)

12-07-2011 04:54 PM
تواجد ابناء السيدين في القصر يعني فعلياً دخول آباءهم اليه وهذا مكانهم الطبيعي في هذا التوقيت من تاريخ السودان ليتم كنسهم غداً مع حلفاءهم الي مذبلة التاريخ
يقول تعالى;(ليميز الله الخبيث من الطيب فيجعل الخبيث بعضه على بعض فيركمه جميعاً فيجعله في جهنم):D


#252523 [برجس ]
0.00/5 (0 صوت)

12-07-2011 02:28 PM
رغم انو الواحد مامنتمى الى اى جهه سياسية ، ولو دايرين الجد - كلام خارم بارم واكثر من فارغ وطبعا دا كلو من بنات افكار الكاتب وبس داير يملى وقتو فى الكلام الفاضى


#252185 [الجنرال 111]
0.00/5 (0 صوت)

12-06-2011 11:39 PM
يا جبرا انت دحن الريس ده جزورو مو ختميه يخته قالو السعيد يساعدو اولاد الساده


#252120 [شمس الدين عبدالله ابراهيم]
0.00/5 (0 صوت)

12-06-2011 09:22 PM
هسي انتا ذاتك يا الفاتح جبرا صورتك العامل ليها مكياج وناشرها في مواقع كثيرة ما حلاااااااااااتك بالجد وشك ما شاء الله املس منعم ومندي ... قول لي بالله كيف ايدك الناعمة دي مسكت القلم ... قسما عظما زي النعومة بتاعك وشك دي لو ادوك قلم حرير يجرحك ... ها زول ها ... انتا البنات يضربن بيك المثل في النعومة ... قال ساااخر سبيل قال .... غير عنوان بابك دا وسميه (ساحر سبيل) عشان وشك الساحر الحلو دا :D


#252090 [mohy]
0.00/5 (0 صوت)

12-06-2011 08:25 PM
بس إن شاء الله ما يتلم على صقور المؤتمر الوطني زي ناس نافع

الحمائم أفضل ليهو


#252077 [ود المك عدلان]
0.00/5 (0 صوت)

12-06-2011 07:48 PM
و الله يا جماعة دي حرقة و غيرة منكم ساكت ؛ و حجة صفية أخير منكم كلكم ؛ هو ذاتو الزول كان ما سمح و منعم شن طعمو إبقو مساعد رئيس جمهورية ؛ مش كفاية الناس الشينين المالين الوزارات ؛ يعني دايرين إجيبو ليكم واحد كرعينو مشققات و سنونو وسخانات ؛ و الله أنا فرحان جدا لود الميرغني عشان سماحتو ديه .
يا ولد يا ود الميرغني ما تسمع لي الكلام ده ؛ سير و حافظ علي سماحتك و إن شاء الله تبقي لينا و جه مشرف خارج السودان ؛


#252071 [زيكو]
0.00/5 (0 صوت)

12-06-2011 07:31 PM
حلاتك انت ياعسل ياخ والله سودان من غيرك مسيخ انا ماعارف قدر مااشوف ودسيدى بتذكر ودالطهور وسيدى بختو ضمن الشيكات بتاعة الجنائن تطلع بسرعة ومبروك لنا مساعد ودسيدى وعقبال اولاد اولاد احفاد سيدى وطظ فى السودان فيه امثال هؤلائى الواحد ماعارف بلده جاء فى ليلة خشى القصر عليك الله فى مزلة اكثر من كده


#252042 [alshifa]
0.00/5 (0 صوت)

12-06-2011 05:49 PM
هوى ياجبرا يااخوى ... اعمل حسابك بسخطوك ويسووك قرد ... والولد الحليوه ده سجم خشموا من ئعالب القصر.... انتوا ابوهوا دا ماعاقل ولا شنوا .... احسن يلم ولدوا عليهوا قبال ماتصبح الواطه .... والرماد يكيل حماده .... الرقيق الحليوه .... سمع اضانى ياجبرا قالوا ليك الشافع امس عنده حمى ومقطى بالبطانيه ونفلوه لمستوصف رويال كير .. والداكاتره قالوا ليك الشافع ماعيان لاكين .. فجاه رفع راسوا لقى عمك على عثمان بوشوا الاسود داك واقف جنبه ... وعاد قالوا ليك الشافع من ديك الخلعه تانى ماشاف العافيه... والله مسكين ربنا يرفعه لى شبابه


#252030 [المهموم]
0.00/5 (0 صوت)

12-06-2011 05:15 PM
مبالغة ياود جبرا ...................................... ودا حلاتوو وحلات نوناتو


#252025 [خستكه]
0.00/5 (0 صوت)

12-06-2011 05:01 PM
أتخيل معاي
ررنق ررنق تلفون بضرب
تلفون عبد الرحمن الصادق المهدي ضرب
عبد الرحمن: ألو، يا سعادة، السيد المشير
عمر البشير: الشبل الهمام عبده
عبد الرحمن: انشا الله قريب ومتغدي معانا؟
عمر البشير:لا قريب وشديد كمان، اها أغشاك ونمشي علي الاجتماع في بيت مولانا؟
عبد الرحمن: كدي إنتا أصل اتغدى معانا وبعدين نمشي، أبوي ذاتو دايرك، بس دقيقه بصلو في العصر
عمر البشير:بصلو؟ معا منو أبوك؟
عبد الرحمن: أبوي وعلي عثمان والترابي هو البصلي بيهم،الترابي ياهو زي ما عارف كله جمعه مقيل معانا في البيت الكبير، وعلي عثمان جا يقابل الترابي، أهنديل انتهو هاك أبوي
الصادق المهدي: يا عمر كدي اتحرك علينا وحصل الغدا
عمر البشير: كدي الغدا خلي الترابي وعلي ديل لاميهم عندك لي شنو يا الصادق؟ (بي هيجان شديد)
الصادق: كدي أهدا، سيب الأنفعال ياخي، إنتا يا عمر اتغيرتا شديد، بقيت منفعل خالص خالص، ما ممكن تبقي بي الطريقه، كدا أنا حاصدق أنو فعلاً موضوع المحكمه دا بقي مؤثر فيك خالص خالص
عمر البشير: مش المحكمه دي؟ ديل هم ذاتهم ألسبب فيها نسيبك وعلي عثمان، وبعدين صراحة أنا الترابي دا بقيت أتفادو، بتعبني شديد ياخ، بعملة ظاهرة شديد كلو ما القاني في حته أشبكني العكسر والعسس ويقول لي خنت الأمانة يا عمر ويتبسم لي.
الصادق:ياخ الراجل بعزك شديد ياخ ما تبقي لايوق كلمتك


#252002 [asli]
0.00/5 (0 صوت)

12-06-2011 03:51 PM
انها الحقيقة ظهرت للعيان فبعد ان كان مولانا يبارك انضمام بعض ارزقية الحزب امثال ابرسي و شيلا من الخفاء فهاهو وحبا في الدنيا وليس مصلحة الوطن كما يدعي يفكك الحذب والطريقة لمصلحة المؤتمر البطنى
لكن الحذب له رجاله الذين سوف يزودن عنه وحسن فعل الان تفرز الكيمان


#251996 [يحيى العمدة]
0.00/5 (0 صوت)

12-06-2011 03:43 PM
جبرا المسكون بالابداع ،الرجل الرائع ، القمة التى نتقاصر دونها ، قرات مقالك بل لوحتك الرائعة بالوانها الزاهية ، الاسلوب الشيق الفكه ، اليراع الجرىء الذى لا يخشى فى الحق لومة لائم ، لقد اصفت فاجدت وانصفت المشهد والحدث ، واجبت على كل التساؤلات المطروحة ، حقا حلاتو من الروضة لم يعرف من امر وطنه شيئا فالوطن بالنسبة له الا ضرع لبقرة حلوب تقتات من قارعة الطريق لا تعلف بل تحلب ! لقد سقط حلاتو فى اول اختبار حينما ذكر الولايات التى سيعمل على فك طلاسم الحروب الاهلية فكانت على حسب قوله النيل الابيض وشمال كردفان ولا نعتقد ان الامر ذلة لسان او كبوة فارس ، فالامر جهل بطبيعة الاشياء واجزم انه لا يعرف عن سكان تلك الولايات شيئا ، وله العذر فى ذلك فالولايتين ليست مسجلتان فى مفكرة الولايات التى تجبى منها الجبايات للتكية فاهلها متمردون على الطريقة الختمية ولا بد ان يكونوا قد امتد تمردهم على شركائه الجدد ،والمحير فى الامر ان حلاتو لم يحدثنا عن الكيفية التى سيحل بها فزورة تلك الولايات المتمردة ، ولا ندرى ان كانت للختمية علاقات باطنية بالكجور ؟ هنالك العديد من التساؤلات والتى فى اعتقادى ان اجاباتها لا يمكن استخراجها من قواميس السياسة ! فالاجابات يمكن استخلاصها من مصادر اخرى ( من المنجمين مثلا ، وستات الودع ) على طريقة ارمى الودع لى كشكشه 000 ويا جبرا تكون حليت عقدتنا لو جبت ودع لجارتكم ولوزم الودع ( البن الحبشى وصمغ اللبان والمنديل الاحمر ) خليها تشوف لينا حظنا مع حلاتو


#251988 [Wyoming]
0.00/5 (0 صوت)

12-06-2011 03:23 PM
أنت شايكنا حلاتوو حلاتوو الحلاه جابت من وين.....أنت عاوز تضيعنا ولاشنو بكرة بتجي العربية تشيلك ونحن ما لقا حاجة نقراءها


#251959 [أسامة عباس]
0.00/5 (0 صوت)

12-06-2011 02:41 PM
ليه تقول على سيدى ولد سيدى الماشفناه من ماولدو الا مساعد ياى ... تقول عليه حلاتو ... طيب شفع الحارة 79 يقولو عليهم شنو ؟؟؟ الانجليز كان كانوا عارفين القصر البنوهو الاسمو الجمهورى سيتحول لروضة اطفال ماكان بنوهو...
أنت ياجبرا الحلوين ديل اولاد المصارين البيض اسيادى اولاد اسيادى لو ماتدربوا على حكم الاذيال الهمج الغبيانين المغبيين ( الاسم الشعب السودانى ) حيتدربوا متين ؟؟؟


#251952 [حسام تومابى]
0.00/5 (0 صوت)

12-06-2011 02:27 PM
سجمك يا جبرة بسختك قرد دا ما ود شيوخ


#251943 [قول النصيحة]
0.00/5 (0 صوت)

12-06-2011 02:17 PM
يا جبرة يا رهييييييييييب

و حلاااااااااتو ود ابو هاشم ، و ما عاش ابو هاشم

هو نحنا شنو الضيعنا غير السيدين المهدي و المرغني

كمان عايزيين اورثوها لي اولادم اتخيلو !!!!!!!

عالم ما بتختشي و لا بتستحي تماما زي حافظ الاسد و حسني مبارك

لكن حلااااااااااااااااااااااااااااااااتم الاثنين في مزبلة مزابل التاريخ العريضة

التاريخ يؤرخ و نحن لا ننسي ، قال سيدين قال طز طز طز


#251933 [sinnar]
0.00/5 (0 صوت)

12-06-2011 01:58 PM
!wow, unbleavable


#251922 [khtmi]
0.00/5 (0 صوت)

12-06-2011 01:26 PM
مهداة لكل الاتحادين الوصولين
وليس الاصلين فالاصل منهم
براء للرجرجة والدهماء من طائفة الختمية
الزين لايفقهون الفرق بين القيادة والسيادة
للزعيم الذي أضاع هيبة الحزب
وداس على كرامة أبناه
وحرمة شهاده ضيعت كيان – ياعثمان
بعت الأوطان – ياعثمان
مابعت الكرامك – ياعثمان
وكمان قيسان – ياعثمان
ولكنك بعت – ياعثمان
كل السودان – ياعثمان
كنا بنتمتى – ياعثمان
قائد يجمعنا – ياعثمان
مازول ما بتحلف – ياعثمان
ظل الكيزان – ياعثمان
إلقالو رشوك – ياعثمان
دولارأمريكي – ياعثمان
وفرنك ألمان – ياعثمان
طاطأت رؤوسنا – ياعثمان
وكسرت نفوسنا – ياعثمان
شفناك زمان – ياعثمان
راجل الميدان – ياعثمان
الماك جبان – ياعثمان
ماظل كيزان – ياعثمان
وين سلم تسلم – ياعثمان
تاريخك بحكم – ياعثمان
اليوم بي سببك- ياعثمان
حزبك اتفكك- ياعثمان
شرفك بتهتك – ياعثمان
حزب الحرية – ياعثمان
اصبح سخرية – ياعثمان
وبلا وطنية – ياعثمان
ضيعتنا كيف – ياعثمان
الكنا معاك – ياعثمان
ماضيعناك - ياعثمان
حنشوفك باكر- ياعثمان
والموج الهادر – ياعثمان
زاحف الى قصرك – ياعثمان
مابذكر فضلك – ياعثمان
أصل الثورات- ياعثمان
ضد الشبهات - ياعثمان
وكل الصفات - ياعثمان
الماراعي – ياعثمان
ظن الابوات - ياعثمان
الفينهو جدودنا – ياعثمان
بزلوا الفلزات – ياعثمان
فلزات أكبادنا – ياعثمان
الليها حياتنا – ياعثمان
شاركت براك – ياعثمان
مانحن معاك –ياعثمان
باكر يوم تندم – ياعثمان
لازم تتعلم – ياعثمان
حزبك يتكلم – ياعثمان
وشعبك يتألم - ياعثمان
في الزمن الضائع – ياعثمان
وفي للجنب الخاسر – ياعثمان
الشارع جائع – ياعثمان
أنت بتنحاز – ياعثمان
للكتلو الناس – ياعثمان
والآن في الأخر – ياعثمان
انت انحزت – ياعثمان


#251916 [انسان وقرفان وزهجان ]
0.00/5 (0 صوت)

12-06-2011 01:16 PM
يعني نفهم من الكسرة يا خال انو الود الحليو دة اول وظيفة في حياته وما شغال كمان . لانو قبلو في المساعد حلة مني اركو (والتحية لاهلنا في دارفور الحبيبة ) ومساعد الجبنة موسي محمحد احمد (والتحية لاهلنا ناس الشرق ناس الجبنة) كانو قاعدين ساكت حسي هو زاتو عينوه عشان يقعد ساكت . والله دي حلوة اول وظيفة عاطل عن العمل .
اقتباس ::
- تتصلح ؟ والله بالطريقه دى ياها الماشة الخور عدييييييل !



#251915 [أبوعـــــــــــلاء]
0.00/5 (0 صوت)

12-06-2011 01:14 PM
هههههههههههههههههههههههههههههههههههااااااااااااااى

والله ياجبره لخصت كل الجوانا وتانى بعد مقالك ده سكتنا خالص


#251914 [Abdullah]
0.00/5 (0 صوت)

12-06-2011 01:14 PM
والله حيرتنا ياخلف الله , إنت قاصد ود السيد والا ودالامام؟ لو قلت للحاجة صفية دا ودالسيد علي الميرغني كانت زغردت.


#251883 [هجو نصر]
0.00/5 (0 صوت)

12-06-2011 12:33 PM
لا اقصد شخصا بعينه ولكني اعلق علي ما تسميه الفرنجة (موضوع ذو صلة) وهو تعيين الذين تنقصهم الكفاءة النكته المصرية الشهيرة : ان رئيس مؤسسة اصر علي تعيين ابنه المتخلف عقليا واوكل للجنة التوظيف ذلك . لكن الابن ذاك رسب حتي في تسمية اعضاء الحواس الخمس ! جئ بمدرب خاص ليعلمه اسماء تلك الحواس وبعد تعب شديد ومجهود خرافي نجح الامر فاجاب صاحبنا وهم يشيرون الي انفه: انف والي عينه : عين ! صاح اعضاء اللجنة مهللين : يا سلام هايل عظيم ! وعرفت كل دا كيف؟ اجاب مزهوا : بالعقل ! واشار الي قفاه


#251880 [Saifalhag]
0.00/5 (0 صوت)

12-06-2011 12:28 PM
ياحلاوووتك يا جبرة...;)
كدى خليهو يودهو الثورة الحارة 79 ويقولو ليهو أرجع براك .. كان جا راجع بيتهم تاني يلومونى !


#251879 [ابوامجد]
0.00/5 (0 صوت)

12-06-2011 12:28 PM
ياجبرا ههههههههههههههههههههههههههههههههههههههههههههههههههههههههههههههكتلتنا كتلا حلالالالالالالالالالالالالالالالاتو هههههههههههههههههههههههه والبلد هى لسه ما مشت الخور ياجبرا مشت زمان وبقت طحالب كمان الولد بساعد الريس فى كيفية دمار الشعب الفضل للمقابر


#251872 [ابو النصر]
0.00/5 (0 صوت)

12-06-2011 12:12 PM
سجمك يالفاتح جبرا الود بسخطك دا شافع صالح ولدة نجاح وصلاح وربنا فتح بصيرتو وقالو بشوف المستقبل والدليل على ذلك تنبى بالحروب الجديد في شمال كردفان والنيل الابيض اعمل حسابك من نفحات سيد ي عاش ابوهشومي


#251871 [ابو النصر]
0.00/5 (0 صوت)

12-06-2011 12:12 PM
سجمك يالفاتح جبرا الود بسخطك دا شافع صالح ولدة نجاح وصلاح وربنا فتح بصيرتو وقالو بشوف المستقبل والدليل على ذلك تنبى بالحروب الجديد في شمال كردفان والنيل الابيض اعمل حسابك من نفحات سيد ي عاش ابوهشومي


#251863 [احمد الحاج]
0.00/5 (0 صوت)

12-06-2011 12:02 PM
اوعى ينشبك ياجبرا ولكن ماحلاااتو


#251851 [الحزينة]
0.00/5 (0 صوت)

12-06-2011 11:47 AM
يا جبرة إنت الوحيد البتخلينى احس بالراحة وبتقول الكلام الصاح الولد لسة عضمة طرية وما ناقش أى حاجة لاكن دى سياسة الأسياد الولد هسى مساعيد وبكرة يسوق العربية يعنى مشروع رئيس مستقبلا ويا حليل البلد والشعب الجيعان الخلوهو ملهى بى لقمة العيش وهم الأسياد الى ان تقوم الساعة و البشير و المرغنى و المهدى هم واحد ضيعونا وعزبونا الله لاكسبم عافية وربنا ينتقم منهم .


#251841 [ابوالسيد]
0.00/5 (0 صوت)

12-06-2011 11:33 AM
أسالو قول ليهو بتعرف أمبدة كرور؟


#251840 [ehab]
0.00/5 (0 صوت)

12-06-2011 11:32 AM
حاجه صفيه دي كان بارتك ضهره بتورم من السيطان خليها تتبتب لينا حماده ومازن حلاتم القامو من نومن ولقي كومن والله استر عليك ياجبر اناولوك الرزم واعادوك بنوم النهار وتاني ما نشوفك


الفاتح جبرا
 الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة