من عمايلكم دى ..!ا
12-07-2011 01:04 PM

ساخر سبيل

من عمايلكم دى !


الفاتح يوسف جبرا

نتيجة لتدهور الحال الإقتصادي فقد قل الإقبال على الزواج ، بل وعزف الكثيرين عنه وزادت نسبة العنوسة بين الشباب مما أفرز كثيرا من الظواهر والأمراض الإجتماعية والتى أصبحت (كمحصلة طبيعية) من أهم وأكبر مهددات الأمن الإجتماعي !
لقد شرع الإسلام الزواج وسعى حثيثا لإزالة كل العقبات والعوائق التي من الممكن ان تقف دونه؛ وذلك لما للزواج من أهمية وقد ثبت الحث عليه، والترغيب به، في القرآن والسنة بشتى الأساليب والمعاني الواضحة (والمعلومة) والتى لا حاجة لذكرها في هذا المقام .
طيب .. الحالة الإقتصادية (المهببة وعارفنها) .. شغل مافي وعارفين ..(عرس مافي) وعارفين .. طيب الكلام في الموضوع ده لزومو شنو؟ أقول ليكم :
بالأمس إتصل بى هاتفياً شاب من قرائي يدعونى لمناسبة عقد قرانه عقب صلاة الجمعة بأحد المساجد المعروفة .. قلت له: (ربنا يتمم على خير يا ابنى .. مبروك ألف مبروك وسوف تجدني إن شاء الله من الحضور) .. توقف الشاب برهة عن الكلام ثم قال لي : بس في حاجه كده عاوز أحكيها ليك يا استاذ .. قلت له: تفضل .. قال لي في حزن وأسى : عارف يا أستاذ ناس المسجد ديل قالوا ليا تدفع رسوم عقدكم ؟ .. قلت له : كم؟ .. أجابنى بصوت مخنوق :
- خمسمية جنيه .. يعنى نص مليون بالقديم !!
- معقولة المسجد يشيل نص مليون فى (العقد؟) !
- ده الحصل يا أستاذ ..
- طيب ما تمشى ليك مسجد تااني !
- مشيت لي مسجد تانى بيشيل تلتمية جنيه لكن لقيتو محجوز قمتا رجعتا لأبو خمسمية ده !
- إنتا متأكد من كلامك ده !
- طبعاً يا أستاذ .. عليك الله يا أستاذ أكتب لينا في الموضوع ده !
قلت له في سري قبل أن يغلق الخط: (الأستاذ تطير عيشتو هو يكتب في شنو ولا يخلي شنو).
هذه ? يا سادتي- هي المساجد التى من المفترض إن يكون لها دور أساسي في تماسك المجتمع وتقوية الروح الاجتماعية فيه والعمل على حل مشاكله ، هذه هي المساجد التى من المفترض أن تدعو الشباب إلى الزواج وتحببهم فيه وتساعدهم على بلوغه للأسف الشديد المحزن أصابت القائمين عليها حمى (الإستثمار) ! وملئ البطون والكروش بالمال السحت الذى يدخره هؤلاء الشباب (جنيه .. جنيه) من مرتباتهم الضعيفة من أجل أن يقيموا نصف دينهم !
نعم يا سادتي .. كما أن على العريس القيام بحجز (صالة أفراح) فقد أصبح عليه أن يقوم بحجز (مسجد أفراح) لإقامة (عقد القران) فيه .. هنالك مساجد خمسة نجوم .. مساجد أربعة نجوم وإنت وقدرتك وإستطاعتك !
إذا كان هذا هو الحال فالعبدلله لن يندهش بالطبع إذا تم إنشاء مكتب للتعاقد (مع العرسان) في كل مسجد (ده لو ما حصل) .. فيذهب مثل هذا الشاب مستفسرا للحجز :
- والله أنا عاوز أعمل عقدي يوم الجمعة الجاية بعد الصلاة.
- (يمسك بالدفتر) : والله الجمعة الجاية محجوزة عندنا فيها خمسطاشر عقدا !
- طيب شوف ليا الجمعة البعدها !
- برضو محجوزة .. لكن البعدها فاضية !
- خلاس ممكن !
- عايزين عقد خدمات متكاملة ولا عادي !
- ما فاهم ممكن تشرح ليا .
- لو خدمات متكاملة يعنى ح نوفر ليكم البلح والحلاوة والفشار وتصوير الفيديو والساوند سيستم وكمان خدمة (حراسة الاحذية) بالإضافة لفريق أمنى للحماية من النشالين!
- وده بي كم ؟
- إربعة ملايين بس.
- طيب كان (عقد عادي) ؟
- العادي بي خمسمية .. والمأذون منكم !! نحنا بس مننا المسجد والمكرفون العادي ده
(مواصلا) : إنتا اشتريت جلابية العقد ؟
- لا لسه ليه؟
- عندنا كمان جلاليب عرسان حاجة تمام وعمم توتال أصلي وشالات مطرزة ومراكيب جلد نمر ومراكيب أصلة وعصى أبنوس حاجة تمام وكمان ساعات سويسرية !
تصور عزيزى القارئ كيف أن ورقة لا تستغرق كتابتها (عشر دقائق) تكلف (نص مليون) من الجنيهات !! ويمكن (لمولانا) أن يقوم في يوم واحد بعقد عشر زيجات (يعنى خمسة ملايين) !! .. لا أعلم كيف يتم توزيع هذه (الغنيمة) ولكن الذى أعلمه تماماً (إنو الناس دى بتبالغ عدييييييل كده) وهى تقوم بلا أدنى خجل أو وازع بتفريغ الدين من معانيه السامية, هذا الدين الذى يدعو إلى مساعدة الشباب والوقوف إلى جانبهم من أجل تكوين الأسرة المسلمة التى يعز الله بها أمة الإسلام.
العبد لله شخصياً لا يستبعد فكرة الإستثمار في المرافق (الدينية) هذه فمن كان المال هدفه في هذه الدنيا الزائلة (ممكن يعمل أي حاجة) ..وإذا صمتت الجهات (المفترض تكون مسئولة) عن مثل هذا العبث قريباً سوف نسمع عن طرح عطاءات لإدارة (حمامات) االمسجد الفلاني .. فتقوم الشركة التى يقع عليها العطاء بحساب الماء الذى يستهلكه كل مصلي فى الوضوء فيصبح الوضوء بالتذاكر مما يضطر معه معظم المواطنين أن يتيمموا صعيدا طاهرا !
أو ربما يصبح الدخول إلى المساجد عن طريق (بطاقة ممغنطة) يتم شحنها بعدد الصلوات التى يستطيع (جيبك) أداؤها ..وعندها ربما تضع البطاقة على الفتحة المخصصة بباب المسجد ليأتيك صوتاً ناعماً ينبهك : عزيزى المصلي رصيدك لا يكفي لأداء هذه الصلاة !
كسرة :
ويقولوا ليك الزواج العرفي ده إنتشر كده ليه؟ ما من عمايلكم دي !



تعليقات 33 | إهداء 4 | زيارات 7950

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#253665 [محي]
0.00/5 (0 صوت)

12-09-2011 04:40 PM
قال مسلم غيور قال

ما شفت إلا مقال جبرة دا حتى مابتفهم لو كان مجاز

أين الأئمة والشيوخ الإنت بتدافع عنهم ديل من الظلم الحاصل في البلد دي أتحدى لو في واحد بيطلع من خطبة الحكومة

خاتي إيميلك ليه أجب على السؤال:

أذكر إسم شيخ واحد من شيوخك ديل صدع بالحق متى وأين؟


#253616 [ود البلد]
0.00/5 (0 صوت)

12-09-2011 03:10 PM
الاستاذ جبرا اضافه للقصه لى حكايه مع ناس الكهرباء(الجمره الخبيسه)كنت فى السودان لزواج شقيقى واردنا زياده كهرباء لزوم ساون واضاءه وكاميرات وماشابه ذلك واذا بالموظفه تطلب منى كرت الدعوه بتاع الذواج وبقوليها ماعندنا كرت وهى مصره عشان تطلع التصديق لحفله فى الشارع وفى لحظه الغلاط دى يظهر ابن الجيران ويقول لى مالك يازول وحكيت ليهوا واذا به يدخل اقرب مغلق ويشترى كابل كبير ويوصل الكهرباء من عمود الشارع ومجانا وانا فى كامل الدهشه وخليك من ضابط الشرطه يطلب منك تسريح للحفله حسب شكلك ومظهرك واذا بى اساله امنا لحكومه مش المفرض تساعد الناس ديل عشان يتزوجوا واذا به يجيب انت الكان ماعندك قروش المعرس ليها شتو

وهاك التصديق ده لك النحيه واتمنى انك تكون بتقرا التعليقات دى عشان الفايده وتقدر نغير ولو شى بسيط من الاشياء السلبيه الكتيره الظهرت فى مجتمعتا الفضل


#253460 [طارق الكسلاوي]
0.00/5 (0 صوت)

12-09-2011 08:19 AM
أستاذنا
لا فض فوك
مصايبنا كتيرة ومشاكلنا اكتر
لكن لا تقتحم الجوانب الدينية والمقدسة بهذا الاسلوب الكاريكاتوري
بعدين مفروض نفكر في السبب إن صحت الرواية
الحكومة رفعت يدها من المساجد وما بتدفع مرتبات الأئمة ولا الكهربا ولا غيرو
طيب ناس المسجد يجيبو من وين
ليه ما تحاسب الحكومة عشان تخلت عن دورها في دعم المساجد / هي فاضية من دعم الحاجات التانية


#253162 [الوجع كتير]
0.00/5 (0 صوت)

12-08-2011 04:10 PM
وبعد ما يسلم الامام اى زول يدخل للصلاه فى المسجد يدفع قروش للصلاه لان يعتبر هذا زمن اضافى


#253108 [ود البلد]
0.00/5 (0 صوت)

12-08-2011 02:51 PM
يهيهيهيه والله شر البليه مايضحك موضوع فى الصميم الله يديك العافيه اسناذ جبرا تكتب فى شنو...وتخلى شنو على قولك
فى مثل بقول ان غلبك سدها وسع قدها لك التحيه





#252937 [الزول الكان سمح]
0.00/5 (0 صوت)

12-08-2011 11:07 AM

يا أستاذ

ناس محلية سواكن عاملين ( كرخانات ) داخل الميناء....المغترب لو ماعندو بالسودانى يدفع بالريال...شوف عينى


#252826 [ودالخضر]
0.00/5 (0 صوت)

12-08-2011 04:07 AM
ياشباب ناس البرلمان رفضوا زيادة البترول وقالوا عايزين يشوفوا آلية لسد النقص الفى الميزانية وارجوا ان لا تكون رسوم عقد الزواج فى المساجد إحداها وإلا سوف تكون كارثة


#252816 [مرتضي]
0.00/5 (0 صوت)

12-08-2011 03:16 AM
التحيه والئلام لك يا استاذ جبره انا شخصيا اصدق هذا الكلام وحجز الاماكن وتخصيصها حاصل في مسجد النور لصاحبه امير المومنين ومن سلاله ال بيت وابن اخت صاحب منبر الدمار الشامل عمر البشير الرقاص لايمكن ان تصلي في المكان المخصص لسيادته لك الله يا شعبي واعانك علي المصائب التي حلت بك وخلصنا منها


#252785 [بلتعة]
0.00/5 (0 صوت)

12-08-2011 12:15 AM
ممكن تلقى أعلانات من شاكلة مسجد .... صلاة سياحية الصف الأول ....جنيه الصف الثاني... جنيه حمامات فاخرة مواضي مميزة... سارع الفرص محدودة


#252760 [ابو ريان]
0.00/5 (0 صوت)

12-07-2011 10:48 PM
ده كلام خيالي ومبالغ فيه والواقع غير كدة وما شفنا حاجة زي دى ربنايسالنا


#252748 [كوكو]
0.00/5 (0 صوت)

12-07-2011 10:18 PM
السلام عليكم ، ممكن البطاقه الممغنطه تقول ليك : مكانك الصف التالت شمال الامام ، مكانك الصف الاخير يمين الامام و هكذا دواليك


#252743 [عمر ]
0.00/5 (0 صوت)

12-07-2011 10:05 PM
يااخي الكلام دا ما صحيح ولو صادق ورينا امام المسجد دا عشان اكسر ليك راسه بالعكاز دا لكن لانه كلامك دا ساكت ما في زول حيصدق خطرفاتك وابشري يا حكومه


#252693 [على صالح]
0.00/5 (0 صوت)

12-07-2011 08:27 PM
انا اول مره اسمع كلام دىده .... لكن عارف انو المساجد داخل الخرطوم بقت تتكندش
و دى طبعا محتاجه مال للكهرب وكده بعدين الباقى اجتهاد و المجتهدين من غير فقه كثر و الله المستعان.


#252660 [بلتعة]
0.00/5 (0 صوت)

12-07-2011 07:33 PM
يا جبرا قلت عطاءات لإدارة الحمامات؟ أنت وين عايش دي ماقديمة ولا الخمسمية البندفعها للبول دي أيه؟ والله لو عندك أربعمية كان الضحك أقصد البول يشرطك ... وكمان تلقى المتحصل قاعد وآخر شياكة والمسجل بأعلى صوتو... (مرة كنت في السوق وكان معاي بنتي عمرها خمسة سنوات طفلة واتضايقت وديتها الحمام ولقينا الحفلة قاجة بالأستريو الماخمج ... المهم ونحن خارجين البت قالت لي يا أبوي ده ( مابيخجل عامل ليهو حفلة هنا؟) ... فبالله عليك مسألة العطاء دي خلينا منها لأنها دي مرحة تخطيناها وأصبحت واقع بس أكتب لينا عن المسجلات أبو سماعتين داخل الحمامات لأنو دي فضايح وخاصة البلد بقت 75 في المية منها أجانب ونخشى من تدويل الفضيحة... ولا أيه رأيك؟؟؟؟؟؟؟؟؟؟؟؟.


#252648 [محمد]
0.00/5 (0 صوت)

12-07-2011 07:04 PM
هو العريس ده اساسا ما يشوف ليو جامع عادي بدون رسوم و حركات و بركات ز لكن يكون عاوز بعقد في الشهيد ولا سيده سنهوريز و أتمني انو العقد في سيده سنهوري و الشهيد و ما شايه يكون ب10 مليون ما خمسمائة لانو ما بعقدوا فيهوا الا الجماعة


#252631 [مستاء]
0.00/5 (0 صوت)

12-07-2011 06:24 PM
,والله كان كدا تعالوا عندنا الحلة (القرية) نديكم البت بي غرفتها بس عليك بسريرين وترابيز ودولاب هدوم ، أما العقد : مجااااااانا في الجامع ما عليك إلا يديك الإمام الراتب مذكرة للماذون تطلع القسيمة برسوم (50ج) إنت وذوقك ومهرنا لسه مليون مع الشنطة . والشيله واحد واحد إذا عندك سيره والشبكة إنت ورغبتك ودهبك بنفعك بعدين . وإذا أهلها مروقين يمكن أم العروس ترجع لأمك حاجات بأكتر مما دفعت من فطور العريس وكدا .....والله بتكلم جد .


#252606 [عوض محمد احمد الحسين]
0.00/5 (0 صوت)

12-07-2011 05:14 PM
اتمنى صادقا ان يكون ماقراءناه ليس صحيحا وان كان صحيحا فانها ولا شك كارثه بمعنى الكلمه - اين من جعلهم الله ولاة امر هذا البلد على ولى الامر ان يحقق فى هذا الموضوع ان كان صحيحا عليه تقويم من يقومون ويجب انزال اقصى العقوبات عليهم ففى هذا اليس للنظام فقط لد مسلم وامرنا ديننا ان نيسر ولا نعسر - وان لم يكن صحيحا فيجب ان يقدم الى محاكمه - فالبلد فيها مايكفيها من عطاله وغلاء الله لا نسالك رد القضاء ولكن نسالك اللطف فيه


#252588 [عزوز]
0.00/5 (0 صوت)

12-07-2011 04:33 PM
رائع دوما ،،،،


#252586 [abdelrahman basheer alhaj]
0.00/5 (0 صوت)

12-07-2011 04:33 PM
نطالب بخصخصة المساجد . لأن المسألة كده سايبه . ومال ســــايب.


#252578 [ودامدرمان]
0.00/5 (0 صوت)

12-07-2011 04:21 PM
الاستاذ الكريم الفاتح
دا كلام غريب جدا\"
انا العقد بتاعي كان في مسجد وماحصل كلام زي دا
وحضرت كم عقد في كم مسجد ومالاقاني كلام زي دا
مافي زول بدفع شئ غير رسوم القسيمة


#252557 [وحيد]
0.00/5 (0 صوت)

12-07-2011 03:52 PM
امال الجماعة ديل اسمهم تجار الدين ليه؟
اتوقع ان يتم خصخصة المساجد و تصبح الصلاه برسوم
اصحاب الايدي المتوضئة ديل يكملوا العمارات الجديدة بي شنو


#252540 [نصر الدين محمد ]
0.00/5 (0 صوت)

12-07-2011 02:50 PM
أها مسعول من الخير ، وثيقة الزواج داخلة في الكلام دا ، ولا برة.... بعدين أنا كان متزوج ، وضاعت مني وثيقة الزواج ،ولاقوني ناس الاسمهم شنو..؟.. البدقو البنات ديلاك... وقالو لي دي ما مرتك !... لومرتك طلع القسمة !!يعني يتهموني بي شروع أو تهمة اختلاط أو مواد جديدة في القانون الجديد...!!!كدة ورونا حل عشان أنا خايف من الخروج مع مرتي....


#252538 [مسلم غيور]
0.00/5 (0 صوت)

12-07-2011 02:46 PM
لاخ العزيز جبرا ...بعد التحية والاحترام ...ارجو اخي ان تتاكد من جهات الاختصاص عن هذا الموضوع وده طبعاً كان مفروض يحصل قبل ما تكتب ولا حرف واحد في الموضوع ده لانها دي امانة وانت محاسب عليها امام الله اذا كان كان كلامك ده غير صحيح ..اما اذا كانت نكتة ساي انت قطعتها من راسك ومافي شاب اتصل بيك ولا يحزنون فبرضو عليك وزر الاستهزاء والاستهتار بائمة وشيوخ المساجد لانه الموضوع ده مافيه هذار .....ارجو منك اخي جبرا ان ترد على تعقيبي هذا على ايميلي المكتوب بعاليه ([email protected]) .....


#252536 [ABO YOUSIF]
0.00/5 (0 صوت)

12-07-2011 02:45 PM
ما قصرت يا استاذ الفاتح فى تناولك للمواضيع الاجتماعية و السياسية و طبعا الوجع الاقتصادية
اسلوبك البلدى البسيط يخلينا ننتظر جديدك دايما لك التحية و الاحترام
لكن عندى حاج كده عايز اقولها بمناسبة المساجد دى -- قبل سنتين جيت السودان زيارة للاهل و طبعا بعد غياب طويل جدا قدر ما تتخيل 18 سنة و الحقيقة انا طلعت لما الجماعة ديل دخلوا البلد و قلت لناس البيت انا ما برجع لو ما الجماعة ديل طلعوا لكن لقيت بالهم اطول من بالى و باين روحهم برضو اطول من روحى عموما زاد بى الشوق و رجعت اسلم على الاهل و الدنيا ما معروفة
يلا مره كده جيت الخرطوم عشان اكمل اجرات الرجوع والجو كان سخن شديد و انا فى السوق العربى قلت امشى المسجد اصلى و ابرد شويه عموما مشيت و فلما جيت داخل لقيت طبعا المسجد اتغير شديد قلت الحمد لله بس مع الباب لقيت واحد عنده طربيزه و قام ادانى نص صابونه شلتها معاى من غير ما اسالة دخلت صليت و جيت طالع الراجل نادانى فى شنو قال لى تمن الصابونه صبحان الله قلت له طيب هاك صابونتك و سالته ليه بس انت اديتنى الصابونه قال لى انا قايلك ماشى تستحم لان الصلاة انتهت قبيل سالته كيف يعنى استحم فى المسجد قال انت ما من البلد ولا شنو ؟ قلت شايفنى خواجه ؟طبعا من البلد -- المهم دفعت تمن الصابونه و شلتها معى للزكرى حتى اليوم قاعده فى الشنطه فيا اخى قصة رسوم العقد دى عادى فى ظل هذه الحكومه ممكن نتوع كل شىء

و لك جزيل الشكر


#252527 [Wyoming]
0.00/5 (0 صوت)

12-07-2011 02:30 PM
والله يا استاذ جبرة ده موضوع جديد لينج....تكون يا استاذ كترت الخضراء امبارح ولافيها بتلات كروت وحلمت بالموضوع ده....والله الواحد ما مصدق انو الجشع وصل الي هذه المرحلة من قلة الذوق ونقص في الدين
أنا من زمان عندي ثلاث اشياء بخاف منهاوهي
الواحد لو مطول عمتو
او لو مكبر شنبو
او لو مكتر دقنو
وانتو عارفين باقي قصة
ولكم التحية ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;(


#252526 [garvan]
0.00/5 (0 صوت)

12-07-2011 02:29 PM
so the definition of islamic country shall be to do excatly what is contarary to good values gong mr bashiiiiiiir


#252520 [ابوهمام]
0.00/5 (0 صوت)

12-07-2011 02:26 PM
ليس من شروط صحة عقد النكاح ان يكون فى المسجد ,هذه بدعة من بدع السودانيين وخاصة بهم وما اكثرها بدعهم وبوبارهم على الفاضى .


#252518 [سام]
0.00/5 (0 صوت)

12-07-2011 02:24 PM
على الطلاق بكيت الله وانتى جاهى تورينا يوم في الكيزان استغفر الله العظيم يا ناس خافو الله خافوا من العيب


#252516 [المستشار]
0.00/5 (0 صوت)

12-07-2011 02:22 PM
الناس ديل كرهونا العرس والتفكير فيهو بقي زاتو مشكله بس الله يسهل ....... ويقلل من سماسره الجوامع....ودمتم


#252513 [ياسين]
0.00/5 (0 صوت)

12-07-2011 02:20 PM
طالما الحال وصلت لي ما جاء بالمقال ومع مشروع الميزانية الجديدة حتكون كل العباد
ات بطريقة الدفع المقدم لا ويلزموووك تشتري عداد حسنات لانو الكمية محدودة وكده ويدفعوع ايجار العداد


#252500 [هندسة ]
0.00/5 (0 صوت)

12-07-2011 02:04 PM
يعني الافضل الزول يمشي يعقد في ميدان من ميادين النجيله الصناعيه الطالعه جديدة .... لانو ايجار الميدان اقل من 200 جنيه وابوي وابوك في دايرة السنتر


#252462 [Amin]
0.00/5 (0 صوت)

12-07-2011 01:11 PM
لااصدق اتمنى أن لايكون ذلك صحيحاً دي تبقى ...مصيبة كبرى


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة