المقالات
السياسة
ارشيف مقالات سياسية
قناة الخرطوم والغناء الهابط
قناة الخرطوم والغناء الهابط
12-06-2011 06:44 PM

قناة الخرطوم والغناء الهابط

عباس الدسيس الشريف
[email protected]

قادني الريموت الي قناة الخرطوم الفضائية لمشاهدة برنامج عن الغناء الهابط تقديم الاستاذة/ ام وضاح وضيوف الحلقة الفنان سيف الجامعه والصحفي هيثم كابو وضيف اخر علي ما اعتقد اسمه الرشيد وهي حلقة نقاش عبارة عن هرجلة في تداخل الحوار دون ضابط من مقدم الحلقة وتسيدها سيف الجامعه بمقصاته لمقدمة البرامج والضيوف في دفاع مستميت عن الاغنية الرصينة وهجومه علي الاغنية الهابطه التي يتداولها الشارع وهي اغنية الشباك وفنانيها يعتبرون اصحاب الشبابيك الفنيه والعدادات الراميه ونوه الي ان من المؤسف وردي او ابوالامين او كابلي اصبحو ليس هم بفناني شباك.
هنالك تطور زمني في تناول الكلمة وتطور مرحلي في الاجيال لكل جيل له لغته الخاصه به ان الغناء الهابط ((كما يسميه سيف الجامعه والفنانين القدامي)) موجود منذ ظهور الفن ولو تناولنا نماذج لمجتمعنا المعاصر اغنية العجب حبيبي تغني بها القامة ابوداؤد :
يما زازا أخدت نظرة أنا من قصاد الطاقة
توبالكرب الجابوبك النقادة
ياسيد الناس أنا عاشقك زيادة
فوق الجيد أنا ببقى ليك قلادة
العجب حبيبي...

يوم لاقيتو واقف جنب بيتو
الزول الظريف واقف جنب بيتو
لقاني أشر لي سلاني ما سليتو
شفت الحبيب حتى النوم أبيتو

مقارنة مع حرامي القلوب:

وانا في نومي بتقلب حرامي القلوب تلب

سالت روميو ورندا قفلت البرندا

واناداير اتعشي واحلي بي المريندا

واخد لي سندااااااااااااااااااااااااااااااا

ورقدتا ونعستا وسرحتا

عاينت في الحيطة في حرامي لي تلب

خشي علي براحه بقي مافي بينا مسااحه

حرامي شنو دا الراقئ الزاد للروح افراحا

دا حرامي سمح سماحه

ما عادي طبعوا هادئ

بدل يسرق قروشنا سرق قلبي المعذب

وصحيت والله بعلم وكنتا صاحي وبحلم

حلمت بي ذول بريدو ومعاهو ما اتألم

حرامي القلوب يسلم دا بحبو وبحب قربو وبخش في قلبو

والبشيل قلبي ويجري يتهني ما يتغلب

هسي كان قبضوهو بشنو حايحاكموهو

مافي قانون بحاكم الذول البريديهو يسكوهو وبمسكيهو وما بخلوهو

تجي السرقه ما فاهم في حب الناس مدرب

وانا في نومي بنقلب الحرامي لي تلب

وانا في نومي بتقلب حرامي القلوب تلب ..

الفرق شنو!!!!!!!! بينها وبين العجب حبيبي اللهم الي عجب حرامي القلوب تلب بي الحيطه وعجب ابوداؤد بالشباك ...... خلينا من العجب المقيم الراحل زيدان ابراهيم :
ادونا فندقكم ندق ونديكم
ادونا منقتكم نمص ونديكم
تموصو تدونا
أدونا فندقكم .. ندق ونديكم
كان أبيتوا تدونا .. الكاروشة تمسكم
يا حاجة دقي لينا الكاروشة
يا حاجة طوّلي الجبون ده
ياحاجة قصّري الجبون ده
نخلي الفندق والمص..... ما باقي ليهو الي اقول للحاجة اقعدي عريانه بعد جبون كمان اتقصر.
نرجع لي حكاية فنان الشباك بتاعت سيف الجامعه وردي ود اللمين وغيرهم قدمو للساحة الفنية ارقي انواع الفن اعتقد خلاص الزمن اختلف ما ممكن وردي حتي الان اكون فنان الشباك اصلو ديناصور من الستينات مكنكش في حكاية الشباك دي الحكاية اللحقت البلد امات طه كان الترابي لسع منتظر الدور عشان ابقي رئيس شباب الزمن الحالي عايز واحد ارقص اتمايل تجيب لي فنان قاعد في كرسي برضو تقول لي الشباك ؟؟؟؟؟؟؟
جيل وردي حسي في الاربعينات وناس سيف الجامعه راحو في النص خلو الحساده بلا قانون مصنفات بلا كلام تخاريف الفن ان كان هابط او طالع لا قوانيين تقيده اتحاد المهن الموسيقيه اتحاد عواجيز الناس ما محتاجة لتلفزيون السودان او قناة الشروق عشان تنتشر هنالك عشرات وسائل اعلامية وتقنية للنشر زمن راديو امدرمان الفيهو لجان للنصوص والاصوات انتهي وكل جيل ليهو فهمو واهتماماته مثال تاني:
ابني بدرس في مدارس اجنبيه وهذا يعتبر الجيل البعد فناني شباب اليوم اول ما اركب معاي العربية بطلع الMP3 بتاعي بره واشغل الفنان Akon قلت ليهو مرة يا ولدي ما تسمع غناء السودان الجميل الرصين اجابني والله يا بابا مجاملة ليك الموسيقي يعني ممكن تتسمع بس الكلام معقد انا طوالي بسمع عندك اغنية خال فاطنة كويسه بس الكلام فيها ما قادر افهمو زي اللغة اليابانية عشميق حبل الوجج يعني شنو ؟؟؟؟؟؟؟؟:
يسلم لي خال فاطنه
ليهم بلالي البدرج العاطله
ابكريق في اللجج
سدر حبس الفجج
خال فاطنه
عشميق حبل الوجج
انا أخوى مقلام الحجج
خال فاطنه
يا خريف الرتوع
ابشقه قمر السبوع
فوق بيتو بسند الجوع
يا قشاش الدموع
خال فاطنه
زمن الموشحات والغناء الطويل انتهي اصبح الغناء كعجلة الزمن وكما يقول الشباب دقة سريعه الغناء البسيط المفهوم القصير هو المرغوب وكل زمن بي ناسو وحرامي القلوب بدل اتاوق بالطاقة قال احسن إختصر الزمن اتلب بي الحيطه جيرانا المصريين اقولو الرزق احب الخفية.
نرجع للمتحاورين هيثم كابو صحفي ويعتبر من جيل اليوم او فايتم بي كم سنة غير متوازن في اعمدته الصحفيه دائما بركب الموجة علي حساب الشهرة والانتشار والقفز بالزانة حسي لو مشيت فتشتا عربيتو إحتمال تلقي فيها سيدي او شريط لي عوضية عذاب اعمدته لا تعتبر واقعيه عندو برنامج حواري في قناة النيل الازرق فشل السبب يعتقد هو ان البرنامج لو استضاف فيهو الديناصورات بنجح الغريبه انجح حلقة بتاعت الفنان نادر خضر ودفوعاته دايما غير منطقية وتتبني اراء اجيال سابقة ساعتو النقدية متاخره عشان كده صحفيا حدو قريب.
الاغانى تصوير للواقع الاجتماعي والاقتصادي وتعبير عن احلام شريحه مقدره من الاشخاص .
قديماً قيل لبشار بن برد انك لتأتي بالهجين المتفاوت كيف وانت القائل :
اذا ما غضبنا غضبة مضرية *** هتكنا حجاب الشمس او تقطر الدما
واذا ما اعرنا عري سيدا منا *** صلي علينا وسلما

وتأتي بعد ذلك وتقول :
ربابة ربة البيت *** تصب الخل في الزيت
لها عشر دجاجات *** وديك حسن الصوت

فقال لهم فأما ربابة هذه فهي جارية لي ولاأكل الطعام الاعلي يديها فهذا البيت اوضح لها واوقع من ان اقول لها : قفا نبك من ذكري حبيب ومنزل.
اصبحت الاهتمامات العلمية اهم من الادبية في مجاراة مع الدول المتقدم والذي يتناول الفن فيها القضايا العاطفية بصورة مبسطه دون التعقيد اللغوي والادبي بتاع المعلقات الادبية التي اصبحت حصيلة العرب مع التطور التكنلوجي للغرب.
أعجبتني جداً اجابة ذكية من الفنان نادر خضر والذي كان مستضافاً في احدي برامج تلفزيون السودان وكان المستضيف د. حمزة عوض الله الشهير ب(حماميزو ) فسأل مقدم البرنامج نادر خضر وقال له انت متهم بالترويج للاغنية الهابطة فما كان من الفنان نادر الا ان رد سريعاً قائلاً : اذا انا بروج للاغنية الهابطة فاذاً علي التعليم العالي السلام لانني الان فنان الجامعات الاول فبهت حماميزو ولزم الصمت ، وهذه حقيقة فقد كان نادر خضر فنان الجامعات الاول في ذلك الوقت .
عموماً الغناء عبارة عن مرآة تعكس واقع المجتمع بوضوح وعلي ذلك نقيس ونقيم المجتمع من خلال مايردد ه من اغاني .و كلااااااااااااااام ياعوض دكام .

عباس الدسيس الشريف
[email protected]


تعليقات 2 | إهداء 2 | زيارات 2665

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#252897 [عماد الدين علي مكي]
0.00/5 (0 صوت)

12-08-2011 10:25 AM

يمكن تعود ابنك يستمع لبعض الاغاني الجيدة ذات الكلمات الجيدة للفنان محمد ميرغني وابراهيم عوض


#252600 [ما فاهمين حاجة]
0.00/5 (0 صوت)

12-07-2011 04:54 PM
ما فاهمين حاجة.. يعني لنت ضد الغناء الهابط و لا لا؟

انت بعني مع المدارس الاجنبية اللي بتطلع ناس ما بيعرفوا بلدهم و ثقافتهم و لهجتهم.... رغم انهم عايشين في بلدهم ذاتها و لا الحكاية شنو..!


عباس الدسيس الشريف
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة